El Apocalipsis 9
9
Attho oꞌ eꞌñe maꞌpsheñamha mellañotheñ ñeñthchaꞌ poktorerrtserr eꞌñe allowanen
1Allempoña poꞌpsheñeñ mellañotheñ ñeñth paꞌmnareñpaꞌ oꞌ poktorerrerr. Poktoraꞌwerrtserrpaꞌ nañapaꞌ all nenterrerr ranto atarremh ñeñth shoraꞌnmats entoth oꞌ eꞌñe xhap patso eꞌñe ateth orrtosa ñerraꞌm mellañotheñ. Ñeñthña mellañotheñ allñapaꞌ apet patherr llave alloch toran allo eꞌtamphsareth arroroth ñeñth atarr oꞌpononeth arrorothtena pats. 2Ñañapaꞌ oꞌ toramphsan arroroth. Ñeñthña arroroth allothña xhaꞌnom amos shonteꞌ ateth ñerraꞌmrratheꞌ xho chemoeꞌchenet. Chepoten amos xha moeneꞌ emayenan amaꞌt atsneꞌ, errakmañen chepoten, eꞌñe chorren amos. 3Attho atarr chepoten amospaꞌ xhaꞌnmaxhaꞌtatan ñamha alloth awañchenklla nanak shonteꞌ, pamxhaꞌtyesa errakmañen patso. Ñewa, ñeñth awañchenkllapaꞌ oꞌ apet atthoch epotañta ateth pena ñerraꞌmrratheꞌ yellas ñeñth atarr epotañ. 4Awañchenkllañapaꞌ ateth otarethta amach erroth phatstano taꞌteꞌ ñeñth patsoꞌtsen, amach erroth phatstano ñamha tsach. Amaꞌt ñamha allowen ñeñth paꞌnamen chopyets añe patsro amach erroth phatsche. Añchaꞌña erroth phaꞌ acheñ ñeñth ama ayatoꞌmaꞌtaretheyaye Yompor poeyotsaparo. 5Ama moenacheto oꞌch moetsan amaꞌt pathrra acheñ allempo. Ñeñth awañchenkllapaꞌ aña oteñet oꞌch moeroxhtatan acheñ amnarmha arrorr. Ñeñthpaꞌ atethchaꞌ atserrphanet ateth atserrtena yellas ñerraꞌm xho epotaꞌy. 6Allempoña acheñeneshaꞌpaꞌ eꞌnetchaꞌ atthoch rromoet tharraña amach errothenoth rromoeto. Amaꞌtchaꞌ atarr yaꞌñametareꞌtenetañpaꞌ amach rromoeto.
7Ñeñth awañchenklla ateth orrtena ñerraꞌmrratheꞌ kawall allempo oꞌch natyeñet atthoch kellarachet. Poñpaꞌ eꞌñe ateth orrtena ñerraꞌm choyoꞌmets ñeñth orotaten. Paꞌklloyothpaꞌ eꞌñe ateth orrtena ñerraꞌmrratheꞌ acheñ. 8Echeth, poeꞌchpaꞌ añekmoen ateth ñerraꞌmrratheꞌ koyaneshaꞌ poeꞌch. Paꞌspaꞌ eꞌñe ateth orrtena ñerraꞌmrratheꞌ maꞌyarras. 9Paꞌtallpaꞌ eꞌñe ateth orrtena ñerraꞌmrratheꞌ asertall ñeñthchaꞌ moñenaya, amach etsoto allo saneñet. Ñamha awañchenklla ñerraꞌm esempo anomxhenapaꞌ eꞌñech ateth eꞌmorrtena ñerraꞌmrratheꞌ shonteꞌ carro maꞌmoretets allempo matateñ kawall womenk atthoch xhapoet allchaꞌ kellaroset. 10Paꞌsmeꞌllpaꞌ eꞌñe ateth orrtena ñerraꞌmrratheꞌ yellas paꞌsmeꞌll alloth epotañtena. Paꞌsmeꞌlloꞌtsen poepotañer alloth atserrpenan acheñeneshaꞌ. Eꞌñech amnarmha arrorr moeroxhtatenanet. 11Ñeñth awañchenklla ñetpaꞌxhoꞌña añ paꞌmhchaꞌtarether penet mellañotheñ ñeñth amhchaꞌtarethtetsa all alloꞌtsen arroroth ñeñth atarr arroroth oꞌpononeth pats. Mellañotheñ ñeñth paꞌmhchaꞌtarether pen awañchenklla, hebreyaxhopaꞌ añ socheñet Abadón; griegaxhoñapaꞌ añ socheñet Apolión. Ñeñth epoꞌmar soꞌchñets ya yeñoño ñeñth yoten amtsanatañ.
12Allempopaꞌ met ñeñth ñanom ñeñth allkatañtetsa, tharraña señochepaꞌch palltena poꞌpoñ epa ñeñthchaꞌ allkatañterrtserr.
13Allempoña poꞌpsheñeñ mellañotheñ ñeñth poꞌpechapoeñ oꞌ poktorerrerr. Poktoraꞌwerrtserrpaꞌ naña allpaꞌ neꞌmoerrerr ñoñets ñeñth eꞌmorrtetsa altar paꞌtatsoꞌmaroth poꞌwkoroth. Añ altar ñeñth ayexhkatareth oro, ñeñthpaꞌ eꞌñe ñewapotheꞌtsen Yompor poꞌkonaño. 14Ñeñthña ñoñetspaꞌ ateth otenan mellañotheñ ñeñth poꞌpechapoeñ ñeñthara ñeñth oꞌ poktoraꞌwerrerr. Ñeñthña ñoñetspaꞌ ateth otenan mellañotheñ:
—Theꞌpaꞌ oꞌch pepyamper mellañotheñneshaꞌ paꞌtatssheñoꞌmar ñeñth ewankarethtetsa all ñeñth atarr poꞌñeso ñeñth paꞌsoꞌcheñ Eufrates.
15Ñewa, ñeñth mellañotheñ paꞌtatssheñoꞌmaretpaꞌ añekop aññoꞌtarethtenet all atomat oꞌch xhap allempo onañchareth allempochña ñetpaꞌ oꞌch aꞌkllatweret shonteꞌ acheñeneshaꞌ. Ñeñth ora allpon acheñeneshaꞌ ñeñth yexhaꞌyetsa arr patsro allponchaꞌ kollaꞌwerrtsa ñeñth allpon otenet la tercera parte. Theꞌpaꞌ oꞌ eꞌñe etsotwa ñeñth ateth onañchareth ñeñth hora, ñamha ñeñth yethro, ñamha ñeñth arrorr-ro ñamha ñeñth chararo. Allempoña ñeñth mellañotheñ paꞌtatssheñoꞌmarpaꞌ oꞌ aꞌrroyarethterret. 16Ñeñth mellañotheñ paꞌtatssheñoꞌmar ñetñapaꞌ awanmet poꞌsolltarer ñeñth montaꞌyesnetsa poekawalloro. Nañapaꞌ neꞌmoen allpon ñeñth ateth oten ñeñth alloꞌtsaꞌyen. Ñeñthpaꞌ atarr aton shonteꞌ. Ñeñth cheꞌmoechets all, alloꞌtsen doscientos millones solltarneshaꞌ.
17Ñeñth ateth gatennet all nent ñamha kawallexhno, ñamha nent ñeñth ateth orrtena ñeñth montenaya. Poesomapothpaꞌ añ chorraꞌyenet asrom. Patantaꞌtetspaꞌ añ chorraꞌyenet tsamamoenareꞌ, poꞌpotantañpaꞌ añ chorraꞌyenet asollemamoenareꞌ, poꞌpotantañpaꞌ añ chorraꞌyenet shemashremamoenareꞌ. Ñamha kawallexhno poñpaꞌ ateth orretyena ñerraꞌmrratheꞌ maꞌyarrotoꞌ. Poenamothñapaꞌ alloth xhaꞌnen tsoꞌ worteꞌ epoet ñamha amos epoet ñamha ñeñth woretnets shemashrepñeñen ñeñth otenet azufre. 18Añña ñeñth xhaꞌnets poenamoth atsetaren maꞌpoꞌmarpaꞌ ñeñthpaꞌ ñeñthña amtsañtetsa ñeñthchaꞌ aꞌkllatwerreꞌ shonteꞌ acheñeneshaꞌ ñeñth allpon otenet la tercera parte. 19Ña poꞌwamenk allo moetsenan acheñeneshaꞌ ama poenamothayaya ateth peno, añña amaꞌt paꞌsmeꞌllothpaꞌxhoꞌña amtsañtena. Tharroꞌmar paꞌsmeꞌllpaꞌ shechpetoꞌ ñeñth posoꞌsmeꞌll pen. Ñeñthpaꞌ alloña atserrpenan acheñeneshaꞌ.
20Allpon acheñeneshaꞌ ñeñth keshphatsa ñeñth ama moetsanato ñeñth amtsañtetsa ñetñapaꞌ atthera athpareꞌteñet Yompor. Ama kothapeꞌcherreto kowen atthoch kexhpoet ñeñth ateth phatseꞌtyenet sosyaꞌtsañ. Ñetpaꞌ atthera moeneñet oꞌch maꞌyochyet oneñethexhno ñeñth ama kowenayaye. Ñamha ñetpaꞌ atthera moeneñet oꞌch yexhkatatseꞌtyeset paꞌnamen ñeñthchaꞌ maꞌyochenet ateth ñerraꞌm oro ñamha kellemaꞌth, ñamha bronce, ñamha mapoeꞌ, ñamha tsach. Allowenet ñeñth yexhkatyenet ñeñthaña poꞌyomporer penet, ñeñtha maꞌyochenet amaꞌt ama enteno, amaꞌt ama eꞌmoeno, amaꞌt ama chopeꞌcheno. 21Ñamha ama kexhpoeneto ñeñth attho moetsannaꞌtenet ñamha attho tsamhnannenet ñamha attho nanak kañoreshaꞌtenet ñamha attho etatsreꞌtannaꞌtyenet. Ora añexhnopaꞌ alloña ama kowenayeꞌ kothapeꞌcheneto.
Currently Selected:
El Apocalipsis 9: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.