Hag 1
1
Xyiib'ankil wi' chik li rochoch li Yos
1Ak wiib' chihab' rokik cho'q awab'ej laj Darío, sa' li xb'een kutan re li xwaq po, li Qaawa' ki'aatinak chi xtz'uumal re laj Hageo rik'in laj Sorobabel, ralal laj Salatiel, aj jolominel re Judá, ut rik'in laj Josué, ralal laj Josadak,#1,1 Esd 4,24-5,2; 6,14. xyuwa'il aj tij.
2-3A'an a'in li kixye li Qaawa', li Nimajwal Yos, chi xtz'uumal re li propeet: “Li tenamit a'in neke'xye naq toj maji' xq'ehil xyiib'ankil wi' chik li rochoch li Qaawa' Yos. 4Ma xq'ehil tab'i' cho'q eere wank sa' chaab'il ochoch naq toj po'lem linsantil ochoch? 5Ma ink'a' nekeril li k'aru yookex chi xk'ulb'al? 6K'ajo' li awimq xeraw, ut kach'in ajwi' nekexok; xextzekank, ab'an ink'a' nak'ojlaak leech'ool; xex'uk'ak, ab'an ink'a' nanume'k leechaqi'eel; xelan eerib' chi us, ut ink'a' nekextiqwo'k; ut li tojb'il moos yal sa' q'ichil koxtal naxk'e li xtojb'al. 7Laa'in li Nimajwal Yos, ut nawaj naq teek'oxla chi us k'aru yookex chi xb'aanunkil. 8Ayuqex sa' li k'iche', k'amomaq chaq eeche' ut yiib'omaq wi' chik linloq'laj muheb'aal. Ut laa'in taasaho'q sa' inch'ool ut tweek'a naq nekek'e inloq'al, chan li Qaawa'. 9Naab'al raj nekeraj, ab'an b'a'b'ay ajwi' neketaw. Ut li xek'uula sa' leerochoch, laa'in xinkuti chi najt. Ma nekenaw k'a'ut? Xb'aan naq toj po'lem linsantil ochoch, ut laa'ex chejunjunqal naxik eech'ool chirix leerochoch. 10Jo'kan naq eemaak laa'ex naq ink'a' chik nat'ane'k li hab', ut li ch'och' ink'a' chik na'elk li awimq chiru.#1,10 Lv 26,18-20. 11Laa'in xintaqlank re li saq'ehil sa' ruuchich'och': sa' xb'eeneb' li k'iche', sa' xb'een li triiw, sa' xb'een li uub' ut li oliiw, sa' xb'eeneb' li rawimq li ch'och', sa' xb'eeneb' li poyanam, eb' li xul ut chixjunil li k'anjel na'uxmank”.
12Naq laj Sorobabel, ralal laj Salatiel, ut laj Josué, ralal laj Josadak, xyuwa'il aj tij, jo'wi' chixjunileb' li tenamit ke'rab'i li raatin li Qaawa' li xYoseb', li kixye chi xtz'uumal re laj Hageo li propeet, jo' chanru chaq'rab'inb'il xb'aan, k'ajo' naq ke'ok xxiw. 13Toja' naq laj Hageo, li xtaql li Yos, kixye reheb' li tenamit li aatin a'in sa' xk'ab'a' li Qaawa': “Jo'ka'in naxye li Yos: «Laa'in li Qaawa' wankin eerik'in»”.
14-15Chi jo'kan li Qaawa' kixwaklesi xch'ool laj Sorobabel, ralal laj Salatiel, aj jolominel re Judá, ut laj Josué, ralal laj Josadak, xyuwa'il laj tij, jo'wi' kixk'e xkawub' xch'ool chixjunileb' li tenamit. Sa' li kaahib' xka'k'aal xb'e li xwaq po naq ak wiib' chihab' rokik chi awab'ejink laj Darío, chixjunileb' ke'xtikib' xyiib'ankil wi' chik li rochoch li Qaawa', li xYoseb' nim xwankil.#1,14-15 Esd 5,2.
Currently Selected:
Hag 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.