Apocalipsis 3
3
Sartisiquë yaꞌhuëpisopita ninshitërinsoꞌ
1Ina quëran Quisoso shaꞌhuitaantarinco:
—Ansiano Sartisiquë yaꞌhuërinsontaꞌ ninshitëquëꞌ nonchin imapisopita natainaꞌ.
“Ca Quisosoco ninshitaranquëmaꞌ. Casoꞌ canchisë ispiritoroꞌsaꞌ Yosëri camairinsoꞌ cantaꞌ camairahuë, natërinaco. Naporahuaton, tayoraroꞌsaꞌ sëꞌquërahuëso pochin, ansianoroꞌsantaꞌ acorahuë aꞌchinacaiso marëꞌ. Canpitasoꞌ nohuitëranquëmaꞌ. Yaꞌipi co noyahuëꞌ ninamasopita nitotërahuë. Aꞌnapitasoꞌ nicatënënquëmaꞌ, ‘noya imapi,’ topirinahuëꞌ, co tëhuënchachin imaramacohuëꞌ. Chimipi pochin cancantëramaꞌ. 2Ipora huantaꞌ niyontonpiramahuëꞌ, topinan quëran naporamaꞌ: ‘Yaꞌipi natëtoi, noya ninai,’ topiramahuëꞌ, co huachi Yosë noya niꞌninquëmahuëꞌ. Huëꞌërëso pochin cancantëramaꞌ niꞌton, co yonquiramahuëꞌ. Pënsha yatacopirinso pochin cancantëramaꞌ. Pën yatacopihuachina, pishitërëꞌ noya orotacaso marëꞌ. Inapochachin canpitantaꞌ chiníquën Yosë yonquiantacoꞌ. 3Yaꞌnan natanapomaꞌ, Yosë nanamën noꞌtëquën aꞌchintërinënquëmaꞌ. Ina yonquiatomaꞌ, yaꞌipi co noyahuëꞌ yonquiramasopita naniantocoꞌ. Yaꞌipi cancanëma quëran casáchin yonquico. Co noya cancantaantahuatamahuëꞌ, aꞌnaroáchin anaꞌintaranquëmaꞌ. Ihuatonaꞌpi huëꞌninso pochachin aꞌnanaya anaꞌintaranquëmaꞌ. Co nitotasënquëmahuëꞌ, oꞌmantararahuë. 4Napoaponahuëꞌ, caraichinquëmaꞌ noyápiachin cancantëramaꞌ. Canpitaráchin noya nicatomaꞌ, co nëꞌhuëtërinso pochin cancantaramahuëꞌ. Ina marëꞌ canpitasoꞌ noya niꞌsaranquëmaꞌ niꞌton, Yosëꞌpaꞌ ichiyaꞌhuëcontaranquëmaꞌ. Inatohuaꞌ nóya cancantaramaꞌ niꞌton, huiríchin aꞌmocontaramaꞌ. 5Inquëmasoꞌ sopai minsëhuatamaꞌ, Yosëꞌpaꞌ paꞌsaramaꞌ. Noyápiachin cancantaramaꞌ niꞌton, huiríchin aꞌmocontaramaꞌ. Inatohuaꞌ yaꞌhuëmiataramaꞌ. Nanpirin quiricaquë nininëmaꞌ nani ninshitëranquëmaꞌ. Co onporontaꞌ tapiarahuëꞌ. Tata Yosë shaꞌhuitarahuë: ‘Isopita imamiatërinaco,’ itarahuë. Anquëniroꞌsantaꞌ natanapi. 6Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ, ninshitohuatan, itërinco.
Piratiripiaquë yaꞌhuëpisopita ninshitërinsoꞌ
7Ina quëran itaantarinco:
—Ansiano Piratiripiaquë yaꞌhuërinsontaꞌ ninshitëquëꞌ nonchin imapisopita natainaꞌ.
“Ca Quisosoco quirica aꞌpataranquëmaꞌ, niꞌcoꞌ. Casoꞌ noya noyaco. Casáchin noꞌtëquën aꞌchinahuë. Iráca Yosëri Tapi shaꞌhuitërin. ‘Aꞌna tahuëri quëma shiparinquën yaꞌipi piyapinëhuëpita huaꞌanëntarin,’ itërin. Iráca ninorincoso chachin nani oꞌmarahuë Yosë huëntonënquë ayaꞌconaꞌhuanquëmaso marëꞌ. Niahuiquë yaꞌcoana iꞌsoarahuatëꞌ, ayaꞌconëꞌ. Inapochachin carinquëmaꞌ ayaꞌconpatënquëmaꞌ, co insontaꞌ nanitërinhuëꞌ ocoiinquëmasoꞌ. Oncotohuatëra, co aꞌnapita nanitopihuëꞌ yaꞌconacaisoꞌ. 8Cari nohuitëranquëmaꞌ. Yaꞌipi ninamasopitantaꞌ nitotërahuë. Co naꞌaquëmahuëꞌ nipomarahuëꞌ, noya ninamaꞌ. Co chiníquën nanantapomarahuëꞌ, nanamëhuë noya imaramaꞌ. Co tapanatomahuëꞌ, ‘Quisocristoíchin imarai,’ tënamaꞌ niꞌton, yaꞌcoana iꞌsoatërëso pochin catahuaranquëmaꞌ naꞌa piyapiꞌsaꞌ aꞌchintacamasoꞌ. Ca nohuanton, pënëntaramaꞌ. Co insontaꞌ nanitarinhuëꞌ ataꞌtëinquëmasoꞌ. 9Aꞌnaquën nonpintatënënquëmaꞌ, ‘Yosë piyapinënpitacoi quiyantaꞌ,’ itopirinënquëmahuëꞌ, Satanasë huëntonënquë yaꞌconpi. Aꞌna tahuëri ca nohuanto, inapitantaꞌ isonahuatonaꞌ, noya nontarinënquëmaꞌ. ‘Tëhuënchachin noꞌtëquën imaramaꞌ. Quisocristo nosororinquëmaꞌ,’ itarinënquëmaꞌ. 10Chiníquën cancantatomaꞌ, imamiatoco, itëranquëmaꞌ. Natëramaco niꞌton, carinquëmantaꞌ naꞌcon catahuaranquëmaꞌ. Aꞌna tahuëri yaꞌipi isoroꞌpaquë yaꞌhuëpisopita chiníquën aparisitarahuë tënicaꞌhuaso marëꞌ. Co naporoꞌ parisitaramahuëꞌ. Nichaꞌësaranquëmaꞌ. 11Co huaꞌquiya quëranhuëꞌ oꞌmantararahuë. Ama naniantatomacohuëꞌ, imamiatoco. Niꞌcona sopai minsëchinquëmaꞌ. Ina minsëhuachinquëmaꞌ, co inápaquë canaaramahuëꞌ. 12Sopai minsëhuatamaꞌ, Yosë yaꞌhuërinquë chachin pantaramaꞌ. Piyon pëiꞌ achinirinso pochin naꞌcon nohuantaranquëmaꞌ. Napoaton yaꞌhuëmiatontaramaꞌ. Co pipiaramahuëꞌ. Yosë co onporontaꞌ aꞌpoarinquëmahuëꞌ. Nininën chachin acotaranquëmaꞌ. Aꞌna tahuëri panca ninanoꞌ yaꞌhuapon. Inápa quëran oꞌmararin. Nasha Quirosarin itopisoꞌ. Ina nininëontaꞌ acotaranquëmaꞌ. Cantaꞌ Quisosoco oꞌmantahuato, nasha nininëhuë acotaranquëmaꞌ. Co onporontaꞌ aꞌpoaranquëmahuëꞌ. 13Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ, ninshitohuatan, itërinco.
Naotisiaquë yaꞌhuëpisopita ninshitërinsoꞌ
14—Ina quëran ansiano Naotisiaquë yaꞌhuërinsoꞌ ninshitëquëꞌ nonchin imapisopita natainaꞌ.
“Ca Quisosoco quirica aꞌpataranquëmaꞌ, niꞌcoꞌ. Noꞌtëquën nonato, noꞌtën nanan aꞌchintëranquëmaꞌ. Co onporontaꞌ nonpintëranquëmahuëꞌ. Yosë nohuanton, yaꞌipi maꞌsha ninahuë. Napoaton, yaꞌipi piyapiꞌsaꞌ natëinacosoꞌ yaꞌhuërin. 15Casoꞌ nohuitëranquëmaꞌ. Yaꞌipi ninamasopitantaꞌ nitotato, co noya niꞌnanquëmahuëꞌ. Niꞌcoꞌ. Tëꞌnaiꞌ noyápiachin oꞌorëꞌ. Ahuaihuatërantaꞌ, yashin oꞌorëꞌ. Co noya huairinsohuëꞌ nipirinhuëꞌ oꞌopatëra, amirotërëꞌ, topi. Inapochachin niꞌnanquëmaꞌ. Aꞌnaquën noya ahuairëso pochin noya imarinaco. Canpitantaꞌ noya imaramaco naporini, noya niꞌitënquëmahuëꞌ. Aꞌnaquëontaꞌ tëꞌnai pochin nipi. Co nitochátërapihuëꞌ niꞌton, nosororahuë. 16Canpitaso nipirinhuëꞌ co noya ahuairëso pochinhuëꞌ ninamaꞌ. ‘Noya imarai,’ topiramahuëꞌ, co yaꞌipi cancanëma quëran imaramacohuëꞌ niꞌton, yaaꞌporanquëmaꞌ. Maꞌsha amirotatëꞌ yaimorëso pochin niꞌnanquëmaꞌ. 17Canpitasoꞌ naporamaꞌ: ‘Naꞌa maꞌsha yaꞌhuëtërincoi niꞌton, noya yaꞌhuarai. Quiyasoꞌ noya piyapicoi. Aꞌnapita quëran noya noya nitotërai. Co mantaꞌ pahuantërincoihuëꞌ,’ topiramahuëꞌ, co noꞌtëquën yonquiramahuëꞌ. Cancanëma quëran yonquiramasopita nitotërahuë. Saꞌahuaya pochin niꞌnanquëmaꞌ. Coriqui pahuantërinso pochin canpitasoꞌ naꞌcon pahuantarinquëmaꞌ noya cancantacamasoꞌ. Somaraya pochin cancantatomaꞌ, co tëhuënchachin nohuitëramacohuëꞌ. Saꞌahua capa aꞌmocasoꞌ nininso pochin co noyápiachin cancantëramahuëꞌ. Paꞌpi nosorotëramaꞌ. 18Napoaton pënënanquëmaꞌ. Chiníquën nontoco catahuainquëmaꞌ. Niꞌcoꞌ. Oro aꞌpëhuatëra, yaꞌipi nëꞌhuë inquirin. Orosachin quëparitërin, noyasáchin nininsoꞌ. Inapochachin canpitantaꞌ nontoco catahuainquëmaꞌ noya yonquicamaso marëꞌ. Naꞌcon pahuantarinquëmaꞌ Yosë pochin nicacamasoꞌ. Casáchin yonquico Yosë noya niꞌinquëmaꞌ. Yonquihuatamaco, huiríchin aꞌmorëso pochin noya nisaramaꞌ. Somaraya pochin cancantëramaꞌ niꞌton, co tëhuënchachin nohuitëramacohuëꞌ. Nimirioquë acorayatërëso pochin anoyacancanchinquëmaꞌ cancanëma quëran nohuitamacoso marëꞌ. 19Nosoroatënquëmaꞌ, chiníquën nontëranquëmaꞌ. Anaꞌintaranquëmaꞌ noya cancantacamaso marëꞌ. Co noyahuëꞌ yonquiramasopita aꞌporahuatomaꞌ, casáchin tahuërëtantaco huachi. 20Cancanëmaquë yayaꞌcoancantëranquëmaꞌ. Ina marëꞌ nontaranquëmaꞌ. Yaꞌcoana piꞌnirëso pochin ninaranquëmaꞌ. Natanahuatamaco: ‘Yaꞌcoancantoco,’ itohuatamaco, yaꞌcoancantaranquëmaꞌ. Niichicoshatërëso pochin nóya ninohuitarihuaꞌ. 21Nani sopai minsërahuato, Tata Yosëꞌpaꞌ yaꞌhuarahuë. Yaꞌipiya huaꞌanëntarai. Canpitantaꞌ sopai minsëhuatamaꞌ, Yosëꞌpaꞌ noya acoaranquëmaꞌ. Canpitaroꞌco huaꞌanëntarahuë. 22Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ ninshitohuatan, itërinco Quisoso.
Currently Selected:
Apocalipsis 3: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.