El Apocalipsis 15
15
Allempo Juanpaꞌ enterranerr kanxherrsheña mellañotheñ, ñetpaꞌ oꞌch orrtaterret ñeñthchaꞌ amoeroxhtatañterrtsa
1Allempoña all ento napaꞌ oꞌ nenterrerr poꞌpoñ ñeñth atarr yoroxhen ñeñth ama yentare ñeñthchaꞌ yeñotaterreꞌ ñeñthchaꞌ ateth perra esempo. Nenterrerr mellañotheñneshaꞌ kanxherrsheña. Ñetñapaꞌ allsensarethtenet atthoch orrtaterret ñeñthchaꞌ amoeroxhtatañterrtsa. Poesheñaꞌttsetpaꞌ orrtaterretchaꞌ ñeñthchaꞌ amoeroxhtatañterrtsa eꞌñe poꞌpoñeꞌttsokma kanxherrsheñoꞌmaret. Allempochña etsotwerra allowen ñeñthchaꞌ attho Yomporpaꞌ yoroxhtater.
2Allña napaꞌ nenterrerr ñeñth ateth orrtetsa errakmañen ateth ñerraꞌmrratheꞌ ñeñth añekmoen rerpat eꞌñe ateth worten ateth ñerraꞌm tsoꞌ wortets all. Allñapaꞌ all thomxhen allowen acheñeneshaꞌ ñeñth eꞌñe metanaꞌtweꞌ ora allpon ñeñth ateth topatyenanet maꞌyarrmaꞌth ñamha ñeñth poeyexhkatar. Ñetpaꞌ ama ayatoꞌmaꞌtaretheyayeto maꞌyarrmaꞌth poeyotsaparo atthoch noñet paꞌsoꞌcheñ amapaꞌ ñamha poꞌnúmero. All thomxhenet eꞌñe arpathochet ñeñthpaꞌ Yompor apoenawet. 3Ñetña poemhtanaꞌtweñothet allowen topateñets morrechenet Moisés poemorreño ñeñth Moisés ñeñth atarr thorratseꞌth Yomporekop. Paꞌkeshphatarethteñothet morrechenet ñamha Cristo poemorreño ñeñth tomaꞌntenaya Carnero. Ñeñthpaꞌ ateth axhoteñet Yompor:
Yompore, ñeñtheph nanak Partsoph pha ñeñtheph Yepartseshar yepen, atarr echarr es petsotatyen, atarr koxhneshareꞌ es pephaꞌyen. Pha ñeñtheph Paꞌmhchaꞌtarether pen allowen paꞌnamen acheñeneshaꞌ ñeñtheph eꞌñe pokteꞌ es pephaꞌyen. Ñamha eꞌñe poꞌñoxh ateth ñeñth allpon es photyen.
4Allowen acheñeneshaꞌ eꞌñe amhchaꞌnaꞌtpoꞌ entenpet, Yompore. Amaꞌt poesheñarrapaꞌ ama eñalle ñeñth ama amhchaꞌnaꞌtpawoyeꞌ pentenaye, Yompore. Allowen acheñeneshaꞌpaꞌ eꞌñe phaptha kowentatennapet, tharroꞌmar eꞌñe phaptha pha ñeñtheph atarr Partsoph. Tharroꞌmar allowen acheñeneshaꞌ ñeñth paꞌnamen anetsoth waxhaꞌtetchaꞌ pesho atthoch maꞌyochapet pha eꞌñe phapoeth tharroꞌmar ñetpaꞌ oꞌ thaya xhapanet poeyoxhro attho phapaꞌ eꞌñe kowen pokteꞌ es pephaꞌyen.
5Allempoña napaꞌ kowerrtsanerr nenterrñañerr Yompor paꞌpakëll ñeñth poeꞌntañoꞌtsen. Ñeñthña pokoll popellrrarpaꞌ eꞌñe kowen atorareth. Oꞌponoñapaꞌ alloꞌtsen all aññoꞌtenet mapoettall ñeñth allo akellkareth Yompor poꞌñoñ ñeñth ateth anareth amaꞌt awathotheñ. 6Oꞌponothña Yompor paꞌpakllothpaꞌ xhaꞌnmaxherrerr ñeñth kanxherrsheña mellañotheñneshaꞌ. Poesheñaꞌttset orrtaterretchaꞌ ñeñthchaꞌ amoeroxhtatañterrtsa eꞌñe poꞌpoñeꞌttsokma kanxherrsheñoꞌmaret. Añ chorraꞌyenet ñeñth atarr nanak kowen ñeñth otenet lino ñeñth ama asosyatño amaꞌt eꞌñe mamesha. Eꞌñe kowen poptamaꞌtyena. Achanarethareret, poꞌchanaretpaꞌ orotommoenareꞌ ñeñth allo chanaꞌyenet poesomapo. 7Allempoña añ ñeñth paꞌtatsoꞌmar berrmaꞌth, patherrñapaꞌ apaꞌyesan mellañotheñneshaꞌ kanxherrsheñoꞌmar pajoꞌ. Apaꞌyesanet poesheñaꞌttset poꞌpajoꞌ ñeñth orotaten. Ñeñthña pajoꞌpaꞌ all eꞌchorrayesareth alloch koñchaterran Yompor paꞌnamen acheñeneshaꞌ ñeñth añe patsroꞌtsen, ñeñthara Yompor ñeñth ama arromñatheshayaye amaꞌt errponaña amaꞌt awatha. 8Allña Yompor paꞌpakllo eꞌñe chorren amos. Ñeñthña amospaꞌ añepaꞌt ottetsa Yompor poꞌkowenña ñamha poꞌpartsoña. Allñapaꞌ amaꞌt poesheñarrapaꞌ ama moenateñeto oꞌch beꞌthoset all Yompor paꞌpakllo tharrempowach esempoch orrtatan ñeñth kanxherrsheña mellañotheñneshaꞌ moeroxhteñets. Allempochña beꞌthosxherret all Yompor paꞌpakllo.
Currently Selected:
El Apocalipsis 15: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.