Rut 1
1
Elimelec lhäy'e lew'et lheley ihoye honhat tä Moab
1-2Häp fwalas tä pajche p'ante, kamaj newache Israel lhayis laka rey, tajlhame lhamel laka niyatey tä iche. Wet fwalastso iche lewhäy tä nehlä ihi ilhokej honhat, wet häp hin'o tä lhey Elimelec tä tälhe hupuy tä Belén, häp Judá lhip, lham yikch'oya lew'et, lhäy'e lech'efwa tä lhey Noemí, lhäy'e leles tä lheyes Mahlón lhäy'e Quilión, wet ihoye honhat tä Moab yämlek yen lew'eta ayej. Lhamel häpehen Efrata lheley tä tälhe t'at Belén tä Judá lhip.
3Mat tä lhamel ihi p'ante Moab, Elimelec ileyej honhat, wet Noemí imälheyej leles. 4Wet lhamel iwo ch'efwasa, iyejen atsinhay tä lew'et t'at honhattso, elh tä lhey Orfa wet elh tä lhey Rut. Wet lhamel yen lew'eta Moab diez nekchämes, 5wet tä tajyäme lewhäytso, Mahlón lhäy'e Quilión ileyejen honhat. Tä mälhyejtso, Noemí tek häp lech'efwa ihi, tek häp leles ihi.
Rut lhäy'e Orfa itshupyene len'äyij
6Tä paj Noemí iläte tä Lhawuk hip'altsene laka wichi Israel lhayis, noj nehlä tä iche, nech'e lhäk ihi lhamel. Tä mälhyejtso, lhaiwaklhat 7wet yikch'oya lew'et tä ihi, lhäy'e letichey, wet lhamel tiyäjche n'äyij tä yikhen, yäple honhat tä Judá. 8Mat Noemí nech'e tahuyej lhamel tä yok:
–Mäyay, äpilay, aelh weihalha äple ako lew'et. Is chik Owuk Dios ahip'altsenehen, mälhyej tä amel lewoye tä lep'altsenhente oles tä ileyejen honhat, lhäy'e olham. 9Is chik yachajo tä hiw'en amhohen hach'efwas wet atamsekis ihi.
Noemí nech'e iwo tsilhekayej, hits'u Orfa lhäy'e Rut lech'alo wet lhamel ifwitsenejen tä tafwchehchä. 10Wet lhamel yämeje Noemí, yok:
–¡Kha! Olhamel oyikhila amche tä lehoye aka wichi.
11Mat Noemí inityen tä yok:
–Iles tsinhay, is chik lhäpilay. ¿Atsi m'ak tä tumenej tä let'uhläk lenek n'okwe? Nemla owo olesa yämlek amel lhenayhla hach'efwasa. 12Mäyay, äple haw'et, tsi olham ohäpe elh tä thaläkw yämlek owo ch'efwaya. Wet tej chik ofwitaj okalhi tä owo ch'efwaya honatsina wet oles ihi, 13¿hät amel letayayhiyela yäk thänhäy yämlek lhenay hach'efwasa, wet tumenla amejen tä naj hach'efwasa? Kha, iles tsinhay, tek is. Tsi wuj tä pay ohusek, inu'pe amel ateläythayaj, häp tä Owuk Dios matche tä itay n'ohlä.
14Tä Noemí ileyej lhämet tä iwoye, nech'e lhamel yachajo tä ifwitsenejen tä tafwchehchä. Wet nech'e Orfa hits'u lakatela lech'alo wet yik, mat Rut imälheyej Noemí.
Rut yikche Noemí
15Wet Noemí tahuyej Rut wet yok:
–Lhek yahinya, Orfa nech'e yäple laka wichi lhäy'e laka dios lhayis. Is chik am lhekche.
16Mat Rut ichulho, yok:
–Yej lenityen n'oyej yäk oaiwom wet oyik hach'oya. Tsi honhat chik häpe tä am tä lehoye, wet olham oyikhila amche. Wet lhip chik häpe tä am tä lhehi, olham oihihila. Häp aka wichi häpehila oka wichi, wet aka Dios häpehila oka Dios. 17Honhat chik häpe tä am tä lhehi tä leleyej honhat, olham oihihila tä oleyej honhat, wet otseyek ihihila. Chik oaiwom, is chik Lhawuk Dios iwit'äyenn'o wet y'isej lhip owit'äyhyaj. Tsi ts'ilakhila ot'ilek tä n'ahiw'enhathen.
18Tä Noemí hiw'en tä kalelhäj tä Rut iwatläk yikche, wet lham nemhit inityen, tek häp lhämet ihi.
19Wet lhamel tujlhache len'äyij yäk ichäte Belén. Tä tiyäjo, wet wichi iseltejen wet wuj lhämtes tä iwoye, wet atsinhay yok:
–¿Et häpe Noemí p'iya?
20Mat Noemí yok:
–Yej lhen olheya Noemí. En olheya Mara,#1.20 Häp õlhey Noemí yok, Okäjyaj, wet Mara yok, Pay. tsi Dios tä najit letumfwaya yäm äytaj ohusek. 21Tä oyikte, iche m'ak tä ow'en, mat tä Lhawuk inachajn'o, nech'e ohäpe elh tä p'elitsaj. ¿Chipte tä lhen olheya Noemí? Tsi Lhawuk tä najit letumfwaya häp tä iso n'oyej okäjyaj wet hiw'en n'oho olhakli.
22Mälhyej p'antetso tä Noemí yäpil tä tälhe Moab, lhäy'e Rut, häp letiche tä Moab lhayis elh. Tä lhamel ichäte Belén, häpe lewhäy tä iwo tesa õlanyaj tä cebada.
Currently Selected:
Rut 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.