Lev 1
1
Häp itshäwet wok afwenche tä õ'wunhomche tä õyen Lhawuk t'awayhata
1Lhawuk ichufwi carpa tä lewukwe, wet t'äne häp Moisés wet yok:
2–Häp tähesna olhämtes tä is chik lefwenho häp Israel lhayis. Chik iche elh tä ihän n'oye otw'ayhat tä itshäwet, is chik ichäj alhoho itshäwet tä wuj wok tä niwuja.
3“Chik häpe itshäwet tä wuj tä ichäj n'oye tä häpkhilek õ'wunho, is chik häpe tolo tä hin'o tä isilataj tä newache m'ak chik iyej. Wet is chik ihäne carpa tä owukwe lepe, häpkhilek otchumlä. 4Is chik iti'pe takwey häp itshäwet lhetek, wet otchumlahlä häpkhilek otäyhtej letes tä ihihlä lech'isukyaj. 5Wet ilänla tolo tä ihi tä ottache. Wet sacerdotes tä Aarón leles ihänhiyela lew'oyis häp altar tä ihi carpa tä owukwe lepe, wet itsäyhichehena altar lhipey. 6Wet elh tä ichäj alhoho itshäwet ilanhihila t'äj wet iwohla lhipeya. 7Wet sacerdotes ilhänhihila itäj tä i'pe altar, iskonla'pe lelhetes, 8wet lhamel iskonla'pe itshäwet lhipey tä pajche õyisthen, lhäy'e lhetek, lhäy'e lakäsley t'alhä. 9Wet is chik õ'lejej inät häp itshäwet lheley lhäy'e lhechey. Wet nilhokej itshäwet lhipey tä sacerdote iwunhihola pajla'tha nofw. Wet nech'e häpe otw'ayhat tä õ'wunej tä lenij akäjche tä ikänitlhin'o.
10“Chik itshäwet tä hin'o ichäj n'oye häpe elh tä niwuja, chik tson'ataj wok kayla, is chik häpe itshäwet tä hin'o tä isilataj tä newache m'ak chik iyej. 11Wet chik ilän itshäwet, is chik itihi tä altar tä ihi tä ottache lhip tä tumej tafwojyhiye. Wet sacerdotes tä Aarón leles itsäyhichehena lew'oyis häp altar lhipey. 12Wet elh tä ichäj alhoho itshäwet iwohla lhipeya, wet sacerdote iskonla'pe lhipey tä pajche õyisthen häp itäj tä y'oho tä i'pe altar. Wet y'isiyeja lhetek lhäy'e lakäsley t'alhä. 13Wet is chik õ'lejej inät häp itshäwet lheley lhäy'e lhechey. Wet nilhokej itshäwet lhipey tä sacerdote iwunhihola pajla'tha nofw. Wet nech'e häpe otw'ayhat tä õ'wunej tä lenij akäjche tä ikänitlhin'o.
14“M'ak tä hin'o ichäj n'oye tä yen otw'ayhata, chik häpe afwenche is chik häpe pop wok hokwinaj lhäs. 15Wet sacerdote ihänhiyela altar häp afwenche, wet itonhihila lew'o tä ilanhi lhetek, wet nech'e iwunhihola lhetek. Wet hits'ifwnhilahchä lew'oyis wet itsäyhichela altar lhip. 16Wet ilanhihila lakätsi, imälhthihila häp lhäk tä ihi, wet ithathihola mok'otaj tä iwhäye altar lhip tä tumej tä ifwala tälhche. 17Wet nech'e hich'esajichela lechowej afwenche, wet itsokhihena lhafwis wet isohit'alawek lhipey, hip'ajthilawek. Chik tajyäme täja, wet nilhokej itshäwet lhipey tä sacerdote iwunhihola pajla'tha nofw. Wet nech'e häpe otw'ayhat tä õ'wunej tä lenij akäjche tä ikänitlhin'o.
Currently Selected:
Lev 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.