Filipenses 2
2
Ri Dios xuyac uk'ij ri Jesús ma Rire xu'an ch'uti'n che rib
1Ruma c'u c'o alak puk'ab ri Cristo, lic nimarinak chi c'u'x alak y bochi'im chi c'u'x alak ruc' ri rutzil uc'u'x Rire. Ec'u ri Ruxlabixel ri Dios c'o uc' alak y u'anom chi xa jun che alak, yey c'ulum chi c'u alak ri relej uc'u'x y ri c'axna'bal uc'u'x ri Cristo. 2E uwari'che tz'akatisaj co alak uwach ri nuqui'cotemal ruc' wa': Chu'ana xa jun c'u'x alak, xa jun ri rutzil c'u'x alak y xa jun ri na'oj alak chiwach alak. 3Mac'o ma'an alak xew re cac'oji' más wach alak chiquiwa ri jujun chic o re yacbal k'ij alak. Ri lic usuc' e 'ana alak ch'uti'n che ib alak ruc' ri ca'an alak y yaca alak quik'ij ri jujun chic. 4Na utz ta c'u ri' we c'o junok e xew cutzucuj ri utz chiribil rib, ma ri lic chirajawaxic wi e cutzucuj ri utz chique ri nic'aj chic.
5E chu'ana ri c'u'x alak jela' pacha' ruc'u'x ri Kanimajawal Jesucristo.
6Rire na xu'an ta nim che rib;
tob ne lic junam uwach ruc' ri Dios,
na xuch'o'jij ta ri takal che.
7Tob lic c'o uwach, xuya can ranima' ri takal che;
xu'an pacha' aj chac che rib cha' quebuto' tak ri ticawex.
Xu'an c'u ticawex.
8Echiri' junam chi uwach cuc' ri ticawex,
xu'an ch'uti'n che rib.
Lic c'ut xucoj utzij ri Dios, ma xuya rib pa camic.
Yey wa camic lic q'uixbal uwach,
ma xcamisax chwa cruz pacha' junok lic aj mac.
9Ruma c'u wa xu'an ri Jesús,
ri Dios e más xuyac uk'ij Rire chiquiwa conoje ri lic c'o quiwach.
Xuya c'u che ri Jesús cakabi'ij “Kanimajawal” che,
ma rubi' Rire e más c'o uwach chwa ronoje tak ri bi'aj.
10Chwach c'u ri Kanimajawal Jesucristo
caquixucuba' quib conoje ri e c'o chila' chicaj,
ri e c'o che ruwachulew y ri e c'o chuxe' ulew.
11Y conoje c'ut caquibi'ij “ri Jesucristo e Rajawal ronoje ri c'olic”,
y caquibi'ij c'u wa' re yacbal uk'ij ri Kakaw Dios.
Kak'alajisaj ri K'ijsak ruc' ri kabinic kasilabic
12Ec'u ralak, ri lic c'ax canna' alak, chwi petinak lok, lic takem alak ri c'utunic re ri Utzilaj Tzij; 'ana c'u alak wa' na xew ta echiri' in c'o uc' alak, ma e más chirajawaxic catakej alak wa' wo'ora echiri' na in jinta uc' alak. Ruc' c'u xi'in ib alak chwach ri Dios, e lic k'alajisaj alak ri colobetajic alak ruc' ri binic silabic alak. 13Ma e ri Dios cuya che alak cacha c'u'x alak che u'anic ri utz chwach y e Rire ri cato'w e alak che u'anic ri caraj Rire.
14Janipa ri ca'an alak, ma'an alak ruc' yaj o ruc' ch'a'oj 15cha' jela' lic jusuc' ri binic silabic alak chwach ri Dios y jec'ula' na jinta c'o catz'akaw chi' alak y cak'alajin c'u ri' alak sakil ralc'o'al ri Dios, ma lic alak junwi chiquixo'l tak ri winak na e ta jusuc' yey itzel quic'u'x. Jec'ula' ri', cu'an alak pacha' tak ri ch'umil lic quewon pa ri k'eku'malil re ruwachulew 16echiri' cak'alajisaj alak ri K'ijsak cuya c'aslemal. Jec'ula' echiri' cac'un tanchi ri Cristo, ri'in canna' jun qui'cotemal na jinta c'o wi, ma lic c'o xutikoj ri nubinic y ri nuchac uc' alak. 17Ec'u ri'in na cambisoj taj tob ne quincamisaxic y caturuw c'u ri nuquic' pacha' juna kasa'n chwach ri Dios, ma wa' e cutz'akatisaj ri kasa'n re ri binic silabic alak ya'om chi alak puk'ab ri Dios ruma ri cubulibal c'u'x alak ruc'. Lic c'ut quinqui'cot uma onoje alak ma lic ya'om ib alak che ulok'nimaxic ri Kanimajawal. 18Y jec'ula' cuaj caqui'cot onoje ralak wuc'.
Ri coponibal queb raj chac ri Dios chila' Filipos
19We e caraj ri' ri Kanimajawal Jesucristo, cantak bi tan ri Timoteo re que'rila alak y jec'ula' ri wanima' caqui'cotic echiri' rire cuc'am lo rason alak. 20Na jinta chi c'u junok lic junam ruc'u'x wuc' pacha' ri Timoteo, ma rire lic uya'om uc'u'x che alak. 21Ma e tak ri ticawex xew caquitzucuj ri cacaj rique y na e ta queboc il che ri caraj ri Kanimajawal Jesucristo. 22Ilom chi c'u alak ri utzilaj chac u'anom ri Timoteo, ma lic inuto'om che utzijoxic ri Utzilaj Tzij. Rire u'anom pacha' nuc'ajol ma chacuninak wuc' jela' pacha' cu'an juna ala ruc' rukaw. 23Ec'u uwari'che lic cuaj cantak bi ri Timoteo uc' alak, we xk'alajin na sa' ri ca'an chwe wara, we quinel bi o quincanaj pa cárcel. 24Yey cubul ne nuc'u'x qui'nwila tan wach alak, we e caraj ri' ri Kanimajawal.
25Canch'ob c'ut lic chirajawaxic cantak tanchi ubi uc' alak ri hermano Epafrodito, ri xtak lo alak wuc' re quinuto' che tak ri cajawax chwe. Rire junam chacuninak wuc' y junam katijom c'ax pa ruchac ri Dios. 26Rire lic caraj chic caril wach onoje alak, ma xreta'maj tom chi alak echiri' lic xuchap yabil. Lic c'u cubisoj wa', ma laj paxinak c'u'x alak che ri xuc'ulumaj. 27Pakatzij wi rire xuchap yabil, xa jubik' chi xraj laj xcamic, pero ruma c'u ri c'axna'bal uc'u'x ri Dios na xopon ta chupa ri camic. Jec'ula' ri Dios xuto'o yey lic xinuto' ne ri'in, ma we ta e la' xcam na, ri' lic curik rib ri nubis. 28Ruma c'u wa' lic cuaj cantak bi tan ri Epafrodito uc' alak cha' jela' caqui'cot alak che echiri' quil tanchi alak uwach. Y ruma c'u wa qui'cotemal alak, capactaj ri nubis ri'in che alak. 29We xopon tanchi rire uc' alak, c'ulu alak ruc' qui'cotemal chupa rubi' ri Cristo. Lic tac'aba' alak uk'ij, ma e takal ri' chique conoje ri e jela' pacha' rire. 30Ma rire laj xcamic ruma ri cachacun chupa ruchac ri Cristo; xuya c'u ranima' cuc'ulumaj wa' cha' quinuto' ri'in wara. Y jec'ula', rire lic xolu'ana pac'axel ralak janipa ri cajawax chwe ri'in.
Currently Selected:
Filipenses 2: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.