Est 1
1
Li nimla wa'ak li kik'ehe'k xb'aan laj Asuero
1A'in kik'ulmank chiru xyu'am laj Asuero#1,1 Esd 4,6; Est (gr) 1,1a-s. naq kitaqlank cho'q awab'ej sa' xb'een wuqub' xwuqk'aal (127) teep chi tenamit chalen chaq sa' xteepal India toj Etiopía 2ut kiwank chi awab'ejink sa' li tenamit Susa.
3Ak oxib' chihab' rokik chi awab'ejink, laj Asuero kixk'uub' jun li ninq'e cho'q reheb' chixjunileb' laj k'anjel chiru. Kixb'oqeb' ajwi' li xjolomileb' laj puub' re Persia ut Media, eb' li ninqeb' xwankil ut li neke'jolomink re eb' li junq teep chi tenamit. 4Chiru waqib' po kixk'ut chixjunil li xb'ihomal chiruheb' jo' ajwi' li xnimal xloq'al li x'awab'ejihom ut li xwankilal. 5Naq kiraqe'k li ninq'e a'an, li awab'ej kixk'e wi' chik jun li ninq'e cho'q reheb' jo'k'ihaleb' li wankeb' sa' li tenamit Susa, jo' kok' ut ninq. Ut chiru wuqub' kutan ke'ninq'ehik chiru xneb'aalil li rochoch li awab'ej. 6Uutz'u'ujinb'il chi us li na'ajej rik'in chaab'il t'ilkem, saq ut rax choxa li xb'onoleb', b'ak'b'ookeb' rik'in kaqik'aam liin ut chapchookeb' chiru kotkookil chapleb' yiib'anb'il rik'in plaat, sa' xyanqeb' li oqech mármol. Ke'xk'e ajwi' eb' li k'ojarib'aal yiib'anb'il rik'in plaat ut oor, ut li ch'och' tz'akanb'il ru rik'in chaab'il pek jo'wi' rik'in saq ut q'eqi mármol. 7Ke'uk'ak sa' k'iila paay chi sek' plaat, ut k'ajo' li b'iin kixk'e li awab'ej. 8Ab'anan li awab'ej kixye reheb' laj k'anjel chiru naq maajun minb'ilaq ru chi uk'ak, a' yaal b'an re li junjunq k'aru tixb'aanu. 9Jo'kan ajwi' kixb'aanu lix Vasti, li xna'eb' li tenamit: kixk'uub' jun li ninq'e cho'q reheb' chixjunileb' li ixq li wankeb' sa' rochoch laj Asuero li awab'ej.
10Sa' xwuq li kutan naq li awab'ej yo xkalajik, kixtaqla xb'oqb'al laj Mehumán, laj Bisetá, laj Jarboná, laj Biktá, laj Abaktá, laj Setar ut laj Karkás, eb' li wuqub' chi winq li wankeb' chi k'anjelak sa' rochoch laj Asuero. 11Ut kixye reheb' naq te'xk'am chaq lix Vasti, li xna'eb' li tenamit, re taawanq chiru li awab'ej chi wank xkoroon sa' xjolom, ut taa'ile'q xch'ina'usal xb'aaneb' chixjunil. Relik chi yaal naq k'ajo' xch'ina'usal li xna'eb' li tenamit. 12Ab'anan lix Vasti ink'a' kixpaab' li xb'oqb'al xb'aan li awab'ej. Toja' naq q'axal kiraho'k xch'ool li awab'ej; kijosq'o'k 13ut kixye reheb' li ramiiw: “K'ehomaq reetal k'aru xinxsume wi' lix Vasti. Raqomaq aatin sa' xb'een ut yehomaq k'aru tento xb'aanunkil anaqwan”.
14Toja' naq ke'jilok chi xk'atq laj Asuero eb' li xjolomileb' aj Persia ut aj Media, li k'ulb'ileb' xb'aan li awab'ej chi wank sa' li rochoch ut wankeb' xwankil sa' xb'een li tenamit. A'aneb' laj Karsená, laj Setar, laj Admatá, laj Tarsis, laj Meres, laj Marsená ut laj Memukán, 15ut ke'xye re k'aru tento xb'aanunkil, jo' naxye li chaq'rab', chirix naq lix Vasti, li xna'eb' li tenamit, ink'a' kixpaab' li raatin li awab'ej yeeb'il xb'aaneb' li wuqub' chi winq.
16Toja' naq laj Memukán kixye re li awab'ej ut chixjunileb' laj jolominel: “Lix Vasti, li xna'eb' li tenamit, moko ka'aj ta wi' xk'e sa' xutaan li awab'ej, xk'e aj b'an wi' sa' xutaan chixjunileb' li xjolomileb' li tenamit jo' ajwi' chixjunileb' laj k'anjel chiru. 17Li xb'aanu lix Vasti, toxnawmanq xb'aan chixjunileb' li ixq. Jo'kan naq ink'a' chik te'xpaab' li xb'eelomeb', xb'aan naq te'xye: «Laj Asuero li awab'ej kixtaqla xb'oqb'al lix Vasti sa' li ninq'e, ut a'an ink'a' kiraj xik», cha'qeb'. 18Ut chalen anaqwan eb' li rixaqileb' li xjolomileb' laj Persia ut laj Media te'xnaw k'aru kixye lix Vasti re li awab'ej, te'xwech'i li xb'eelomeb', ut a'an tixk'am chaq naab'al li ch'a'ajkilal. 19Jo'kan utan, at awab'ej, wi us cho'q aawe, chipuktesimanq li chaq'rab' a'in ut chitz'iib'amanq sa' xchaq'rab'eb' laj Persia ut eb' laj Media re naq ink'a' taasachmanq xwankil:#1,19 Est 8,8; Dn 6,8. «Ramrooq chiru lix Vasti xk'utb'al rib' chiru laj Asuero». Ut li awab'ej xk'ehaq li xwankil lix Vasti re jalan chik ixq li relik chi yaal xk'ulub'aq. 20Li xchaq'rab' li awab'ej chik'eemanq chi nawe'k sa' chixjunileb' li tenamit, us ta jwal nim xteepalil li x'awab'ejihom. Chi jo'kan chixjunileb' li ixq te'roxloq'i li xb'eelomeb', us ta ninqeb' malaj kok'eb' xwankil”, chan laj Memukán.
21Laj Asuero ut chixjunileb' laj jolominel ke'xk'ul xch'ool li k'aru kixye laj Memukán, ut li awab'ej kixye naq chipaab'aaq li na'leb' a'an. 22Kixtaqlaheb' xhu sa' chixjunil li tenamit li wankeb' rub'el xwankil, tz'iib'anb'ileb' sa' raatinob'aal li junq teep chi tenamit, re naq chixjunileb' li b'eelomej a'anaqeb' tz'aqal xjolomil junqkab'al.
Currently Selected:
Est 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.