Filipenses 1
1
Pablopaꞌ kellkan carta all ayottamphsarethtena; añekop kellkëꞌ ñeñth ameꞌñetsa anetso Filiposo
1Masheñneshachaꞌ ñamha noxhaneshachaꞌ ñeñthes allowenes oꞌ poeyochreshaꞌ perres Parets eꞌñe separrokmateñoth Cristo Jesús all anetso Filiposo, amaꞌt ñamha saꞌmhchaꞌtaretherneshowen ñamha ñeñthes diáconoxhnos ñeñthes sherbets all poerawo. Na Pablon epan masheñ Timoteo ñeñthen sekellkëneꞌña añ carta. 2Theꞌpaꞌ eꞌñe newomhchaꞌteñothes sa, napaꞌ oꞌch notas: Yomporepaꞌchña sebensareꞌtampeneꞌ ñeñth nanak Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.
Arrpaꞌ ateth maꞌyochampenanet Pablo
3-4Theꞌpaꞌ oꞌch notas, allempo nemaꞌyocheña Yompor ñeñth neyemtena na, neyerpoeñothespaꞌ xhokma nokshensa Yomporeshoth. Ñeñthoꞌmarña allempo es nenamoennas Yomporpaꞌ xhokma nokshensa Yomporeshoth allowenes. 5Tharroꞌmar allempotheñ sagër Cristopaꞌ sapaꞌ alloꞌnaꞌt sesen ameꞌñatsa themeꞌttsen. Eꞌñe sameꞌñeñothpaꞌ atthoña sellkapretna atthoch errothenothpaꞌ oꞌtheꞌ epaꞌwerra errakmañen añ kowen ñoñets alloch yekeshperra. 6Ñamha napaꞌ neñotenes attho Yomporpaꞌ oꞌ ameꞌñatasa awaña, theꞌñapaꞌ ñepaꞌchña alloꞌna awamenkath sephaꞌnmoeꞌ eꞌñe ñokop, thayotheñ amaꞌt esempowañenchaꞌ werra Jesucristo poeꞌntañoth. 7Ñeñth ateth nentapretenespaꞌ ñeñthpaꞌ eꞌñe pokteꞌ tharroꞌmar atarr nemorrentensa eꞌñe neyoxhrokmañen. Ñeñthoꞌmarña yellkannaꞌteñothpaꞌ yeñoteñ Yompor eꞌñe poemoereñothpaꞌ amach aꞌypoꞌñerrno na amaꞌt ñamha sa. Ateth napaꞌ amaꞌt cárceloꞌtsenen Yompor poemoereñothenpaꞌ amach aꞌypoꞌñerrno. Ñamha ñerraꞌm allempo achmhareꞌtenet añ kowen ñoñets alloch yekeshperra, attho napaꞌ nemoñena añ kowen ñoñets, Yompor poemoereñothenpaꞌ xhokma awamenkath penen. Ñamha allempo nameꞌñateña acheñeneshaꞌ añ kowen ñoñets alloch yekeshperra, Yompor poemoereñothpaꞌ xhokma awamenkath penen. 8Ñeñthoꞌmarña theꞌ Yomporpaꞌ eñotenen poꞌñoxh theꞌpaꞌ nanak neyerpoensa. Eꞌñe ateth nanak nemorrentensa ñerraꞌm ateth morrentenya Jesucristo eꞌñe kowen. 9Ateth nenamoennas Yompor sokoppaꞌ ateth noten, alloꞌnepaꞌch sesen morrentannaꞌtnomtsa nanak ñamha alloꞌnepaꞌch sesen eñotnomoeꞌ ñeñth nanak sherbets yamoꞌtseshakop. Allochñapaꞌ atthoch xhokma yorrtaten yemorrenteña eꞌñe poꞌñoxh. 10Atthochña señoch erraꞌtsentheꞌña nanak kowen sherbets Yomporekop. Allochñapaꞌ eꞌñe señoteñothpaꞌ añepaꞌchña ateth sephaꞌyen ñeñth eꞌñe kowenareꞌ. Allochñapaꞌ amach xha saꞌyowarethterro ñerraꞌm esempowañenchaꞌ werra Cristo. 11Ora ateth nenamoennas Yompor sokoppaꞌ ateth noten, eꞌñe sameꞌñeñoth Jesucristo poktakmapaꞌ añepaꞌchña kowen ateth sephaꞌyen ñeñth nanak sherbets Yomporekop. Ñerraꞌm ateth yepenapaꞌ atthochña eꞌñe kowen yaꞌkshapretarethtena Yompor poꞌkowenña.
Attho epatwan allowenakop Yompor poꞌñoñ eꞌñe cárceloth
12Ñeñthoꞌmarña masheñneshachaꞌ ñamha noxhaneshachaꞌ oꞌch neñotatas, amaꞌt attho ayottamphsarethen cárcelo ñeñthpaꞌ ama añekpayaye atthoch oꞌch epatareꞌtenan kowen ñoñets alloch yekeshperra. Elloña eꞌñe atthothpaꞌ alloꞌnach sen epaꞌwatsa Yompor poꞌñoñ. 13Ñeñthoꞌmarña theꞌpaꞌ allowen guardianeshaꞌ ñeñth kowampeneꞌ amhchaꞌtarethepoꞌ ñetpaꞌxhoꞌña oꞌ eꞌñe eñotwanet attho ayottamphsarethen cárcelopaꞌ añothña eꞌñe nameꞌñeñoth Cristo ateth pennet. Ñamha amaꞌt paꞌnamen acheñeneshaꞌ theꞌpaꞌ oꞌ eñotwanet ñeñthekop nemoeroxhtena. 14Ñeñthoꞌmarña theꞌpaꞌ shonteꞌ masheñneshaꞌ eꞌñe alloꞌna senet yemoetnomoet Yepartseshar Cristo poktakma, tharroꞌmar ñetpaꞌ ateth entennet eꞌñe nameꞌñeñotha Cristo nemoeroxhtena cárcelo. Ñeñthoꞌmarña ñetpaꞌxhoꞌña oꞌwañ mechaꞌnaꞌtet serrpareꞌtet Yompor poꞌñoñ.
15Ñewa, poꞌñoxhpaꞌ eñall poesheñaꞌtets tharrekpach serrpareꞌtenet Cristo eꞌñe poeꞌmatareꞌteñothetan na. Tharraña poꞌpsheññexhnopaꞌ eꞌñech poksheñeshokmañen aꞌpotheññañet Yompor poꞌñoñ. 16-17Añpaꞌ eꞌñe poemorrenteñothetan ateth penet tharroꞌmar ñetpaꞌ eñotennet napaꞌ anarethen attho nach moñenaya añ kowen ñoñets alloch yekeshperra ñerraꞌm esempo achmhareꞌteñet. Tharraña ñeñthña serrpareꞌteneꞌ Cristo poꞌñoñ eꞌñe ñokpoetapaꞌ amach poeñmañeshakmayeꞌ serrpareꞌteneto. Ñetpaꞌ xhatheꞌ otenapoetañ alloꞌnach atsrreꞌmoxhen entatnennet amaꞌt cárceloꞌtsenen.
18-19Ñewa, amaꞌt atethpaꞌ nokoppaꞌ eꞌñe pokteꞌ. Amaꞌt errotheno serrpareꞌtenet kowen ñoñets Cristokop, nokoppaꞌ eꞌñe pokteꞌ nenteñ. Tharroꞌmar amaꞌt poeshkëñmeꞌchatsa serrpareꞌtenet Cristo, amaꞌt ñamha poeñmañeshothchaꞌ serrpareꞌtenetpaꞌ napaꞌ ñeñthchaꞌña nanak nokshateneꞌ. Ñeñthoꞌmarña napaꞌ xhokmach nokshena tharroꞌmar napaꞌ neñotenes sapaꞌ xhokma semaꞌyochampenna ñamha neñotena Jesucristo Poekamkëñpaꞌ ñeñthña awamenkath nepeneꞌ. Ñeñthoꞌmarña neñoteñ añ moeroxhteñets tsapathonethpaꞌ aꞌpoktatarethchaꞌ eꞌñe kowen nokop.
Attho Pablopaꞌ ora allpon korreꞌth arr patsropaꞌ ñeñthpaꞌ eꞌñe ora Cristokop
20Ñeñthoꞌmarña eꞌñe noksheñeshaꞌ nekweñ tharroꞌmar neñoteñ amach apenkataretheno amaꞌt mamesha. Ñamha amach nemhchaꞌnañothayaya neꞌñoreno eꞌñe kowen Cristokop. Atthochña napaꞌ akshapretpoꞌ entapretennet Cristo, amaꞌt napaꞌ errothenoꞌtsenenchaꞌ amaꞌt ñerraꞌm nerroma amapaꞌ ñerraꞌm ora nokrrenmeñ. Ateth awathotheñpaꞌ theꞌpaꞌxhoꞌña atthekmoepaꞌch pena. 21Tharroꞌmar napaꞌ allpon nokrrena arr patsropaꞌ ñeñthpaꞌ eꞌñe ora Cristokop. Ñamha amaꞌt xho nerromapaꞌ ñeñthpaꞌ elloña nanak kowen nokop. 22Ñamha ñerraꞌm allempo nokrrenmeñpaꞌ thorrenayanach Yompor poꞌtarwas tharroꞌmar atthothchaꞌña alloꞌnach nesherbhatneññañ Yompor poꞌñoñ. Ñeñthoꞌmarña ñeñthchaꞌ nanak nemnaꞌ theꞌpaꞌ ama neñoteñe erraꞌtsentheꞌña ñeñth nanak sherbets, ñatoꞌ oꞌch nerroma thayekma amapaꞌ ñatoꞌ korretsanach. 23Ñeñth nanak thorrapoꞌ nenten oꞌch notas ñeñth atarr kowen nenten, ñatoꞌ oꞌch nerroma amapaꞌ korretsanach. Napaꞌ nemneñeñ oꞌwañchaꞌ nokrra añe patsro allochñapaꞌ oꞌch nexhap thekma Cristesho, tharroꞌmar ñeñthpaꞌ elloña nanak kowen nokop. 24Tharraña ñerraꞌm amach nerromopaꞌ ñeñthchaꞌña nanak sherbhats sokop. 25Ñeñthoꞌmarña napaꞌ neñoteñ amach nerromo, amach nesaꞌnerrso, allochñapaꞌ alloꞌnach nesen seyxhatnomoeꞌ allowenes attho ñerraꞌm alloꞌna yesen yemtaya Cristopaꞌ xhokmachña yokshena. 26Allochñapaꞌ ñerraꞌm esempo nexherr seshopaꞌ allempochña alla neñotaterrserr nanak, atthoch alloꞌna sesen nanakokmañen koshaya Cristo.
Xhokmoepaꞌch yokrrena eꞌñe kowen ñeñth ateth oteney Yompor poꞌñoñoth
27Theꞌpaꞌ añach notas, xhokmoepaꞌch sokrra eꞌñe kowen ñeñth ateth yorrtaten ñeñthey ameꞌñenaya Cristo poꞌñoñ. Allochñapaꞌ ñerraꞌm machayotha nabhcherrsaꞌ amapaꞌ ñerraꞌm amaꞌtchaꞌ ama yabhchannerropaꞌ eꞌñepaꞌchña kowen neꞌmareꞌtenes attho eꞌñe womenk sepen seyoxher atthoch eꞌñe pathrra sokthapeꞌchen. Ñamha oꞌch neꞌmareꞌtas attho sapaꞌ semaꞌyoxhrena allowenes parro atthoch semoñena añ kowen ñoñets alloch yekeshperra. 28Ñamha amoepaꞌchña aña seyoreꞌtatstaye amaꞌt mamesha ñeñth seꞌmoñeꞌteneꞌ tharroꞌmar ñetpaꞌ ñeñthchaꞌña eñotatawet poꞌñoxh ñetpaꞌ amach keshperreto. Tharraña yokopñapaꞌ ñeñthña yeñotateneꞌ poꞌñoxhpaꞌ yekeshphaꞌwerrach. Añexhnopaꞌ Yomporo pokthaphña. 29Ama pathrrayaya moenatenye Yompor attho oꞌ yameꞌñera Cristo. Añña eꞌñe poemoereñothey moenateney ñamha eꞌñe yameꞌñeñothpaꞌ xhochña yemoeroxhta ñokop. 30Ñeñthoꞌmarña sapaꞌxhoꞌña eꞌñe pokteꞌ oꞌch saꞌmoeroxhtatarethta Cristokop eꞌñe ateth sentenen na awathotheñ amaꞌt themeꞌttsenpaꞌ seꞌmareꞌtenen napaꞌ alloꞌtsenarana all nemoeroxhtena eꞌñe nameꞌñeñoth Cristo.
Currently Selected:
Filipenses 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.