1 Juan 2
2
Ri Qanimajawal Jesucristo kach'aw paqawi' chwach ri Dios
1Ralaq alaq walk'o'al chupa rub'i' ri Dios, kantz'ib'aj k'u pan wa' che alaq cha' na kamakun ta alaq. Yey we k'o junoq che alaq kamakunik, cheta'maj alaq k'o Jun kach'aw paqawi' chwach ri Qaqaw, wa' e ri Qanimajawal Jesucristo, yey Rire lik jusuk'. 2E Rire ri xuya rib' xkam paqak'axel re tojb'al ri qamak. Y na xew ta re tojb'al ri qamak ri'oj, ma re tojb'al ri kimak konoje ri e k'o che ruwachulew.
3We kaqa'an ri taqanik kuya ri Dios chiqe, kaq'alajin k'u ri' paqatzij wi qeta'am uwach Rire. 4We k'o kab'i'n re: «Ri'in weta'am uwach ri Dios» yey na ku'an ta janipa ri taqanik kuya ri Dios che, ri' xa aj raq'ul y na jinta ri Q'ijsaq ruk'. 5No'j ri kutaqej ri kub'i'ij ri Dios, ri' kaq'alajinik paqatzij wi lik k'ax kuna' ri Dios. We jek'ula' kaqa'an ri'oj, q'alaj k'u ri' paqatzij wi xa jun qa'anom ruk' Rire. 6We k'o junoq kub'i'ij xa jun u'anom ruk' ri Dios, chirajawaxik k'u ri' chu'ana che rub'inik jela' pacha' rub'inik ri Qanimajawal Jesucristo.
Ri taqanik puwi ri saqil rutzil k'u'xaj
7Hermanos, na kantz'ib'aj ta jun k'ak' tzijpixab'#2:7 Wa tzijpixab' e ri k'ax kaqana' qib' chiqawach ruk' ri saqil rutzil k'u'xaj xuk'ut ri Jesús. Jn. 13:34 che alaq, ma e kantz'ib'aj chwi ri xex chi k'o uk' alaq chwi ri petinaq loq. Wa ojer tzijpixab' e ri xex chi tom wi lo alaq. 8Na ruk' ta k'u ri', e pacha' k'ak' wa kantz'ib'aj che alaq, ma wa' lik xq'alajin che rub'inik ri Jesús yey kaq'alajin k'u che ri b'inik silab'ik ralaq, ma ri q'equ'malil katajin upakatajik y ri saqil Q'ijsaq kawon chik.
9We k'o junoq kub'i'ij k'o chupa ri Q'ijsaq yey tzel karil ri ratz-uchaq', ri' k'a k'o pa q'equ'malil. 10No'j we junoq k'ax kuna' ri ratz-uchaq', ri' k'o chupa ri Q'ijsaq y na jinta k'o kaminow re pa mak. 11Pero ri tzel karil ri ratz-uchaq', ri' k'a k'o pa q'equ'malil y kab'in k'u chupa wa'. Ruma la', na reta'am taj pachawi ke'ek wi, ma ruma k'o chupa ri q'equ'malil e junam ruk' pacha' potz'.
12Kantz'ib'aj pan wa' che alaq, ralaq walk'o'al chupa rub'i' ri Dios,
ma kuytajinaq chi mak alaq ruma ri xu'an ri Qanimajawal Jesucristo.
13Kantz'ib'aj pan wa' che alaq ri k'o alk'o'al alaq,
ma xeta'maj alaq uwach ri Qanimajawal,
ri xex chi k'o lo wi echiri' k'amaja' ne ka'ani' ruwachulew.
Kantz'ib'aj pan wa' chiwe ri ix alab'o-alito,
ma ich'ijom chi uchuq'ab' ritzel winaq.
Kantz'ib'aj pan wa' che alaq, ralaq walk'o'al chupa rub'i' ri Dios;
ma xeta'maj alaq uwach ri Qaqaw.
14Xintz'ib'an k'u pan che alaq ri k'o alk'o'al alaq,
ma eta'am chi alaq uwach ri Qanimajawal,
ri xex chi k'o lo wi echiri' k'amaja' ne ka'ani' ruwachulew.
Xintz'ib'an pan chiwe ri ix alab'o-alito,
ma lik k'o ruchuq'ab' ri Dios iwuk'
y Ruch'a'tem ri Dios lik tikil chupa ri iwanima'
yey lik ich'ijom chi uchuq'ab' ritzel winaq.
15Me'ek k'u'x alaq ruk' ri k'o che ruwachulew ruk' taq ri xa re ruwachulew. Ma we k'o junoq e ke'ek uk'u'x ruk' taq wa', ri' na k'ax ta kuna' ri Qaqaw. 16Ma e ronoje ri na utz taj k'o che ruwachulew, na ruk' ta ri Dios petinaq wi, xa e re ruwachulew. Yey wa' e taq ri rayinik re ri qati'jil, ri rayinik re kaqa'an qe'oj che janipa ri kaqilo y ri rayinik re yakb'al qaq'ij. 17Ek'u ruwachulew xa kak'isik junam ruk' ronoje ri rayinik na utz taj k'o chwach; no'j k'u ri ka'anaw janipa ri karaj ri Dios, ri' na jinta utaqexik ruk'aslemal.
Qachajij qib' chikiwach ri e aj sokoso'nel
18Alaq walk'o'al chupa rub'i' ri Dios, oj k'o chi che ruk'isb'al q'ij. Qeta'am chi wa', ma tom chi alaq e kak'un lo ri jun kayaktaj chirij ri Cristo, ri kab'i'x “anticristo”#2 Ts. 2:3-4 che. Yey wo'ora lik e k'i chi ri eyaktajinaq chirij ri Cristo. 19Rike tob' xkimol kib' junam quk' ri'oj, na junam ta kik'u'x quk' ri'oj. Ma we ta e ri', xekanaj ta kan quk'. Pero xeb'el k'u b'i chiqaxo'l ri'oj, y ruk' wa' kaq'alajinik na jinta junoq chike rike e quk'il ri'oj.
20Ek'u ralaq na alaq ta jela' pacha' rike, ma ya'tal che ralaq ri Ruxlab'ixel ri Jun lik nim uq'ij Santo y ruma k'u wa' onoje alaq eta'am alaq ri Q'ijsaq. 21Kantz'ib'aj pan wa' che alaq, na e ta ruma na eta'am ta alaq ri Q'ijsaq re ri Dios, ma e ruma ne ri eta'am alaq wa' yey eta'am chi k'u alaq na jinta juna raq'ub'al no'jital lo che ri Q'ijsaq.
22¿China taq ri lik e aj raq'ul? E taq ri kakib'i'ij: «Ri Jesús na e ta Rucha'o'n lo ri Dios.» Ek'u taq ri kakib'i'ij wa', na xew ta eyaktajinaq chirij Ruk'ajol ri Dios, ma jenela' eyaktajinaq chirij ri Qaqaw Dios. 23E junoq kub'i'ij: «Ri Jesús na e ta Uk'ajol ri Dios,» ri' na jinta ri Qaqaw Dios ruk'. No'j ri kuq'alajisaj: «Ri Jesús e Uk'ajol ri Dios,» ri' k'o ri Qaqaw Dios ruk'.
24Ek'u ri xex chi tom wi lo alaq puwi ri Cristo, e tikila ri' chupa ri anima' alaq. Yey we e u'anom ri', k'o chi alaq puq'ab' ri Qaqaw Dios y puq'ab' Ruk'ajol. 25Ek'u b'i'tisinik wa' u'anom kan ri Qanimajawal Jesucristo: E ri kuya ri k'aslemal na jinta utaqexik chiqe.
26Kantz'ib'aj k'u pan wa' che alaq, ma e k'o ri kakaj kakisok alaq. 27No'j ralaq k'o chi pa anima' alaq ri Uxlab'ixel ya'tal che alaq ruma ri Qanimajawal Jesucristo. E uwari'che na kajawax taj kak'un lo junoq ruk' k'utunik lik junwi chwa ri q'alajisam chi che alaq, ma ri Ruxlab'ixel ri Dios e kak'utuw che alaq ronoje ri Q'ijsaq re ri Dios. Y janipa ri kuk'ut Rire, lik qatzij, na raq'ub'al taj. Ruma k'u ri', tikila alaq chi utz chupa ri majom alaq che ri Ruxlab'ixel ri Dios. 28Ek'u wo'ora, ri alaq walk'o'al chupa rub'i' ri Dios, mesaj ib' alaq puq'ab' ri Qanimajawal Jesucristo, cha' ruk' kub'ulib'al qak'u'x kaqoy'ej Rire y na kojk'ix ta chwach Rire echiri' kaq'alajin uwach pa ruk'unib'al. 29Ralaq eta'am chi alaq wa': Rire lik jusuk'. Cheta'maj k'u alaq ri': E janipa ri kaki'an ri lik jusuk', eb'alaxinaq chi chupa rub'i' Rire.
Currently Selected:
1 Juan 2: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.