Jn 9
9
Li Jesus kixk'irtasi jun li winq mutz' chalen chaq sa' xyo'lajik
1Naq yo chi nume'k li Jesus, kiril jun li winq mutz' chalen chaq sa' xyo'lajik. 2Ut eb' li xtzolom ke'xpatz' re:
—At Tzolonel, ani kimaakob'k? Ma li winq a'in malaj eb' li xna' xyuwa', naq kiyo'laak sa' mutz'il? chankeb'.
3Kichaq'ok li Jesus ut kixye:
—Chi moko a'in kimaakob'k chi moko eb' li xna' xyuwa', re b'an naq li xnimal xwankil li Yos taak'utb'esiiq rik'in. 4Naq toj kutan, tento tqab'aanu li k'anjel naraj li kitaqlank chaq we. Chalk re li q'oqyink ut maa'ani chik truuq taak'anjelaq. 5Naq toj wanqin sa' li ruuchich'och', laa'in xsaqenk li ruuchich'och'.
6Naq ak xye a'in, kichuub'ak sa' ch'och', kixyiib' sulul rik'in li xchuub', kixyul li sulul sa' ru li mutz' ut kixye re:
7—Ayu chi ch'ajok sa' li ha' Siloé xk'ab'a' (naraj naxye: “Taqlanb'il”).
Koho li mutz', koxch'ajoq chaq ut na'ilok chik naq kisutq'iik chaq. 8Eb' li rechkab'al ut eb' li ak najter rokikeb' chi rilb'al naq mutz', ke'ok chi xyeeb'al:
—Ma maawa' tab'i' a'in li nak'ojlaak chi lemooxnik?
9Wan ke'yehok:
—A'an a'in.
Wankeb' chik ke'yehok:
—Maawa', chanchan b'an a'an na'ilok.
A'ut a'an kixye:
—Laa'inin.
10Toja' naq ke'xye re:
—Chan put ru naq xtehonk xsa' laawu?
11Kichaq'ok a'an ut kixye:
—Li winq Jesus xk'ab'a' xyiib' li sulul, xyul sa' li wu ut xye we: «Ayu Siloé ut ch'ajon chaq». Xkohin, xinch'ajok chaq ut nin'ilok chik.
12—B'ar wank a'an? chankeb' re.
Kichaq'ok:
—Ink'a' ninnaw, chan.
13Ke'xk'am rik'ineb' laj Pariseey li mutz' naq xwank. 14Ab'anan sábado chik naq li Jesus kixyiib' li sulul ut kixte xsa' li ru. 15Ke'ok ut eb' laj Pariseey chi xpatz'b'al wi' chik chanru naq xtehonk xsa' li ru, ut a'an kixye reheb':
—Xk'e li sulul sa' li wu, xinch'ajok chaq ut nin'ilok chik anaqwan.
16Wankeb' aj Pariseey ke'yehok:
—Li winq a'in moko rik'in ta li Yos nachalk xb'aan naq ink'a' naxk'e xloq'al li sábado.
Wankeb' chik ke'yehok:
—Chanru naq tixb'aanu li xninqal eetalil a'in junaq winq aj maak?
Ut kiwank jachok ib' sa' xyanqeb'. 17Toja' naq ke'xpatz' wi' chik re li mutz':
—Ut laa'at k'aru nakaye chirix a'an, xb'aan naq xte xsa' laawu?
Kichaq'ok:
—A'an jun propeet, chan.
18A'ut eb' laj Judiiy ink'a' ke'xpaab' naq li winq a'an mutz' naq kiwank ut na'ilok chik, toj ke'xb'oq chaq li xna' xyuwa' 19ut ke'xpatz' reheb':
—Ma a'in leeralal, a' li nekeye naq mutz' chalen chaq sa' xyo'lajik? Chan put ru naq na'ilok chik anaqwan?
20Ke'chaq'ok li xna' xyuwa' ut ke'xye:
—Naqanaw naq a'an a'in li qalal, mutz' naq kiyo'laak. 21Ab'anan, chan ta wi' ru naq na'ilok chik anaqwan, tik ink'a' naqanaw, chi moko naqanaw ani xtehok xsa' li ru. Patz'omaq re; ak wank xchihab'. A'an naru naxch'olob' li k'aru xk'ul.
22A'in ke'xye li xna' xyuwa' xb'aan xxiweb' chiruheb' laj Judiiy, xb'aan naq ak k'uub'k'u xb'aaneb' laj Judiiy, wi ani tixye naq li Jesus a'an li Kriist, isinb'ilaq sa' li ch'utleb'aal kab'l. 23Jo'kan naq ke'xye li xna' xyuwa': “Ak wank xchihab'. Patz'omaq re”.
24Eb' laj Judiiy ke'xb'oq wi' chik li winq, a' li mutz' naq xwank, ut ke'xye re:
—Chaye qe li yaal sa' xk'ab'a' li Yos. Laa'o naqanaw naq li winq a'in a'an aj maak.
25Kichaq'ok a'an ut kixye:
—Wi a'an aj maak, ink'a' ninnaw laa'in. Jun ajwi' li ninnaw chi us: mutz'in naq xinwank ut anaqwan nin'ilok chik.
26Toja' naq ke'xye re:
—K'aru xb'aanu aawe? Chanru naq xte xsa' laawu?
27Kichaq'ok ut kixye:
—Ak xinye eere ut ink'a' xeraj rab'inkil. K'a'ut naq teeraj rab'inkil wi' chik? Ma teeraj ajwi' ok laa'ex cho'q xtzolom?
28Ut eb' a'an kilaje'xhob' ut ke'xye re:
—Laa'at xtzolom li winq a'an, a'ut laa'o xtzolomo laj Moisés. 29Laa'o naqanaw naq li Yos ki'aatinak rik'in laj Moisés, a'ut a'in ink'a' naqanaw b'ar chalenaq chaq.
30Kichaq'ok li winq ut kixye reheb':
—Sachb'ach'oolej tz'aqal a'in, naq laa'ex ink'a' nekenaw b'ar chalenaq, ut a'an xte xsa' li wu. 31Laa'o naqanaw naq li Yos ink'a' narab'iheb' laj maak; ab'an wi junaq naxxiwa ru li Yos ut naxb'aanu li rajom, a'an na'ab'iik. 32Maajun wa ab'inb'il resil junaq winq tixte xsa' ru junaq mutz' chalen chaq sa' xyo'lajik. 33Wi ta a'an ink'a' chalenaq rik'in li Yos, maak'a' raj truuq tixb'aanu.
34Ke'chaq'ok eb' a'an ut ke'xye re:
—Xatyo'laak chajunxaqalil sa' li maak ut taawaj anchal qatzolb'al laa'o?
Ut ke'risi sa' xyanqeb'.
35Li Jesus kirab'i resil naq ke'risi sa' xyanqeb' ut, naq kixtaw, kixye re:
—Ma nakapaab' laa'at li K'ajolb'ej?
36Kichaq'ok a'an:
—Ut ani a'an, at Qaawa', re naq tinpaab'? chan.
37Kiyehe'k re xb'aan li Jesus:
—Ak xawil ru; a'an a'in li yo chi aatinak aawik'in.
38Toja' naq a'an kixye:
—Ninpaab', Qaawa'.
Ut kixwiq'ib' rib' chiru, kixloq'oni.
39—Chi raqok aatin xinchalk sa' li ruuchich'och' a'in -chan li Jesus- re naq eb' li ink'a' neke'ilok che'iloq, ut eb' li neke'ilok che'mutz'irq.
40Wankeb' aj Pariseey te'ochb'eeninq re, ut naq ke'rab'i a'in, ke'xye re:
—Ma mutz'o ajwi' laa'o chi jo'kanan?
41Kixye li Jesus reheb':
—Wi ta mutz'ex, maak'a' raj eemaak; ab'anan nekeye: «Nokoo'ilok»; jo'kan naq leemaak toj wank sa' eeb'een.
Currently Selected:
Jn 9: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.