Juan 15
15
Ri Jesús e ri saqil raqan uva yey ri'oj oj ruq'ab'
1»In ri in saqil raqan uva y ri Nuqaw e ri aj chakunel chupa taq ri uva. 2We k'o k'u juna uq'ab' ri uva na kuya ta uwach, Rire kuq'at b'i. No'j k'u ri kuya uwach, xa e kujal uwi' re ku'an chom che cha' jela' kuya más uwach. 3Jek'ula' ri'ix 'anom chi chom chiwe ruma ri k'utunik nu'anom chiwach.
4»Miwesaj iwib' chwij, jek'ula' xa jun qa'anom, ri'ix wuk' ri'in y ri'in iwuk' ri'ix. Ma e pacha' juna uq'ab' che' na kawachin ta xa utukel we kesax che ri raqan; jek'ula' ri' ri'ix, na utz taj kixwachinik we kiwesaj iwib' chwij.
5»In ri in raqan ri tiko'n yey ri'ix ix ruq'ab'. China k'u ri u'anom xa jun wuk' ri'in yey ri'in in xa jun ruk' rire, ri' lik kawachinik. Ma we iwesam iwib' chwij, na jinta kich'ij u'anik. 6China k'u ri karesaj rib' chwij, jela' ka'an che pacha' ruq'ab' che' na jinta uchak, kachetik y kak'aq b'i. Kachaqij k'ut, tek'uchiri' kamolik y kaporox pa aq'.
7»Yey we e la' xa jun i'anom ri'ix wuk' y na kik'ow ta chik'u'x taq ri nuk'utum chiwach, chitz'onoj k'u ri' sa' taq ri kiwaj y kaya'taj na chiwe. 8Ri Nuqaw lik kayaki' uq'ij echiri' ri'ix kiya uk'iyal ijiq'ob'alil y ruk' wa' kaq'alajinik pa saqil wi ix nutijo'n.
9»Jek'ula' pacha' ri Nuqaw lik k'ax kinuna' ri'in, jek'uri'la' ri'in k'ax kixinna' ri'ix. Lik k'ut miwesaj iwib' chupa ri rutzil nuk'u'x chiwe. 10We e ki'an janipa ri kixintaq che, kixk'oji' k'u ri' chupa wa rutzil nuk'u'x, jela' pacha' ri'in nu'anom janipa ri inutaqom ri Nuqaw che u'anik yey in k'o chupa ri rutzil uk'u'x Rire.
11»Ximb'i'ij wa' chiwe cha' ri nuki'kotemal kak'oji' iwuk' y kanoj k'u ri' ri iwanima' che ki'kotemal.
12»Ek'u nutaqanik wa' kanya chiwe: Lik k'ax china'a iwib' chiwach jela' pacha' ri'in lik k'ax kixinna'o. 13Na jinta juna k'utub'al re ri rutzil k'u'xaj más nim chwa wa': E junoq kuya ruk'aslem che uto'ik jun chik tob' ne kakam ruma.
14»Ri'ix ix wamigos we e la' e ki'an janipa ri kixintaq che u'anik. 15Na kamb'i'ij ta chi ne “waj chak” chiwe, ma e juna aj chak na reta'am taj sa' ri ku'an ri rajaw. Kamb'i'ij k'u chiwe “ix wamigos”, ma nuya'om chi reta'maxik chiwe ronoje ri ub'i'im lo ri Nuqaw chwe. 16Na ix ta xixcha'w we ri'in, in ri xincha'w iwe. Yey nuya'om piq'ab' ki'ana ri nuchak y jela' kiya uk'iyal ijiq'ob'alil y wa' na jinta uk'isik. Yey janipa k'u ri kitz'onoj che ri Nuqaw pa ri nub'i', Rire kuya na chiwe. 17Ek'u kixintaq che u'anik wa': K'ax china'a iwib' chiwach.
Ri tzel keb'ilow re ri Jesús
18»We tzel kixkil ri winaq che ruwachulew, chiweta'maj e ri'in ri nab'e tzel kinkilo. 19We ta e la' junam rib'inik ri'ix kuk' ri tikawex re ruwachulew, ri' lik k'ax kixna'ik. No'j in xincha'w iwe ri'ix chikixo'l ri winaq; e uwari'che tzel kixilik. 20K'una chik'u'x ri nub'i'im chiwe: Na jinta juna aj chak más k'o uwach chwa ri rajaw. We ri'in internab'em ruk' k'axk'ob'ik, jela' ri' ka'an chiwe ri'ix, kixternab'ex ruk' k'axk'ob'ik. Yey we e k'o ri kitaqem ri nutzij ri'in, jek'ula' ri', e k'o ri kakitaqej ri kik'ut ri'ix. 21Pero ri kixkiternab'ej ruk' k'ax ruma ikojom ri nub'i', e kaki'an wa' ruma na keta'am ta uwach ri xintaqaw loq.
22»We tamaji xink'un ri'in y tamaji xink'ut rutzij ri Nuqaw chikiwach, na jinta k'u kimak ri' ruma na xkik'ul ta wa tzij. No'j ri'in xink'unik y xink'ut rutzij ri Nuqaw chikiwach; ruma k'u wa', na jinta junoq chike utz kub'i'ij na jinta umak. 23Ma e ri tzel keb'ilow we ri'in, ri' e tzel kakil ri Nuqaw. 24Na jinta k'u kimak we tamaji nu'anom uk'iyal milagros chikiwach yey wa' na jinta chi ne junoq 'anayom re. No'j rike kilom ronoje taq wa'; y na ruk' ta k'u ri', tzel kinkil ri'in y tzel kakil ri Nuqaw.
25»Ek'u xu'an taq wa' cha' lik e ku'ana janipa ri tz'ib'ital kan pa ri Tzij Pixab' k'o pakiq'ab' rike:
Tzel xinkilo tob' na jinta numak Sal. 35:19
kacha'.
26»Yey echiri' kinopon ruk' ri Nuqaw, kantaq lo Jun To'b'el iwe re kunimarisaj ik'u'x. Rire kape ruk' ri Nuqaw y e Q'alajisanel re ri Q'ijsaq. Ek'uchiri' kak'unik, kaq'alajisan chiwach ri'ix panuwi ri'in. 27Yey ri'ix kixq'alajisan na panuwi ri'in, ma ix k'oji'naq wuk' chwi ri jeqeb'al lo ri nuchak.
Currently Selected:
Juan 15: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.