Jɔb 1
1
1Dəw kára ria lə Jɔb si mee ɓee gə́ Uts. Dəw neelé to njera né gə goo rəbee ləm, gə njenéra gə́ danasur ləm tɔ. Yeḛ ɓəl Ala ləm, yeḛ unda ria ɓad dɔ néra gə́ majel’g ləm tɔ. 2Yeḛ oji ŋganeeje gə́ diŋgam siri gə njé gə́ dené munda. 3Badje ləa d’as tɔl-dɔg-loo-siri (7.000) ləm, jambalje ləa d’as tɔl-dɔg-loo-munda (3.000) ləm, maŋgje ləa gə́ d’wa dee na̰’d joo-joo d’as loo tɔl-mi (500) ləm, ko̰-mulayḛ̀je-je ləa d’as tɔl-mi (500) ləma, kuraje ləa bula digi-digi ləm tɔ. Dəw neelé ria ɓar ur dɔ dəwje lai gə́ d’isi Bər.
4Ŋganeeje gə́ diŋgam d’aw kəi lə na̰ gə goo na̰ goo na̰ d’o̰ muru-gad, tɔɓəi deḛ ɓar ŋgako̰ deeje gə́ dené gə́ munda lé d’ar dee d’usɔ gə d’ai sə dee na̰’d tɔ. 5Loo gə́ ndɔ muru-gadje lé dəs mba̰ ndá Jɔb ɓar ŋganeeje ree unda dee gə kəmee, tɔɓəi yeḛ uba naŋg ḭta gə ndɔ rad inja nékinjaməs gə́ ka̰ roo mbata lə dee kára-kára lai. Mbata Jɔb pana: Banelə ŋgan neḛje ra kaiya d’ar meḛ dee ɔs gel gə Ala. Yee ɓa gə́ né gə́ Jɔb ra ta-ta ya. 6Yen ŋga ndɔ kára bèe kuraje lə Ala gə́ dara ree d’aar nea̰’g ndá Njekurai kara ree aar dan dee’g tɔ . 7Njesigənea̰ dəji Njekurai pana: See i ḭ ra wa.
Ndá Njekurai ila Njesigənea̰’g pana: M’ḭ loo gugu’d dɔ naŋg nee ləm, gə loo njaa keneŋ ləm tɔ.
8Njesigənea̰ dəji Njekurai pana: See i oo kura ləm Jɔb wa. Gar dəw gə́ togə́bè godo dɔ naŋg nee. Yeḛ to njera né gə́ gə goo rəbee ləm, gə njenéra gə́ danasur ləm tɔ, yeḛ ɓəl Ala ləm, unda ne rəa ɓad dɔ néra gə́ majel’g ləm tɔ.
9Yen ŋga Njekurai tel dəji Njesigənea̰ pana: See Jɔb ɓəl Ala kari ba ya wa . 10See i ula ŋgalaŋ gugu ne dəa gə dɔ njémeekəije ləa gə dɔ néje ləa lai el wa. I tɔr ndui dɔ kula gə́ yeḛ ra ndá koso-nékulje ləa kara taa mee ɓee pəl-pəl. 11Nɛ maji kari ula jii ndiŋ ɔrɔ ne rɔ né gə́ to kea̰ oo ndá ma m’gər gao to gə́ yeḛ a kila ndɔl dɔi’g kəmi’g nee ya.
12Njesigənea̰ tel ila Njekurai’g pana: Aa oo néje lai gə́ to kea̰ lé m’ya̰ meḛ jii’g. Nɛ né kára ba lé maji kari ɔrɔ darəa gə jii el.
Yen ŋga Njekurai saa rəa no̰ Njesigənea̰’g aw.
13Ndɔ kára bèe loo gə́ ŋgalə Jɔb gə́ diŋgam gə njé gə́ dené d’aw d’usɔ né gə d’ai mán-nduú gə́ mḭ mee kəi’g lə ŋgoko̰ dee gə́ to ŋgara deeje 14ndá njekaḭkula kára teḛ təsərə ree rɔ Jɔb’g ulá pana: Maŋgje d’aw ndɔ-ndɔ ləm, ko̰-mulayḛ̀je-je d’aw d’o̰ mu mbɔr dee’g ləm tɔ, 15Ndá Sabaje ree d’ur dɔ dee’g tɔl kuraje ləi gə kiambas, tɔɓəi d’ɔr dee lai d’aw sə dee. Nɛ ma nja gə karm ba m’teḛ ta yoo’g pe’d-pe’d m’ree mba kulai taree.
16Loo gə́ yeḛ aw pa təa’g bèe-bèe ya ɓəi ndá yeḛ gə́ raŋg teḛ təsərə ree ula Jɔb pana: Pər lə Ala ḭ dara oso ɓugu dɔ badə-kosoje’g roo dee gə kuraje ləi na̰’d dula-dula, nɛ ma nja gə karm ba m’teḛ pe’d-pe’d ta yoo’g m’ree mba kulai taree.
17Loo gə́ yeḛ aw pa təa’g bèe-bèe ya ɓəi ndá yeḛ gə́ raŋg teḛ təsərə ree ula Jɔb pana: Kaldeje d’ɔm na̰’d kudu munda d’ur dɔ jambalje’g twa dee ləm, deḛ tɔl kuraje ləi gə kiambas ləm tɔ, nɛ ma nja gə karm ba m’teḛ pe’d-pe’d ta yoo’g m’ree mba kulai taree.
18Loo gə́ yeḛ aw pa təa’g bèe-bèe ya ɓəi ndá yeḛ gə́ raŋg teḛ təsərə ree ula Jɔb pana: Ŋganije gə́ diŋgam gə njé gə́ dené d’isi d’usɔ né gə d’ai mán-nduú gə́ mḭ kəi lə ŋgara deeje 19ndá aa oo lel-boo ḭ par gə́ kel dɔdilaloo’g biri dɔkum kəi gə́ sɔ lé aree təd unda dee mburug tɔl dee. Nɛ ma nja gə karm ba m’teḛ pe’d-pe’d ta yoo’g m’ree mba kulai taree.
20Yen ŋga Jɔb ḭta til kubu ləa gə́ boi yul rəa’g ləm, ndisa dəa ŋgori-ŋgori ləm tɔ, tɔɓəi yeḛ oso naŋg bəbərə dəb kəmee naŋg 21ndá yeḛ pana: M’teḛ mee kɔmje’g kudum dum
Ndá m’a tel kaw naŋg gə kudum gə́ dum ya tɔ.
Njesigənea̰ ya to njekar né ləm,
Njesigənea̰ ya to njetaa né ləm tɔ,
Ndá maji kar dɔ ri Njesigənea̰ ai səgərə.
22Gə goo néje nee lai lé Jɔb ra ne kaiya el ləm, oo ne Ala gə́ njera né gə́ lal najee el ləm tɔ.
Currently Selected:
Jɔb 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.