Tito 1
1
Ri Pablo kuya pan rutzil uwach ri Tito
1Ri'in in Pablo, in aj chak re ri Dios yey in taqo'n re ri Qanimajawal Jesucristo. Ri chak uya'om chwe e keb'enuto' ri eb'ucha'om Rire cha' kakub'i' kik'u'x ruk', kaketa'maj chi utz ri Q'ijsaq y keb'in jusuk' chwach 2cha' jela' kakikub'a' kik'u'x che uk'ulik ri kik'aslemal na jinta utaqexik. Ma ri Dios xub'i'tisij lo wa k'aslemal echiri' k'amaja' kajeqer lo ruwachulew, y Rire na ku'an ta raq'ub'al. 3Yey echiri' xopon ruq'ijol re kaq'alajisax ri Utzilaj Tzij, ri Dios Qakolob'enel xuya panuq'ab' kantzijoj wa' chikiwach ri tikawex.
4Kantz'ib'aj k'u pan wa' wa carta chawe ri'at Tito, ri paqatzij wi at pacha' nuk'ajol chupa rub'i' ri Cristo, ma junam ri kub'ulib'al qak'u'x ruk' Rire. Chak'ulu k'u ri unimal rutzil k'u'xaj, ri k'axna'b'al k'u'xaj y ri utzil chomal re ri Qaqaw Dios y re ri Qanimajawal Jesucristo Qakolob'enel.
Ruchak ri Tito chupa ri isla Creta
5Ri'in xatinya kan chila' chupa ri isla Creta cha' kayijb'a' taq ri chaqal kan u'anik y keb'akoj k'u e aj wach pa riglesia chujujunal tinamit, jela' pacha' ri ximb'i'ij kan chawe.
Ri b'inik silab'ik taqal chike ri e aj wach y ri e aj k'amal kiwach rutinamit ri Dios
6E juna aj wach re riglesia lik chirajawaxik jusuk' rub'inik usilab'ik cha' na jinta kach'a'tib'en re. K'ola jusuk' ruk' ri rixoqil yey ri ralk'o'al chirajawaxik kikojom rub'i' ri Cristo, e kojol tzij y na katataj ta k'u chike e aj mak o e titz'itaq.
7Ek'u ri' ri ya'tal che ku'ana aj k'amal kiwach rutinamit ri Dios, lik chirajawaxik e jusuk' rub'inik usilab'ik cha' na jinta kach'a'tib'en re, mu'an nim chirib'il rib', na ch'i'ch'oj ta uk'u'x, na q'ab'a'rel taj, na aj ch'a'oj taj, na rayinel taj re puaq kach'ak ruk' sokoso'nik. 8Yey cheb'uk'ulu chi utz taq ri keb'opon chirocho, chuya'a uk'u'x che u'anik ri utz, lik chuch'ob'o chi utz ri ku'ano, chu'ana ri lik jusuk', lik chuya'a rib' puq'ab' ri Dios y lik churiqa uchajixik rib' chwach ronoje ri na utz taj. 9E chutaqej ri saqil Utzilaj Tzij re ri Dios k'utum chwach#2 Ts. 2:15 cha' jela' kuriq kapixab'an ruk' chomilaj k'utunik y kukoj wa' pa kijolom ri tikawex, ri kakib'i'ij na qatzij ta wa k'utunik.
Taq ri kaki'an k'utunik na saqil taj
10Ma lik e k'i ri e titz'itaq, kakik'ut ri na jinta uchak y e sokoso'nel. Y chike taq wa' e k'o ri lik keb'ok il che ri retalil re circuncisión. 11Maya k'u luwar chike wa' wa winaq kek'utunik, ma kakisachisaj kina'oj uk'iyal familias ruk' ri kik'utunik. Rike xew kakaj keb'eyomar ruk' ri k'utunik kaki'ano yey wa' lik k'ixb'al uwach.
12Ojertan k'o jun q'alajisanel aj Creta, jewa' xub'i'ij chwi rutinamit rire: “Ri e aj Creta lik xex wi e aj raq'ul, pacha' e itzel chikop, lik e japjatel y lik e xepu'ab'”#1:12 Ri xtz'ib'an re wa' e jun achi Epiménides rub'i', yey rire lik k'o uwach rojertan. xcha'. 13Yey ri xub'i'ij wa' wa'chi lik qatzij; e uwari'che chirajawaxik lik chach'a'b'ej kipa cha' ketiki' chupa ri saqil k'utunik, 14y jek'ula' na keb'ok ta il che taq ri tzijonik xa kimololem raj judi'ab' y na keb'ok tane il che ri taqanik ke ri winaq kiya'om kan ri Q'ijsaq.
15E junoq saqil runa'oj, ronoje ri chom chwach ri Dios, ri' e lik chom chwach rire. No'j ri sachinaq runa'oj, ri na kukoj ta ri Q'ijsaq, ri' ronoje lik ch'ul chwach ma ch'ul runa'oj y ri ranima'; y jek'ula' na kuna'b'ej taj sa' ri chom y sa' ri na chom taj. 16Tob' kub'i'ij reta'am uwach ri Dios; pero ruk' ri ku'ano, kaq'alajinik na reta'am ta uwach. Ma xaqi itzel uk'u'x, aj palajiy tzij y na jinta k'ana utz ku'an chwach ri Dios.
Currently Selected:
Tito 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.