Santiago 4
4
Me'ek qak'u'x ruk' ri xa re ruwachulew
1¿Pa taq kape wi ri ch'a'oj y ri oyowal chiwach alaq? Wa' pa anima' alaq kape wi, ma ri rayib'al e alaq e pacha' k'o pa ch'a'oj ruk' ri karaj ri Dios che alaq. 2Lik k'o karayij alaq yey wa' na kaya'taj ta che alaq. Kak'is k'u ib' alaq che retzelal k'u'xaj; ruma k'u ri' katij alaq uq'ij che uk'ulik ri ka'aj alaq, kach'o'jin alaq y ka'an ne alaq kamik y ch'a'oj. Pero na kak'ul ta alaq ri ka'aj alaq ma na katz'onoj ta alaq wa' che ri Dios. 3Yey ri katz'onoj alaq, na kak'ul ta alaq ma na utz ta utz'onoxik ka'an alaq. Ma ri katz'onoj alaq xa e re katz'ila' alaq che ri rayib'al alaq.
4Ralaq ri na jusuk' ta ri anima' alaq chwach ri Dios, ¿na eta'am ta kami alaq we jun kujunimaj rib' ruk' taq ri rayinik xa re ruwachulew, e junam ruk' kach'o'jin chirij ri Dios? China k'u ri ke'ek uk'u'x ruk' ri rayinik xa re ruwachulew, ri' e ku'ana aj retzelal k'u'x chirij ri Dios. 5Laj kach'ob' k'u alaq raqan na il ta uwach Ruch'a'tem ri Dios pa kub'i'ij wi: «Ri Ruxlab'ixel uya'om ri Dios pa qanima' lik k'ax kojuna'o y lik na kuk'ul ta uk'u'x we lik e ke'ek qak'u'x ruk' taq ri xa re ruwachulew»#Éx. 20:4-5; Dt. 4:24; Zac. 8:2 kacha'. 6Pero ri Dios lik nim ri unimal rutzil uk'u'x kuya chiqe. Ruma la' jewa' tz'ib'ital pa Ruch'a'tem:
Ri Dios uyakom rib' chikij
janipa ri kakitak'ab'a' kiq'ij;
no'j uya'om ri unimal rutzil uk'u'x chike
janipa ri kaki'an ch'uti'n che kib' Pr. 3:34
kacha'.
7E uwari'che, ya'a ib' alaq puq'ab' ri Dios; ch'ija alaq uchuq'ab' ritzel winaq y jek'ula' rire kanimaj chiwach alaq. 8Lik qib' alaq ruk' ri Dios y jela' Rire kaqib' uk' ralaq. Ralaq ri k'o alaq pa mak, chomaj alaq ri b'inik silab'ik alaq. Ek'u ralaq ri xa keb' k'u'x alaq, ri ka'aj alaq k'ax kana' alaq ri Dios yey lik ke'ek k'u'x alaq ruk' ri mak re ruwachulew, lik chomaj ri anima' alaq che wa'. 9Chub'isoj k'u'x alaq ri 'anom alaq, k'ax chuna'a k'u'x alaq y choq' alaq ruma wa'. Ek'u ri' ri tze' alaq chu'ana oq'ej y ri ki'kotemal alaq chu'ana b'is. 10'Ana k'u alaq ch'uti'n che ib' alaq chwach ri Dios; yey we ka'an k'u alaq wa', Rire kuyak q'ij alaq.
Maqach'a'tib'ej qib' chiqawach
11Hermanos, mach'a'tib'ej ib' alaq chiwach alaq. Ma e ri kach'a't chirij ri ratz-uchaq' y kuq'at tzij puwi' xa pa re rire, ri' e junam ruk' e kach'a't chirij ri Tzij Pixab' y kuq'at tzij puwi wa'. Yey we ka'an la wa', ri' e ke'eloq na lal ta 'anal re ri Tzij Pixab'; ek'u ka'an che ib' la lal aj q'atal tzij puwi'. 12Ma xa Jun ri ya'yom lo re ri Tzij Pixab' y xew Rire k'o puq'ab' kojukolob'ej o kusach qawach. No'j rilal ¿sa' ri wach la cha' xa pa e la kaq'at la tzij puwi jun chik?
Na qeta'am taj sa' ri kaqak'ulumaj chwe'q
13Wo'ora tape alaq, ri jewa' kab'i'ij alaq: «Waq'ij o chwe'q koj'ek pa jun tinamit y kojk'oji' chila' jun junab'; kaqa'an k'u qak'ay y kaqach'ak qarajil» kacha alaq. 14Yey na eta'am tane k'ana alaq sa' ri kak'ulumaj alaq ri chwe'q. Ma ¿sa' ri unimal uwach ri k'aslemal alaq? Paqatzij wi, xa pacha' sutz', ma xa pa joq'otaj kawinaqirik y tek'uchiri' kasachik. 15Yey ri chirajawaxik wi e kab'i'ij alaq wa': «We ri Qaqaw karaj, kojk'asi'ik y kaqa'an wa'riri' o kaqa'an lele'» kacha alaq. 16No'j ri ka'an ralaq, e lik ka'an alaq nim che ib' alaq echiri' katak'ab'a' q'ij alaq. Yey lik na usuk' taj we junoq kutak'ab'a' uq'ij. 17E junoq reta'am sa' ri utz chirajawaxik ka'anik yey na ku'an taj, ri' kamakunik.
Currently Selected:
Santiago 4: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.