Éx 1
1
Leteläythayaj ihi Israel lhayis tä ihi p'ante Egipto
1Häp tähesna lheyis häp Israel leles tä yikche häp lajcha Jacob tä ihoye p'ante Egipto, elhpej lhamel lhäy'e lew'et lheley:#Gén 46.6-7 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad, lhäy'e Aser. 5Tä nilhokej Jacob leles lhäy'e lechetsos, iche setenta lhamel. José pajche ihi Egipto.
6Tajyäme p'ante wujpe nekchämis, wet nemhit ichehen José lhäy'e lechilalis, lhäy'e nilhokej wichi tä lew'awlhafwas, lhamel y'inhen. 7Mat lhamel wujpey leles lhäy'e lechetsos wet häpe wichi tä lhäy'e lhip tä wuj. Wet äp häpe wichi tä takhajayhen wet tapoyejej honhat tä lhamel ihi.
8Tä paj p'ante, iche niyat tä nech'ayek tä nitäfwelayej José. Wet tahuyej laka wichi wet yok:
9–Tetshan, häp wichi tä Israel lhayis lhäy'e lhip tä wujpey wet äp takhajayhen, wet äp inu'pe n'amel. 10Is chik iche m'ak chik y'awoyeje lhamel, häpkhilek nemhit t'aylhatshi. Tsi elat chik iche n'oka'tshayaj, wet tach'ote lhatayhfwas wet iwo ka'tshayaja n'amejen, wet yikch'oye lhaka honhat.
11Tä mälhyejtso, Egipto lheley tachuma hin'ol tä häpe lhamel wet yen lewosayej lechumtes. Wet lhamel yäm äytajche lechumet häp Israel lhayis, õne'tek lhamel yenwethä hupuy tä ihiche honhates tä lheyis Pitón lhäy'e Ramsés. Häp honhatestso tä Egipto kaniyat itihiche lakapuchehis tä wus tä yenwethä yämthilek t'amajej n'olhäk. 12Mat tej tä õyäm äytajche m'ak tä õ'woyeje Israel lhayis, mat lhäy'epej lhip tä t'aytshi lhamel wet wujpey. Wet Egipto lheley nowaye lhamel 13wet häp tä yen lakwenkaya, ichumyene lechumet tä wuj tä äytajche. 14Wet lajit lakäjyaja lhamel, wuj tä äytaj lechumet, lhamel yenlhi iyhät wet yenlhi adobes, wet õne'tek lhamel yenlhi lechumtes tä ihiche n'olafwey. Wet matche tä ni'isa m'ak tä õ'woyeje lhamel.
15Häte Egipto kaniyat ifwenho Sifra lhäy'e elh tä lhey Fúa, häp atsinhay tä t'uye Hebreo lhayis ka'tsinhay#1.15 Hebreo lhayis häpehen t'at Israel lhayis. tä takapuhtshanhen, wet yok:
16–Chik lehoye atsinha tä Hebrea tä takapuhtshan, yahin häp han'äfwaj tä nech'e nichätchä. Chik atsinha, is t'at, mat chik hin'o, ¡län!
17Mat häp atsinhaytso lhamel nowaye Dios, wet häp tä iwohiyet'a m'ak tä niyat ne'tek lhamel iwoye, wet tek ilänhen nä'tshas. 18Tä mälhyejtso, niyat t'äne atsinhaytso wet tahuyej wet yok:
–¿Chipte tä kalänahen nä'tshas?
19Lhamel nichulho niyat wet yok:
–Hebreo ka'tsinhay wuj tä takhajayhen, tek häte iwoye atsinhay tä Egipto lheley. Elhpej tä iwo lhäsa nichätchä tä kamaj olhamel n'am chäte.
20-21Tä mälhyejtso, Israel lhayis lhäy'epej lhip tä wujpey, wet wuj tä takhajayhen. Wet häp atsinhay tä t'uye lhamel tä iwo lelesa, tä lhamel itiyej lenowayhyaj häp Dios, häte Dios tach'ote t'at lhameltso wet iwo lelesa.
22Wet niyat ifwenho imälhewek wichi wet yok:
–Ukwe Hebreo leles tä nech'e ichehen tä häpe hin'ol wet thate tewok. Mat elhpej tä atsinha is t'at, yej län.
Currently Selected:
Éx 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.