2 Tesalonicenses 1
1
Ri Pablo cuya pan rutzil quiwach ri hermanos e c'o Tesalónica
1Ri'in Pablo cuc' ri wachbi'il Silvano y Timoteo cakatak bi wa carta che alak, ri alak re riglesia c'o Tesalónica, alak re ri Kakaw Dios y re ri Kanimajawal Jesucristo. 2C'ulu c'u alak ri unimal rutzil c'u'xaj y ri utzil chomal re ri Kakaw Dios y re ri Kanimajawal Jesucristo.
Ri k'atbal tzij paquiwi raj maquib echiri' cac'un tanchi ri Cristo
3Hermanos, xaki cojtioxin chwach ri Dios uma ralak; lic e takal ri' caka'ano ma lic catajin unimaric ri cubulibal c'u'x alak ruc' ri Cristo yey catajin unimaric ri rutzil c'u'x alak, ri cac'ut alak chiwach onoje alak. 4Ruma c'u ri', ri'oj lic cakatac'aba' k'ij alak echiri' cojch'a't pawi' alak chiquiwach tak riglesias re ri Dios. Lic e cakatzijoj ri unimal c'u'x alak y ri cubulibal c'u'x alak; ma tob alak ternabem ruc' c'ax y quic'ow alak pa c'axc'obic, wa' lic cuyum alak.
5Ri k'atbal tzij cu'an ri Dios lic jusuc', yey cak'alajin wa' ma chwach Rire lic takal che alak coc na alak chupa rutakanic, y ruma ne ri' catij alak c'ax wo'ora. 6Yey lic ube c'ut, ri Dios cu'an uc'axel chique ri eya'yom e alak pa c'ax. 7No'j c'u ralak ri catajin ic'owic alak chupa ri c'ax, cuya na che alak ri uxlanem junam kuc' ri'oj echiri' cak'alajin uwach ri Kanimajawal Jesucristo. Echiri' Rire cac'un chila' chicaj chupa urepebal ak' cuc' ru ángeles lic c'o quichuk'ab, 8quebo'lu'ya'a c'u pa c'ax ri na xcaj ta caqueta'maj uwach ri Dios y na xquitakej tane ri Utzilaj Tzij re ri Kanimajawal Jesucristo. 9E tak c'u wa' wa winak caquic'ul ri k'atbal tzij re ri c'axc'obic na jinta utakexic; xa jumul c'ut quebesax bi chwach ri Kanimajawal y chwach ruchomal ruchuk'ab 10echiri' cac'un Rire chupa la' la jun k'ij re cayac uk'ij cuma rutinamit. Conoje c'u ri' ri xecojow rubi' lic caquilok'nimaj uk'ij ruma ri u'anom Rire cuc'. Yey ralak, alak jun che wa utinamit ruma xcoj alak ri xkatzijoj che alak.
11E uwari'che lic xaki caka'an orar pawi' alak. Cakatz'onoj c'u che ri Dios e cato'w e alak cha' ri binic silabic alak cu'ana pacha' ri takal chique ri esiq'uim ruma Rire. Y cakatz'onoj c'u che cuto' alak che u'anic tak ri utzilaj chac caraj Rire che alak, yey ca'an c'u alak wa' ruc' cubulibal c'u'xaj y ruc' ruchuk'ab Rire. 12Jec'ula' e cayac uk'ij ri Kanimajawal Jesucristo ruma ri ca'an alak, yey catac'abax k'ij ralak ruma alak re Rire. Ca'an c'u wa' ruma ri unimal rutzil c'u'xaj re ri ka Dios y re ri Kanimajawal Jesucristo.
Currently Selected:
2 Tesalonicenses 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.