El Apocalipsis 14
14
Allempo Juanpaꞌ entan Cristo ñeñth atmaꞌntatareth Carnero, all then Siónaphno epoet ñamha shonteꞌ acheñeneshaꞌ
1Allempoña na kowerrtsanerrpaꞌ alla nentererr Cristo all then Siónaphno. All orrtena eꞌñe ateth orrtena ñerraꞌm Carnero. All thomxhen ñamha shonteꞌ acheñeneshaꞌ. Ñeñth acheñeneshaꞌpaꞌ alloꞌtsen ciento cuarenta cuatro mil acheñeneshaꞌ ñeñth emchorrenaya Cristo. Ñeñthña acheñeneshaꞌpaꞌ eꞌñe ayatoꞌmaꞌtarethocheꞌ. Poetoꞌmoetopaꞌ all naꞌyeññañet Cristo paꞌsoꞌcheñ ñeñth atmaꞌntatareth Carnero, ñamha Pompor paꞌsoꞌcheñ ñeñthara ya Yeyomporer. 2Allñapaꞌ neꞌmoen ñeñth womenk eꞌmorrtetsa, arroth wena entoth. Atarr womenk eꞌmorrtena ateth ñerraꞌm all etsaseꞌtena shonteꞌ oñexhno ñeñth atarr womenk maꞌmoretets. Poꞌmaꞌmoreteñapaꞌ atarr womenk eꞌmorrtena xha ottena ñerraꞌm xho thekor-rraren womenk ñeñth yoten tatsllareꞌ. Ñeñth maꞌmoretets all añepaꞌt maꞌmoretets ñeñth shontetsa acheñeneshaꞌ all añepaꞌt aꞌmaꞌmoretenet arpa. 3Allñapaꞌ kowentatenet morreñets ñeñth eꞌñe etserra morreñets all Yompor poꞌkonaño. Alloꞌtsen ñamha paꞌtatsoꞌmar ñeñth berrmaꞌthtetsa, ñamha alloꞌtsaꞌyen ñeñth sherbeneꞌ Yompor ñeñth epoch xharraꞌ ñeñth poechetsa paꞌtatssheña. Amaꞌt eꞌñe poesheñarrapaꞌ ama eseshayeꞌ yexhenayeña añ morreñets ñeñth etserra. Añña eñoteneꞌ ñeñth ciento cuarenta cuatro mil acheñeneshaꞌ ñeñth aꞌkeshphatarethtetsa añe patsroth. 4Ñetpaꞌ ama aꞌsosyateneto attho yorayeñet koyaneshaꞌ tharroꞌmar ñetpaꞌ eꞌñe kowen korrenet. Ñetpaꞌ añ eꞌñe kowen kothenet Cristo ñeñth tomaꞌntenaya Carnero. All amaꞌt erra moeneꞌ sen Cristo, ñetñapaꞌ eꞌñech kothaꞌneñet kowen. Ñetpaꞌ eꞌñe ñanom aꞌkeshphatarethtet atthoña ñetpaꞌ anarethtenet ateth ñerraꞌmrratheꞌ ñeñth ñanom yapoeñ Yompor ñeñth atarr kowen, ñeñthara oꞌpatena ñamha Cristo ñeñth atmaꞌntatareth Carnero. 5Amaꞌt poesheñarrothetapaꞌ ama shekëneto amaꞌt eꞌñe mamesha. Ñetpaꞌ eꞌñe kowen orretyenet amach errothenoth otteñeꞌcharethterreto amaꞌt awatha all Yompor poꞌkonaño.
Allempo Juanpaꞌ enterranerr maꞌpsheña mellañotheñ ñeñth eñosyesnets anomaꞌmathoth
6Allempoña napaꞌ alla nenterrerr poꞌpoñ mellañotheñ all anomaꞌmtena allpononeth enoneth. Ñapaꞌ ñeñthña serrpareꞌtatenawet kowen ñoñets ñeñth ama awañaño ñeñth alloch yekeshperra. Añ kowen ñoñets ñeñthchaꞌ serrpareꞌtatan allowen paꞌnamen acheñeneshaꞌ ñeñth yexhaꞌyetsa añe patsro, amaꞌt ora allemeñ paꞌnamen anetsoxhno ñeñth paꞌnamen mereñtsorexhno ñeñth eñosyets eꞌñe poꞌpoñeꞌttsokma ñoñtso. 7Ñeñth attho anomaꞌmtena all, eñosnen, atarr womenk eꞌmorrtena, ñeñthpaꞌ ateth otnen:
—Semhchaꞌnaꞌchepaꞌch Yompor, xhochña sekowentatoñ tharroꞌmar theꞌpaꞌ oꞌ xhap allempoch entyesas eꞌñe poesheñaꞌttsos errothentheꞌ sephaꞌyena. Theꞌpaꞌ ñachña semaꞌyocha ñeñth yexhkateꞌ enet ñamha ñeñth yexhkateꞌ pats, ñamha oñexhno amaꞌt alloth potayen oñ.
8Allempoñapaꞌ alla kothaꞌnererr poꞌpoñ mellañotheñ ñeñth poepañ mellañotheñ. Ñapaꞌxhoꞌña eñosnerrerr, ñeñthñapaꞌ ateth otnom:
—Theꞌpaꞌ oꞌ awaporeꞌtarethta añ anets ñeñth atmaꞌntatareth Babilonia ñeñth nanak atarr anets. Tharroꞌmar ñeñthpaꞌ aña yexhatyenan ora allpon poꞌpoñexhno anetsoxhno ñeñth atarr sosyaꞌtsañexhno ñeñth ateth moenatseꞌtatyenanet ñet poꞌchets.
9Allempoñapaꞌ alla kothaꞌwererr poꞌpoñ mellañotheñ ñeñth poemaꞌpañ. Ñapaꞌxhoꞌña eñosnerrerr, poꞌñoñpaꞌ atarr womenk eꞌmorrtena, ñeñthñapaꞌ ateth otnerrerr:
—Ñerraꞌm eseshaꞌ maꞌyochenaya maꞌyarrmaꞌth amapaꞌ ayexhkatareth ñeñth tomaꞌntenaya maꞌyarrmaꞌth, amapaꞌ ñerraꞌm eseshaꞌ moenatenet oꞌch yakoꞌmhtaꞌchet maꞌyarrmaꞌth poeyotsaparo amapaꞌ poetoꞌmo ayatoꞌmaꞌtarethta, 10ñetñapaꞌ aꞌkoñchatarethterretchaꞌ, tharroꞌmar Yomporña eꞌñe poꞌyoroxhenñothpaꞌ ñachña eꞌñe koñchatwerrawet eꞌñe poktakma. Tsoꞌpaꞌ ñeñthchaꞌña moeroxhtatwerrawet ñamha ñeñth epoet worten tsoꞌpaꞌ ñeñthpaꞌ atarr shemasher ñeñth otenet azufre. Allchaꞌ aꞌkoñchatarethterret, allothchaꞌña koweretña allowen mellañotheñnaneshaxhno ñeñth poeyochreshaꞌ pen Parets. Koweretchaꞌ ñamha Cristo ñeñth atmaꞌntatareth Carnero. 11Atthoch achamarethterret, tsoꞌñapaꞌ chepoten pamosoñ enoneth ñeñthñapaꞌ amach awañañathterro amaꞌt errponaña. Amach wañerro amaꞌt mamesha ñeñth attho aꞌkoñchatarethtenet amaꞌt yetho amaꞌt ñamha tsapo. Tharroꞌmar ñetpaꞌ aña maꞌyochenet maꞌyarrmaꞌth ñamha ayexhkatareth ñeñth tomaꞌntenaya ña. Ñamha moenateñet acheñ oꞌch yakoꞌmhtaꞌchet oꞌch noñet paꞌkoꞌmeto maꞌyarrmaꞌth paꞌsoꞌcheñ amapaꞌ poetoꞌmo. Arrpaꞌ allowa ñeñth ateth ot mellañotheñ ñeñth anomaꞌmtetsa enoꞌmar.
12Ñeñthoꞌmarña alloweney ñeñthey eꞌñe poeyochreshaꞌ peney Parets ñeñthey ameꞌñenaya Yompor poꞌñoñ ñeñth ateth oteney ñeñthey eꞌñe yemtenaya Jesús, yokopñapaꞌ añ poktetsa oꞌch yaꞌwantaꞌwen eꞌñe akopha ñeñth allpon paꞌnamen es yewenoya.
13Allempoña na allpaꞌ neꞌmoerrerr ñoñets arroth wena entoth, ñeñthpaꞌ ateth oten:
—Theꞌpaꞌ oꞌch pekellkaꞌ añ ñoñets: “Theꞌñapaꞌ atarrchaꞌ kosheñtsoꞌtsaꞌyen allowen ñeñthchaꞌ rromayets eꞌñe pameꞌñeñothet Yepartseshar Jesucristo.” Poꞌñoxh ateth oten Yompor Poekamkëñ, ñetpaꞌ amesatarethterretchaꞌ. Theꞌpaꞌ amach alla thorrerreteꞌthe tharroꞌmar ñeñth allpon oꞌ thorraꞌyenet añ patsro, ñeñthpaꞌ eꞌñe eñotwareth all Yompor poeꞌntaño.
Atthoch xherr ñeñtheñpo allempoch apxherret narmets ñeñth oꞌ pomellaꞌwen
14Allempoña na kowerrtsanerrpaꞌ nenterrerr os atarr wallamaꞌth. Ñeñthña ospaꞌ all anen poesheñarr ñeñthpaꞌ añepaꞌt Jesús ñeñthara Ñeñth Acheñetosets arr patsro. Ñeñthñapaꞌ echoyoꞌmeth, ñeñthña poꞌchoyoꞌmhpaꞌ oro ñeñth choyoꞌmhtena. Potothñapaꞌ orrenan kochell ñeñth atoreꞌgorroth ñeñth atarr nanak etsotañ ñeñth otenet hoz. 15Allempoña Yompor paꞌpakllothpaꞌ xhaꞌnom poꞌpsheñeñ mellañotheñ. Ñañapaꞌ otosan ñeñth anets oso. Poꞌñoññapaꞌ atarr womenk eꞌmorrtena, ñeñthpaꞌ ateth otenan ñeñth anets oso:
—Phamat phokchello ñeñth pomellets allochñapaꞌ oꞌch phaꞌyapaxheꞌ tharroꞌmar oꞌ xhap ñeñtheñpo allempo yapxhen ñeñth oꞌ pomellaꞌwa yenaremh.
16Allempoña ñeñth anets oso, ñañapaꞌ oꞌxhoꞌ amatan ñeñth oꞌ pomellaꞌwen ora errapharen añe patsro. Ñañapaꞌ oꞌ aꞌyapaxhan allemhatheñ ñeñth pomellets añe patsro.
17Allempoña xhaꞌnerrerr poꞌpsheñeñ mellañotheñ Yompor paꞌpaklloth ñeñth entoꞌtsen. Ñapaꞌxhoꞌña orrenan poꞌkchell ñeñth atarr nanak etsotañ. 18Allempoñapaꞌ xhaꞌnerrerr poꞌpsheñeñ mellañotheñ. Ñapaꞌ arroth wapa alloꞌtsen altar. Ñañapaꞌ ñeñth awamenkathtetsa atthoch pomnaren penan tsoꞌ. Ñañapaꞌ otan ñeñth okchelleth. Poꞌñoññapaꞌ atarr womenk eꞌmorrtena, ñeñthpaꞌ ateth oten:
—Theꞌpaꞌ oꞌch phamat phokchello ñeñth atarr nanak etsotañ oꞌch phapxhaꞌ allo poechmhaꞌtets uva ñeñth añe patsroꞌtsen tharroꞌmar oꞌ atarr nanak yen.
19Ñeñthña mellañotheñ ateth oteñetpaꞌ atethxhoꞌ pha. Allempoña amatan poꞌkchello uva ñeñth añe patsroꞌtsen oꞌxhoꞌ aꞌyapaxhach. Aꞌyapaxhatwepaꞌ oꞌ shontanña uva allchaꞌ athmamaꞌchet atthoch xhaꞌnmatoñet poꞌñer. Ñeñthñapaꞌ añ tomaꞌntena attho Yompor poꞌyoroxhenñothpaꞌ atarrchaꞌ koñchaterran acheñeneshaꞌ. 20All athmamaꞌteñet uva, pokollothpaꞌ tama aꞌyentheꞌtsen. Ñeñth attho xhaꞌnen uva poꞌñer ñeñthpaꞌ añ tomaꞌntena oꞌch chorrerr errasats arr patsro aꞌyowen ñeñth allowanen trescientos kilómetros ñamha enoneth xhapchaꞌ eꞌñe kawall poꞌfrenowa ñeñth xhets eꞌñe yellekaꞌnowa.
Currently Selected:
El Apocalipsis 14: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.