1 Juan 5
5
Kaqach'ij uchuq'ab' ri na utz taj ruma ri kub'ulib'al qak'u'x ruk' ri Jesús
1E junoq kukojo ri Jesús e Ucha'o'n lo ri Dios, ri' alaxinaq chi chupa rub'i' ri Dios. Yey we k'ax kaqana' ri Dios, ri' k'ax keqana' ri e ralk'o'al Rire. 2Chwi k'u ri' wa' kaqeta'maj k'ax keqana' ri e ralk'o'al ri Dios, we k'ax kaqana' ri Dios y kojtajin che u'anik ri kub'i'ij Rutzij Upixab'. 3Ma ri k'utub'al re ri rutzil qak'u'x che ri Dios, e ri kaqa'an janipa ri kub'i'ij Rutzij Upixab' yey wa' na k'ayew taj ka'anik. 4Ma qonoje ri oj alaxinaq chi chupa rub'i' ri Dios, kaqach'ij uchuq'ab' ri na utz taj k'o che ruwachulew, yey kaqa'an wa' ruma ri kub'ulib'al qak'u'x ruk' Rire. 5¿China k'u ri kach'ijow uchuq'ab' ri na utz taj k'o che ruwachulew? E junoq kukojo ri Jesús e Uk'ajol ri Dios.
Ri uq'alajisam ri Dios puwi Ruk'ajol
6Ri Qanimajawal Jesucristo xk'un che ruwachulew y xq'alajin k'ut china Rire echiri' xuk'ul ri ya' re bautismo#Mt. 3:16 y echiri' xturuw rukik'el; na xew ta k'u ruma ri bautismo ruk' ya' ma ruk' ne rukik'el xturuwik. Ek'u ri Ruxlab'ixel ri Dios xq'alajisan re wa'; yey ronoje ri kub'i'ij Rire, lik qatzij. 7E oxib' k'u ri keq'alajisan puwi ri lik qatzij:#5:7-8 Pa ri versículo 7 y jeqeb'al re ri versículo 8, k'o jujun manuscritos kakib'i'ij: «E oxib' k'u ri e k'o chila' chikaj keq'alajisan puwi ri lik qatzij: Ri Qaqaw Dios, ri Tzij y ri Ruxlab'ixel ri Dios. Koxchal k'u ri' wa' xa jun ki'anom. Yey e oxib' ri keq'alajisan puwi ri lik qatzij wara che ruwachulew.» 8ri Ruxlab'ixel ri Dios, ri bautismo re ri Jesús ruk' ya' y rukik'el ri Jesús xturuw chwa ri cruz; yey uroxchal wa' junam ri kakiq'alajisaj.
9Ri'oj kaqak'ul ri kakiq'alajisaj ri tikawex, pero janipa ri kub'i'ij ri Dios más k'o uwach chwa ri kakib'i'ij ri tikawex; ruma k'u ri' lik chirajawaxik kaqak'ul janipa ri kuq'alajisaj Rire puwi Ruk'ajol. 10E junoq kub'ul uk'u'x ruk' Ruk'ajol ri Dios, ri' ukojom janipa ri uq'alajisam ri Dios puwi Ruk'ajol. No'j ri na kukoj ta ri kub'i'ij ri Dios, e pacha' ku'an aj raq'ul che ri Dios, ma na kukoj ta ri uq'alajisam ri Dios puwi Ruk'ajol. 11Y ri q'alajisam e wa': Ri Dios uya'om qak'aslemal na jinta utaqexik, yey wa' wa k'aslemal xew kariqitaj ruma Ruk'ajol. 12E junoq uk'ulum Ruk'ajol ri Dios pa ranima', ri' ya'tal chi wa' wa k'aslemal che; no'j e junoq na uk'ulum ta Ruk'ajol ri Dios pa ranima', ri' na ya'tal ta wa' wa k'aslemal che. 13Kantz'ib'aj pan wa' che alaq ri kojom alaq rub'i' Ruk'ajol ri Dios, cha' keta'maj alaq k'o k'aslemal alaq na jinta utaqexik.
K'isb'al uch'a'tem ri Juan chike ri hermanos
14Kub'ul qak'u'x ruk' ri Dios ma qeta'am we ri kaqatz'onoj che e chirij janipa ri karaj Rire, kojuta k'u ri'. 15Yey we qeta'am Rire kojuto, qeta'am k'u ri' kuya chiqe sa' ri qatz'onom che.
16We k'o junoq karil juna hermano katzaq pa mak, yey we wa' wa mak na kuk'am tub'i pa ri kamik chwach ri Dios,#1 Jn. 2:22; 4:3; Mt. 12:31-32; Heb. 6:4-6 chu'ana k'u orar ri' cha' wa hermano kutzelej utzij chwach ri Dios y jek'ula' ri Dios kuya uk'aslemal. Wa' e we ri mak na kuk'am tub'i pa ri kamik chwach ri Dios. Pero k'o mak kuk'am b'i jun pa ri kamik chwach ri Dios;#5:16 “Mak kuk'am b'i jun pa ri kamik chwach ri Dios”: Wa' e ke'elawi, ri mak más nim e we jun na karaj taj kukoj rub'i' ri Cristo, ma ri ka'anaw re wa' na jinta uk'aslemal chwach ri Dios. chwi k'u ri' wa' na kamb'i'ij taj we k'a ka'an orar puwi ri ka'anaw re. 17Ronoje ri na jusuk' taj ka'anik e mak chwach ri Dios, pero k'o mak na kuk'am tub'i jun pa ri kamik na jinta utaqexik.
18Qeta'am k'ut, e janipa ri eb'alaxinaq chupa rub'i' ri Dios, na kakitijoj ta chi kib' che u'anik ri mak; ma Ruk'ajol ri Dios e kachajin ke cha' na ketzaq ta puq'ab' ritzel winaq. 19Lik k'u qeta'am oj re ri Dios, y qeta'am taq ri winaq re ruwachulew puq'ab' ritzel winaq e k'o wi. 20Y qeta'am k'ut, Ruk'ajol ri Dios xk'un che ruwachulew, yey uya'om qana'oj cha' kaqeta'maj uwach ri Jun paqatzij wi e Dios. Y oj k'o k'u puq'ab' ri paqatzij wi e Dios, ma oj k'o puq'ab' Ruk'ajol Jesucristo. Xew Rire paqatzij wi e Dios y e Rire ri kuya ri k'aslemal na jinta utaqexik. 21Alaq walk'o'al chupa rub'i' ri Dios, maloq'nimaj alaq taq ri tiox. Amén.
Currently Selected:
1 Juan 5: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.