Lucas 17
17
Anishacancantopisopita
(Mateo 18.6-7, 21-22; Marcos 9.42)
1Ina quëran caꞌtanoꞌsanënpita pënëantarin. “Nisha nisha maꞌsha yaꞌhuërin anishacancantiinpoasoꞌ. Nipirinhuëꞌ, anishacancantonaꞌpisoꞌ paꞌpi co noyahuëꞌ niꞌton, ¡maꞌhuantacha nisarin paya! Ina marëꞌ Yosëri chiníquën anaꞌintarin. 2Coꞌhuara huaꞌhuaroꞌsa tërantaꞌ anishacancanchátërasohuëꞌ, marëquë chimiitërin naporini, noya noya niitonhuëꞌ. Pancaraꞌpiquë aꞌsonconotahuatonaꞌ, tëꞌyaitopi naporini, co aquëtëꞌ oshahuaintonhuëꞌ. Aꞌnaquëntaꞌ imasapirinacohuëꞌ, co chiníquën cancanchatërapihuëꞌ. Huaꞌhuaroꞌsaꞌ pochin cancantopi. Inapita anishacancantohuachinaꞌ, Yosëri anaꞌintarin. 3Napoaton, niꞌcona aꞌnapita anishacancantotamaꞌ.
Aꞌna piyapi maꞌsha onpotohuachinquëmaꞌ, pënëncoꞌ. Naporinso marëꞌ sëtohuachina, nanan anoyatocoꞌ. 4Aꞌna tahuërimarëáchin canchisëroꞌ napotopirinquëmahuëꞌ, canchisëro chachin: ‘Co noyahuëꞌ ninahuë niꞌton, sëtërahuë,’ itohuachinquëmaꞌ, nanan anoyataantacoꞌ. Co onporontaꞌ noꞌhuicasoꞌ yaꞌhuërinhuëꞌ,” tënin.
Yaꞌipi cancanënpoa quëran natëcasoꞌ yaꞌhuërin
5Ina quëran caꞌtanoꞌsanënpitari itopi:
—Catahuacoi Sinioro, Yosë noya noya natëꞌi, itopi.
6—Mostasa yaꞌpirin huaꞌhuishin ninin. Ina pochin piꞌpian tërantaꞌ Yosë natëtomaꞌ, nontohuatamaꞌ, noya catahuarinquëmaꞌ. “Yosë nohuanton, iso nara noꞌpa quëran pipirahuaton, marëquë paꞌin,” tënamaꞌ naporini, paꞌitonhuëꞌ. “Yosë noꞌtëquën nontërinco,” topatamaꞌ, sacaiꞌ nininsoꞌ nanitaparamaꞌ, itërin.
Yosë marëꞌ sacatacasoꞌ yaꞌhuërinsoꞌ
7Ina quëran itantarin: “Patron yaꞌhuëhuachina, piyapinën camairin. Camaihuachina, iminënquë sacatërin. Pëꞌtahuanënpitantaꞌ aꞌpairin. Nani sacatohuachina, imin quëran huënantahuachina, patroni aꞌnaroáchin aꞌcarin, ¿topiramahuëꞌ ti? 8Co naporinhuëꞌ. Patronꞌton yacoshatërin. Napoaton piyapinën shaꞌhuitërin. ‘Cosharoꞌ niquëꞌ. Ina quëran nitaparahuaton, oꞌhuintoco caꞌi. Nani coshatohuato, oꞌshitoco,’ itërin. Nani coshatohuachina, naporo huarëꞌ piyapinënsoꞌ coshatërin. 9Piyapinën camairin niꞌton, natërin. ‘Ma noyanquën niꞌton, natëranco. Ina marëꞌ “Yosparinquën,” ’ co itërinhuëꞌ. 10Canpitantaꞌ iyaroꞌsaꞌ, Yosë shaꞌhuitohuachinquëmaꞌ, natëcoꞌ. Nani natëhuatamaꞌ: ‘Topinan piyapinënpoaꞌ niꞌtëhuaꞌ, natërëhuaꞌ,’ nitocoꞌ. Yaꞌipiya natëcamasoꞌ yaꞌhuërin,” itërin Quisosori.
Chana caniori maninsopita anoyatërinsoꞌ
11Ina quëran Cariria parti naꞌhuëtahuaton, Quirosarinquë paꞌsarin. Samaria yonsan yaꞌcariya paꞌnin. 12Inaquë paaton, aꞌna ninanoquë canconin. Canconpachina, shonca quëmapiꞌsaꞌ chana caniori maninsopita quënanconin. Inapitasoꞌ aquëmiáchin huanirahuatonaꞌ, 13chiníquën nontopi:
—¡Quiyantaꞌ Maistro nosoroatoncoi anoyatocoi topiraihuëꞌ! itopi.
14Napotohuachinara, niꞌsahuaton, itapon:
—Paatomaꞌ corto huaꞌan noyatëramaso aꞌnotoncoꞌ, itërin. Napotohuachina, paꞌpi.
Paasoiꞌ, aꞌnanaya canio inquipi. Noyatopi. 15Aꞌnaraꞌ: “Nani noyatërahuë,” taꞌton, ayanquintarin. Iratapon pochin “¡Ma noyacha Yosësoꞌ niꞌton, anoyatërinco paya!” tosarin. 16Quisosoquë huënantahuaton, nantëntaquëchin isonquirin. Isonquirahuaton, “Yosparinquën, Sinioro,” itërin. Samaria piyapi inasoꞌ.
17-18—Shonca yaꞌpi anoyatopirahuëꞌ, aꞌnaíchin huënantahuaton, “Yosparinquën,” itërinco. Inasoꞌ nisha piyapi niponahuëꞌ, Yosë yonquirin. Aꞌnapitaso nipirinhuëꞌ co “Yosparinquën,” itërinacohuëꞌ, tënin.
19Ina quëran itantarin:
—Huanirahuaton iyasha, noya paquë. Yosë natëran niꞌton, noyatomiatëran huachi, itërin.
Yosë huaꞌanëntarinsoꞌ
(Mateo 24.23-28, 36-41)
20Ina quëran Parisioroꞌsari huëcapairahuatonaꞌ, itaponaꞌ:
—¿Onporotaꞌ Yosë isoroꞌpaquë huaꞌanëntarin? itopi.
—Yosë huaꞌanëntohuachin iyaroꞌsaꞌ, co aꞌninquëchin yaꞌnoarinhuëꞌ. 21“Isëquë yaꞌhuarin,” co taponahuëꞌ. “Pasëquë yaꞌhuarin,” co taponahuëꞌ. Yosë huaꞌanëntohuachinquëmaꞌ, yaꞌcoancantarinquëmaꞌ, itërin.
22Ina quëran caꞌtanoꞌsanënpita itantarin:
—Aꞌna tahuëri iyaroꞌsaꞌ, panantarahuë. Naporoꞌ nohuantaramaco. Yosë quëran quëmapico niꞌto, oꞌmantararahuë. “Manóton oꞌmantaꞌin,” tosapiramahuëꞌ, co naporoꞌ quënanaramacohuëꞌ. 23Aꞌnaquën yanonpintarinënquëmaꞌ. “Nani oꞌmantarin. Pasëquë yaꞌhuarin,” itarinënquëmaꞌ aꞌnaquën. “Patoroꞌpaꞌ yaꞌhuarin, quiyasoꞌ nitotërai,” itarinënquëmaꞌ aꞌnaquëontaꞌ. Ina pochin nontohuachinënquëmaꞌ, ama natëcosohuëꞌ. Ama inapita imacosohuëꞌ. 24Aꞌnanaya oꞌmantararahuë. Oꞌcoriꞌ huënshaꞌ topachina, yaꞌipi parti aꞌpintërin. Inapochachin aꞌna tahuëri yaꞌipi piyapiꞌsaꞌ niꞌsarinaco. 25Iporaso nipirinhuëꞌ chiníquën parisitaꞌhuasoꞌ yaꞌhuërin. Naꞌa piyapiꞌsaꞌ co nohuantarinacohuëꞌ. Noꞌhuiarinaco. 26-27Iráca Noi pënëntopirinhuëꞌ, co natëpihuëꞌ. Co natëtonahuëꞌ, topinan yaꞌhuëcaisoráchin cancantopi. Coshatapi, oꞌosapi, saꞌasapi, huiꞌninpitantaꞌ asoꞌyapi. Napoatonaꞌ, co mantaꞌ Yosë yonquipihuëꞌ. Noiso nipirinhuëꞌ, Yosë natëton panca nancha ninin. Nani tinihuachina, inaquë yaꞌconin. Aꞌnapitasoꞌ co yonquipirinahuëꞌ, aꞌnanaya panca pacon paꞌsarin huachi. Naporoꞌ yaꞌipiya chimiitopi. Inapochachin piyapiꞌsaꞌ topinan yaꞌhuasoiꞌ, aꞌnanaya oꞌmantararahuë. 28Notontaꞌ iráca Sotomaquë yaꞌhuëpirinhuëꞌ. Inaquë aꞌnapitasoꞌ topinan yaꞌhuatonaꞌ, coshatápi, oꞌosápi, nipaꞌantápi, maꞌsha shaꞌsapi, pëiapi. 29Napoápirinahuëꞌ, Noto pipihuachina, naporo tahuëri chachin Yosë nohuanton, inápa quëran pën aꞌpaimarin. Aꞌnanaya taꞌhuantopi. 30Inapochachin cantaꞌ aꞌna tahuëri Yosë quëran quëmapico niꞌto, yaꞌnoantarahuë.
31“Ina tahuëri nanihuachin, co maꞌshanëmapita yonquicasoꞌ yaꞌhuaponhuëꞌ. Pëinëma aipi yaꞌhuëhuatamaꞌ, ama maꞌsha macacaso marë tërantaꞌ yaꞌconcosohuëꞌ. Aꞌnaroáchin taꞌacoꞌ. Iminquë yaꞌhuëhuatamaꞌ, ama pëinëmaquë paantacosohuëꞌ. Topinan pacoꞌ. 32Iráca Noto saꞌin maꞌshanënpita yonquiaton, co aꞌnaroáchin taꞌarinhuëꞌ. Napoaton co chaꞌërinhuëꞌ. Ina yonquicoꞌ. 33Noya nanpicamasoáchin yonquihuatamaꞌ, topinan quëran nanpiaramaꞌ. Chiminpatamaꞌ, parisitomiataramaꞌ. Nipirinhuëꞌ, casáchin yonquihuatamaco, tëpapirinënquëmaontaꞌ, noya noya nanpimiatontaramaꞌ.
34Oꞌmantahuato, naporoꞌ tashiꞌ catoꞌ piyapi ina pëꞌsaraquëáchin huëꞌësapirinahuëꞌ, aꞌnaraꞌ imarinco niꞌton, anquëniri inápaquë quëpantararin. Aꞌnaso nipirinhuëꞌ patarin. 35Cato sanapi shiꞌshiꞌ pëꞌsanapirinhuëꞌ, aꞌnaraꞌ quëpantararin. Aꞌnaso nipirinhuëꞌ patarin. [ 36Cato quëmapi ina iminquëáchin sacatapirinahuëꞌ, aꞌnaraꞌ quëpantararin, aꞌnaraꞌ patarin,”] tënin Quisoso.
37—¿Insëquëtaꞌ Sinioro napoapi? itopi.
—Maꞌsharoꞌsaꞌ chiminpachina, tamëroꞌsari huëcapaipi, itërin. (Oꞌmantahuachin, yaꞌipiya nitotapi, tapon naporin.)
Currently Selected:
Lucas 17: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.