2~Sam 1
1
David ihanej p'ante tä y'il Saúl
1Tiyäme p'ante tä y'il Saúl, David pile lew'et Siklag tä ileyej tä ikalhi Amalek lhayis. Wet imälhehi Siklag fwalas täkwfwas. 2Wet tä fwala elh näm hin'o tä tälhe Saúl laka'tshayajw'et tä lakhäy hikw'esen wet honhat poyej lhetek, hin'älit tä lelhakli ihi. Tä ichäte David, t'upihchä wet itsinen lakamchetey yäk lete'pe ihi honhat tä n'okwiyej. 3Wet David y'ätshane tä yok:
–¿Chi tä letälhi?
Wet hin'otso ichulho tä yok:
–Oyäm naji, otefwayej Israel lhayis ka'tshayajw'et.
4David inityen tä y'ätshane tä yok:
–Lhek fwen n'oho, ¿atsin'aj m'ak tä iche?
Wet hin'otso ichulho tä yok:
–Häp sip'älis yikch'oye õka'tshayajw'et, wet wujpey tä y'inhen. Hätej Saúl lhäy'e lhäs Jonatán tä y'inhen.
5David y'ätshane manse tä yok:
–¿Wet chäte tä lehanej tä Saúl lhäy'e lhäs Jonatán tä y'inhen?
6Wet manse tä silätwo ichulho tä yok:
–Wet tek hanläk ow'en, ichutlä tä ohoye chenaj tä Gilboa. Wet ow'en Saúl tä itsoklhi lehun, wet kaletas tä letayhfwas ka'tshayajchal lhäy'e hin'ol tä iche'pe y'elatas ihän wet ifwitya. 7Wet Saúl iyahin lefwute, wet hiw'en n'oye wet t'än n'oye. Wet olham ohoye, 8wet y'ätshan n'oye tä yok, “¿Atsi tä ahäpe?” Wet olham ochulho tä oyok, “Ohäpe Amalek lhayis elh.” 9Wet lham yok, “Lhuu ho n'oye wet länn'o, tsi olhak'alh lehilä mat kamaj oläy.” 10Wet olham ohoye wet olän, tsi ohanej tä tek iläyhla. Wet tä pajche y'il, wet ochuma lhetekp'ot lhäy'e lekwet'ak, wet ochäj kana tä ohän ame, iwuk.
11Tä David iläte, wet hich'esajche lew'uy, wet hätej ilhokej hin'ol tä iyej, tä iwoye letetnek tä lewit'äy ihi. 12Wet tafwchehchä tä lhamel y'äyenche Saúl tä y'il, lhäy'e lhäs Jonatán, lhäy'e Lhawuk laka wichi Israel tä lewit'äy ihi tä õ'länhen. Wet lhamel lhaichuyhathen yäk honaj.
13Wet David y'ätshane manse tä silätwo wet yok:
–¿Am atsi tä ahäpe?
Lham ichulho tä yok:
–Olham ohäpe Amalek lhayis elh, mat ow'et Israel.
14Wet David yok:
–¿Wet chäte tä kanowaya tä lelän rey tä Lhawuk itshupiye?
15Wet David t'äne elh laka hin'ol wet ifwenho tä yok:
–¡Mäh län!
Wet lham ilän hin'o tä Amalek lhayis elh, wet y'il.
16Wet David ifwenho tä yok:
–Am tä letumen amej tä awit'äy ihi, tsi am tä ämet tä lhok, “Olham tä olän rey tä Lhawuk itshupiye.”
David y'äyenche Saúl lhäy'e lhäs Jonatán
17David iten letenek tä y'äyenche Saúl tä y'il, lhäy'e lhäs Jonatán, 18wet inityenej chik õ'chufwenej wichi tä ihi Judá. Wet letenekna lhey “Õch'ähiw'ut” wet ihi Jaser lelesaynekhi. Wet yok:
19“¡Israel, noj awujyaj tä ihi aka chenhas!
¡Matche tä y'inhen hin'ol tä khajayhen!
20Yej lewoyay siläta Gat lheley,
wet yej lhen ämeta tä lhehi
lakawayhil tä ihi Askalón,
yämlek niwoya käjyaja Filisteo lhayis ka'tsinhay
wet tek tiyäjejchephä lakäjyaj häp kachuhantsestso.
21“¡Gilboa kachenhas,
is chik tek äp iwomchä
wet is chik ayas nemla itsäy atape!
¡Is chik tek äp lewo aya!
Ihi lhipna tä õt'äsche
lhamel tä khajayhen laka'tshayajp'otes.
Noj leleplehyaj Saúl laka'tshayajp'ot,
mälhyej chik õknitsäya'pe p'ante aceite.
22“Tä pilpej Jonatán lhäy'e Saúl
tä tälhe laka'tshayaj,
tek w'enej chik letayhfwas tä khajayhen
lew'oyis lhäy'e lape
newayej lech'ähil lhäy'e lakatnhates.
23“Saúl lhäy'e Jonatán, oalehumnhay.
Lep'akwekhennaj tä leläyhen,
tanej tä let'inhen kamaj lep'akwekhen.
¡Lenu'pe afwenchey tä kotses tä leläfwenhen!
¡Lenu'pe owalhas tä akhajayhen!
24“¡Israel ka'tsinhay,
afwchehchä tä ley'äyenay Saúl,
häp lham tä iwoyaypej haw'uyisa
tä fwak'anhen tä isis
wet isilatyenejen tuntey tä oro!
25¡Matche tä y'inhen hin'ol tä khajayhen
tä ihi õka'tshayaj!
¡Jonatán y'il tä i'pe chenaj!
26“Oelh Jonatán,
¡wuj tä ofwitajayaj ihi tä otichun hach'oya,
tsi lekäjyenlhipejn'o!
Wuj tä isilataj ahumnhayaj tä leti n'oyej,
inu'pe atsinhay lehumnhayaj.
27¡Matche tä y'inhen hin'ol tä khajayhen!
Täylhi laka'tshayajchal, lhäy'e lakwelheley.”
Currently Selected:
2~Sam 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.