Lucas 15
15
Ohuica chihuërinso pochin nininsoꞌ
(Mateo 18.10-14)
1Nisha nisha piyapiꞌsaꞌ huëꞌpi Quisoso natanacaiso marëꞌ. Copirno marëꞌ coriqui maꞌpatonaꞌpiroꞌsaꞌ, oshahuanoꞌsaꞌ itopisoꞌ, inapitantaꞌ huëꞌpi. 2Ina niꞌsahuatonaꞌ, parisioroꞌsaꞌ, cotio maistroꞌsaꞌ, inapitari noꞌhuipi.
—¿Onpoatontaꞌ Quisoso oshahuanoꞌsaꞌ paꞌyatërin? Inapitarëꞌ coshatarin, co napocasohuëꞌ nipirinhuëꞌ, toconpi.
3Ina natanahuaton, Quisosori iso pënënto nanan shaꞌhuitërin ayonquicaiso marëꞌ: 4“Aꞌna quëmapi pasa ohuicaroꞌsaꞌ pëꞌtahuaton, yaꞌipiya nosororin. Aꞌnaya tërantaꞌ chihuëhuachina, yonípon paꞌsarin. Aꞌnapitasoꞌ pastoquëranchin patahuaton, huaꞌquiꞌ yonisarin. Quënanaquë huarëꞌ yonisárin. 5Quënanahuaton, paꞌyatërin. Pitënahuaton, quëmantarin. 6Pëinënquë canquiantahuachina, nipayarinsopita, yaꞌcariya yaꞌhuëpisopita, inapita shaꞌhuitërin. ‘Ohuicanëhuë chihuëpirinhuëꞌ, quënanahuë. Ina marëꞌ nóya cancantahuaꞌ,’ itërin. 7Inapochachin Yosë niꞌninpoaꞌ. Noya piyapi yaꞌhuëhuachin, Yosëri noya niꞌsarin. Nipirinhuëꞌ, oshahuanoꞌsantaꞌ nosororin. Aꞌnaya tërantaꞌ co noyahuëꞌ yonquirinsoꞌ naniantohuachin, Yosë yaꞌhuërinquëntaꞌ capa cancantomiatapi,” itërin Quisosori.
Coriqui ayatërinsoꞌ
8Ina quëran iso pënënto nanan shaꞌhuitantarin: “Aꞌna sanapi shonca coriqui prata quëran nininsoꞌ yaꞌhuëtopirinhuëꞌ, aꞌnaraꞌ ayatërin. Nanparin iꞌchinpitahuaton, noyá huitëtërin. Quënanaquë huarëꞌ yonisárin. 9Quënanahuaton, nipayarinsopita, yaꞌcariya yaꞌhuëpisopita, inapita shaꞌhuitërin. ‘Coriquinëhuë ayatopirahuëꞌ, quënanahuë. Ina marëꞌ noya cancantahuaꞌ,’ itërin. 10Inapochachin aꞌna piyapi tërantaꞌ co noyahuëꞌ yonquirinsopita naniantohuachin, anquëniroꞌsantaꞌ noya cancantapi,” itërin.
Oshahuanaꞌpi huëantarinsoꞌ
11Ina quëran Quisosori itaantarin: “Aꞌna quëmapi catoꞌ huiꞌninpita yaꞌhuëtopirinhuëꞌ, 12huaꞌhua nininsoari paꞌpin itërin: ‘Aꞌna tahuëri yaꞌipi maꞌshanënpita iyahuëroꞌco patomatarancoi. Caso nipirinhuëꞌ apira nohuantërahuë. Ipora tata quëtochanco, topirahuëꞌ,’ itërin. Itohuachina, patoma maꞌshanënpita quëtërin. 13Cara tahuëri quëran pochin huaꞌhua nininsoꞌ yapipirin. Yaꞌipi maꞌshanënpita paꞌanahuaton, coriqui canarinsoꞌ masahuaton, aquë paꞌnin. Inaquë noꞌpirárin, nansarárin, monshihuanárin. Naꞌa coriqui quëparinsoꞌ iꞌquirin. 14Nani yaꞌipi iꞌquihuachina, inaquësoꞌ tanarotopi niꞌton, co mantaꞌ capacasoꞌ yaꞌhuërinhuëꞌ. Inantaꞌ tanarin. 15Napoaton aꞌna patronquë paꞌnin. ‘Cantaꞌ sacachi, topirahuëꞌ,’ itërin. ‘Noyahuaꞌ. Sacatëquëꞌ nipachin,’ itahuaton, pastoquë aꞌparin coshinënpita aꞌpaicaso marëꞌ. 16Inaquë paaton, coshiroꞌsaꞌ aꞌcararin. Tanaton, coshi caꞌninsoꞌ tërantaꞌ nayapirinhuëꞌ, co incari quëtërinhuëꞌ. 17Ina quëran yonquirin. ‘¡Maꞌhuántacha ninahuë paya! Tata piyapinënpitasoꞌ noya coshatapi. Caso nipirinhuëꞌ tana yatëparinco taꞌa. 18Paato, tatahuë nonchi: “Co noyahuëꞌ tata ninahuë. Nonpintëranquën. Co Yosë natëtohuëꞌ, oshahuanahuë. 19Co noyahuëꞌ ninahuëso marëꞌ co huachi huiꞌnan pochin cancantancosoꞌ yaꞌhuërinhuëꞌ. Piyapinën pochin tërantaꞌ niꞌco,” ichi,’ tënin yonquinënquë. 20Ina quëran paꞌpin yaꞌhuërinꞌpaꞌ paantarin.
Yaꞌcaritëriahuasoꞌ, aquë quëran paꞌpini quënanin. Quënanahuaton, naꞌcon nosoroaton, taꞌaparin. Iporahuaton, apinorin. 21‘Co noyahuëꞌ ninahuë, tata. Nonpintëranquën. Co Yosë natëtohuëꞌ, oshahuanahuë. Co noyahuëꞌ ninahuëso marëꞌ co huachi huiꞌnan pochin cancantancosoꞌ yaꞌhuërinhuëꞌ,’ itërin paꞌpin. 22Napotopirinhuëꞌ, paꞌpinisoꞌ naꞌcon nosororin. Piyapinënpita camairin. ‘Manóton paatomaꞌ, noyápiachin nininsoꞌ maconahuatomaꞌ, aꞌmotocoꞌ. Poꞌmoitërantaꞌ noyápiachin nininsoꞌ poꞌmotocoꞌ. Sapatëntaꞌ matonquëꞌ poꞌmoin. 23Ina quëran toroaꞌhua amoshin nininsoꞌ maꞌtomaꞌ, tëpacoꞌ caꞌahuaꞌ. Capa cancantatëhuaꞌ, pita niahuaꞌ. 24Iso huiꞌnahuë chiminin pochin niponahuëꞌ, iporasoꞌ yaꞌnoantarin. Ayatë pochin nipirinhuëꞌ, iporasoꞌ niantarahuë,’ itërin. Ina quëran pita nisapi.
25Paninanso nipirinhuëꞌ, iminquë sacatërin quëran huëntararin. Pëiquë yaꞌcaritëriahuasoꞌ, mosica piꞌnirapiso natanin. Nansatonaꞌ, capa cancantapi. 26Natanahuaton, piyapinën përarin: ‘¿Onpoatontaꞌ pita nisapi?’ itërin. 27‘Coꞌta iyaꞌhua huënantarin. Noya canquintarin niꞌton, tatari paꞌyatërin. Toroaꞌhua amoshin nininsoꞌ atëpatërin capacaso marëꞌ,’ itërin. 28Ina natanahuaton, noꞌhuitërin. Noꞌhuitaton, co yayaꞌconinhuëꞌ. Paꞌpini pipirahuaton, itërin: ‘Huëquëꞌ conpa capa cancantahuaꞌ,’ itopirinhuëꞌ. 29‘Inca tata. Naꞌa piꞌipi quëma marëꞌ chiníquën sacatërahuë. Shaꞌhuitohuatancora, yaꞌipiya natëranquën. Napoaponahuëꞌ, co casoꞌ chipo tërantaꞌ quëtërancohuëꞌ amiconëhuëpita amatahuato capa cancantaꞌhuaiso marëꞌ. 30Iso huiꞌnanso nipirinhuëꞌ, aquë paaton noꞌpiárin. Monshihuanárin. Coriquinën quëtopiranhuëꞌ, yaꞌipi iꞌquirin. Ina quëran huënantahuachina, quëmari nosoroaton, paꞌyatëran. Toroaꞌhua amoshin nininsoꞌ atëpatëran coshatacaiso marëꞌ,’ itërin.
31Napotohuachina, paꞌpini itërin: ‘Nosororanquën mini conpa. Quëmasoꞌ co yaꞌhuincaranhuëꞌ. Yaꞌipi maꞌshanëhuëpita quëchinquën. Yaꞌipiya quëmaquën nisarin. 32Iyaꞌhuaso nipirinhuëꞌ, nani huënantarin. Chimininso pochin niponahuëꞌ, yaꞌnoantarin. Ayatërëso pochin nitopirëhuahuëꞌ, niantarëhuaꞌ. Ina marëꞌ noya cancantacasoꞌ yaꞌhuërin,’ itërin paꞌpini,” tënin Quisoso.
Currently Selected:
Lucas 15: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.