Colosenses 1
1
Ri Pablo cuya pan rutzil quiwach ri hermanos e c'o Colosas
1Ri'in in Pablo in tako'n re ri Kanimajawal Jesucristo; e ri Dios intakayom re ma e xraj ri' chwe. Junam ruc' ri hermano Timoteo, 2cakatak bi wa carta che alak ri c'o alak pa ri tinamit Colosas, ri c'o alak puk'ab ri Cristo y tiquil alak chi utz chupa rubi'. C'ulu c'u alak ri unimal rutzil c'u'xaj y ri utzil chomal re ri Kakaw Dios y re ri Kanimajawal Jesucristo.
Ri Pablo cu'an orar paquiwi ri hermanos e c'o Colosas
3Echiri' caka'an orar pawi' alak, xaki cojtioxin c'u chwach ri Dios, Rukaw ri Kanimajawal Jesucristo. 4Ma ri'oj katom puwi ri cubulibal c'u'x alak ruc' ri Kanimajawal Jesucristo y puwi ri rutzil c'u'x alak cuc' conoje ri quicojom rubi'. 5Jec'ula' 'anom alak ma ralak e cubam pan c'u'x alak che uc'ulic ri uc'olom ri Dios che alak chila' chicaj; yey wa' eta'am alak ruma ri sakil Utzilaj Tzij tom chi alak. 6Ec'u wa' wa Utzilaj Tzij xtzijox che alak, e catajin utzijoxic che ronoje ruwachulew. Yey q'uiyarinak quiwach ri quecojow re y lic c'o cutikoj che ri quibinic quisilabic tak ri ticawex. Y jela' u'anom chixo'libal ralak chwi lo echiri' xta alak puwi ri unimal rutzil uc'u'x ri Dios y xc'ul alak wa' pakatzij wi. 7Jela' rutzijoxic xu'an ri Epafras che alak. Rire e jun kachbi'il na lok' ta c'ax cana'w re yey e jun utzilaj aj chac re ri Cristo c'o chiwach alak. 8Rire utzijom chike puwi ri rutzil c'u'x alak, ri uya'om ri Ruxlabixel ri Dios pa anima' alak.
9Ec'u uwari'che, chwi lo echiri' xkata wa', e la' na oj uxlaninak ta che caka'an orar pawi' alak cha' ri Dios cuk'alajisaj che alak janipa ri caraj Rire ca'an alak y cha' camaj alak usuc' ronoje tak ri sakil na'oj petinak ruc' ri Ruxlabixel. 10Y jec'ula' cabin alak jusuc' pacha' ri takal chique ri e ralc'o'al ri Dios y ca'an c'u alak janipa ri caraj ri Dios cha' c'o cutikoj ri utzilaj chac ca'an alak y jela' cac'oji' más na'oj alak che reta'maxic uwach ri Dios. 11Cakatz'onoj c'u che ri Dios chuya'a chuk'ab alak e chirij runimal uchuk'ab Rire cha' cach'ij alak uchuk'ab ri quic'owibej alak ruc' unimal c'u'xaj y cha' ruc' unimal qui'cotemal 12catioxin c'u alak chwach ri Kakaw, ma e Rire x'anaw chike ri'oj utz cakac'ul janipa rubi'tisim chique rutinamit e c'o pa ri K'ijsak. 13Ri Dios xojresaj chupa ruchuk'ab ri k'eku'malil y xojuk'atisaj chupa rutakanic Ruc'ajol, ri lic c'ax cuna'o. 14Ruc' c'u ri' ri Cristo c'o kacolobetajic y c'o cuybal kamac ruma ruquiq'uel xturuwic.
Ruma ri Cristo cojc'oji' chi utzil chomal chwach ri Dios
15Tob na jinta junok iliyom uwach ri Dios, pero ri Cristo e cac'utuben uwach. Yey ri Cristo xex chi c'o wi echiri' xwinakir ronoje ri c'o che ruwachulew. 16Ruma c'u ri Cristo, ri Dios xu'an ronoje tak ri c'olic: tak ri e c'o chila' chicaj y ri e c'o che ruwachulew, tak ri quilitaj uwach y ri na quilitaj ta uwach; ri e takanelab y ri e aj k'atal tzij, tob ne ri ángeles, ri c'o quiwach y ri c'o quichuk'ab. Ronoje tak c'u ri' ri c'olic, x'an ruma ri Cristo yey e re yacbal uk'ij Rire.
17Ri Cristo xex chi c'o wi chwa ronoje tak ri c'olic y Rire e chapayom re ronoje tak wa'. 18Ri Cristo e ujolom riglesia. E Rire ri nabe che ronoje tak ri c'olic y ri nabe xc'astaj lo chiquixo'l ri ecaminak, cha' e Rire ri lic c'o uwach chwa tak ronoje ri c'olic. 19Ma lic e xuc'ul uc'u'x ri' ri Dios ri cac'oji' ronoje ruc'u'xibal Rire ruc' ri Cristo. 20Ruma c'u ri Cristo, ri Dios xu'ano cha' ronoje tak ri c'olic cac'oji' tanchi puk'ab Rire, wa' e tak ri c'o che ruwachulew y tak ri c'o chila' chicaj, y jec'ula' conoje quec'oji' chi utzil chomal chwach Rire ruma ruquiq'uel ri Cristo xturuw chwa ri cruz.
21Ec'u ralak rojertan na alak ta utinamit ri Dios y alak ne aj retzelal c'u'x chirij ri Dios ruma na chom ta ri na'oj alak y ruma tak ri na utz taj x'an alak. No'j wo'ora ri Dios uya'om alak chi utzil chomal chwach Rire. 22Xu'an c'u wa' ruma rucamic ri Cristo cha' jela' cu'ana alak jusuc', na jinta c'ana mac alak y na jinta catz'akaw chi' alak chwach Rire. 23Ruma wa' lic chirajawaxic wi cachuk'ubej ib alak y catiqui' alak chi utz chupa ri cubulibal c'u'x alak ruc' ri Dios. Yey mok'otaj c'u alak roy'exic ri cubam pan c'u'x alak che, wa' e janipa ri bi'tisim chupa ri Utzilaj Tzij tom chi alak. Wa' wa Utzilaj Tzij e ri catajin utzijoxic pa tak ronoje luwar che ruwachulew. Yey ri'in Pablo, ya'tal chwe cantzijoj wa'.
Ruchac ri Pablo pa tak ri tinamit che ruwachulew
24Ec'u ri'in wo'ora lic quinqui'cot che tak ri c'axc'obic cantijo we ruc' wa' canto' alak. Jec'ula' e cantz'akatisaj chwi ri nucuerpo janipa ri c'axc'olil ya'tal chwe ruma in re ri Cristo, yey wa canc'ulumaj e to'bal che riglesia, rucuerpo Rire. 25Xinu'an jun aj chac re Rire cha' canto' riglesia, ma e ri Dios uya'om chwe cantzijoj pa tz'akat wi ri Utzilaj Tzij chiwach ralak ri na alak ta aj judi'ab. 26Lic ojertan lo ri' na k'alajisam ta wa' chiquiwach ri ticawex, no'j c'u wo'ora ri Dios e xuk'alajisaj wa' chique ri e re Rire. 27Chique c'u rique, ri Dios lic xraj cuk'alajisaj ri unimal chomalil uch'obom lok cuya chique tak ri tinamit na e ta aj judi'ab; wa' e ri cajeki' ri Cristo pa anima' ralak, y ruma c'u ri' lic cubam c'u'x alak che uc'ulic ri chomilaj c'aslemal chila' chicaj.
28Ec'u ri'oj e cakatzijoj rubi' ri Cristo pa tak coj'ec wi. Quebekapixabaj conoje ri ticawex y cojc'utun chiquiwach ruc' sakil na'oj, cha' quebekaya ri e re ri Cristo chwach ri Dios ruc' jun jusuc' quibinic quisilabic. 29Lic c'u cantij uk'ij che u'anic wa' ruc' ronoje nuc'u'x, yey ronoje ri can'ano e ruma runimal uchuk'ab ri Cristo c'o wuc'.
Currently Selected:
Colosenses 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.