Efesios 4
4
Aꞌna huënton pochin ninëhuasoꞌ
1Quisocristo nanamën aꞌchinahuëso marëꞌ tashinan pëiquë poꞌmopirinacohuëꞌ, iporahuantaꞌ pënënáranquëmaꞌ. Yosë nichaꞌëtënquëmaꞌ, huëntonënquë ayaꞌconinquëmaꞌ. Napoaton noyasáchin nicoꞌ. 2“Yosëíchin catahuarinpoaꞌ noya nicacasoꞌ,” taꞌtomaꞌ, ama aꞌnapita nocancosohuëꞌ. Sanoanan quëran nontatomaꞌ, ama noꞌhuicosohuëꞌ. Aꞌnapita maꞌsha onpotohuachinënquëmaꞌ, ama yaiꞌhuërëtocosohuëꞌ. Co noyahuëꞌ nipirinahuëꞌ, nosoroatomaꞌ noya nontocoꞌ. 3Naꞌcon yonquicoꞌ iyaparima pochachin ninosorocamasoꞌ. Ispirito Santo catahuarinquëmaꞌ napopináchin yonquicamaso marëꞌ. Ina catahuahuachinquëmaꞌ, co piꞌpian tërantaꞌ ninoꞌhuiaramahuëꞌ. Noya niniꞌtomaꞌ, yaꞌhuaramaꞌ. 4Quisocristo imapatëhuaꞌ, yaꞌipinpoaꞌ aꞌna huëntoínchin pochin ninëhuaꞌ. Aꞌnaíchin Ispirito Santo yaꞌhuërinsoꞌ yaꞌcoancantërinpoaꞌ. Imarëhuasopita nichaꞌësarinpoaꞌ yaꞌhuërinquë chachin quëpantaꞌinpoaso marëꞌ. Inasáchin ninarëhuaꞌ. 5Quisocristoíchin huaꞌanëntërinpoaꞌ. Ina nanamënáchin natërëhuaꞌ. “Quisocristo imarahuë,” taꞌtëhuaꞌ, aporihuanëhuaꞌ. Co nisha nisha imacaso marëꞌ aporintërinënpoahuëꞌ. 6Tata Yosëíchin chinotërëhuaꞌ. Yaꞌipi imarëhuasopita huiꞌninpita pochin niꞌninpoaꞌ. Inasoꞌ chini chiníquën nanantaton, huaꞌanëntërinpoaꞌ. Yaꞌipinpoaꞌ catahuarinpoaꞌ ina marëꞌ sacatacasoꞌ. Imapatëhuaꞌ, yaꞌcoancantomiatërinpoaꞌ.
7Quisocristo catahuarinpoaꞌ maꞌsona tërantaꞌ noya nicacaso marëꞌ. Yaꞌipinpoaꞌ aꞌnaya aꞌnayanpoaꞌ catahuarinpoaꞌ nisha nisha nicacasoꞌ. Inaora nohuanton, catahuarinpoaꞌ maꞌsona nohuantërinsoꞌ noya nitotacaso marëꞌ. 8-9Iráca inápaquë nóya yaꞌhuëpirinhuëꞌ, isoroꞌpaquë chachin oꞌmarin. Naꞌcon parisitaton, chiminin. Paꞌpitopirinahuëꞌ, nanpiantaton, inápaquë panantarin. Iráca quiricanënquë naporin:
“Yaꞌipi minsërahuaton, inápaquë panantarin huachi.
Naporahuaton, maꞌsha topinan nicanarëso pochin piyapinënpita catahuarin nóya nicacasoꞌ.
Nisha nisha nicacasoꞌ catahuarin,” tënin.
10Quisocristo chachin isoroꞌpaquë oꞌmarahuaton, inápaquë panantarin. Yosë yaꞌhuërinquë chachin panantarahuaton, huaꞌyanën chachin aꞌpatimarinpoaꞌ yaꞌcoancantinpoaso marëꞌ. Yaꞌipi parti yaꞌhuaton, yaꞌipi huaꞌanëntarin. 11Naporahuaton, nisha nisha acorinpoaꞌ nicatahuacaso marëꞌ. Aꞌnaquën Quisocristori chachin aꞌparin aꞌchinacaso marëꞌ. Aꞌnaquëontaꞌ Ispirito Santo nohuanton, Yosë yonquirinso chachin shaꞌhuirin. Aꞌnaquëontaꞌ nisha nisha parti paaton, Yosë nanamën aꞌchinaꞌpiarin. Aꞌnaquëontaꞌ ina nohuanton, yaꞌhuëpiquë yaꞌhuëhuanoꞌsaꞌ nani tahuëri catahuapi noya imacaiso marëꞌ. Aꞌnaquëontaꞌ yaꞌipi Yosë nanamën aꞌchintapi. 12Nisha nisha acorinpoaꞌ noya nicatahuacaso marëꞌ. Inaora nonën pochin niꞌninpoaꞌ niꞌton, yaꞌipi imarëhuasopita catahuarinpoaꞌ noya ina marëꞌ sacatacasoꞌ. 13Inapohuatëhuaꞌ, yaꞌipinpoaꞌ imarëhuasopita napopináchin yonquiarihuaꞌ. Yosë huiꞌnin chachin nóya nohuitarihuaꞌ. Ina quëran noya noya cancantarihuaꞌ. Soꞌsorëso pochin oshaquëran Quisocristo pochachin cancantacasoꞌ yaꞌhuërin. 14Ina quëran noꞌtëquën yonquiarihuaꞌ. Co huachi huaꞌhuaroꞌsa pochin cancantarihuahuëꞌ. Huaꞌhuaroꞌsasoꞌ co yonquiyatërapihuëꞌ niꞌton, nisha nisha natëtopi. Canpoaso nipirinhuëꞌ chinotënpoa pochin noꞌtëquën yonquiaꞌahuaꞌ. Niꞌcoꞌ. Panca ihuan huëꞌpachina, poti niquëran niquëran ohuërërin. Co noꞌtëquën yanponinhuëꞌ. Inapochachin aꞌnaquën nisha nisha nanan natanpachinara, nisha nisha yonquipi. Co Quisocristo nanamënáchin yonquipihuëꞌ. Aꞌnaquën nisha nisha aꞌchinapi. Noyá nitotopi nonpinacaisoꞌ. Nonpin nanan imatonaꞌ, yanonpintopirinënquëmahuëꞌ, ama piꞌpian tërantaꞌ natëcosohuëꞌ. 15Quisocristo nanamënso nipirinhuëꞌ noꞌtën nanan. Noya ninosoroatëhuaꞌ, inasáchin niaꞌchintahuaꞌ. Inapohuatëhuaꞌ, oshaquëran Quisocristo pochin cancantarihuaꞌ. Inasoꞌ naꞌcon nosoroatonpoaꞌ, huaꞌanëntarinpoaꞌ. Inaora nonën pochachin niꞌninpoaꞌ. Inasoꞌ motënpoa pochin niꞌton, natëcasoꞌ yaꞌhuërin. 16Ina natëhuatëhuaꞌ, noya niniꞌtëhuaꞌ, yaꞌhuarihuaꞌ. Yaꞌipinpoaꞌ nicatahuacasoꞌ yaꞌhuërin. Nisha nisha nicatahuarihuaꞌ noya noya imacaso marëꞌ. Quisocristo chachin catahuahuachinpoaꞌ, noya nicatahuarihuaꞌ. Ina quëran ninosoroatëhuaꞌ, yaꞌipinpoaꞌ noya noya cancantarihuaꞌ.
Nasha cancan quëtërinpoasoꞌ
17-18Quisocristo nanan quëtërinco niꞌton, pënënaranquëmaꞌ. Naꞌa piyapiꞌsaꞌ co imatonaraihuëꞌ, topinan quëran yaꞌhuërapi. Somaraya pochin cancantatonaꞌ, nisha nisha yonquipi. Co natantochináchinhuëꞌ cancantopi niꞌton, co Yosë nanamën nitotopihuëꞌ. Co Yosë yonquiatonaraihuëꞌ, co mantaꞌ Yosë nohuitopihuëꞌ. Ama inapita pochin nicosohuëꞌ. 19Inapitasoꞌ nitotaponaraihuëꞌ, co nohuantopihuëꞌ noya nicacaisoꞌ. Co noyahuëꞌ nisáponaraihuëꞌ, co nitotapanpihuëꞌ. Monshihuanacaisoáchin yonquipi. Co noyahuëꞌ yonquiatonaꞌ, aꞌnaratipita nipi. 20Co ina pochin Quisocristo aꞌchintërinpoahuëꞌ. 21Inasoꞌ noꞌtëquën anitotërinpoaꞌ. Nanamën nani natanamaꞌ. 22Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi. 23Ina naniantatomaꞌ, nóya cancantocoꞌ noya noya yonquiamaso marëꞌ. 24Nasha cancan Yosë quëtërinpoaꞌ ina pochin cancantacaso marëꞌ. Napoaton nasha aꞌmorëso pochin nasha cancantocoꞌ. Noꞌtëquën yonquiatomaꞌ, noyasáchin nicoꞌ.
25Yaꞌipi imarëhuasopita Yosë huëntonënquë chachin yaꞌconëhuaꞌ. Iyanpoa pochin ninëhuaꞌ. Napoaton ama ninonpintahuasohuëꞌ. Noꞌtëquënáchin ninontahuaꞌ.
26Aꞌna piyapi noꞌhuihuatamaꞌ, niꞌcona oshahuantamaꞌ. Coꞌhuara piꞌi yaꞌcoyantërasohuëꞌ, nanan anoyatocoꞌ. 27Huaꞌquiꞌ noꞌhuihuatamaꞌ, aꞌnaroáchin sopai minsëarinquëmaꞌ.
28Aꞌnaquëmaꞌ iráca ihuatëramaꞌ. Ama huachi ihuatocosohuëꞌ. Ama chirotomarahuëꞌ, noya sacatocoꞌ. Ina quëran nanitëramaꞌ pahuantërinsopita quëtacamasoꞌ.
29Ama taparoꞌ noncosohuëꞌ. Ama maꞌtoma maꞌtoma noncosohuëꞌ. Sano yonquiatomaꞌ, noya noncoꞌ aꞌnapita natanatënquëmaꞌ, Yosë yonquiꞌinaꞌ. Noya noya imacaso marëꞌ catahuacoꞌ. 30Co noyahuëꞌ nipatamaꞌ, Ispirito Santo sëtarin. Quisocristo imapatamara, sichoquë marca acotërëso pochin Ispirito Santo ayaꞌcoancantërinquëmaꞌ. Ayaroꞌ tahuëriquë huarëꞌ aꞌpaiarinquëmaꞌ. Naporoꞌ noyá nichaꞌësarinquëmaꞌ. Napoaton ama Ispirito Santo asëtocosohuëꞌ.
31Ama aꞌnapita noꞌhuitomaꞌ, yonquirácosohuëꞌ. Aꞌnaroáchin nanan anoyatocoꞌ. Ama noꞌhuitacamasoꞌ nohuantocosohuëꞌ. Ama noꞌhuito canainquëmasohuëꞌ. Ama iquianan quëran ninontocosohuëꞌ. Nipinocasontaꞌ co noyahuëꞌ. Ama piꞌpian tërantaꞌ co noyahuëꞌ nicosohuëꞌ. 32Yaꞌipi piyapi noya nontocoꞌ. Nosoroatomaꞌ, catahuacoꞌ. Maꞌsha onpotohuachinënquëmaꞌ, ama ina yonquicosohuëꞌ. Quisocristo imaramaꞌ niꞌton, Yosë oshanëmaꞌ inquitërinquëmaꞌ. Canpita marëꞌ chiminin niꞌton, nanan anoyatërinquëmaꞌ. Inapochachin canpitantaꞌ aꞌnapita maꞌsha onpotohuachinënquëmaꞌ, nanan anoyatatomaꞌ, noya nontocoꞌ.
Currently Selected:
Efesios 4: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.