Santiago 1
1
Ri Santiago cuya pan rutzil quiwach rutinamit ri Dios
1Ri'in in Santiago, in aj chac re ri Dios y re ri Kanimajawal Jesucristo. Canya pan rutzil wach ralak alak ri cablajuj tinamit re Israel, ri alak quichom bi che ronoje ruwachulew.
Kach'ija uchuk'ab ri c'axc'obic
2Alak nu hermanos, lic qui'cota alak echiri' quic'ow alak chupa tak uq'uiyal uwach c'axc'obic. 3Ma eta'am chi alak we cach'ij alak ri c'ambal upa ri cubulibal c'u'x alak ruc' ri Dios, wa' cuc'am lo unimal c'u'xaj che alak. 4Lic c'ola c'u unimal c'u'x alak pa sakil wi cha' jela' cac'oji' alak jusuc' y cacowir alak chi utz, jec'uri'la' na jinta chi c'o cajawax che ri binic silabic alak chwach ri Dios.
5We c'o c'u junok che alak cajawax sakil una'oj, chutz'onoj che ri Dios y wa' caya'taj lo che, ma ri Dios na cuxu'yaj ta ri catz'onox che y na cuc'ak tane bi quik'ij ri ticawex c'o caquitz'onoj che. 6Yey we junok c'o caraj cutz'onoj che ri Dios, lic chirajawaxic che, cacubi' uc'u'x ruc' ri Dios y na queb ta upa ri cubulibal uc'u'x. Ma e ri xa queb upa ri cubulibal uc'u'x, ri' na tiquil ta chi utz; e pacha' ri urepebal uwi ri mar xa cac'am bi jewa' y jeri' ruma ri tew. 7Ec'u junok jewa' u'anom, much'obo we c'o cuc'ul che ri Kajawal. 8Ma ri ticawex xa queb upa che ri cuch'obo, ri' na jinta ucowil che tak ri cu'ano.
9E juna hermano lic na il ta co uwach, lic qui'cota che ri yacbal uk'ij cuya ri Dios. 10Yey ri hermano beyom lic qui'cota che we cac'ak bi uk'ij ruma u'anom ch'uti'n che rib chwach ri Dios. Ma ruc'aslem che ruwachulew xa e pacha' rucotz'i'jal rak'es, na cacowin taj. 11Ma echiri' quel lo ri k'ij yey ruc'atanil caka'wic, rak'es cachakijic y rucotz'i'jal capukic y casach uwach ruchomalil. Jec'uri'la' cuc'ulumaj ri beyom, ma tob lic cachacunic, echiri' cacamic, ronoje rubeyomalil cacanaj canok.
12Nim uk'ij ralaxic ri ticawex cuch'ij uchuk'ab ri c'ambal upa, ma echiri' uch'ijom chi uchuk'ab wa', cuc'ul ri sipanic re ri c'aslemal ubi'tisim lo ri Dios chique ri c'ax quena'w re Rire.
Kach'ija uchuk'ab ri mac
13Echiri' c'o junok cuna'o c'o caminow uwach pa mac, mubi'ij e ri Dios ri ca'anaw wa' che. Ma ri Dios na cacha ta c'ana uc'u'x che ri mac yey na cumin tane junok chupa. 14Ma echiri' c'o junok cuna'o c'o caminow uwach pa mac, ri' e rurayibal ri cac'amaw bi re chupa. 15Ec'u tak rurayibal cuc'am bi pa mac, yey wa' wa mac cuc'am lo camic. 16Alak nu hermanos ri lic c'ax canna' alak, cambi'ij c'u che alak: Masocotaj c'ana alak. 17Ma ronoje chomilaj sipanic y ri utz caya'taj chike, ruc' ri Dios petinak wi. Rire e 'anayom re tak ri cawon che ruwa caj. Yey tak wa' xa cajalc'atitaj uwach, no'j ri Dios na cajalc'atitaj ta uwach y ri k'ijsak re Rire na coc ta k'eku'm chwach. 18Lic ruc' c'u Rire xalax wi cuya c'ac' kac'aslemal ruma ri K'ijsak re Ruch'a'tem, cha' jela' e coju'ana ri nabe ralc'o'al oj ya'tal puk'ab ri Cristo.
Ka'ana janipa ri cubi'ij Ruch'a'tem ri Dios
19Alak nu hermanos ri c'ax canna' alak, mic'ow chic'u'x alak wa': Lic chirajawaxic che alak caya xiquin alak che ri caquibi'ij ri jujun chic, no'j lic ch'obo na alak rakan chi utz sa' ri cabi'ij alak, yey mu'an ne ri lic xa ch'itil alak che ri oyowal. 20Ma e junok aj oyowal na cu'an ta ri jusuc' chwach ri Dios. 21Ruma c'u la', ya'a can alak ronoje ri na chom ta uwach y ronoje ruq'uiyal mac. E lic c'ulu alak ruc' uch'uti'nal c'u'x alak Ruch'a'tem ri Dios tiquil chi chupa ri anima' alak, ma wa' cucolobej alak. 22E lic 'ana alak janipa ri cubi'ij Ruch'a'tem ri Dios y na xew ta alak tanel re; ma we xa alak tanel re, casoc ib alak we cach'ob alak ruma wa' cacolobetaj alak. 23Ma e junok xa tanel re Ruch'a'tem ri Dios y na cu'an ta janipa ri cubi'ij, e pacha' junok caril rupalaj chupa juna spej. 24Yey echiri' xril bi rupalaj, que'ec y xa pa jok'otaj cumesc'utaj sa' ri catzu'nic. 25No'j ri lic uya'om rib che utakexic ri sakil Utzij Upixab ri Dios, ri cojresaj puk'ab ri mac, yey xaki e cu'an wa' y na casach ta chuc'u'x ri cubi'ij ri Tzij Pixab ma e 'anal re janipa ri cubi'ij wa', ri Dios cuto' che janipa ri cu'ano.
26We c'o junok cuch'obo pa sakil wi e culok'nimaj uk'ij ri Dios, pero na cuk'atej ta ri rak' che molot y c'axlaj ch'a'tem, ri' utuquel cusoc rib yey ronoje ri cu'ano re culok'nimaj ri Dios, na jinta uchac. 27Ma ri sakil ulok'nimaxic uk'ij ri Kakaw Dios e ri quekato' ri niba'ib y ri malca'nib chupa tak ri c'ax e c'o wi, yey e ri cakachajij kib cha' na cojtzak ta chupa ri ch'ulilaj mac re ruwachulew.
Currently Selected:
Santiago 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.