1~Sam 1
1
Häp Elcana lhäy'e lech'efwa Ana
1Iche p'ante hin'o tä lhey Elcana tä tälhe wichi tä tälhe letes Efraín p'ante. Häp lajcha lhey Jeroham wet lechäti lhey Elihú. Elihú lajcha lhey Tohu tä häpe hin'o tä lhey Suf tä lhäs. Wet Elcana lew'et häpe hupuy tä niwuja tä lhey Ramá tä ihi chenhas tä ihi honhat tä lewuk Efraín lhayis. 2Wet Elcana hiw'en lech'efwas täkwfwas, häp elh tä lhey Ana wet elh Penina. Penina leles ihi mat Ana häpe tä naj lelesa.
3Wet nekchämpej nekchämpej Elcana lhäy'e lew'et lheley lhamel yikch'oye laka hupuy wet ihoye õn'okhayajw'et tä ihi Silo yämlek n'okwiyej Lhawuk tä laj letumfwaya wet iwo w'ayhata häp tshäwet tä ilän. Wet iche p'ante Lhawuk laka sacerdotes tä ihi täja, lhamel lheyes Ofni wet Finees, häpehen t'at sacerdote Elí tä leles. 4Wet tä ichätepej häp ifwalatso tä Elcana iwo w'ayhata häp tshäwet tä ilän, lham hiw'enho lech'efwa Penina t'isan lhipey wet ilhokej lham leles tä hin'ol lhäy'e tä atsinhay. 5Mat hiw'enho Ana häp lhip tä lhäy'e lhip tä is, tsi wuj tä ihumin, tej tä Lhawuk tek hich'anlhaye chik iwo lhäsa thayej. 6Mat häp letayhfwa Penina ilhaklitlhipej häp Ana wet iläkwlhi yämlek yen w'et m'ayeka, tsi Lhawuk tek hiw'enho tä lhäs ihi. 7Wet mälhyejpejtso nekchämpej nekchämpej. Tä Ana ihoye häp Lhawuk lew'et, Penina ilhaklitlhipej yäk tafwlhi t'at wet tek tufw häp lhäk. 8Wet häp lech'efwa Elcana yok:
–Ana, ¿chihäte tä letafwlhi? ¿Chihäte tä katufwa häp äk? ¿Chihäte tä afwitajayaj ihi? ¿Hät n'am nu'pe diez ales tä hin'ol laha?
Ana lhahip'altsene Lhawuk
9Häp lhamel ihi p'ante Silo, wet tä ileyejen tä t'ekhen wet iyä, Ana nephä wet yik tä iwo t'alhyaja. Wet häp Elí tä sacerdote itayphä t'at, i'pe laka silla tä iwhäye lepe tä Lhawuk lew'et. 10Wet Ana iwo t'alhyaja tä t'alhe Lhawuk, häp wuj tä lefwitajayaj ihi wet lhäy'e lhip tä tafwlhi. 11Wet yäm kalelhäj lhämet, yok:
–Iwuk tä naj atumfwaya, is chik letetshann'o tä ohäpe akawo wet letichun n'okwe tä wuj tä ofwitajayaj ihi. Yej p'ethet ohilä, häm is chik lew'en n'oho olhäs. Wet olham nech'e oyachajila ame yämlek hich'otla ame ilhokej ifwalas tä ihonhate. Wet tek õyisthichela lew'ole tä ihi lhetek, tä õyenla letetneka tä häpe elh tä amajchet.#Núm 6.5
12Tä taje tä Ana iwo t'alhyajaye Lhawuk, Elí itetshan t'at häp lhayhi. 13Tsi tä iwo t'alhyaja, ts'ilak lepästey tä iläylhi, tek tsaje. Wet Elí yenek häpe atsinha tä w'oknaj, 14wet tahuyej, yok:
–¡Leyej tä alhen w'oknaja! ¡Tiyej kanhi hat'es!
15Mat Ana ichulho wet yok:
–Kha, iwuk, olham ohäpe atsinha tä wuj tä lefwitajayaj ihi. Tek oyäyejne hat'es wok vino, mat owo ot'alhyaja, ofwenho Lhawuk ofwitajayaj. 16Yej fwitaj tä ohäpe atsinha tä naj lehuseka. Ilhokej lewhäy tä oyämlhi t'at yäk athana, tsi wuj tä olhakli ihi wet naj otamseka.
17Elí ichulho wet yok:
–Mäh, atamsek ihi, wet is chik Israel laka Dios hiw'en amho m'ak tä let'alhe.
18Ana yok:
–Is tä lep'altsenn'o.
Wet yäpil wet t'ek, nemhit lefwitajayaj ihi.
Dios ichulho Ana t'alhyaj
19Tä nech'e fwamlafwaj lhamel inechephä wet n'okwiyej häp Lhawuk. Tä ileyej, wet yäple lew'et tä ihi Ramá. Wet Elcana imäyej lech'efwa Ana, wet Lhawuk itichunche 20wet Ana nech'e hich'otshan, wet tä ichäte lewhäy iwo lhäsa. Wet iwo lheya Samuel, häp õlhey tä hätet iwoye õlhämet tä yok, Ot'alheje Dios. Tsi pajche t'alheje Lhawuk.
21Tä nekchäm elh, wet Elcana ihoye Silo, lhäy'e lew'et lheley, yämlek iwo w'ayhata häp tshäwet tä ilän tä hiw'enho häp Lhawuk, mälhyej tä iwoye nekchämpej, wet yäm matche lhämet. 22Mat Ana tek yik, tsi ifwenho lech'efwa, yok:
–Otaye chik olehtej ot'aate han'äfwaj. Wet ochäjiyela Lhawuk wet is chik tajlhame tä imälheyej.
23Wet Elcana ichulho, yok:
–Woye t'at m'ak tä lefwitaj is alhoho. Mälhehchä yämlek lelehtej hat'aate. Wet is chik Lhawuk yäm matche lhämet.
Häpe tä Ana imälhehchä wet ichihelit häp lhäs yäk ilehtej let'aate. 24Tä ichäte lewhäy, ichäje häp Lhawuk lew'et tä ihi Silo, ithatlä w'asetaj tä asnak tä hiw'en tres nekchämes, lhäy'e harina, lhäy'e vino. Wet Samuel kamaj han'äfwaj t'at. 25Tä lhamel ileyej tä ilän w'asetaj, ihäne han'äfwaj häp Elí. 26Wet Ana yok:
–Iwuk, mälhyej tä matche olhämet, olham ohäpe atsinhahte ikana tä i'awhäye tä iwo t'alhyajaye Lhawuk. 27Häpe han'äfwajna tä ot'alheje Lhawuk, wet hiw'en n'oho. 28Tä mälhyejtso, oyachaje häp Lhawuk häpkhilek t'amajchet ilhokej ifwalas tä iläy.
Wet lhamel n'okwiyej p'ante häp Lhawuk.
Currently Selected:
1~Sam 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.