Filemón 1
1
Ri Pablo kuya pan rutzil uwach ri Filemón
1Ri'in in Pablo, in k'o pa cárcel ruma kintzijon puwi ri Qanimajawal Jesucristo. Junam ruk' ri hermano Timoteo kaqataq b'i wa carta che'la Filemón, ri na loq' ta k'ax kana'w e la yey lal qachb'i'il chupa ruchak ri Dios. 2Kaqaya pan rutzil kiwach ri hermana Apia y ri hermano Arquipo, ri qachb'i'il lik uya'om rib' che u'anik ruchak ri Dios,#1:2 “Ri qachb'i'il lik uya'om rib' che u'anik ruchak ri Dios”: Pa ri ch'a'tem griego kub'i'ij “ri qachb'i'il pa ch'a'oj”. yey kaqaya pan rutzil kiwach ri hermanos kakimol kib' pa ocho la. 3K'ulu k'u alaq ri unimal rutzil k'u'xaj y ri utzil chomal re ri Qaqaw Dios y re ri Qanimajawal Jesucristo.
Ri rutzil uk'u'x y ri kub'ulib'al uk'u'x ri Filemón
4Echiri' kan'an orar, xaqi kak'un la chi nuk'u'x y kintioxin k'u che ri Nuqaw Dios uma rilal. 5Ma nutom lik k'ax kana' la ri Qanimajawal Jesucristo y lik kub'ul k'u'x la ruk' yey kak'ut la ri rutzil k'u'x la chike konoje ri kikojom rub'i'. 6Ek'u ri kuaj ri'in e keta'maj la ronoje ri utz ya'tal paqaq'ab' kaqa'ano ruma xa oj jun ruk' ri Cristo, cha' jela' ri kub'ulib'al k'u'x la ruk' Rire k'o kutiqoj chike jujun chik. 7Hermano, ri'oj lik kojki'kotik y lik nimarinaq qak'u'x ruma ri rutzil k'u'xaj k'utum la chike ri kikojom rub'i' ri Cristo, ma ruk' wa' kowirinaq kik'u'x rike.
Ri Pablo kach'aw puwi ri Onésimo
8E uwari'che, k'o kuaj kantz'onoj ko che'la. Tob' ri Cristo uya'om panuq'ab' ri'in kantaq la che u'anik ri lik ub'e, na kan'an ta wa'; 9ek'u ri kan'ano e kinelaj ko che'la ruma ri rutzil k'u'x la wuk'. Ri'in in Pablo, in chi nimalaj winaq, yey wo'ora in k'o pa cárcel ruma kintzijon puwi ri Cristo; 10kinch'aw ko chiwach la puwi ri Onésimo.#1:10 Ri Filemón xuloq' ri Onésimo re u “esclavo”. Na ruk' ta k'u ri', ri Onésimo xanimaj b'i. Rojertan we juna esclavo ku'an wa', puq'ab' ri rajaw k'o wi kuya pa k'ax o kukamisaj. Kil “esclavo” pa vocabulario. Rire wo'ora e nuk'ajol chupa rub'i' ri Cristo, ma wuma ri'in, rire xukoj rub'i' ri Cristo wara pa wa cárcel.
11E ri petinaq loq, ri Onésimo e jun aj chak la na xu'an ta utzilaj to'b'el che'la, no'j wo'ora e jun utzilaj to'b'el che rilal y jenela' chwe ri'in. 12Rire lik uk'u'x wanima'; na ruk' ta k'u ri', kantaq tanchi ub'i che'la, 13tob' lik kuaj ri'in kak'oji' wuk' pak'axel rilal cha' kinuto'o janipa chi q'ij in k'o pa cárcel ruma kantzijoj ri Utzilaj Tzij. 14Pero na jinta k'o xuaj xin'an xa chirij wi' la. We ka'an la wa kantz'onoj che'la, na kuaj taj ka'an la wa' ruma kantaq la che, ma e ri kuaj ri'in e ka'an la wa' ruma lik kalax pa anima' la.
15Laj k'o ne xutiqoj ri xrik'owib'ej ri Onésimo, ma tob' rire xel uk' la jujun q'ij, ek'u ri' wo'ora na xa ta chi ajilam q'ij kak'oji' uk' la 16re to'b'el e la, yey rire e jun hermano na loq' ta k'ax kana'w re. Ri'in lik k'ax kanna'o yey wo'ora más ne k'ax kana' rilal, ma e to'b'el e la, yey rilal ruk' rire chaq' ib' alaq chupa rub'i' ri Qanimajawal.
17E uwari'che, we kuna' k'u'x la junam qachb'i'il qib' chupa ruchak ri Qanimajawal Jesucristo, k'ulu k'u la ri Onésimo pacha' e ri'in ri kink'ul la. 18We rire k'o u'anom che'la o we k'o uk'as uk' la, kojo la wa k'as pa nub'i' ri'in y jela' kantoj che'la.
19Ri'in in Pablo, in kintz'ib'an re wa' ruk' ri nuq'ab': In kintojow re ruk'as. Na kajawax tane k'ut kankuxtaj ri k'as rilal wuk' ri'in, ma wuma ri'in xriq la ri k'aslemal chwach ri Dios, tob' wa' na kantz'onoj taj katoj la chwe. 20Hermano, ruma k'ax kana' la ri Qanimajawal; 'ana ko la wa kantz'onoj che'la. Nimarisaj k'u la ri nuk'u'x ruk' wa ka'an la che ri Onésimo. 21Kintz'ib'an pan uk' la ruk' kub'ulib'al nuk'u'x, ma weta'am kik'ow ne uwi' ri ka'an la chwa wa kantz'onoj che'la. 22Yijb'a' k'u pan la juna luwar pa kink'oji' wi, ma kub'ul nuk'u'x kinopon tanchi uk' la, we ri Dios kuya luwar kinel b'i pa wa cárcel pacha' ri tz'onom alaq panuwi' chwach Rire.
K'isb'al uch'a'tem ri Pablo che ri Filemón
23Ri Epafras, ri wachb'i'il wara pa oj tz'apil wi ruma oj re ri Qanimajawal Jesucristo, kuya pan rutzil wach la. 24Jenela', kakiya pan rutzil wach la ri Marcos, ri Aristarco, ri Demas y ri Lucas, ri e wachb'i'il chupa ruchak ri Qaqaw. 25K'ola k'u pa anima' alaq ri unimal rutzil uk'u'x ri Qanimajawal Jesucristo. Amén.
Currently Selected:
Filemón 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.