2 Timoteo 1
1
Ri Pablo cuya pan rutzil uwach ri Timoteo
1Ri'in in Pablo, in tako'n re ri Kanimajawal Jesucristo ma e xraj ri' ri Dios chwe cantzijoj ri c'aslemal bi'tisim chique ri caquiya quib puk'ab ri Kanimajawal Jesucristo. 2Cantz'ibaj pan wa' wa carta chawe ri'at Timoteo. Ri'in lic c'ax catinna'o ma at pacha' nuc'ajol chupa rubi' ri Cristo. Chac'ulu c'u ri unimal rutzil c'u'xaj, ri relej c'u'xaj y ri utzil chomal re ri Kakaw Dios y re ri Kanimajawal Jesucristo.
Ri Pablo cupixabaj ri Timoteo che utzijoxic ri Utzilaj Tzij
3Lic quintioxin chwach ri Dios, ri canlok'nimaj jela' pacha' xqui'an lo ri wati'-numam ojertan yey lic cuna' nuc'u'x utz nu'anom chwach Rire. Yey echiri' can'an orar chipak'ij chichak'ab xaki catc'un chinuc'u'x. 4E cac'un chinuc'u'x rok'ej xa'ano echiri' xatcanaj canok y lic cuaj c'ut canwil awach cha' jela' caqui'cot ri wanima'. 5Yey cac'un chinuc'u'x ri sakil cubulibal ac'u'x ruc' ri Kanimajawal Jesucristo; ma wa' nabe xc'oji' ruc' rawati' Loida y rachu Eunice, y wo'ora lic k'alaj e ne c'o awuc' ri'at.
6E uwari'che lic catimpixabaj puwi ri uya'om ri Dios chawe,#1 Co. 12:4-11 wa' e ri xac'ulu echiri' xinya ri nuk'ab pawi' cha' catu'an at aj chac re ri Dios. Lic c'u chachuk'ubej awib che u'anic wa' ruc' ronoje ac'u'x. 7Ma ri Dios na uya'om ta ri Ruxlabixel chike cha' coju'an oj turun; e uya'om chike cha' cac'oji' kachuk'ab, rutzil kac'u'x y sakil kana'oj. 8E uwari'che, matq'uix che utzijoxic ri Utzilaj Tzij re ri Kanimajawal Jesucristo y matq'uix ne chwe ri'in ma in c'o pa cárcel ruma cantzijoj ri Utzilaj Tzij. Ec'u ri'at, e chacuyu tak ri c'axc'obic cape pakawi' ruma rutzijoxic wa', chach'ija c'u ronoje ruc' ruchuk'ab ri Dios.
9E ri Dios xcoloben ke'oj y xojusiq'uij cha' cojc'oji' jusuc' chwach; yey wa' na e ta ruma ri ka'anom ri'oj, ma e ruma lic e xraj ri' Rire chike. Echiri' c'amaja' ne cu'an ruwachulew, uch'obom chic cuya ri unimal rutzil uc'u'x chike ruma ri Kanimajawal Jesucristo. 10Y wo'ora uc'utum chi ri rutzil uc'u'x chike ma xutak lo ri Kanimajawal Jesucristo re cojucolobej. Rire xuch'ij uchuk'ab ri camic y jec'ula' xuk'alajisaj c'o c'aslemal na jinta utakexic chique ri quicojom ri Utzilaj Tzij.
11Yey ri'in in cha'tal lo ruma ri Dios re cantzijoj wa Utzilaj Tzij y re quinu'an in tako'n y c'utunel chiquiwach ri uq'uiyal quiwach tak ri ticawex. 12E uwari'che ri'in cantij ronoje tak wa c'axc'obic in c'o wi y na quinq'uix ta c'u che, ma lic weta'am china ruc' cubul wi nuc'u'x, yey lic jiquil nuc'u'x che e Rire lic c'o uchuk'ab che uchajixic ri uya'om panuk'ab c'a che ruc'unibal ri Cristo.
13E lic chac'utu chiquiwach ri ticawex ri sakil c'utunic atom ri'at chwe; cha'ana wa' ruc' ri cubulibal c'u'xaj y ri rutzil c'u'xaj arikom ruc' ri Kanimajawal Jesucristo. 14Ruc' ruto'bal ri Santowilaj Ruxlabixel ri Dios c'o pa kanima', lic chachajij chi utz ri ya'tal chawe ruma ri Dios.
15Ri'at lic aweta'am, e q'ui ri kachbi'il e aj Asia xincok'otaj canok, y chiquixo'l rique c'o ri Figelo y ri Hermógenes. 16No'j ri Onesíforo na xinrok'otaj taj. Chuc'utu c'u ri Kanimajawal Jesucristo ri rutzil uc'u'x che rire y chique tak ri e c'o pa rocho, ma rire uq'uiyal laj xubochi'ij nuc'u'x y na xq'uix ta chwe tob in c'o pa carena chupa ri cárcel. 17Y echiri' xc'un wara Roma, lic xoc il che nutzucuxic pa in c'o wi y xinuriko. 18Yey aweta'am ne ri'at, rire lic xojuto'o echiri' oj c'o chupa ri tinamit Éfeso. E uwari'che cantz'onoj che ri Kanimajawal chuya'a ri rajil uc'axel che ri Onesíforo chupa ri q'uisbal k'ij.
Currently Selected:
2 Timoteo 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.