2 Samuel 22
22
Nocon Ifo Dioshuunshon David fanainsharashoni
1Ascan nocon Ifo Diosin David numani Saúl rutunonma. Ascatari nan noicasmaifoanri David rutupaifiainfoan Upa Diosin David numani. Ascacun David nocon Ifo Diosi fanainshoni isca huaqui,
2—Uhuun Ifo Diosin min uhuun cushumisicoincun.
Un miqui ichotiro min ua cushunon.
Min uhuun numamisi
ahuara chacafoan ato oinmati un inonma.
3Min uhuun Diosin min uhuun toquirininhuan cuscaran.
Toquiri uhuapacai tsoan shucatiroma.
Nanscarifi ai min u fu icanocai
tsoan mia shucatiroma
uqui nocoshon ua chaca huashquin.
Min uhuun cuno sapaqui pia iquitiroma cuscaran.
Ascan minhuunshon ua chaca huapaifiacaquicai
tsoan ua chaca huatiroma.
Min ua numai min curushhuunoashu un isharanon.
Cunu cuyacoin tarati huashu
tsoa pushu rasi muran iquitiroma
yorafo chaca huashquin.
Nanscarifi ai min uhuun cunu cuyacoin cuscaran.
Ascacun tsoan ua ahuusca huatiroma.
Min ua numamisi.
Yora pofufoan ua fasi chaca huaiton
min ua numa ua ahuusca huanonfoma.
4Ifon, min fasi sharacoincun
un mihuunoa yoipacunaca.
Un mia cufiainton
min ua numamisi ua noicasmaifoan
ua ahuusca huanonfoma.
5Unuhuan fuchoaino yora asatiro.
Nanscarifiaquin yora chacafoan ua namapai.
Un fasi ratucoin ua cuyopaiyaifoanno.
6Ua noicasmaifoan shinanfo
ua samamashta mai huacani.
Un shinanni mun nai.
7Ascan un omitsiscaquin
uhuun Ifo un cufini.
Uhuun Diosi un cufinquin isca huani,
“Uhuun Ifo Diosin ua numapun,” ishon un yoini.
Ascaiton nan icanoshon ua nicani.
8Ascan nocon Ifo Diosin ua noicasmafoqui sinaino
mai yafi nai nayanaiyaini.
9Ahuun ruchoconun coinmanhuan potai cafisca huani
ahuun ashfanpari uru manhuan potai cafisca huani.
Ascaino chii urumanhuain cafiscani.
10Ascan nai murannoashu fupucumuacucahuanaino Diosin fotoni.
Coinmanhuan fisocoin rucu oaino amanaonri Diosin fotoni.
11Ahuun oinmati mutsispacoin a fu nai muran ica
fototiro cuscan Diosin fotoni.
Puiya uhuapanunhuan fuun noyamatiro cuscan
Diosin fuuhuan muran fotoni.
12Coin faquishihuan murannoashu fotoni.
13Asca fotoaino fasi chashacointan
cana fasi piishini.
14Ahuun oi turuica nicatsa.
Nocon Ifo Diosin tsoancai finontiroma
fasi oi ashcafinin nan ua noicasmaifo ato mustaimani.
15Ahuun piiyan cuscara piiyacaino
ua noicasmaifo pashcananfainnifo.
Cana piishicaino ichofoannifo.
16Ascano nocon Ifo Diosihuunoashu ashaintanaino
unuhuan nushmancayan maitsaoriscatani.
Nan mai oni huani cuscari
shafacafi nantifishon ointirofo.
17Asca huashon afin icanoshon ua numani.
Un fasi omitsiscaquin un shinan
ua chacahuaifo cuscan un tunutiroma.
Un unu noacoin muran asai cafisca.
Un ascaiton nocon Ifo Diosin ua numani.
18Ua noicasmaifo fasi curushcoinfofia
uncai ufiri numatiromafia
nocon Ifo Diosin ua numamisi.
19Uficai un numatiroma.
Ahuara fasi chaca un finoainno
natian ua noicasmaifoan ua pacumapaicani.
Nantian nocon Ifo Diosin ua ahuun curush inan
uacai pacumatirofoma.
20Nocon Ifo Diosin uhuun noicoin
uqui fasi unimai.
Ascan ua numa ua iyoanocai
ua noicasmafo uqui nocoshquima.
21-25Nocon Ifo Diosin ua tapima cuscan un huamisi.
Uhuun Diosicai un chaca huamisima
nanscacucai ua potamisima.
Noco yononi cuscan un shinanfafaini.
Ahuun tsain cununi cuscan un potamisima.
Diosin ua oin un ahua chaca shinantama
un ahuun tsain tanacoian.
Nanscacun uhuun nomuran un ahua shinanchacama oinquin
nocon Ifo Diosin ua ahuara shara huashoshquin.
26Nocon Ifo Diosin, mia tanasharamisifo
min atori cushusharashquin.
Nanscarifi ai tsoa nan min yoia cusca amisi
minrifi min ato yoiyomisi cuscan min huaashqui.
27Tsoan ato nomuran shinansharafain chaca huamisima
nocon Ifo Diosin min ato oinmani
minri shinanshara fustifain min ahua chaca huamisima.
Ascafia tsoan chaca huamisifin
min ato ismaicain min main atohuunoa onancoinshon
min ato onaintimashquin.
28Ascan tsoan ahuunoa fusti shinantama
futsafohuuri shinansharacoinquin
futsafo finonpaitamarocon
man tapia Diosi fasi yopacoinquin.
Nanscarafo min ato numashquin.
Ascan nan cacapaimisifoan nantifi finonpaimisifo.
Un tsoa futsa yopaimaran icashon shinanmisifo.
Ascarafofin min nantififain ointaifin
min ato ismashquin afocai ahuama.
29Uhuun Ifon, min uhuun lampara cuscaran chashamashquin.
Icon, Ifon, faquish muranri mian chashamashoshqui.
30Min curushhuunshon un ranushumua mani futsafo un cuyotiro.
Un minhuunoashu cunu cuyacoin ari inatiro.
31Ascan Diosin ahuara shara fustisi huai.
Ifon, min yoiyomisi cuscan nantifi iconcoin.
Tsoan mia yoiquin isca huai,
“Ifon, ua cushusharapun,” ishon yoiaiton
nan cuno sapaqui pia iquitiroma cuscan huaquin
nocon Ifo Diosin ato cushushara.
Nan noicasmaifoancai ato ahuusca huatiroma.
32Nocon Ifo fustifin Diosiquin.
Nan fustifin toquirininhuan cuscaraquin.
Tsoan Diosin shucatiroma noco cushunonma.
33Diosifin cunu cuyacoin pushu rasi tarati hua cuscaraquin.
Ahuun curushhuunoashu noco noicasmaifocai nocoqui nocotiroma.
Diosihuunoashu non isharatiro
noco ahuusca huanonfoma.
34Chasho casharatiro
machi cuya mamaqui nocosharashquin.
Nanscarifi ai un niyoano
ahuarafo ua nitu huapai
Diosin ahuun curushhuunshon ua mutsismashon
ua iyopaiyaiquiri pacutamarocon un nocosharatiro.
35Ua noicasmacaquin ua chaca huapaiyaifoan
Diosin ua itisharahua nocofunun mutsisipa ahuun cuno piacati curushcain un piantiro.
Nanscarifi ai nocon Ifo Diosin ahuun curush ua inain
ua noicasmaifo un ato piancaiton
ua ahuusca huanonfoma.
36Cuno sapa nituhuaticai aqui pia iquitiroma.
Nanscarifi ai mian numahuunoashu
yoshin chaca uhuun nomuran iquitiroma ua chaca huashquin.
Min ua ashomisihuunshon un futsafo finoncoian.
37Min ua mau fai huashoan un pacunonma.
38Ascano nan ua noicasmaifo un ato ichomana
ato rutuqui cuyoshquin.
Un ato cuyoataima un ato mufainquin unuama.
Ascashon un ato cuyocoinni.
39Un ato cuyocoinshon ato shatuqui
futsa afanan funinonfoma.
Uhuun tau naman pacui futsuafo.
40Mian mutsismana ua noicasmaifo ichoshquin.
Ua noicasmaifo min ato finoan
ua ahuusca huanonfoma un ato yononon.
41Min ato umaquinoa ichoni.
Nan ua noicasmaifo nantifi un ato cuyoquin futsanon.
42Ua noicasmaifo cunacani futsan ato numanon.
Ascafiaitocai tsoan ato numai oama.
Ascaino nocon Ifo Diosiri cunafiaifono
arificai ato cumanima.
43Un ato cuyocoiano mai mapo ointsa inifo.
Yoran unmaintinoa mai mapo matsotiro cusca huaquin un ato potani.
44Uhuun yorafoan uhuunoa tsain chaca huafiafo
min ua numa uhuunoa afanan ahua chaca yoinonfoma.
Mian cushuaino un mani futsafoan
un aton niaifo ica.
Un futsafo oinyamafiamisishaquin
un ato yonoa cuscan minhuunshon ua nicasharafo.
45Futsafo uhuun caifoma ratucani uqui fuafo.
Uhuunoa nicai fucani
un ato yonoai cuscan samamashta aashcaquin.
46Samamashta ratucani
aton cunu cuyacoin muran tarati huayacucanashu
ratucani taritariyanan uqui fuafo.
47¡Ifo Diosin, minfin uhuun toquirininhuan cuscaran nipanaca!
Tsoan mia anoa shucatiroma.
Min ua cushupacunaca.
Uhuun Numamisi nocon Ifo Diosin nantifi finoncoian.
¡Nannori nantifi yoipacupainon!
48Tsoan ua chaca huaifin min ato ua copishoniquin.
Min curushhuunshon un caifo futsafo finoan
uhuun yonomati inonfo.
49Ua noicasmacaquin pofufoan
ua chaca huapaiyaifo
nocon Ifo Diosin min ua cushushara
ua ahuusca huanonfoma.
Uhuun Ifon, futsafoanri ua rutupaifiainfoan
mian numamisi ua rutunonfoma.
50Uhuun Ifon mian shara huamisi.
Ascan un manifoti mihuunoa yoicai.
Un ato yoiquin isca huai,
“Uhuun Ifo Diosi fasi sharacoin
ahuamamishti huatiro.
Tsoan uhuun Ifo finontiromaran,” ishon minhuunoa un ato yoishquin.
Un mihuunoashu unimacain fanain sharashquin.
51Upa Diosin nonfin min yora Israelifo.
Mian catonni uhuun caifoan un aton niaifo inon.
Ascano noco noicasmacaquin noco rutupaifiaifoan
min curushhuunshon un ato finoncoian.
Min ua catoan cuscan ua noiquin unupacunacama.
Ua non uhuun facufo non uhuun funafori
min noco noiai cuscacai unupacunacamaran, —ishon David yoini.
Currently Selected:
2 Samuel 22: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.