Romanos 16
16
Pablon ato tsain shara fomani
1-2Nocon yorahuan Febe Cencrea anoashu matoqui nococun shara huacahuun. Nan ainfoan nocon Ifo tanasharacoianquin. Cencrea anoa icoinra huaafo shara huamisiquin. Yorafo shara huamisiquin. Uari shara huamisi. Fasi nocon Ifohuunoashu yonosharamisi. Ascacun yopai cuscan ashocahuun.
3Priscila futan Aquila u futan Jesucristo yonoshosharamisifo. Ua ato yoisharashocahuun. 4Futsafoan ua rutupaiyainfoan nan rafutan ua numaifoan ato rutuqui rashquinifo. Uhuun caifomari Jesús icoinra huafoan ichanancashon yoimisifo isca huaquin, —Priscila yafi Aquila non fasi atohuun noiran, —ishon yoimisifo.
5Ato pushu ano ichananshori ua ato yoisharashocahuun.
Uhuun yorashta Epeneto ua yoishocahuun. Nantofin Asia anoshon Jesús icoinra huaquin tau huani.
6María mato yonosharashomisiri ua yoishocahuun.
7Uhuun yoran rafuri Andrónico yafi Junias ua yoishocahuun. Nan rafu ufu cunu muran iquinifo. Jesús fu rafumisifoan atohuunoa yoisharamisifo. Un Jesucristo icoinra huataima nan rafutan icoinra huaquin tau huanifo.
8Ampliatohuun un noi. Arifi nocon Ifon catonni. Ua yoisharashocahuun.
9Urbano u futan Jesús yonoshomisi nanrifi ua yoisharashocahuun uhuun yorashta Estaquiri ua yoisharashocahuun.
10Apeles fasi nocofunu shara. Upa Diosin aqui unimai. Atori Jesús yonoshosharamisi. Nanrifi ua yoisharashocahuun.
Aristóbulo yafi ahuun yorafori ua yoisharashocahuun.
11Uhuun yorashta Herodión ua yoisharashocahuun.
Narcisco yafi ahuun yorafoan nocon Ifo icoinra huaafo atorifi ua yoisharashocahuun.
12Trifena yafi Trifosa non nocon yorashta Pérsida ua yoisharashocahuun. Nan ainfofoan nocon Ifo fasi yonosharashomisifo.
13Nocon Ifoan Ruforifi catonni. Ahua uhuun uhuacoin cuscara. Ua cushusharamisi. Nan rafuri ua yoisharashocahuun.
14Asíncrito non Flegonte non Hermes non Patrobas non Hermas non icoinra huaa futsafo atofu icafo ua yoisharashocahuun.
15Filólogo non Julia non Nereo yafi ahuun poi non Olimpas non nantifi icoinra huaa futsafo atofu icafori ua yoishosharacahuun.
16Nantifi noinancanashu munininantanancahuun. Nantifi Jesús icoinra huafoan ichananshon maifoti anoashon mato yoisharanonfo.
17Uhuun yoramishtichin oinfain. Mato fu ichananmisifo futsafoan mato shinanchacamapai afanan Jesushuunoa man nannorisi shinanonma. Non mato cayacafi tapima cuscan nanfoan anorima mato tapimapai. Mato amaquiri shinanmapai afanan icoinra man huanonma. Atomaqui icahuun. 18Afoancai nocon Ifo Cristohuunshon yonomisifoma. Nanfoan ahuara fipaiyaifo fustisi shinanfo. Diosin tsain tapisharafoma aton tsain fustihuunshon ato parapaicani ato amaquiri shinanmashcaquin. 19Nantifiton nicafo man nocon Ifo tanasharacoincun. Asca un matoqui unimacoinni. Ahuara sharafohuunoa tapicoincahuun. Manmain ahuara chacahuunoa tapiyamapainon. Afohuunoa shinanyamacahuun.
20Upa Diosin nocon ointi isharamai cuscan nanton samamashta matomaquinoa Satanás anaiticoin mato afanan ahuusca huanonma. Nocon Ifo Jesús mato shara huashopainon.
21Timoteo un futan Jesús yonoshomisiton mato yoisharapai. Lucio non Jasón non Sosípater nanfo uhuun yorafoan mato yoisharacani.
22Unquian, Tercio, un natian Pablo cunushoni. Urifi nocon Ifohuunshon mato yoisharapai.
23Un Gayo pushu muran icun ua cushumisi. Icoinra huaa futsafori ahuun pushu muran ichanamisifo. Afoanri mato yoisharafo. Erasto yorafoan aton pui cushushomisi nocon yorahuan Cuartori mato yoisharapai.
Ahuun unutaqui Dioshuunoa yoisharani
24Nocon Ifo Jesucristo matohuun ramapai. Nanscari ipainon. 25-26Upan Diosin mato cushusharanon. Un Jesushuunoa mato yoimisi cuscan afi ahuun curushu mato inantiro man tanasharanon. Ipaoni tsoancai Jesucristohuunoa tapiyopaonifoma. Natian nantififain tapitirofo Upa Diosin nan nipanacaton noco nichini Furun Jesucristohuunoa non yoinon. Ishquiai cuscan Upa Diosin ato yononi cuscan nannoricoin cununifo. Manifoannatifoan Jesús icoinra huafain nicasharanonfo. 27Nocon Diosin fustitofin nantifi tapicoianquin. Nocon Ifon Jesucristohuunshon nantififain ahuunoa yoisharapacunonfo. Nanscasi ipanon. Amen. Nanti uhuun tsain unutaqui un mato yoi.
Pablo
Currently Selected:
Romanos 16: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.