3 Jn 1
1
Ri Juan cuya pan rutzil uwach ri hermano Gayo
1Ri'in in nimalaj winak, in aj wach re riglesia; cantz'ibaj pan wa carta che'la, hermano Gayo, ma lic pakatzij wi c'ax canna' la. 2Lal nu hermano, ri'in cantz'onoj che ri Dios cha' ronoje quel chi utz chwi k'ab la yey cha' lic e xaki utz wach la jela' pacha' ri binic silabic la lic utz chwach ri Dios. 3Ri'in lic xinqui'cotic echiri' xec'un jujun hermanos y xquitzijoj chwe puwi ri jusuc' binic silabic la, ma e lic takem la ri K'ijsak re ri Dios. 4Na jinta cuya más qui'cotemal chwe chwa ri canweta'maj ri e walc'o'al chupa rubi' ri Dios e lic quitakem ri K'ijsak.
Pixabanic puwi ri quito'ic ri e aj chac re ri Dios
5Lal nu hermano, lic utz ri catajin la che u'anic echiri' queto' la ri hermanos, yey lic ewi ri ca'an la chique ri quepe naj. 6Ec'u rique lic quik'alajisam chiquiwach ri tinamit re ri Cristo janipa ri rutzil c'u'x la chique. Yey lic utz we queto' bi la cha' quebec chi che ri chac re ri Dios e c'o wi. Lic e takal wa' chique rique 7ma e petinak chupa rubi' ri Kanimajawal ruma c'ax caquina' Rire, y na jinta to'bal que caquic'am chique ri winak na queta'am ta uwach ri Dios. 8Ec'u ri'oj, lic chirajawaxic cakaya kib che quito'ic wa' wa ka hermanos cha' jela' cojto'b cuc' che utzijoxic ri K'ijsak.
Ri na utz taj cu'an ri Diótrefes
9Ri'in xintz'ibaj pan chique ri tinamit re ri Cristo puwi wa to'bal takal chique ri e aj chac re ri Dios, pero ri Diótrefes na cuc'ul ta ri pixabanic cakaya ri'oj, ma ri caraj e lic xew rire catakan paquiwi conoje. 10E uwari'che we xinopon chila', canch'a'bej upa ruma tak ri rak'ubal uyacom chikij. Yey na xew ta wa', ma na caraj taj quebuc'ul ri hermanos quepe naj y quebuk'atej ne ri hermanos cacaj quequic'ulu. Ec'u ri quec'uluw que queberesaj bi chiquixo'l ri tinamit re ri Cristo.
Ri utz cu'an ri hermano Demetrio
11Lal nu hermano, ma'an e la ri na utz taj; e 'ana la ri utz. Ma e junok cu'an ri utz, ri' re ri Dios; no'j e junok cu'an ri na utz taj, ri' na reta'am ta uwach ri Dios. 12Conoje chom quech'a't puwi ri hermano Demetrio y lic katzij ri caquibi'ij ma wa' lic cak'alajin che rubinic usilabic. Jenela' ri'oj, chom ruch'a'tibexic caka'ano yey eta'am alak lic katzij ri cakabi'ij.
Q'uisbal uch'a'tem ri Juan che ri Gayo
13Lic q'ui tak ri cuaj cantzijoj che'la, pero wa' na cuaj taj cantz'ibaj che'la 14ma ri cuaj ri'in e quinopon tan uc' la y jec'ula' cojch'a't chikawach.
15C'ola c'u rutzil chomal uc' la. Janipa ri hermanos queta'am wach la caquiya pan rutzil wach la. Cantz'onoj che'la, ya'a la rutzil quiwach chiquijujunal janipa ri queta'am kawach chila'.
Currently Selected:
3 Jn 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.