Filipenses 4
4
Quisocristo yonquiatëhuaꞌ, noya cancantërëhuasoꞌ
1Napoaton iyaroꞌsaꞌ Quisocristo imamiatocoꞌ. Naꞌcon nosororanquëmaꞌ. Yaꞌnipishahuëꞌ yaniꞌnanquëmaꞌ. Canpita yonquiatënquëmaꞌ, nóya cancantërahuë. Noya imaramaꞌ niꞌton, co topinan quëran aꞌchintëranquëmahuëꞌ, tënahuë.
2Imo Ipotia, imo Sintiquia, inapitasoꞌ co noya ninontopihuëꞌ, natantërahuë. Ama huachi imoyaroꞌsaꞌ ninoꞌhuicosohuëꞌ. Catonquëma chachin Quisocristo imaramaꞌ niꞌton, noya niniꞌtomaꞌ, yaꞌhuëcoꞌ. 3Quëmantaꞌ iyasha naꞌcon catahuaranco niꞌton, inapita catahuaquëꞌ noya ninonchinaꞌ. Cato chachin nóya sanapiꞌsaꞌ. Naꞌcon catahuarinaco Quisoso nanamën aꞌchinaꞌhuaso marëꞌ. Iya Crimintintaꞌ noya catahuarinco. Aꞌnapitantaꞌ catahuarinaco aꞌchinaꞌhuaso marëꞌ. Co nininënpita isëquë ninshitopirahuëꞌ, Yosëri nohuitërin. Nanpirin quiricaquë nininënpita nani ninshitërin. Inaquë ninshitohuachinpoaꞌ, nanpimiatarihuaꞌ.
4Nani tahuëri Quisocristo yonquiatomaꞌ, noya cancantocoꞌ. Naquëranchin inachachin shaꞌhuichinquëmaꞌ. Maꞌsha onpoapomarahuëꞌ, noya cancantocoꞌ, tënahuë. 5Yaꞌipi piyapiꞌsaꞌ nosoroatomaꞌ, noyasha nontocoꞌ. Quisocristo niꞌsárinpoaꞌ. Co huaꞌquiya quëranhuëꞌ oꞌmantararin. Ina yonquiatomaꞌ, yaꞌipi piyapiꞌsaꞌ noya nontocoꞌ.
6Maꞌsha onpohuatamaꞌ, ama paꞌyancosohuëꞌ. Ama nisha nisha yonquicosohuëꞌ. Yosë nontocoꞌ catahuainquëmaꞌ. Maꞌsha pahuantohuachinquëmaꞌ, nitocoꞌ. “Ma noya catahuarancoi niꞌton, ‘Yosparinquën, Sinioro,’ ” itocoꞌ. 7Apira apira Yosë nontohuatamaꞌ, asanocancanarinquëmaꞌ. Co imapisopitasohuëꞌ nipirinhuëꞌ co sano cancantopihuëꞌ. Maꞌsha onpohuachinara, aꞌnaroáchin paꞌyanpi. Canpoaso nipirinhuëꞌ Quisocristo imarëhuaꞌ niꞌton, ina yonquiatëhuaꞌ, sano cancantarihuaꞌ.
Yonquirëhuasopita
8Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.
9Naꞌcon Yosë nanamën shaꞌhuitëranquëmaꞌ, natanamaꞌ. Yaꞌipi aꞌchintëranquëmasoꞌ noya natëcoꞌ. Canpitataquë yaꞌhuapo, noya ninahuë, niꞌnamaco. Ca pochachin noya nicoꞌ. Noya nipatamaꞌ, Yosë noya catahuarinquëmaꞌ. Ina nohuanton, noya niniꞌtomaꞌ, yaꞌhuaramaꞌ. Inasáchin asanocancaninpoaꞌ.
Paono catahuapisoꞌ
10Canpitasoꞌ yonquiramaco niꞌton, noya cancantërahuë. Iꞌhuamiáchin maꞌsha aꞌpatiramaco ama pahuantincoso marëhuëꞌ. Ina marëꞌ “Yosparinquën,” itërahuë Yosë. Iráca maꞌsha aꞌpatëramaco. Ina quëran yacatahuantapiramacohuëꞌ, co insontaꞌ huëꞌninhuëꞌ niꞌton, co nanitëramahuëꞌ. Iporaso nipirinhuëꞌ catahuantaramaco. 11Co maꞌsha pahuantërincoso marëꞌ napotëranquëmahuëꞌ. Yosë nohuanton, nani nitotërahuë yaꞌipi ahuantaꞌhuasoꞌ. Maꞌsha pahuantopirincohuëntaꞌ, noya cancantërahuë. 12Maꞌsha yaꞌhuëtohuachinco, noya yaꞌhuërahuë. Capantaꞌ nipachina, co ina marëꞌ sëtërahuëꞌ. Sacaiꞌ ahuantacaso nipirinhuëꞌ, Quisocristo catahuarinco niꞌton, noya ahuantërahuë. Aꞌna tahuëri cosharoꞌ yaꞌhuërin, noya caꞌnahuë. Aꞌna tahuëriso nipirinhuëꞌ capa niꞌton, tana natanahuë. Maꞌsha yaꞌhuëhuachina, noya cancantërahuë. Capantaꞌ nipachina, ahuantato, noya cancantërahuë. 13Co caora nanitapapirahuëꞌ, Quisocristo achinicancaninco niꞌton, yaꞌipiya nanitaparahuë. Maꞌsha onpoaporahuëntaꞌ, noya ahuantërahuë. 14Inaso nipirinhuëꞌ, ma noyanquëmaꞌ canpitasoꞌ niꞌton, catahuaramaco. Isëquë yaꞌhuato parisitopirahuëꞌ, noya catahuaramaco.
15Iráca Masitonia parti pacapo, Yosë nanamën aꞌchintëranquëmaꞌ. Ina marëꞌ aꞌna parti yapaꞌpatëra, canpita catahuaramaco. “Ma noya quëmasoꞌ catahuarancoi Quisocristo imaꞌhuaisoꞌ,” itatomaco, coriqui aꞌpatëramaco. Canpitasáchin inapotëramaco. 16Ina quëran Tisaronicaquë yaꞌhuasoco, maꞌsha pahuantohuachincora, naquëranchin coriqui aꞌpatantaramaco. Catoroꞌ aꞌpatëramaco. 17Ina marëꞌ noya cancantërahuë. Co coriqui quëtëramacoso marëáchin noya cancantërahuëꞌ. Catahuaramacoso marëꞌ Yosëꞌpaꞌ canaaramaꞌ niꞌton, noya noya cancantërahuë. 18Iporasoꞌ nóya iꞌhuërëtëramaco huachi. Napoaton noya yaꞌhuarahuë. Co mantaꞌ pahuantërincohuëꞌ. Iꞌhua Ipapërotito huëꞌpachina, coriqui aꞌpatëramaco niꞌton, maꞌsha yaꞌhuëtërinco. Ina marëꞌ “Yosparinquëmaꞌ,” itëranquëmaꞌ. Yosë nosoroatomaꞌ, aꞌpatiramaco. Yosë chinotacaiso marëꞌ pimóchin nininsoꞌ aꞌpëhuachinara, Yosëri noya niꞌnin. Inapochachin canpitantaꞌ coriqui aꞌpatëramaco niꞌton, Yosë noya niꞌninquëmaꞌ. 19Canpitantaꞌ maꞌsona pahuantohuachinquëmaꞌ, Yosë chachin quëtarinquëmaꞌ. Yaꞌipi huaꞌanëntaton, nanitaparin. Quisocristo imaramaꞌ niꞌton, catahuarinquëmaꞌ. Co huachi pahuantarinquëmahuëꞌ. 20Ma noyacha Tata Yosë chinotërëhuasoso paya. Ipora quëran huarëꞌ yaꞌipi piyapiꞌsari chinochinaꞌ. Amen.
Amiconënpita yonquirinsoꞌ
21Yaꞌipi Quisocristo imaramasopita noya yonquiatënquëmaꞌ, saludos aꞌpataranquëmaꞌ. Caꞌtaninacosopitantaꞌ yonquiatënënquëmaꞌ, saludos aꞌpatarinënquëmaꞌ. 22Yaꞌipi Yosë imapisopita isëquë yaꞌhuëpisoꞌ saludos aꞌpatarinënquëmaꞌ. Copirno inpriatonënpitantaꞌ naꞌcon yonquiatënënquëmaꞌ, saludos aꞌpatarinënquëmaꞌ.
23Inaora nohuanton, Sinioro Quisocristo noya catahuainquëmaꞌ. Nani ninshitëranquëma huachi.
Paono
Currently Selected:
Filipenses 4: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.