Miq 1
1
Dios lakalelhthayaj tä itiyej Samaria
1Häp täja Lhawuk lhämet tä ifwenho Miqueas tä lew'et Moreset häp ifwalas p'ante tä Jotam, Acaz wet Ezequías lhamel niyatejenpej häp Judá. Lhawuk ipäyne tä lewit'äy ihihila häp Samaria lhäy'e häp Jerusalén.
2Nilhokej wichi, ch'ahuyay n'oye.
Tetshanay m'ak tä oyämena,
amel tä lheyaype honhat.
Lhawuk Dios ihi Lew'et tä T'amajchet tä ipuleye.
Lham tä hiw'en m'ak tä ni'isa tä amel lewoye,
wet häp tä tamenej tä tatay ahilähen.
3Lhek yahinlä Lhawuk,
inuphä tä tälho Lew'et.
Nämla, t'äsichelatpe chenaj pesey.
4Wet chenhas tä t'äsichela'pe wachuhihichela,
hätehlat iwoye pinu lhusey tä õ'ti'pe itäj.
Wet lhipey tä w'awulhchehchä,
inät tä iläfwelchehen hich'esajichehena honhat.
5M'ak tä tamenej tä tetso,
häp Israel lhayis iwo lech'isukyaja
wet tatayhlä Lhawuk.
¿Chi tälhe Israel lhayis lech'isukyaj?
Tälhe t'at laka niyatey tä ihi Samaria.
¿Wet atsi tä tamenej tä Judá lhayis n'okwiyej n'ocheyälis?
Häp laka niyatey tä ihi Jerusalén tä tamenej.
6Wet tä mälhyejtso, wet Lhawuk yok:
“Owasthihichela Samaria, oyenla hup mokwa,
häpkhila t'at honhat tä õyen uvaw'etesa.
Othathichela chenhas kawayhil
häp tuntey tä tälho,
wet on'älthichela'pe häp lefwetes.
7Nilhokej n'ocheyälis wasihichela t'at,
wet õ'wohla lhipeya lepeykas.
Õ'wunhihola nilhokej m'ak tä wichi yen lakahaya
häp atsinhay tä yen chumyaja lakain'oyaj
tä ihi len'okhayajw'etes
tä fwetaj ikäjyenejlhi lecheyälis häp lakeyistso.
N'okain'oyajwos kaha häp tä õyenejchelhi n'ocheyälis,
wet wichi letayhfwas ichäjla n'ocheyälistso
häpkhilek lhamel äp yen lecheyälisa.”
Miqueas tafwlhi'pe laka honhat tsi nek t'at lewit'äyhyaj
8Tä Samaria lewit'äyhyaj ihi,
häp tä tamenej tä otafwlhi,
tsi matche tä ofwitajayaj ihi.
Nemhit owo onisäja wet nemhit owo ow'uya.
Opitsaje t'at, ohätet iwoye asinäj takpej t'änlhi.
Ot'änlhi t'at, ohätet iwoye wänlhäj lespej y'iphen.
9Tsi häp tä Samaria lelätsek,
tej chik õ'wo chaya, ilehit'a.
Wet lelätsektso äp inuho Judá
pajtha äp nichäte Jerusalén,
honhat tä oka wichi ihi.
10Yej fwelayhola häp Gat lheley,
wet yej tafwchehchä
häpkhilek lhamel niw'ena tä alhakli ihi.
¡Amel tä haw'et hupuy tä lhey Honhat Mokw'et,
ch'olekwehen holo!
11¡Safir lheley, mähen,
mäyaych'oye aka honhat tä laj haw'uyisa
wet han'äfwlhi tapo amejen!
¡Wichi tä ihi Saanán yikhit'alach'oye lew'et!
¡Wuj n'olhafwyhayaj tä ihi Bet-esel!
¡Ihichet'a elh chik tach'otla amehen!
12Wichi tä lew'et hupuy tä lhey Tapay
niteläjch'oya n'och'otyaj.
Tsi nämho t'at Jerusalén lepe
m'ak tä ni'isa tä Lhawuk ichen.
13¡Amel tä haw'et Lakis,
chumaye aka kaletas, äytej yel'atas!
Ahäpehen wichi tä tatayhlä Lhawuk,
letenay t'at Israel lhayis lakeyis,
wet amel tä lewo ch'isukyaja Jerusalén.
14Amel tä Judá lheley,
nemhit lehanhiyeja lewoyneja chik lehoyaye Moreset-gat.
Israel lhayis kaniyatey w'et t'ekhahiyela t'at
wichi tä lew'et hupuy tä lhey N'otkanyaj.
15Lhawuk yok:
“Amel tä haw'et Maresa,
ochenla amehen atayhfwa
häpkhilek ikalh amhihen.
Wet Israel lhayis tä len'ohyajay ihiche,
lhamel yikhihena wet tiyäjihola chowej tä ihi Adulam
tä weskatlä letayhfwas.
16Wet amel tä Jerusalén lheley,
ähäs etek w'oley tä lhen atetnekayej
m'ak tä äytaj tä i'amejenpe ales tä lehumnhen.
Ähäs haw'oley, äm matche tä isat
häpkhilek ahäte iwoye istiwintas.
Tsi häp tä õ'hänhiyela honhat elh ales,
õyenla kwenkaya.”
Currently Selected:
Miq 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.