Apocalipsis 1
1
Ri Juan cutz'ibaj tak ri xuc'ut ri ángel chwach
1E k'alajisanic wa' xuya ri Dios che ri Kanimajawal Jesucristo cha' Rire cuc'ut chique ri raj chaquib sa' tak ri catajin lok. Ruk'alajisaxic xu'an ri Jesús e xutak lo ru ángel cha' colu'bi'ij wa' che ri raj chac Juan. 2Ec'u ri Juan xuk'alajisaj can ri tzij re ri Dios, ri k'alajisanic re ri Kanimajawal Jesucristo ruc' tak ri xc'ut chwach rire. 3Nim uk'ij ralaxic ri cajilan wa ch'a'tem re wa k'alajisanic yey nim quik'ij calaxic conoje ri quetaw re wa' yey caquitakej ronoje tak ri tz'ibital chupa, ma xa nakaj chi c'o wi lo ruk'ijol echiri' cu'ana tak wa'.
Ri Juan cuya pan rutzil quiwach ri wukub iglesias
4Ri'in in Juan quintz'iban pan chique ri wukub iglesias e c'o chupa tak ri tinamit re Asia.
C'ulu alak ri unimal rutzil c'u'xaj y ri utzil chomal, ri cape ruc' ri Jun c'o wak'ij ora, ri xex chi c'o lo wi y ri c'o chikawach apanok, ri cape ruc' ri wukub uwach Uxlabixel c'o chwach rutz'ulibal pa catakan wi, 5yey ri cape ruc' ri Kanimajawal Jesucristo, ri cuk'alajisaj chi utz ri K'ijsak. Rire e ri nabe xc'astaj lo chiquixo'l ri ecaminak y e ri c'o paquiwi conoje ri e takanelab che ruwachulew. Rire lic c'ax xojuna'o y xojuch'aj che tak ri kamac ruc' ruquiq'uel xturuw chwa ri cruz. 6Xu'an c'u xa jun tinamit chike y xu'an chike oj takanel y oj chacunel chwach ri Dios, Rukaw Rire. Ec'u Rire lic takal che cayac uk'ij wak'ij ora y chikawach apanok ma lic sa'chi ruchomal y ruchuk'ab. 7Tape alak, ri Kanimajawal Jesucristo pa sutz' cac'un wi. Conoje c'u ri' caquilo, caquil ne ri xecamisan re. Y conoje ruq'uiyal quiwach tak ri ticawex che ruwachulew lic quebok'ic ruma ruc'unibal.#Mt. 24:30 Pakatzij wi jela' cu'ano.
8«Ri'in in ri jekebal re yey in ri q'uisbal re, jela' pacha' ri ca'ib letra A y Z»#1:8 “A y Z”: Quil “Alfa y Omega” pa vocabulario. cacha ri Kanimajawal, ri Jun c'o wak'ij ora, ri xex chi c'o lo wi y ri c'o chikawach apanok yey ri c'o ronoje unimal chuk'ab puk'ab.
Ri xc'ut che ri Juan pa ri isla Patmos
9Ri'in in Juan in bare jun uc' alak hermanos, junam oj c'o chupa rutakanic ri Kanimajawal Jesucristo y junam cakach'ij uchuk'ab tak ri c'axc'obic ruc' unimal kac'u'x. E ri'in xine'yo'k pa ri isla Patmos ruma xintzijoj ri Tzij re ri Dios y ri K'ijsak re ri Kanimajawal Jesucristo. 10Pa c'u jun k'ij domingo#1:10 Pa ri ch'a'tem griego cubi'ij “ri k'ij re ri Kanimajawal Jesucristo”. in c'o puk'ab ri Ruxlabixel ri Dios echiri' xinto xch'aw lo Jun chwij, wa' lic co cach'awic pacha' uch'awibal trompeta. 11Jewa' xubi'ij:
«Ri'in in ri jekebal re yey in ri q'uisbal re, jela' pacha' ri ca'ib letra A y Z. Chatz'ibaj c'u chupa juna libro ronoje tak ri cawilo y chataka bi chique ri wukub iglesias e c'o chupa tak ri tinamit re Asia: ri c'o Éfeso, ri c'o Esmirna, ri c'o Pérgamo, ri c'o Tiatira, ri c'o Sardis, ri c'o Filadelfia y ri c'o Laodicea» xcha'.
12Xintzu'n c'u pan chwij cha' canwilo china ri cach'a't lo wuc'; y echiri' xintzu'n apanok, xinwil pan wukub utzuc'ulibal ak' re oro. 13Chiquinic'ajal c'u ri wukub utzuc'ulibal ak' re oro, xinwil pan Jun lic e catzu'n Ralaxel Chiquixo'l Ticawex. Ucojom jun uk'u' copon c'a chukul rakan y cojotal jun pas re oro chwa uc'u'x. 14Rujolom y ruwi' lic sak jela' pacha' ri mit sak y pacha' ri nieve;#1:14 Ri nieve jela' rusakil pacha' catzu'n ri sakbach. y ucabichal ruwach pacha' ak' careprotic. 15Ri rakan cawolk'inic pacha' ri ch'ich' bronce echiri' quesax lo pa ri orna; rukul catatajic jela' pacha' utza'm ya' e ri' xc'unic. 16Puwiquik'ab e c'o wukub ch'umil; puchi' quel lo jun espada lic t'isi's utza'm y ca'ib ruwi re'.#1:16 Wa espada e que'elawi Ruch'a'tem ri Cristo yey wa' lic c'o uchuk'ab ma ronoje ri cubi'ij e cu'ana'. Heb. 4:12 Rupalaj jela' pacha' ri k'ij echiri' lic careprotic. 17Ec'uchiri' xintzu' uwach, xintzak xe'rakan uk'ab y xincanaj canok pacha' in caminak chic. Ec'u Rire xuya ruwiquik'ab panuwi' y jewa' xubi'ij chwe:
«Maxi'ij awib, ma Ri'in in ri nabe yey in ri q'uisbal re. 18In ri xex in c'o wi, In ri xincamic, pero wo'ora na jinta chi utakexic ri nuc'aslemal. Panuk'ab Ri'in c'o wi ri camic y panuk'ab c'o wi quebenuc'astajisaj lo ri ecaminak.#1:18 Pa ri ch'a'tem griego cubi'ij “Panuk'ab c'o wi ri lawe re ri camic y re ri luwar pa quec'oji' wi ri ecaminak.”
19»Chatz'ibaj janipa ri xc'ut chawach, ruc' tak ri cat-tajin che rilic y ri catajin lo chikawach apanok. 20Ri que'elawi ri wukub ch'umil awilom pa nuwiquik'ab y tak ri wukub utzuc'ulibal ak' re oro e wa': Ri wukub ch'umil e ri wukub ángeles e chajinel que ri wukub iglesias; yey ri wukub utzuc'ulibal ak' re oro e ri wukub iglesias.
Currently Selected:
Apocalipsis 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.