(Evangelio según San Lucas) 20
20
Sacerdote apuji aidau Jesusan iniasagbau
(Mt. 21.23-27; Mr. 11.27-33)
1Jesús jega Apajuí ememattainum aents aidaun jintintak nuigtú yamajam chichaman etsejak pujai, sacerdote apuji aidau, maestro chicham umiktinun jintinkagtin, tikich judío apuji aidaujai utsanawajui. 2Nunikag: ¿Aminash ya jintinkagtuata tusash awetamae? ¿Yana chichamenia jusha juniame? tuidau.
3Tama Jesús ayaak:
—Wishakam iniastajime, aigkatajum: 4¿Yaa Juagnash yamijatjata tusash awemauwaita, Apajuik awemauwait, atsa aents aidauk awemauwait? tau.
5Tama ditak pempeentunikiag chichainak: “Juagnak Apajuí awemauwai tajinish, ‘¿Tujash wagka dekaskeapi tichau ainagme?’ tujamtata jama. 6Tuja aents awemauwai tajinchakam, ashí aents aidauk Juagnak profetayai tuidau asag kayai tukugmag mantamain ainawai”, tuidau. 7Tusag:
—Dekatsji, yatsu Juagnash yamijatjata tusash awemauwait, tuidau. 8Tiagtai Jesús ayaak:
—Wishakam tichattajime yana chichamenia jutikaja nunak, tiuwai.
Takau pegkegchau aidau pachisa tibau
(Mt. 21.33-46; Mr. 12.1-12)
9Junashkam Jesús aents aidaun jintintak augmatbaun pachis nagkama tau: “Makichik aents ajajin uvan ajakui, dutika ujumak aents takau aidaun ukujak, weuwai dukap tsawan asa taatatus. 10Nunik uva juut jegamtai, makichik inaken awemauwai takau batsatbaunum, nui jegamtai uva neje jukbaun niinun susatnume dutikam itagtuati tusa, nunik jegattaman takau aina nu suwimawag sutsuk wainak awagkiajui. 11Dutikawagmatai tikich inaken awemauwai, tujash nunashkam suwimawag pegkegchaun chichagkag wainak awagkiajui. 12Nuna dutikawagmatai kampatuma juna tikich inaken awemauwai, dutikamun ajanum takaina nu senchi suwimá, upu upujú awajsag jiikí awemajui.
13“Dutikawagmatai uva ajagtina nu anentaimas: ‘¿Utugkatjaki? tusa, dekas mina uchig anetaijua juna awematjai, dutika ai nuna wainkag ajantus diischajaintash’ tiuwai. 14Tujash takau aina nu uchi minittaman wainkag: ‘Auwai ju aja juna jukitnuk, dekas maa ajapami, dutika juka iinu emami’, tuidau. 15Tusag achiká jukiag uva aja ukumtikiag maawajui.
“¿Nunash ajagtina dusha utugmainai tajume? 16Dekas ajagtina nu tajakug takau aina nunak kajegká utsak, uva ajakbauwa nunak tikich aents aidaun susa idaimainai”.
Nuna Jesús tutai antukag:
—¡Duka tuke dutikamak achatnaitji! tuidau.
17Tiagtai Jesús ditan esetug diisá:
—¿Tujash wajina pachisaya agagbauwa nuwish:
“Kayá ekenag jegamin aidau, kaya pegkegchauwai tusag dakitjajua nunú, yamai dekas jegá ichichkatin kaya apujtutia iman wajasé”, tawa?
18Nunú kaya nui iyauk tsainkatnai, untsu kaya aentsnum iyakug yuku ematnai, tau.
19Nuna Jesús augmattai, sacerdote apuji aidau, maestro chicham umiktinun jintinkagtin aidaujai achikta tuidau. Nuninayatak aents aidaun ishamaidau.
Kuichik akikmamu pachisa tibau
(Mt. 22.15-22; Mr. 12.13-17)
20Nuninak aents aidaun, iish pegkeja nu dekatasa wakegainaji tusajum dekajuatajum tusag awemajui, dutika Jesús wajintig timatai achiká gobernador inama nui sujukmi tusag. 21Tiajam Jesusan iniinak:
—Maestroh, jutiik dekainaji ame tame duka nuigtú jintinkagtam dushakam dekas jintinkagtame; nuigtush aents shiig awajkata tabaunum dutikasme, amek dekaskenum Apajuí jintiya nu pachisam jintinkagtame. 22Nuniau asamin amina iniagme: ¿Jutiish Cesarash akimainkaih atsa akimainchaukaih? tuidau.
23Tujash Jesusak pegkegchau anentaimainamujin dekaju asa:
—¿Wagka pegkegchau anentaiyaish tujutjume? 24Iwaintugkakjua makichik kuichik. ¿Yana niimegaita jusha, yana daaji agagbauwaita?
Tama:
—Cesardauwai tuidau. 25Tiagtai Jesús ayaak:
—Cesardauwa duka, César susatajum, Apajuinua dushakam Apajuik susatajum, tiuwai.
26Nuna ashí aents antuinamunum timatai, tsanumjumainchau dekapjaju. Nunikag nu tu aikam anentai jegagchag, itatjaju.
Jakau nantagtin pachisa iniimsamu
(Mt. 22.23-33; Mr. 12.18-27)
27Juna tusa machik aig, ujumak saduceo aidau, jakauk nantagchagtin ainawai tinu asag, Jesusan iniinak:
28—Maestroh, Moisés papí agag ukugtamkiuwa nui: “Aents nuwan juki uchin akiitsuk jakamtaig, ni yachintin nuwan juki uchin akiimainai, dutika yachí uchijiya nunin emamainai”, tawai. 29Tuja nuniamunum, siete yachigbau aajakajui, nuanuiya nagkamchak iwai nuwenauwai, tujash uchinak akiitsuk jakauwai. 30Nunikmatai tikich yachi jukishkam, uchinak akiitsuk jakauwai. 31Tuja kampatuma nu jukiish, uchinak akiitsuk jakauwai, nuni nuninakua siete aajakajua duka, uchinak akiitsuk jinawajui. 32Nunikagmatai dui pujus nuwashkam jakauwai. 33Siete aajakajua duka ashí nunak nuwatjaju aina duish ¿dekas yana nuweg atinaita atak nantainamunmash? tuidau.
34Tusa tiagtai Jesús ayaak:
—Ju nugka juig aishmag aidauk nuwenainawai, nuwa aidaushkam aishinainawai, 35tujash uwemkaju aidau jakau nantajag tuke pujustin aina nuig, makichkish nuwenbauk atsutnai, 36jatanash jakachagtinai. Ditak angeljai betek agtinai nuigtú Apajuí uchijí agtinai nantakiaju asag. 37Jakau aidau nantajagtina nunak Moisés dekamtijamui zarza kegamunum, Apu Apajuí chichaak: “Witjai Abraham, Isaac, Jacob aina nuna Apajuijinuk”, tiuwa dui. 38Wagki ¡Apajuik jakau aina nuna Apajuijichui, nigka iwaaku aidaun Apajuijiyai! Apajuí diismak jakau aidaush iwaaku batsatainawai.
39Aatus timatai maestro chicham umiktinun jintinkagtin aidau:
—Maestroh shiig tiume, tuidau.
40Nuna timatai ataktuk iniaschajui.
Cristush yana uchijigkita tibau
(Mt. 22.41-46; Mr. 12.35-37)
41Nuniagtai Jesús ditan iniinak:
—¿Wajuk asamtaiya Cristuk Davita uchijiyai tuinawa? 42Tujash David nigki Salmosnum agak:
“Apu mina Apujun chichajak, ekeemsata mina untsujui;
43nunikamin wi amina shiwajum aidaunak,
amina dawemin ikautkatjame”, tiuwai.
44David Apug tawa nuniaish ¿wajuk asaya Davita uchijish amainaita? tau.
Jesús escriba aidau pegkegchauji pachisa tibau
(Mt. 23.1-36; Mr. 12.38-40; Lc. 11.37-54)
45Ashí aents antuinamunum jintintaiji aidaun chichajak: 46“Maestro chicham umiktinun jintinkagtin aina nujaig kuitamamkatajum, ditak nugkutai esagman nugkujag yujainak, plazanum igkuntuinakush eme anenjus kumpamjitnume tusag wakejin ainawai, nuninak jega ijuntainum nuniachkush yuamunum wainakush aents eme anentsá ekeemsati tibaunum ekeemsagtatus wakejin ainawai. 47Nuwa waje aidau jeenash atankiag, tsanumainak Apajuin au aujuinakua ukú yujau aina nunin aigpajum. Nunú aidau imá senchi suwimkan jukiagtin ainawai”.
Currently Selected:
(Evangelio según San Lucas) 20: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.