Sof 1
1
1Häp täja Lhawuk lhämet tä ifwenho Sofonías häp ifwalas p'ante Josías, Amón lhäs, tä häpe Judá laka rey.#2~Rey 22.1—23.30 Wet Sofonías häpe p'ante Cusi lhäs, wet Cusi lajcha häp Gedalías, wet Gedalías lajcha häp Amarías, wet Amarías lajcha häp Ezequías.
Lhawuk itäyhthila nilhokej m'ak tä i'pe honhat
2Lhawuk lhämet yok:
“Oyämla nofwej nilhokej m'ak
tä i'pe honhat tä otäyhat.
3Otäyhthila wichi lhäy'e itshätäy,
wet äp otäyhthila afwenchey lhäy'e w'ahat.
Otihiyeja lewit'äyhyaj häp wichi tä ni'isahen,
wet otifwiyeja nilhokej wichi tä i'pe honhat.”
Lhawuk lhämet tä itiyej Judá lheley
4“Oneyhthiphäla otkwey
wet otasnhila häp Judá lheley,
lhäy'e nilhokej wichi tä ihi Jerusalén.
Ohämthila lhamel tä kamaj n'okwiyej
häp dios tä kamatache tä lhey Ba'al,
wet wichi nemla yen tichunhayaja Ba'al laka sacerdotes.
5Oyämlat nofwej wichi
tä i'pe lewukwey tä n'okwiyej katetsel,
lhäy'e häp iyhäj tä itsinen lakamchetey
tä n'okwi n'oyej tä äp hip'ajtej
tä n'okwiyej n'ocheyä tä lhey Milcom.
6Wet äpte otäyhthila wichi tä ile n'oyej,
häp wichi tä nemhit t'u n'okwe
wet nemhit tay'ätshan n'oye.”
7¡Is chik amel lhok tam
tä lhehi tä Lhawuk tatache,
tsi Lhawuk laka ifwala atott'a alhoho!
Lhawuk lhaiwaklhat häpkhilek ilänhen laka wichi,
tet iwoye tä lhamel ilänhen itshätäy
tä iwo t'awayhata häp lham.
¡Matche, t'änhiyela lhamel
tä pajche iniwhatlä n'olänyaj!
8Lhawuk yok, “Chik nichäte ifwalatso,
otasnhila niyatey lhäy'e rey leles,
lhäy'e nilhokej wichi tä taw'uyhiche
wichi iyhäj tä w'enha lhamej lew'uyis
tä iwo len'okhayaja, tä lhamel
n'okwiyej lecheyälis tä w'enha lhamejen.
9Ifwalatso otasnhila lhamel tä iten
wichi tä w'enha lhamejen lakeyis
tä lhamel n'okwiyej lecheyälis.
Wet ohämthila wichi
tä hich'atchehen lakeyis tä iwoye,
lhäy'e tä akantses,
lhamel yen ch'isukyajw'eta laka niyat lew'et.”
10Lhawuk yok:
“Chik nichäte ifwalatso,
pitsajiyela n'ot'änyajay tä tume
Jerusalén lelafwek tä tuntey lepe
tä w'ahat kotses len'äyhitaj.
Äpte wichi tä ihi Jerusalén lhip tä nech'ayek
iwohla lhafwyhayaja,
wet nech'e äp pitsajiyela
hupuy tä nichätche kanhi, lepak äytaji,
tumhiyela tachenhas.
11¡Amel tä haw'et Jerusalén lhip tä lhey Fwelhek,
afwchehchä, ämetchehen afwyhayajay!
¡Tsi häp tä wichi tä ifwellhi
lakäywet tä wuj tä hiw'en y'inhihena t'at,
lhamel nofwiyeja t'at tä y'inhen!
12“Chik nichäte ifwalatso, otchumhiyela ochäkw
wet ohutunhiyeja'pe Jerusalén tsi oyahnhila'pe.
Wet otasnhila wichi tä iwo t'elakw'eta
tä letichunhayaj yok, Matche tä otamsek ihi.
Lhamel tet iwoye hat'es tä õ'tsäyho n'olhäthi
tä õkniyäyayej tä äp õknitsäyaho elh n'olhäthi.
Matche tä letamsekis ihi lhamel wet yok,
Mathichet'a chik Lhawuk iwohiyela m'ak chik häpe.
13“Häp tä tamenej tä wichi iyhäj
isohiyeja lakäywet wet iwasthihichela lewukwey.
Lhamel yenhichelhila lewukwey
mat ihichet'alachufwi.
Lhamel tutcheyhihena, itihlahchä uvas,
mat tek iyähiyeja t'i tä hat'es.”
Lhawuk laka ifwala tä wuj tä iwo lewäkwa
14Atott'a alhoho Lhawuk laka ifwala tä wuj,
nek t'at, pajiyejt'a chik näm.
Häpkhila ifwala tä wuj tä ni'isa,
tehlat iwoye m'ak chik tapay.
Tejlak häpe wichi tä n'oka'tshayajchal,
tha lhamel tafwiyejchelahchä lenowayhyaj.
15Häpkhila ifwala tä Lhawuk wuj tä iwo lewäkwa.
Häpe ifwala tä n'oteläythayaj
wet lhäy'e tä häpe n'olhakli.
Wasihila honhat, wuj lewit'äyhyaj tä ihi.
Tehlat iwoyek honatsi i'pe honhat,
wujla pule lhayis tä näm, ichalajilahchä.
16Ifwalatso õyafwuthichehena n'ofwolis trompetas,
wet sip'älis t'änhihena,
tatayhlä honhates tä õyen lelafweka tuntey,
lhäy'e laka hupuy tä atoschephä
tä i'pe n'olafwek tselhäs
tä sip'älis ihiche tä iyahinpe honhat.
17Lhawuk yok:
“Ow'enhihola lelhakli häp wichi.
Lhamel tachasichehenat tä inukwe,
tehlat iwoyek asnamis,
tsi häp tä lhamel tatayej n'ohlä lech'isukyajay.
Wet lew'oyis nitsäyhichelahchä,
tehlat inät,
wet lep'itseyhay lhahila'pe honhat,
tehlat iwoye y'amhuy.”
18Chik näm ifwala tä Lhawuk iwo lewäkwa,
niwohit m'ak chik isiyeja, chik plata wok oro.
Tsi häp tä Lhawuk lewäkw häpe itäj
wet iwunhiyeja nilhokej lhamel laka honhat.
Wet nilhokej wichi tä i'pe honhat thahya tä nofwiyeja.
Currently Selected:
Sof 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.