Hebreos 2
2
Ama Quisocristo nanamën aꞌpoahuasohuëꞌ
1Nani noꞌtën nanan natanëhuaꞌ niꞌton, nanamën naꞌcon naꞌcon yonquiaꞌahuaꞌ, ama pëshonacaso marëhuëꞌ. Niꞌcona canpitantaꞌ ina naniantotamaꞌ. 2Iráca Yosëri anquëniroꞌsaꞌ aꞌpaimarin nanan shaꞌhuitacaiso marëꞌ. Natëcasoꞌ yaꞌhuërin niꞌton, co piyapiꞌsari natëhuachinahuëꞌ, Yosëri noꞌtëquën anaꞌintërin. 3Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ. 4Yosëri catahuarin niꞌton, caꞌtanoꞌsanënpita nani maꞌsha nanitapapi. Ina nohuanton, Ispirito Santori catahuarin nisha nisha nitotacaiso marëꞌ. Aꞌnaya aꞌnaya catahuarin Yosë nohuantërinsoꞌ nicacaisoꞌ. Aꞌnaquën catahuarin caniaꞌpiroꞌsaꞌ aꞌnaroáchin anoyatacaisoꞌ. Aꞌnaquëontaꞌ catahuarin Yosë yonquirinso chachin nitotacaiso marëꞌ. Ina nicatëhuaꞌ: “¡Ma noyacha Yosëri catahuarin paya! Ina nohuanton, noꞌtëquën Yosë nanamën shaꞌhuitërinënpoaꞌ,” tënëhuaꞌ.
Quisocristo isoroꞌpaquë oꞌmarinsoꞌ
5Iráca quëran huarëꞌ Yosë yonquihuachinpoara, co nohuantërinhuëꞌ anquëniroꞌsaꞌ huaꞌanëntinpoasoꞌ. Aꞌna tahuëri nasharoꞌpaꞌ nipachin, co inapita huaꞌanëntarinënpoahuëꞌ. Ina shaꞌhuitaranquëmaꞌ. 6Iráca aꞌna piyapi naporinsoꞌ Yosë quiricanënquë ninshitopi:
“Topinan piyapicoi Sinioro nipiraihuëꞌ, naꞌcon yonquirancoi. ¿Onpoatonsoꞌ nimara naꞌcon nosororancoi? tënai yonquiatoi.
7Quëma nohuanton, co anquëniroꞌsa pochin chiníquën nanantopiraihuëꞌ,
co huaꞌquiya quëranhuëꞌ chiníquën nanan quëtarancoi.
Noya noya acoarancoi.
8Yaꞌipi maꞌsha huaꞌanëntarai,” itërin. “Yaꞌipimiáchin huaꞌanëntarai,” topirinhuëꞌ, iporasoꞌ co piyapinpoaꞌ yaꞌipi maꞌsha huaꞌanënchátërarëhuahuëꞌ. 9Quisososo nipirinhuëꞌ yonquiaꞌahuaꞌ. Inasoꞌ isoroꞌpaquë oꞌmaton, piyapi chachin nasitimarin. Parisitaton, canpoa marëꞌ chiminin. Napoaton Yosëri chiníquën nanan quëtërin yaꞌipi huaꞌanëntacaso marëꞌ. Inaora nohuanton, Yosë nosoroatonpoaꞌ, huiꞌnin aꞌpatimarinpoaꞌ yaꞌhuërëtinpoaso marëꞌ. Yaꞌipi piyapinpoa marëꞌ chiminin.
Quisocristo parisitërinsoꞌ
10Yosëri yaꞌipiya ninin. Inasáchin yonquicaso marëꞌ nininpoaꞌ. Ina nohuanton, huiꞌnin parisitërin huëntonënquë ayaꞌcoinpoaso marëꞌ. Naꞌaquënpoaꞌ imarëhuaꞌ. Imapatëhuaꞌ, anoyacancantërinpoaꞌ. Huiꞌninpita pochin Yosë niꞌninpoaꞌ. Quisocristo parisitërin niꞌton nanitërin nichaꞌëinpoasoꞌ. Napoaton, “noya parisichin,” tënin Yosë. Nosoroatonpoaꞌ, naporin. 11Anoyacancantohuachinpoara, huiꞌninpita pochin niꞌninpoaꞌ. Canpoarintaꞌ “Tata” itërëhuaꞌ. Napoaton Quisocristo co tapanatonhuëꞌ, iinpita pochin niꞌninpoaꞌ. 12Quiricanënquë naporin:
“Piyapiꞌsaꞌ iyahuëpita pochin niꞌnahuë. Quëma nanamën, Sinioro, aꞌchintarahuë. Niyontonpatëira, yonquiatëinquën, cantarai,” tënin.
13Inantaꞌ piyapi niꞌton, itaantarin:
“Cantaꞌ Tata Yosë natërahuë. Co naniantarincohuëꞌ, tënahuë,” tënin.
Ina quëran itaantarin:
“Yosë nohuanton, aꞌnaquën piyapiꞌsaꞌ imasarinaco. Inapitantaꞌ Yosë huiꞌninpita pochin niꞌnahuë,” tënin.
14Piyapinpoaꞌ niꞌton, nonënpoaꞌ yaꞌhuëtërinpoaꞌ. Napoaton Quisocristontaꞌ oꞌmahuachina, piyapi chachin nasitimarin. Inantaꞌ nonën yaꞌhuëtërin. Piyapi chachin niquimaton, chiminin. Canpoasoꞌ sopai natëtëhuaꞌ, oshahuanëhuaꞌ niꞌton, chiminarëhuaꞌ. Quisocristoso nipirinhuëꞌ oshanënpoa marëꞌ chiminin. Canpoa marëꞌ chiminaton, sopai minsërin. 15Iráca quëran huarëꞌ chimirin tëꞌhuatërëhuaꞌ. “Chiminarihuaꞌ nimara,” taꞌtëhuaꞌ, tëꞌhuarëꞌquënpoa chachin yaꞌhuápirëhuahuëꞌ, Quisocristosoꞌ nichaꞌërinpoaꞌ. Ina imapatëhuaꞌ, co huachi tëꞌhuatacasoꞌ yaꞌhuërinhuëꞌ. 16Co anquëniroꞌsaꞌ catahuacaso marëꞌ oꞌmarinhuëꞌ. Piyapinpoaꞌ catahuarinpoaꞌ chaꞌëcaso marëꞌ. Apraan pochin noya cancantohuatëhuaꞌ, catahuarinpoaꞌ. 17Napoaton isoroꞌpaquë oꞌmaton, piyapi chachin nasitimarin. Co piyapi pochin nasitërinhuëꞌ naporini, co catahuainpoasoꞌ nanichitonhuëꞌ. Piyapi pochachin inantaꞌ niꞌton, noyá nohuitërinpoaꞌ. Corto huaꞌan chini chiníquën nanantërinso pochin nicaton, canpoa marëꞌ Yosë nontarin nanan anoyatinpoaso marëꞌ. Nosoroatonpoaꞌ, chiminin oshanënpoaꞌ inquitinpoaso marëꞌ. Inasoꞌ co nonpintërinpoahuëꞌ. 18Inantaꞌ sopairi tënihuachina, parisitërin niꞌton, yanonpintërinsoꞌ ninatanin antaꞌ. Napoaton sopai yaminsëhuachinpoaꞌ, ina nanitërin catahuainpoasoꞌ. Catahuarinpoaꞌ ama sopai natëcaso marëhuëꞌ.
Currently Selected:
Hebreos 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.