Jn 3
3
Li Jesus ut laj Nikodemo
1Kiwank jun li winq aj Pariseey, aj Nikodemo xk'ab'a', xnimal ru winq sa' xyanqeb' laj Judiiy. 2A'an kiwulak rik'in li Jesus chi q'eq ut kixye re:
—At Tzolonel, naqanaw naq rik'in li Yos chalenaqat chaq cho'q aj tzolonel, xb'aan naq maa'ani naru chi b'aanunk re li xninqal eetalil nalajaab'aanu laa'at wi maak'a' li Yos rik'in.
3Kichaq'ok li Jesus ut kixye re:
—Relik chi yaal ninye aawe: maa'ani truuq chi rilb'al li xnimajwal awab'ejihom li Yos wi ink'a' ta taayo'laaq wi' chik.#3,3 Taayo'laaq wi' chik malaj taayo'laaq taqe'q.
4Laj Nikodemo kixye re:
—Chanru naq taayo'laaq wi' chik junaq li ak xtixk? Ma truuq tab'i' taa'ok xka' sutil rik'in li xna' ut taayo'laaq wi' chik?
5Kichaq'ok li Jesus ut kixye:
—Relik chi yaal ninye aawe: ani ink'a' taayo'laaq rik'in ha' ut Musiq'ej moko truuq ta taa'ok sa' li xnimajwal awab'ejihom li Yos. 6Li yo'lajenaq rik'in tz'ejwalej a'an tz'ejwalej, ut li yo'lajenaq rik'in li Musiq'ej a'an musiq'ej. 7Misachk aach'ool rik'in li xinye aawe: «Tento naq texyo'laaq wi' chik». 8Li iq' yalaq b'ar na'apunk ut nakawab'i li xyaab', ab'an ink'a' nakanaw b'ar ta nachalk ut b'ar ta naxik. Jo'kaneb' ajwi' li yo'lajenaqeb' rik'in Musiq'ej.
9Kichaq'ok laj Nikodemo ut kixye re:
—Chan put ru naq taak'ulmanq a'an?
10Kisumeek xb'aan li Jesus:
—Laa'at aj tzolol reheb' laj Israel: ma ink'a' nakanaw a'in? 11Relik chi yaal ninye aawe: laa'o nokoo'aatinak chirix li k'aru naqanaw, ut naqanumsi resil li tz'aqal qilom; a'ut laa'ex ink'a' nekek'ulub'a li qaatin. 12Wi ink'a' nekepaab' naq xexwaatina chirix li k'aru re li ruuchich'och', chan put ru naq teepaab' li tinye eere chirix li k'aru re li choxa?
13“Maa'ani taqenaq sa' choxa, ka'ajwi' li kikub'e chaq sa' choxa, a' li K'ajolb'ej. 14Ut kama' naq laj Moisés kixtaqsi li k'anti' sa' li chaqich'och',#3,14 Nm 21,4-9. jo'kan ajwi' tento taataqsiiq li K'ajolb'ej, 15re naq chixjunil li taapaab'anq re wanq xyu'am chi junelik.
16“Xb'aan naq li Yos k'ajo' naq kixra li ruuchich'och': kixk'e chaq li Ralal jun chirib'il re naq chixjunil li taapaab'anq re, ink'a' taasachq, wanq b'an xyu'am chi junelik. 17Xb'aan naq li Yos ink'a' kixtaqla chaq li Ralal sa' ruuchich'och' chi raqok aatin sa' xb'een li ruuchich'och', re b'an naq chikole'q li ruuchich'och' sa' xk'ab'a' a'an.
18“Li napaab'ank re li Ralal li Yos, maak'a' tojb'amaak sa' xb'een. A'ut li ink'a' napaab'ank, ak raqb'il aatin sa' xb'een, xb'aan naq ink'a' xpaab' li Ralal li Yos jun chirib'il. 19Ut a'an a'in li raqb'a aatin: xk'ulunk li saqenk sa' ruuchich'och' ut eb' li winq a' chik li aak'ab' xe'xra chiru li saqenk, xb'aan naq ink'a' useb' li xb'aanuhom. 20Chixjunil ani naxb'aanu li ink'a' us, xik' naril li saqenk ut ink'a' naxik wan wi' li saqenk, re naq ink'a' taaq'use'q rik'in li xb'aanuhom. 21A'ut li nak'anjelank re li yaal, naxik wan wi' li saqenk, re naq chik'utunq naq eb' li xb'aanuhom uxb'ileb' sa' xk'ab'a' li Yos”.
Li kixch'olob' wi' chik laj Jwan chirix li Jesus
22Chirix chik a'in koho li Jesus sa' xch'och'eb' laj Judá, ut aran kikanaak rochb'eeneb' li xtzolom, yo chi kub'sink ha'. 23Laj Jwan yo ajwi' chi kub'sink ha' aran Enón, chi xk'atq Salim, xb'aan naq naab'al li ha' wank aran ut eb' li tenamit neke'wulak aran chi kub'siik xha'eb'. 24Sa'eb' li kutan a'an toj maji'aq nak'ehe'k laj Jwan sa' tz'alam.
25Kiwank jun wech'ij ib' rik'ineb' li xtzolom laj Jwan ut jun aj judiiy, chirix li ch'ajob'resink ib'. 26Ke'wulak wan wi' laj Jwan ut koxe'xye re:
—At Tzolonel, chak'e reetal: li kiwulak aawik'in junpak'al li nima' Jordán, a' li xat-aatinak chirix, yo chi kub'sink ha' ut chixjunileb' neke'wulak rik'in.
27Kichaq'ok laj Jwan ut kixye:
—Maak'a' truuq taareechani junaq, wi ink'a' ta k'eeb'il chaq re sa' choxa. 28Laa'ex nekenaw chi us naq xinye: «Moko laa'in ta li Kriist, yal taqlanb'ilin b'an chaq chiru a'an». 29Li ani aj ik'in wank li ixaqilb'ej a'an li b'eelomej; ut li ramiiw li b'eelomej li nawank aran ut narab'i, k'ajo' naq nasaho'k sa' xch'ool chi rab'inkil xyaab' xkux li b'eelomej.#3,29 Li Jesus a'an li B'eelomej (cf. 2 Ko 11,2; Ap 19,7; 21,2). Sa' li Najter Chaq'rab' k'iila sut eb' li Propeet neke'xye naq li Yos naxra li xtenamit kama' junaq b'eelomej naxra li rixaqil (cf. Os 1-3; Is 1,21; Jr 2,2; 3,1.6-12; Ez 16; 23; Is 50,1; 54,6-7; 62,4-5). A'an a'in li xsahil inch'ool, ut ak tz'aqlojenaq chik ru. 30Tento naq A'an taak'iiq ut laa'in tinsaaq.
31“Li nachalk chaq taqe'q a'an li nim xwankil sa' xb'een chixjunileb'. Li ani re li ruuchich'och', a'an ruuchich'och' ut ruuchich'och'il aatin naxye. Li nachalk chaq sa' choxa 32na'aatinak chirix li rilom ut rab'ihom, ab'an maa'ani nak'ulub'ank re li raatin. 33Ani nak'ulub'ank re li xyehom, a'an naxye chi yaal naq paab'ajel li Yos. 34Xb'aan naq li taqlanb'il chaq xb'aan li Yos na'aatinak jo' na'aatinak li Yos, xb'aan naq naxk'e li Musiq'ej chi ink'a' b'isb'il. 35Li Yuwa'b'ej naxra li K'ajolb'ej ut chixjunil kixq'axtesi sa' ruq'. 36Ani napaab'ank re li K'ajolb'ej, wank xyu'am chi junelik; a'ut li ink'a' napaab'ank re li K'ajolb'ej ink'a' taaril li yu'am, a' chik li xjosq'il li Yos teneb'anb'il sa' xb'een”.
Currently Selected:
Jn 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.