Jn 20
20
Kiril ut kixpaab'
(Mt 28,1-10; Mk 16,1-8; Lk 24,1-12)
1Sa' li xb'een kutan re li xamaan, saqewk re, toj q'oqyink ajwi', koho lix María aj Magdala sa' li muqleb'aal ut kiril naq isinb'il chik li pek chire li muqleb'aal. 2Koho sa' aanil wankeb' wi' laj Simón Pedro ut li jun chik xtzolom li Jesus li q'axal raaro xb'aan, ut koxye reheb':
—Xe'risi li Qaawa' sa' li muqleb'aal ut ink'a' naqanaw b'ar ta xe'xk'e.
3Ke'elk laj Pedro ut li rech tzolonelil, ut koheb' wan wi' li muqleb'aal. 4Koheb' sa' aanil chi xkab'ichaleb', ab'an li xtzolom jun chik q'axal kaw ki'aanilak chiru laj Pedro, koxq'ax ut xb'enwa kiwulak sa' li muqleb'aal. 5Kixk'utzub' rib' ut kiril eb' li b'atleb' t'ikr sa' ch'och', ab'anan moko ki'ok ta. 6Kiwulak ajwi' laj Simón Pedro toj chi ixb'ej, ki'ok sa' li muqleb'aal, ut kiril eb' li b'atleb' t'ikr sa' ch'och' 7ut li sut kilane'k wi' li xjolom: moko wank ta sa' xyanqeb' li b'atleb' t'ikr, soq'so b'an sa' jalan chi na'ajej. 8Toja' naq ki'ok ajwi' li tzolom jun chik, li kiwulak xb'enwa wan wi' li muqleb'aal; kiril ut kixpaab'.
9Xb'aan naq toj maji' ajwi' neke'xtaw ru li Santil Hu li naxye naq tento taawakliiq chi yo'yo sa' xyanqeb' li kamenaq.#20,9 Cf. Sal 16,8 (wank sa' Hch 2,27); Sal 2,7 (wank sa' Hch 13,33); Jon 1,17. 10Chirix chik a'in eb' li xtzolom ke'sutq'iik sa' rochocheb'.
Li Jesus kixk'ut rib' chiru lix María aj Magdala
(Mk 16,9-11)
11Lix María toj wank chi xk'atq li muqleb'aal, yo chi yaab'ak. Ut naq yo chi yaab'ak, kixk'utzub' rib' chi ilok sa' li muqleb'aal, 12ut kiril wiib'eb' li ánjel, saq li raq'eb', k'ojk'ookeb' b'arwi' kijilib'aak li Jesus: jun chi xjolom ut jun chi roq.
13—At ixq, k'a' naq nakatyaab'ak? chankeb' re.
Kichaq'ok a'an ut kixye reheb':
—Xb'aan naq xe'xxok linQaawa' ut ink'a' ninnaw b'ar ta xe'xk'e.
14Naq kixye a'in, kixsutq'isi rib' chirix ut kiril li Jesus xaqxo aran; ab'an ink'a' naxnaw naq a'an li Jesus.
15—At ixq, k'a' naq nakatyaab'ak? Ani nakasik'? chu'uxk re xb'aan li Jesus.
Sa' xch'ool lix María naq a'an laj ilol awimq; jo'kan naq kixye re:
—Wa', wi laa'at xatk'amok re, ye we b'ar xak'e ut laa'in toxinxok chaq.
16Kixye li Jesus re:
—María!
A'an kixsutq'isi rib' ut kixye re sa' aatinob'aal hebreo:
—Rabbuní! (naraj naxye: “At Tzolonel!”).
17Li Jesus kixye re:
—Minaab'ay, xb'aan naq toj maji' nintaqe'k rik'in li Yuwa'b'ej.#20,17 San Jwan naxye naq li Jesus kitaqsiik sa' xnimal xloq'al li Yuwa'b'ej sa' ajwi' li xkutankil li xwaklijik wi' chik chi yo'yo. Ab'anan naqanaw ajwi' naq chiru ka'k'aal kutan toj kiraj xk'utb'al rib' chiruheb' li xtzolom (Hch 1,3). Ayu wankeb' wi' li wiitz'in ut ye reheb': «Taqe'k we rik'in linYuwa' ut eeYuwa' ajwi' laa'ex, rik'in linYos ut eeYos ajwi' laa'ex».
18Koho lix María aj Magdala ut koxye reheb' li xtzolom li Jesus naq kiril ru li Qaawa'; koxye ajwi' chixjunil li kiyehe'k re xb'aan.
Li Jesus kixk'ut rib' chiruheb' li xtzolom
(Mt 28,16-20; Mk 16,14-18; Lk 24,36-49)
19Ewu sa' ajwi' li kutan a'an, li xb'een kutan re li xamaan, naq tz'aptz'ookeb' li rokeb'aal li na'ajej b'ar wankeb' wi' li xtzolom xb'aan xxiweb' chiruheb' laj Judiiy, kiwulak li Jesus, kixk'e rib' sa' xyiheb' ut kixye reheb':
—Chiwanq taxaq eerik'in li tuqtuukil usilal!
20Ut naq kixye a'in, kixk'uteb' li ruq' ut li xk'atq xsa' chiruheb'. Ke'saho'k sa' xch'ool eb' li xtzolom naq ke'ril ru li Qaawa'. 21Toja' naq kixye wi' chik li Jesus reheb':
—Chiwanq taxaq eerik'in li tuqtuukil usilal. Jo' naq xinxtaqla chaq li Yuwa'b'ej, jo'kan ajwi' naq texintaqla laa'in.
22Ut naq kixye a'in, ki'apunk sa' xb'eeneb' ut kixye reheb':
—K'ulumaq li Santil Musiq'ej.#20,22 Cf. Gn 2,7; Ez 37,9. 23Eb' li teekuy teesach li xmaakeb', kuyb'ilaq sachb'ilaqeb' li xmaak; eb' li ink'a' teekuy teesach li xmaakeb', ink'a' ajwi' kuyb'ilaq sachb'ilaqeb' li xmaak.
Li Jesus ut laj Tomás
24Jun reheb' li Kab'laju, a' laj Tomás, Lut nayeemank re, moko wank ta sa' xyanqeb' naq kik'ulunk li Jesus. Naq kiyehe'k re xb'aaneb' li rech tzolonelil: “Xqil ru li Qaawa'”, 25a'an kixye reheb':
—Wi ink'a' twil sa' ruq' li reetalil li klawx, wi ink'a' tinch'ik li ru'uj wuq' sa' xna'aj li klawx ut wi ink'a' tinch'ik li wuq' sa' li xk'atq xsa', ink'a' tinpaab'.
26Waqxaqib'aq kutan xnumik a'an, wankeb' wi' chik sa' kab'l eb' li xtzolom ut laj Tomás wank sa' xyanqeb'. Kiwulak li Jesus chi tz'aptz'ookeb' li okeb'aal, kixk'e rib' sa' xyiheb' ut kixye:
—Chiwanq taxaq eerik'in li tuqtuukil usilal!
27Chirix chik a'an kixye re laj Tomás:
—Jiq chaq arin li ru'uj laawuq' ut il li wuq'. Jiq chaq laawuq' ut ch'ik sa' xk'atq insa', ut maak'e aawib' chi maak'a' aapaab'aal, aj paab'anelaqat b'an.
28Kichaq'ok laj Tomás ut kixye:
—At inQaawa', at inYos!
29Li Jesus kixye re:
—Toj xinaawil naq xapaab'. Us xaq reheb' li maak'a' xe'ril ut xe'xpaab'.
K'a' aj e naq tz'iib'anb'il li hu a'in
30Toj naab'al chik xninqal ru eetalil kixb'aanu li Jesus chiruheb' li xtzolom, ink'a' tz'iib'anb'ileb' sa' li hu a'in. 31A'ut eb' a'in tz'iib'anb'ileb' re naq yooqex chi xpaab'ankil naq li Jesus a'an li Kriist, li Ralal li Yos, ut rik'in xpaab'ankil taawanq eeyu'am sa' xk'ab'a' A'an.
Currently Selected:
Jn 20: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.