Lucas 2
2
Ri ralaxibal ri Jesús
(Mt. 1:18-25)
1Chupa tak la' la k'ij, ri Augusto ri nimalaj takanel re Roma, xtakan che ca'an jun ajilanic chique conoje ri ticawex re tak ri tinamit pa catakan wi rire. 2E nabe ajilanic xtakan che u'anic, yey x'ani' wa' echiri' ri Cirenio e aj wach re ri nación Siria. 3Ruma wa ajilanic, conoje ri ticawex quebec chiquijujunal pa ri quitinamit cha' quebajilaxic.
4E uwari'che ri José xel bi chiri' Galilea chupa raldea Nazaret pa jekel wi, y xe'ec Judea chupa raldea Belén pa xalax wi ri rey David, ma ri José ralc'o'al can ri David. 5Ruma c'u wa ajilanic, xe'ec junam ruc' ri María, ri ya'tal chi che re rixokil. Yey ri María yewa' ixok chic.
6Ec'uchiri' e c'o chi Belén, xopon ruk'ijol cutzir uwach ri María. 7Ruma c'u na xquirik ta luwar pa mesón, xec'oji' pa jun luwar re quiwarabal chicop. Xalax c'u ri' ri nabe ralab ri María. Rire xupis rac'a chi utz pa c'ul y xucotz'oba' pa jun canawa re quiwa'bal chicop.
Raj chajal que bexex que'quila ri Jesús
8Chunakaj Belén e c'o aj chajal bexex caquic'owibej rak'ab pa juyub re quequichajij ri quibexex.
9Yey xakic'ate't xwinakir jun ángel re ri Dios Kajawxel chiquiwach. Ewi runimal uchomalil ri Dios xutzij quiwi' y rique lic xquixi'ij quib che. 10Pero ri ángel xubi'ij chique:
«Mixi'ij iwib, ma nuc'amom lo utzilaj tzij chiwe re unimal qui'cotemal chique conoje rutinamit ri Dios. 11Ma wak'ij pa ri tinamit re ri rey David, xalax jun Colobenel iwe; e ri Kanimajawal, Rucha'o'n lo ri Dios. 12Ri c'utubal re wa' e quirik ri ralco ac'a pistal pa c'ul, cotz'ol chupa jun canawa re quiwa'bal chicop» xcha chique.
13Ec'u la' la jok'otaj uq'uiyal ángeles re chila' chicaj xakic'ate't xewinakir ruc' ri jun ángel, e ri' caquibixoj rubi' ri Dios, jewa' caquibi'ij:
14«¡Nim uk'ij ri Dios c'o chila' chicaj!
Yey che ruwachulew, c'ola ri utzil chomal re ri Dios cuc' ri caquic'ul ri rutzil uc'u'x Rire» xecha'.
15Ec'uchiri' xetzelej ri ángeles chila' chicaj, raj chajal bexex jewa' xquibi'ij chiquiwach: «Jo' ri' c'a chila' Belén. Je'kila wa xolu'bi'ij ri Dios Kajawxel chike» xecha'.
16Lic c'u quebanic xebec y xe'quirika ri María, ri José yey ri ralco ac'a cotz'ol chupa ri canawa re quiwa'bal chicop. 17Yey echiri' xquil uwach ri ralco ac'a, xquitzijoj ri xubi'ij ri ángel chique chwi Rire. 18Y conoje ri xetaw re wa', lic xcam canima' che ri caquitzijoj raj chajal bexex. 19No'j ri María lic uc'olom ronoje wa' pa ranima' y lic cuch'ob rakan puwi'.
20Tec'uchiri', raj chajal bexex xetzelejic, quebixonic y caquiyac uk'ij ri Dios ruma ronoje ri xquilo y xquito, ma e xu'ano pacha' ri bi'im bi chique ruma ri ángel.
Ri Jesús caya' puk'ab ri Kakaw
21Echiri' xuq'uis wajxakib k'ij ralaxic ri ralco ac'a, xcoj ri retalil re circuncisión che. Y Jesús rubi' xcojic, ma echiri' c'amaja' ne camatzexic, ri ángel xubi'ij e bi'aj wa' cacoj che.
22Xopon c'u ri k'ij echiri' chirajawaxic ri José y ri María quebec Jerusalem ruma ri quijosk'iquil chwach ri Dios, jela' pacha' ri c'o chupa ri takanic re ri Moisés.#Lv. 12 Xquic'am c'u bi ri ralco ac'a Jerusalem cha' caquiya puk'ab ri Dios Kajawxel. 23Xqui'an wa' ma jewa' tz'ibital chupa Rutzij Upixab ri Dios Kajawxel: «Conoje ri raltak co alabo quebalax nabe, queya' puk'ab ri Dios Kajawxel»#Éx. 13:2 cacha'. 24Xebec c'u ri' cha' que'quiya'a ri quikasa'n pacha' ri cubi'ij chupa Rutzij Upixab ri Dios Kajawxel: «Juc'ulaj xmucur o juc'ulaj raltak co palomax»#Lv. 12:8 cacha'.
25Chiri' Jerusalem c'o jun achi Simeón rubi'. Rire lic jusuc' rubinic usilabic, lic cucuxtaj ri Dios y roye'em ri colobetajic re ri tinamit Israel. Ri Santowilaj Ruxlabixel ri Dios c'o ruc' 26y uk'alajisam chi che, na cacam tana we na caril tubi uwach Rucha'o'n lo ri Dios. 27Ec'u wa'chi xuna' pa ranima' ruma ri Ruxlabixel ri Dios que'ec pa ri Rocho Dios, y xe'ec c'ut. Ec'uchiri', ruchu-ukaw ri ralco ac'a Jesús xquic'am lo pa ri Rocho Dios cha' caqui'an ruc' pacha' ri cubi'ij ri takanic re ri Tzij Pixab. 28Ewi ri Simeón xuk'aluj ri ralco ac'a y xuyac uk'ij ri Dios, jewa' xubi'ij:
29«Lal Dios Kajawxel, ri'in xa in jun aj chac la.
Ec'u wo'ora utz quincam chi utzil chomal,
ma x'an la janipa ri bi'tisim la chwe;
30ya xinwil uwach ri Colobenel,
31ri ya'om la chiquiwach conoje tak ri tinamit che ruwachulew.
32Y Rire e K'ijsak cuk'alajisaj ri be re ri Dios chique conoje tak ruq'uiyal quiwach ri ticawex che ruwachulew,#Is. 42:6
yey ruma Rire cayac uk'ij ri tinamit la Israel» xcha'.
33Ruchu-ukaw ri Jesús lic cacam canima' che tak ri cabi'x chwi ri ralco ac'a. 34Ec'uchiri', ri Simeón xebu'an bendecir. Yey jewa' xubi'ij che ri María ruchu ri Jesús:
—¡Chatape'! Ruma wa ralco ac'a lic e q'ui chique ri tinamit Israel queyactajic yey lic e q'ui ri quetzakic.#Lc. 20:17-18 Ma Rire ya'tal lo ruma ri Dios re jun c'utubal; no'j uq'uiyal ticawex na caquic'ul taj y lic tzel caquilo. 35Y jec'ula' cak'alajinic sa' ri c'o pa canima' uq'uiyal ticawex, we utz o na utz taj. Yey cambi'ij c'u chawe ri'at: Copon na jun k'ij echiri' lic c'ax cuna' ac'u'x, ma e cu'ana pacha' quic'owisax juna cuchilo pa rawanima' —xcha'.
36Chiri' c'u ri' c'o jun ixok k'alajisanel Ana rubi', umi'al ri Fanuel, ri ralc'o'al can ri Aser.#2:36 Ri Aser e jun chique ri cablajuj uc'ajol ri Jacob. Rire lic nimalaj winak chic. Wukub junab c'uli'nak echiri' xcam ri rachijil, 37yey ya e ochenta y cuatro junab ri' malca'n canok. Rire xaki c'o pa ri Rocho Dios y culok'nimaj ri Dios ruc' ayuno y ruc' oración chipak'ij chichak'ab. 38Xopon c'u pan ri' ri Ana pa c'o wi ri Jesús y xtioxin chwach ri Dios. Ec'uchiri', xujeko cach'a't puwi ri ralco ac'a chique conoje ri coye'em ri colobetajic re Jerusalem.
39Echiri' ruchu-ukaw ri Jesús xquiq'uis u'anic ronoje ri tz'ibital chupa Rutzij Upixab ri Dios, xetzelej tanchi Galilea chupa ri tinamit Nazaret. 40Y ri ralco ac'a catajin uq'uiyic, catajin uc'oji'ic uchuk'ab y catajin uc'oji'ic una'oj. Yey ri unimal rutzil uc'u'x ri Dios c'o ruc'.
Ri Jesús y ruchu-ukaw que'qui'ana ri nimak'ij Pascua
41Ronoje junab ruchu-ukaw ri Jesús quebec Jerusalem re que'qui'ana ri nimak'ij Pascua. 42Echiri' ri Jesús xuq'uis cablajuj junab, ruchu-ukaw xebec Jerusalem jela' pacha' xex caqui'an wi, yey xquic'am bi ri Jesús cuc'.
43Ec'uchiri' xq'uis ri nimak'ij, ruchu-ukaw xquimaj lo quibe. No'j ri Jesús xcanaj can Jerusalem, yey wa' na xquina'bej ta ruchu-ukaw. 44E pa quina'oj rique petinak ri Jesús chiquixo'l ri e cachbi'il. Xebin c'u jun k'ij; c'a tec'uchiri', xquijek caquitzucuj ri Jesús chiquixo'l ri catz-quichak' y tak ri queta'am quiwach, 45pero na xquirik taj. Ruma c'u ri', xetzelej pa ri tinamit Jerusalem cha' quequitzucuj chila'.
46Ec'uchiri' ic'owinak chi oxib k'ij caquitzucuj, xe'quirika ri Jesús chupa ri Rocho Dios tz'ul chiquixo'l doctorab re ri tzijpixab. Rire quebutata' y cu'an tz'onobal chique. 47Y conoje ri quetaw re lic cacam canima' che runa'oj y che ri c'ulubal uwach cu'an chique. 48Echiri' xquil wa' ruchu-ukaw, lic xcam canima' che y jewa' xubi'ij ruchu che:
—Walab, ¿su'chac jewa' ca'an chike? Rakaw y ri'in lic paxinak chi kac'u'x che atzucuxic —xcha che.
49Ec'u ri Jesús xubi'ij chique:
—¿Su'chac quintzucuj alak? ¿Na eta'am ta neba alak pa quinrikitaj wi? Ma lic chirajawaxic quinc'oji' che ri chac re ri Nukaw —xcha chique. 50No'j rique na xquimaj tane usuc' ri xubi'ij chique.
51Tec'uchiri', ri Jesús xtzelej Nazaret junam cuc' ruchu-ukaw y e ri' lic uya'om rib chitakic cuma rique. Ec'u ruchu catajin chuc'u'x tak wa' y lic uc'olom ronoje pa ranima'.
52Y ri Jesús catajin unimaric y catajin uc'oji'ic más runa'oj ri Dios ruc'. Ronoje ri cu'ano lic utz chwach ri Dios y chiquiwach conoje ri ticawex.
Currently Selected:
Lucas 2: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.