(Evangelio según San Lucas) 22
22
Jesús maami tusa chicham umigkamu
(Mt. 26.1-5; Mr. 14.1-2; Jn. 11.45-57)
1Fiesta pag levaduragtuchu yutai Pascua tutai jegattak wajai, 2sacerdote apuji aidau, maestro chicham umiktinun jintinkagtin aidaujai, aentsun ishamaidau asag, Jesús wajuk maawajik tusag chichaidau.
3Nuniamunum Jesusa jintintaiji doce aina nuiya Judas, Iscariote tuuta awagmatia nuna Iwanch egkemtuauwai, 4dutikam wee sacerdote apuji aidaujai nuigtú jega Apajuí ememattain kuitamin aidaujai chichasajui, wajuk Jesusash achikaish sujumainaita nuna pachisag. 5Tama ditak shiig aneasajui, nuninak kuichkin susatatus anagkuawajui. 6Tama Judaschakam ayú tusa wajuk Jesusan aents atsamunum sujukajak tusa egau.
Jesús inagnaku Pascuatin yuwamu
(Mt. 26.17-29; Mr. 14.12-25; Jn. 13.21-30; 1 Co. 11.23-26)
7Pascuatin, pag levaduragtuchu yuwaku uwig aishmag tsakat maa yutai jegau asamtai; 8Jesús, Pedron Juagjai awemak:
—Wetajum, nunikjum Pascua yuwatin umiktajum, tiuwai.
9Tuinam dita aiinak:
—¿Tuwí umiktí tusamea wakegame? tuidau.
10Tiagtai Jesús ayaak:
—Yaakat wayamunum makichik aishmag yumí aimak waketu wainkattagme, nunú pataetukjum jeen wayatta imanui jegatajum, 11nunikjum jeentin chichagkujum: “Maestro chichagtamak: ¿Tuwí awa tesamu wi mina jintintaig aidaujai Pascua yumainush? tujamae” titajum, 12tajumin ni inaktugmastatui yakí tesamu agkan muuntan shiig umikbaun, nuanui umiktajum, tiuwai.
13Tusa tiajam wegag Jesús tibaunak imatiksag wainkaju. Nunikag nui Pascua yuwatnunak umikajui.
Jesús inagnaku Pascua yuwamu
(Mt. 26.20-25; Mr. 14.17-21)
14Hora jegamtai, Jesús apóstol aidaujai mesanum jegaantag pekaamsajui. 15Nunik chichaak:
—Senchi wakemajai, eke jatsuk ju Pascuan atumjai ijunjan yuwatasan. 16Wagki junak ataktuk jutikanuk yuwashtinaitjai; atak Apajuí inabauji uminkatna dui yuwatin asan, tiuwai.
17Tusa vino copanum aun juki, Apajuin see tusa chichaak:
—Ju uwagtajum ashí atum aidautijum, 18dekas tajime, ataktuk jutikanuk uva yumijinak uwagchatnaitjai, Apajuí inamak taatna duwi uwagtin asan, tiuwai.
Jesús, mina anentaimjuttsajum yuwakjumek juní dutikatajum tibau
(Mt. 26.26-29; Mr. 14.22-25; 1 Co. 11.23-26)
19Tusa pagkan juki Apajuin see tii puuká, jintintaiji aidaun susa chichaak:
—Jujú pagka juka mina iyashig atumiin mantamnatta nuna iwainawai, juka tuke jutiksagmeké atin atajum mina anentaimjuttsajum.
20Tusa ashí yuwawagmatai copa juki, chichaak:
—Ju copa juka, mina numpajui yamajam chicham apaamu atumiin ukaejatta nuuwai. 21Mina sujutkatta duka ju mesa juwig wijai eketui. 22Dekaskenmag Aentsmaga akiinauwa duka, nuniktinai tusa agagbauwa nunisag wetatui, tujash nuna sujuktata nunak wait anentajai, tau.
23Tutai ditak pempeentunikiag iniinidau, yaki nunash dutikati tusag.
Yaki dekas imá wagakush atinaita tiagbau
(Mt. 19.28; 20.25-28; 23.11; Mr. 9.34-35; 10.42-45; Lc. 9.46; Jn. 13.12-15)
24Nuigtushkam jintintaiji aidau jutii ainag juwiyash yaki imá wagakush atinaita tusag pampandayidau. 25Tudaiyagtai Jesús chichajak: “Rey nugkanum inamaina duka aentsnak ditanua nunin emak waitkainawai, tuja apu inamaina nunú, pegkegnum yaimin ainaji tumamin ainawai; 26tujash atumek nuninuk amaitsugme. Duka nunitsuk atum ainajum anuiya eme anentai atag takug, datsauch eme anentsá diishtaya nunin anenmamainai. Inamna dushakam tikichin takagna nunin amainai. 27Wagki ¿yaita eme anentsá diitaish, mesanum eketa dukaih atsa ajaama dukaih? ¿Mesanum eketa duchaukaih? Nunin aig witjai atumjaig ajamauwa nuninnuk.
28“Atum ainagme mina pegkegchaunum dekapjuinakuish wijaig ijutkau yujasujum duka. 29Nuadui wi atumnak apu emajime, mina Apag mina apu etiuwa dutiksanuk, 30mina inamtaijui mina mesajui yuwakjum uwagminjum tusan, nuniakjum ekeemtainum ekeemsajum Israelan uchijí doce aajakajua nunú wegantu inagtin ainagme”.
Jesús Pedron ugtuktatme tusa ujakbau
(Mt. 26.30-35; Mr. 14.26-31; Jn. 13.36-38)
31Junashkam Jesús tiuwai:
—Simón, Simón Iwanch segamne, atumin trigo pegatia numamtuk awatamkagtatus; 32tujash wi aminak segatmagme, dekaskeapi tabaugmia nunú mijakaim tusan. Ame minai ataktú anentaimjam, yatsum aidaush minaig ebetmamjatnume tusan yaigminum tau asan. 33Tama ni ayaak:
—Apuh, wika umintsan wekaejai cárcel jujamainakuish nuniachkush mantamainakuish amijai jakatasan, tau.
34Tutai Jesús ayaak:
—Pedro, yamai kashia juik atash eke shinatsaig, Jesusnak waintsamjai tusam kampatumá ugtuktatme, tiuwai.
Wají egkea jutai, kuichik egkea jutai, espadajai tibau
35Tusa idaiyak:
—Atumin wi ishimkun, wají egkea jutaigmekesh, kuichik egketaigkesh, sapatkesh jukigpajum tiuwaitjim duish, ¿makichkish atsumamush ajutjamsauk aina?
Tama dita aiinak:
—Atsa, tiajui.
36Tiagtai Jesús ayaak:
—Tujash yamaik wají egkea jutaigmesh, kuichik egketaigmeshkam jukitajum, espadajum atsugtamkuig, jaanchjum sujakum makichik sumaktajum. 37Dekas tajime, agagbaunum tawa duka minai uminkattawai: “Aents pegkegchaujai betek diyam atinai”, tusa mina pachittsa agagbauwa duka uminui, tau.
38Tutai dita aiinak:
—Apuh, jui jimag espada ajutjamui, tiajui.
Tiagtai Jesuschakam:
—Maake, tiuwai.
Jesús Getsemaní pujusá Apajuí ausamu
(Mt. 26.36-46; Mr. 14.32-42)
39Tusa Jesús yaaktanmaya jiinki Olivosan mujajin weuwai, nui tuke weu asa, nunitai jintintaiji aidaushkam ashinkajui. 40Nui jegantá jintintaiji aidaun chichajak:
—Jui pujusjum Apajuí ausatajum, pegkegchaunum iyawaijum, tau.
41Tusa ukuak nigka kaya nagkimam iyauwama imaan atushat kanaká, tikishmag pujus Apajuin aujak: 42“Apawah, amesh wakegakmek, wi waitmainaitag nu agkanmitkajuata; tujash wi wakegamu achati, ame wakegamu atí”, tiuwai.
43Nuniai makichik ángel nayaimpinmaya wantintuku anentain ichichtugtatus. 44Jesusak ni senchi waittsatnuji jegau asamtai anentaimak waitiau asa, nuní senchi Apajuin auju, imaniau asamtai segagbaujig numpa apu aidau nugká kitaama numamtuk wajaidau.
45Jesús Apajuí augbaun inagnak wajakí, jintintaiji batsakbaun jegantun diikmá, wake besemag dekapenak ane anentaimainakua kajig batsatun wainak:
46—¿Wagka kajiish batsatjume? Nantakjum Apajuí ausatajum pegkegchaunum iyawaijum, tiuwai.
Jesús achiká jukimu
(Mt. 26.47-56; Mr. 14.43-52; Jn. 18.2-11)
47Tusa Jesús eke chichaak wajai, kuashat aents kaunawaju, nuniamunum ni jintintaiji doce aina nuiya Judas daagtin eemak minau, nunú jegantau Jesusan kugkuastatus; 48Nunitai Jesús chichajak:
—Judasah, ¿Aentsmaga akiinauwa duka kugkuasmeap sujame? tiuwai.
49Jesusjai yujaidauk, nu nunidaun wainkag:
—¿Apuh, espadajaig maaniattag? tuidau.
50Tuinai dita aina nuiya makichik sumo sacerdote apuji inaken espadayai kuwishí untsujin tsupigkauwai. 51Dutiktai Jesús chichajak:
—Maake, idaisatajum.
Tusa kuwishí tsupigkamun juki ataktú anujtuk pegkeg awajtusui. 52Dutika sacerdote apuji aidau, jega Apajuí ememattain kuitamin aidau apuji nuigtú judío apu aidaujai niina achiktatus kaunau aidaun Jesús chichajak:
—¿Wagka kasa achiktasa utugmaina imanikjumesh, espada aidau, numi aidau tinamdaekagmesh tantaugme? 53Wi kashí kashinig jega Apajuí ememattainum atumjai ijunnuweg duikish jutikagmek achigchau agmaugme. Tujash juka tsawantak atumdauwai, Iwanch inapainakui juniajum juka, tiuwai.
Pedro Jesusnak wainchaujai tusa uukbau
(Mt. 26.57-58; Mr. 14.53-54; Jn. 18.12-18, 25-27)
54Dutikawag Jesusa achiká jukiag sumo sacerdote jeen ejegawaju, dutikiagtai Pedroshkam ikaag patataetus wegau. 55Nuwi, jegá agaajin jií ikapajag pekagbaunum, Pedroshkam ditajai anamak ekeemsau. 56Nunittaman makichik nuwa inak, jiinum ekeemtatman wainak, dii wajatu, nunik:
—Jusha Jesusjai wekaemajama, tau.
57Tama Pedro wainchauwa nunin chichaak:
—Nuwah, wika wainchaujai, tau.
58Machik asag, tikitchakam Pedron wainak:
—Amesh Jesusa jintintaijitamjama, tau.
Tama Pedro ayaak:
—Atsa, duchauwaitjai, tau.
59Tusa makichik hora tumain nagkaemai, tikitchakam iniak:
—Dekaskenum jusha niijaimpap wekaenaita, wagki niishkam galileanmaya asa, tuidau.
60Tiagtai Pedro chichaak:
Wika atum tajum nunak dekatsjai.
Tusa chichaak wajai, atash shinukui. 61Nuniai Jesús ayampá Pedron diisú, dutikam Pedroshkam adeaju Apu Jesús chichajak: “Atash eke shinatsaig kampatumá ugtuktinaitme”, tibauwa nuna. 62Nunik Pedrok nuiya jiinki, senchi kajeká buutiuwai.
Apu aidau Jesús maatajum tusa inamjamu
(Mt. 26.59-68; Mr. 14.5-65; Jn. 18.19-24)
63Aents Jesusan kuitamak ijunaidauk niina dushikinak awatuidau. 64Dutikainak jiin epetkag iniinak:
—Dekakia ¿ya awatamne? tuidau.
65Tusag nuigtú kuashat pegkegchaun chichajuidau.
66Nunik tsawagmatai, judío apuji aidau, sacerdote apuji aidau, maestro chicham umiktinun jintinkagtin aidaujai ijunjag Jesusan jukiag Sanedrín#22.66 “Sanedrín” tawa duka diistá Mt. 5.22. ejegawag, iniinak:
67—¿Amekaitam Cristo? tukagtita, tuidau.
Tama Jesús ayaak:
—Wi nunuwaitjai takuish, dekaskeapi tujutchattagme, 68tuja wi inimkuish aigmaitsugme, nuigtush akupjumaitsugme. 69Tujash yamaiya jui nagkamas Aentsmaga akiinauwa duka, Apajuí ashí senchigtina nuna untsujin ekeemsattawai, tiuwai.
70Tutai ashí pampanjag iniinak:
—¿Untsu amekaitam Apajuí Uchijim? Tuidau.
Tuinam Jesús ayaak:
—Dekaske atum tajume, tiuwai.
71Nuna timatai:
—¿Nuigtush ya etsegtukti tusaya atsumaji? ii dekas ni chichaamu antugkagjamah, tuidau.
Currently Selected:
(Evangelio según San Lucas) 22: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.