Josué 1
1
Diosin Josué catonni
1Ascatan Moisés niyoatian a fu rafumisiton nan yopai cuscan ashomisi ahuun anu Josué. Moisés Diospan oinmati ipaoni. Ascano Moisés nano nocon Ifo Diosin Josué cunani.
2Yoiquin isca huani, —Uhuun oinmati Moisés man naa. Ascano min natian min caifoan aton niaifo min itiro. Un na mai shara mato inain min caifofo min nanno ato iyotiro unu Jordán pocufaitan nan mai shara fiishcaquin. 3Un Moisés yoiyoni cuscan un nannori mia yoi. Min na mai ano nocoaitian min cahuacacaini na mai ano nantifi un mato inanshquin. 4Tsoa istaipama anoashu chaicoin Líbano ano unu uhuapa nan Eufrates anoashu chaicoin nan Hititafoan aton mai chaicoin ununhuan nan Mediterráneo anori nantifi na mai un mato inain matona inon. 5Min niyoaitiancai tsoan mia nitu huatiroma. Un Moisés fu imisi cuscan un mi fu ipanaca. Uncai mia potapacunacama. Nan mian yopaitian un mi fu iishquin.
6Uhuun yora Israelifo min nan mai shara ano ato iyoshquin. Min shunifo un ato yoiyoni cusca na mai un ato inain. Ascacun uhuun curushhuunshon un mia amapaiyai cuscan huafafainhuun. Shinanquin isca huahuun, “Uhuun Ifo Diosin ua yonoa cuscan un atiroran,” ishon shinanhuun. 7Afanan un mia yoi uhuun curushhuunshon un mia amapaiyai cusca huafafainhuun. “Uhuun Ifo Diosin ua yonoa cuscan un atiroran,” ishon shinanhuun. Moisés mia yonoa cuscan nantifi ahuu. Nanfo cachiquiri huayamahuu. Ahua futsafo tanayamahuu. Min ascaino nantifi min acai cuscan shara iishquin.
8Un mato yonoa cusca nan cunua oinfafaihuun. Min nomuranshon nan cunua cuscan shafatifi non yamutifiri shinanhuun. Min nanscaifin nan cunua cuscan min aashquicai. Ascaino nanti min acai cuscan shara iishquin. Min isharacointiro. 9Un mia yonoa cuscan uhuun curushhuunshon un mia amapaiyai cuscan huafafainhuun. Min raquira caino un mi fu cai. Ascacun shinanquin isca huahuu, “Uhuun Ifo Diosin ua yonoa cuscan un atiroran,” ishon shinanhuun. Futsafoqui musuyamahuun. Ascafiacun shinanquin isca huayamahuu, “Uhuun Ifo Diosin ua yonoa cuscacai un atiromaran,” ishon nannori shinanyamahuu, —ishon nocon Ifo Diosin Josué yoini.
Josué itishara huani na mai shara ano iquicashquin
10Ascano nan Upa Diosin yoini cuscan Josué Israeli niaifo patasharinoafo cunani ato yoishquin. 11—Nocon caifofo nantifi ato yoicahuun ato tushu non nantifi aton ahuarafo itishara huanonfo. Osha rafu non fusti finontan non unu Jordán pocufainnicai nan mai nocon Ifo Diosin noco inainton non fiicai nocona inon, —ishon Josué ato yoini.
12Ascatan Josué Israelifo aton mani rafu non fusti cunani. Rubén ahuun funafo cunafain Gad ahuun funafo cunafain Manasés ahuun funafo atirifiri cunani. Ato yoini isca huaquin.
13—Nocon Ifo Diospan ahuun oinmati Moisés mato yonoa cuscan ointiaquimayamacahuun. Man Moisés tapimana man unu Jordán ocuma futsa ipaima. Man nuquiri ipai mato pushu rasi nuquiri man iishquin. Ascano Moisés mato cumaquin isca huani, “Nocon Ifo Diosicai afanan mato iyofoanfafainnima. Nantian mato tunumashquin nan mai shara mato inain nanno man inon. Man unu Jordán ocuma futsa ipaiyamaino shara itiroran,” ishon Moisés mato yoini. 14Ascano maton ahuinfo non maton facufo non maton inafo nuquiri unu Jordán fari oaiquiri nituyotirofo. Ascafia nocofunu mutsispafoan rucu unu Jordán pocufaintiro maton yora futsafo futan nan mai shara fiishcaquin. Ascano maton ashi non maton piacatifoya man fotiro nan mato noicasmaifo rutushcaquin.
15Ascatari unu Jordán ocuma futsa maton caifo mani futsafoya foyotacahuun nantifi nan caifo futsafo na mai shara icafo ato cuyoshcaquin. Ascano man nuquiri ishara cusca maton caifo mani futsafori na mai shara ano isharatirofo. Nan maton yora mani futsafoan nan mai fiaitian manfin afanan nuquiri unu Jordán fari oaiquiri futiroquin Moisés mato yoiyoni cuscan man mau huafain pushu huafain nuno isharashcaquin, —ishon Josué ato yoini.
16Nannori nicacatan yoiquin isca huanifo,
—Min noco ahuara yonoai cuscan non aashquin. Nan min noco nichiaiquiri non catiro. 17Moisés noco yonoa non nanscacoinmisi cuscan nanscarifiai min noco yonoai cuscan non aashquin. Ascano nocon Ifo Diosin Moisés fu ipaoni cuscan nanscariai mi fu ipapainon. 18Min tsain noco yoiai cuscan huafain min noco yonoshquin ai cuscan futsan nicacasmaiton non rutushquin. Ascano Diospan curushhuunshon mia amapaiyai cuscan huafafainhuun. Shinanquin isca huahuu, “Uhuun Ifo Diosin ua yonoa cuscan un atiroran,” ishon shinanhuun, —ishon Josué yoinifo.
Currently Selected:
Josué 1: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.