El Apocalipsis 17
17
Atthoch aꞌkoñchatarethterra koyaneshaꞌ ekañoreshath ñeñth tomaꞌntenaya anets Babilonia all ama eseshaꞌ yerpaꞌpenayo Yompor
1Allempoña mellañotheñ ñeñth kanxherrsheña ñeñth echyeneꞌ poꞌpajotholleshaꞌ, poesheñarrñapaꞌ oꞌ wapa. Wapa neshopaꞌ otosen:
—Theꞌpaꞌ oꞌch phokthaꞌn oꞌch negatenphaꞌ allchaꞌ aꞌkoñchatarethta añ koyaneshaꞌ ñeñth atarr ekañoreshath ñeñth ameꞌñatenaya paꞌnamen amhchaꞌtarethneshaꞌ ñeñth paꞌnamen anetsoꞌtsaꞌyen eꞌñe allowanen xhen oñexhno añe patsro. Ñapaꞌ poꞌkonañ penan oñexhno all anen. 2Ñeñth amhchaꞌtarethetyetsa añe patsropaꞌ pameꞌñeñothet ñetpaꞌ eꞌñe poꞌkañoreshakma peñet ñeñth koyaneshaꞌ. Allowen ñeñth añe patsroꞌtsen acheñeneshaꞌ eꞌñe aꞌposaꞌtwenanet tharroꞌmar ñeñth attho kañoreshaꞌtenanet ñeñthpaꞌ xhochña aꞌposaꞌtenanet atthoch eꞌñe kowen ameꞌñeñet.
3Allempoña ñeñth mellañotheñpaꞌ arr anmoen amaratho, eꞌñe Yompor poekamkëñoth anmoenet. Allñapaꞌ nentos poesheñarr koyaneshaꞌ ñeñth anets berrmaꞌth paꞌcheꞌño. Ñeñth berrmaꞌthpaꞌ atarr amhchaꞌnoxhen, atarr tsaphnanen. Poñpaꞌ kanxherrmhaga, poꞌwkorñapaꞌ xharraꞌ. Ora poeꞌmokroꞌmarpaꞌ eꞌñe akellkaꞌwareth allemeñ. Ñeñthña kellekpaꞌ allo sochatseꞌteñet Yompor. 4Ñeñthña koyaneshaꞌpaꞌ añ chorrena yetsñorromamoen epoet tsamamoen. Ñamha allo aññoꞌtena ñeñthpaꞌ ateth ñerraꞌm orollmemen ñeñth atarr kowen, ñamha mapyellmetholleshaꞌ ñeñth nanak poptallmeꞌchyetsa ñeñth nanak tsaꞌteꞌ ñamha poꞌser ñeñth atarr kowen orrtateneꞌ ña. Pototh orrenan poꞌpajoꞌ orotaten. Ñeñth pajoꞌpaꞌ eꞌñe eꞌchorrenan paꞌnamen sosyaꞌtsañexhno ñeñth atarr yetsenaꞌten ñeñth attho nanak kañoreshaꞌten. 5Poetoꞌmpaꞌ akellkatoꞌmaꞌtareth. Añ soꞌchñets ñeñth kellkënet allpaꞌ ñeñthpaꞌ atthoch eñotatanet ñeñth ama eꞌñeyeꞌ eñotpawo, ñeñthpaꞌ ateth oten: “Añpaꞌ ñeñth tomaꞌntenaya anets Babilonia ñeñth nanak atarr anets ñeñthara pachor pen ñamha allowen ñeñth atarr ekañoreshath ñamha paꞌnamen sosyaꞌtsañexhno ñeñth atarr yetsenaꞌtyen arr patsro.” 6Allempoña ñeñth koyaneshaꞌpaꞌ neñoch atarr posaꞌten. Ñañapaꞌ añ posaꞌtena errasats ñeñth poꞌrras ñeñth moetsanateteꞌth ñeñth poeyochreshaꞌ pen Parets tharroꞌmar ñapaꞌ atarr kowen entenan oꞌch moetsachet ñeñth serrpareꞌteneꞌ attho ameꞌñeñet Jesús. Allempo neñch nañapaꞌ attha nekwanaꞌch ñeñth koyaneshaꞌ. 7Naña allempo mellañotheñpaꞌ oꞌ alla oterren:
—¿Esoꞌmareꞌtña attha pekwanaꞌteñ? Theꞌpaꞌ oꞌch neñotataph ñeñth tomaꞌntena añ koyaneshaꞌ ñamha ñeñth tomaꞌntena añ berrmaꞌth ñeñth allo anen ñeñth kanxherrmhaga poñ, poꞌwkorñapaꞌ xharraꞌ. 8Añ berrmaꞌth ñeñth penten, ñeñthpaꞌ añ tomaꞌntena ñeñth korratseꞌth awañmoꞌcha theꞌpaꞌ ama eñalle oꞌ rroma. Tharraña oꞌ mameshamerra oꞌch alla tanterra oꞌch xhaꞌnerr arrorothoth. Tharraña ñeñthpaꞌ mamekpach ateth perra, ellochña oꞌch alla rromoerrerr. Allempochña oꞌch chenka eꞌñe poktakma. Acheñeneshaꞌ ñeñth yexhaꞌyetsa añe patsro ñeñth ama ameꞌñetso ñetñapaꞌ atarrchaꞌ kowanrrorteret añ berrmaꞌth tharroꞌmar ama poentareto ñeñth ateth pena añ berrmaꞌth. Amaꞌt ñeñth korratseꞌth arr patsro, tharraña awañmoꞌchapaꞌ oꞌ rroma. Amaꞌt oꞌ rromwañ tharraña oꞌ alla orrterrerr. Ñeñthoꞌmarña acheñeneshaꞌpaꞌ atarr kowanrrorteñet. Ñewa, ñeñth kowanrrorteneꞌpaꞌ ama akellkaretheyaye paꞌsoꞌcheñ Yompor poꞌlibro all akellkarethtena paꞌsoꞌchñexhno ñeñth poeyochreshaꞌ pen Yompor; ñetñapaꞌ korretsetach errponañowen. Ñeñth ama ameꞌñetso ama akellkaretheyayeto paꞌsoꞌcheñ awathotheñ allempotheñ eꞌñe errteꞌ ayexhkatarethtetsa pats.
9‘Theꞌ ñeñthchaꞌ neñotataphpaꞌ oꞌch phokthapeꞌch eꞌñe kowen eshekchaꞌ peñot ñeñth ateth tomaꞌntena añ berrmaꞌth poñexhno. Ñeñth penten kanxherrmhaga poñ, ñeñthpaꞌ añ tomaꞌntena kanxherrpena aspeneth all yexhena añ koyaneshaꞌ. 10Tomaꞌntenana ñamha kanxherrsheña ñeñth amhchaꞌtarethtetsa añe patsro. Tharraña amnarsheñapaꞌ oꞌwañ amhchaꞌtarethta. Theꞌpaꞌ oꞌ poesheñarramha amhchaꞌtarethtetsa. Tharraña poesheñarrmeñ palltena ama orrtenaꞌ. Tharraña esempoch orrtapaꞌ amach atarr atomat amhchaꞌtarethto. 11Ñamha añ berrmaꞌth ñeñth tomaꞌntenaya poesheñarr amhchaꞌtareth ñeñth korratseꞌth awañmoꞌcha theꞌpaꞌ oꞌ rroma. Amaꞌt oꞌ rromañpaꞌ tharraña ñeñthara oꞌch alla orrterra oꞌch alla amhchaꞌtarethterrerr ñeñthchaꞌ posoksheñterreꞌ ñeñth kanxherrsheña amhchaꞌtareth ñeñth oꞌ kollaꞌwa. Tharraña ñapaꞌxhoꞌña xhokmach rromoerrerr allempoch chenka eꞌñe poktakma. Ñewa, ñapaꞌ ñeñthara ñeñth amhchaꞌtarethtatseꞌth ñamha awañmoꞌcha allempo kanxherrsheñteteꞌth.
12‘Ñamha añ berrmaꞌth ñeñth xharraꞌ poꞌwkor ñeñth penten, ñeñthpaꞌ añ tomaꞌntena xharrasheña amhchaꞌtarethneshaꞌ, tharraña ñetpaꞌ ama amhchaꞌtarethtenetaꞌ tharroꞌmar ama orrtenetaꞌ. Tharraña esempoch orrterret allempochña amhchaꞌtarethtapreteret berrmaꞌth eꞌñe mameꞌ. 13Ñetpaꞌ eꞌñech pathrra kothapeꞌchenet ñeñth ateth kothapeꞌchen berrmaꞌth, oꞌch neñet berrmaꞌth ñeñthchaꞌ paꞌmhchaꞌtarether perret. Ñeñthpaꞌ attho yenpoeñet atthoch awamenkath peñet berrmaꞌth. 14Ñetñapaꞌ poeꞌmoñeꞌteñothet Cristo ñeñth tomaꞌntenaya Carnero kellareretchaꞌ. Tharraña Cristo ñeñth tomaꞌntenaya Carnero ñach aꞌmchechwerrawet tharroꞌmar ñapaꞌ atarr awamenkath. Amaꞌt ora allpon ñeñth ayochreshathetyetsa, Cristoñapaꞌ eꞌñe Paꞌyochreshather phoweñet allowenet, ñamha amaꞌt ora allpon ñeñth amhchaꞌtarethetyetsa, ñetpaꞌxhoꞌña eꞌñe Paꞌmhchaꞌtarether phoweñet allowenet. Ñamha ñeñth epoet parro yemtena, ñetpaꞌ Yompor akrerrawet ñeñth xhoreꞌten ña ñeñth atarr yemtenaya ña.
15Allempoña añ mellañotheñ alla oterrnerr, ñeñthpaꞌ ateth oten:
—Ñamha añ oñexhno ñeñth penten ñeñth allo anen koyaneshaꞌ ñeñth atarr ekañoreshath, ñeñthpaꞌ añ tomaꞌntena shonteꞌ paꞌnamen acheñeneshaꞌ ñamha paꞌnamen anetsoxhno all yexhaꞌyenet ñamha poꞌpoñeꞌttsokma ñoñets ñeñth allo eñosyenet. 16Ñamha añ berrmaꞌth ñeñth penten xharraꞌ poꞌwkor ñeñth tomaꞌntenaya xharrasheña amhchaꞌtarethneshaꞌ, ñetñapaꞌ tsenaꞌchetchaꞌ ñeñth koyaneshaꞌ, aꞌypoꞌñeretchaꞌ eꞌñe moelleꞌmkoth. Eꞌnwerrñañetchaꞌ eꞌñe ña poꞌchets allempochña chamoeret tso. 17Yomporpaꞌ ña neneꞌ allowen amhchaꞌtarethneshaꞌ poeyoxhreto atthoch ñetpaꞌ eꞌñech pathrra kothapeꞌchenet ñeñth ateth kothapeꞌchen berrmaꞌth, atthoch yenpoeñet eshekchaꞌ awamenkath peñet berrmaꞌth. Allochñapaꞌ atthoch etsotateññañet Yompor poꞌñoñ ñeñth ateth oten. 18Ñamha añ koyaneshaꞌ ñeñth penten ñapaꞌ añ tomaꞌntena ñeñth atarr nanak anets ñeñth pomnaren peneꞌ allowen ñeñth amhchaꞌtarethetyetsa allemeñ anetsoꞌmar ñeñth añe patsro.
Currently Selected:
El Apocalipsis 17: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.