San Lucas 20
20
Attho allsensarethtena Jesús
(Mt. 21.23-27; Mr. 11.27-33)
1Poꞌpocheño pamtharr Jesúsñapaꞌ alla yexhaterranerr acheñeneshaꞌ Parets paꞌpakllo. Allpaꞌ añ serrpareꞌtatenanet kowen ñoñets alloch yekeshperra. Attheñapaꞌ waxhaꞌtoña shonteꞌ amhchaꞌtarethneshaꞌ —ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar ñamha allponsheña ñeñth atarr etsotayenayeñ ñoñets ñeñth ateth anareth ñamha poꞌpotantañ ñeñth pomporneshaꞌ phaꞌyen allowen judioneshaꞌ. 2Ñetñapaꞌ ateth otoset Jesús:
—Ñewa, yapaꞌ añekop yewena yemneñ oꞌch photey ¿errotheꞌt apoenpetña llesens? ¿Eseshaꞌtña phapoeneꞌña llesens atthoth phorrtatyenña ñeñth xhokma atthekma pephaꞌyena?
3Jesúsñapaꞌ ateth otapanet:
—Ñewa, napaꞌxhoꞌña nemneñ oꞌch naꞌphthoꞌtapas samha amaꞌt pathrra ñoñets. Sapaꞌxhoꞌña oꞌch sotosen, 4awañmoꞌcha allempo apateꞌth Juanañ Yomporekop ñeñthpaꞌ ¿eseshaꞌtña llesenseꞌ ñatoꞌ Yompor amapaꞌ acheñatheꞌ apoeꞌña llesens? Nemnen oꞌch sotosen ñeñth ateth sokthapeꞌchen sa.
5Ñetñapaꞌ eꞌñe aꞌnawa otannaꞌtyeset:
—Taꞌm errothchaꞌkaꞌye yochtheꞌ. Ñerraꞌm xha yoch Yomporeshothkaꞌye apetña llesens, ñañapaꞌ xhatheꞌkaꞌye otey: “Ñewa, sañapaꞌ esoꞌmareꞌtña ama seꞌmhñocheña awaña allempo serrpareꞌtatosan acheñeneshaꞌ.” 6Elloña ñerraꞌm xha yoch acheñeshotha apet llesenspaꞌ acheñeneshaꞌñapaꞌ xhatheꞌ eꞌmoñeꞌtyet. Poeꞌmoñeꞌteñothetaypaꞌ xhatheꞌ rrollapechyet tharroꞌmar ñetpaꞌ eꞌñe kowen eñcheteꞌth Juanañ, xhokma otyenet ñapaꞌ ñeñthkaꞌyeña aꞌmhtoseꞌ Yompor poꞌñoñ.
7Ñeñthoꞌmarña ñetpaꞌ ateth ochet Jesús:
—Taꞌm yapaꞌ amakaꞌyeña yeñoteñe; erroththeꞌ wapaña Juan, erroththeꞌ apetña ñamha llesens.
8Allempoña Jesúspaꞌ ateth oterraneterr:
—Napaꞌxhoꞌña theꞌpaꞌ amach notaso samha alloth aparethenña namha llesens atthoth ateth nephaꞌyena.
Ateth atmaꞌntatarethtena ñeñth atarwasañexhno ñeñth ama kowenayaye
(Mt. 21.33-44; Mr. 12.1-11)
9Allempoña Jesúspaꞌ alla serrpareꞌtaterranerr acheñeneshaꞌ tomaꞌnteñtso. Ñeñthpaꞌ ateth otanet:
—Eñall poesheñarr acheñ ñeñthña nareꞌtanatatnomoeꞌ shonteꞌ uvach, paꞌmoerñapaꞌ eꞌñe ora uvachmatatwe. Eꞌñe allponmatatsapaꞌ oꞌ naꞌnman poꞌpotantañ ñeñthchaꞌ tarwasatats uvachmo ñeñthchaꞌ koyerrawet allpon ñerraꞌm esempoch thoteñet. Allempoña ñapaꞌ awoꞌ bhaxhayo poꞌpoñ anetso alla atomat. 10Xhap allempo yen uvachllomhpaꞌ ñañapaꞌ moeñerran poꞌpsheñeñ paꞌtarwasañer oꞌch enamoerraꞌ uvachllomh poꞌpsheñeñ paꞌtarwasañresho ñeñth kowampeneꞌ uvachmaꞌ. Allempoña xhen allpaꞌ enamwenan ñeñth allpon oꞌpatena pamoꞌmtayet arepaꞌtchaꞌña es apapoenayeña uvachllomh, elloña ñeñthapaꞌ xha nalleꞌtapoeñet, oꞌ alla moeñoꞌteret eꞌñe attha. 11Allempoña ñeñth pamoꞌmteꞌ pen uvachmaꞌpaꞌ oꞌ alla moeñerranerr poꞌpsheñeñ paꞌtarwasañer. Allempo xhenerr allpaꞌ ñapaꞌxhoꞌña xha es otnareꞌtapetpaꞌ oꞌxhoꞌ nalleꞌtapet oꞌ matateret eꞌñe attha. 12Allempo pomaꞌpocheño oꞌ alla moeñerranerr poꞌpsheñeñ paꞌtarwasañer. Ñeñthpaꞌxhoꞌña allempo xhenerr ñamha allpaꞌ ñañapaꞌ xha atarr atserrphatseꞌtapetpaꞌ oꞌxhoꞌ alla matateret.
13‘Allempoña ñeñth pamoꞌmteꞌ penetpaꞌ ateth ot: “Theꞌpaꞌ errothwachñakaꞌyeña nepeꞌtheꞌ. Theꞌpaꞌ oꞌch nemñe ñeñth eꞌñe na nechemer ñeñth atarr nemorrentena. Ñatoꞌrraña ñeñthpaꞌ mechaꞌnaꞌtapetchaꞌ.” 14Arepaꞌtchaꞌña amaꞌt mameshapaꞌ mechaꞌnaꞌtapeto. Allempo entapoñet poechemerpaꞌ ateth otannaꞌtyeset: “Añmapaꞌ ñeñthkaꞌyeña poechemer ñeñthchaꞌ oꞌpaterraya pompor poenaremh esempo. Ñapaꞌxhoꞌña theꞌpaꞌ oꞌchkaꞌye yemtsaph allochñapaꞌ yachkaꞌyeña eꞌñe oꞌpaterrayaña pompor poenaremh.” 15Allempoñapaꞌ oꞌ rromapet oꞌ chetareꞌtnomet narmetsmo aꞌyoth, allña moetsapoñetña ñamha poechemer. Arrpaꞌ allowa ateth tomaꞌntata Jesús eꞌñe ñañeña.
Jesúsñapaꞌ ateth oterranerr acheñeneshaꞌ:
—Ñewa, theꞌpaꞌ oꞌch notas, ñeñth pamoꞌmteꞌ pen atarwasañexhnopaꞌ atethchaꞌ phowerranet. 16Ñerraꞌm esempoch werranet, pamoꞌmtayetpaꞌ aꞌkllatwerranetchaꞌ, narmetsmaꞌña oꞌch apoerran poꞌpotantañ.
Acheñeneshaꞌñapaꞌ allempo eꞌmoeñet Jesús ateth oten, ñetñapaꞌ ateth ochet:
—¡Ñeñthpaꞌ arepaꞌchña attheyeꞌ phatsterro, Neyompor-re!
17Jesúsña attha kowanetpaꞌ ateth otanet:
—Ñerraꞌm ama ateth poeperraꞌchepaꞌ esoꞌmareꞌtña otenña Yompor poꞌñoñ ñeñth anwareth awathotheñ, ñeñthpaꞌ eꞌñechkaꞌye poꞌñoxh ateth perra. Tharroꞌmar ñeñthpaꞌ ateth oten nokop, all atmaꞌntatarethen mapoeꞌ. Ñeñthpaꞌ eꞌñe ateth anwareth Yompor poꞌñoñ awathotheñ:
Añ mapoeꞌ ñeñth ama pokteyeꞌ entyeno ñeñth thomatyeneꞌ pokoll, ñeñthña theꞌpaꞌ oꞌ anarethterra ñeñthchaꞌ ello atarr kowen sherberrets eꞌñe ateth ñerraꞌm kellpach allo eꞌñe kowen echarr orratenet pokoll.
18Elloñapaꞌ ateth otanet:
—Allowen ñeñth epothoꞌtetsa añ mapyopaꞌ atarrchaꞌ atserrpenanet, ñamha añ mapoeꞌpaꞌ ñerraꞌm eseshesho mataꞌnompaꞌ eꞌñech aꞌtpetseꞌtwosanet.
Attho aꞌphthoꞌchet Jesús, pokteꞌtheꞌ oꞌch tsaꞌtet impuesto
(Mt. 21.45-46; 22.15-22; Mr. 12.12-17)
19Añña ñeñth atarr etsotayenayeñ ñoñets ñeñth ateth anareth ñamha ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar, ñetña allempopaꞌ oꞌ eñochet ñetkaꞌye atmaꞌntatarethtenet, ñeñthpaꞌ ñokpoetkaꞌye ateth eñorenaña Jesús. Allempoña ñetpaꞌ atarr moeneñetañ oꞌch rremoet Jesús eꞌñe allorokma tharraña ama eseshayeꞌ rromaye tharroꞌmar ñetpaꞌ mechaꞌteñet acheñeneshaꞌ. Ñewa, acheñeneshaꞌ eꞌñekaꞌye kowen enteñet Jesús. 20Tharraña ñetpaꞌ aña atarr eꞌnenet atthoch amaꞌt parrochapaꞌ oꞌch eñorachet ñeñth ama pokteyaye amaꞌt ñamha gobiernokop, allochñapaꞌ atthoch rremoet oꞌch pomoeñetaꞌ amhchaꞌtarethesho ñeñth nen gobiernoꞌ Romoth ñeñth amhchaꞌtarethtetsa alloꞌmarekop. Attheña ñetñapaꞌ eꞌñe aꞌnawa moeñet allponsheña acheñ Jesúsesho ñeñth ottetsañ ñerraꞌmrratheꞌ atarr kowen acheñ, tharraña ñetpaꞌ añekpa amñarethtet atthoch eꞌñe poeshkëñoth poꞌñoñothetpaꞌ oꞌch eñorachet ñeñth ama kowenayaye. 21Allempoña xhapoet ñeshopaꞌ ateth otoset:
—Maestrochaꞌ, yapaꞌ yeñoteneph ñeñth ateth peñen ñamha attho peyxhatyen Yompor pokthaphña ñeñthpaꞌ eꞌñe kowenakma. Phapaꞌ allowen acheñ eꞌñe kowen pentweñ; ama aña ñapoeth pemorrenteno ñeñth atarr amhchaꞌnaꞌtpoꞌ entyen allowen acheñeneshaꞌ. 22Ñeñthoꞌmarña theꞌpaꞌ yemneñ oꞌch peñotatapoey erraꞌtsentheꞌña eꞌñe poꞌñoxh kowentetsa. ¿Pokteꞌtheꞌ oꞌch yetsaꞌta impuestos añekop ñeñth amhchaꞌtarethtetsa Romo, ñeñth ama judioneshayaye? Ñatoꞌ amatheꞌ pokteyaye yokop ñeñthey judioneshay oꞌch yetsaꞌta amhchaꞌtareth romoꞌmarneshaꞌ ñeñth ama judioneshayaye.
23Jesúsñapaꞌ eñotanet ñeñth ateth shekareꞌteñetañ, ñañapaꞌ ateth otanet:
24—Ñewa, segaten poetallarr kelle.
Gatwetpaꞌ ateth otanet:
—Ñewa, sapaꞌ oꞌch soten, ¿eseshaꞌt sentenña ñeñth atmaꞌntatarethtetsa all? ¿Eseshaꞌt paꞌsoꞌcheñ ñeñth akellkarethtetsaña all?
Ñetñapaꞌ ateth ochet:
—Amhchaꞌtarethkaꞌye atmaꞌntatarethtetsaña all ñamha ñokaꞌyeña paꞌsoꞌcheñ ñeñth akellkarethtetsa all.
25Jesúsñapaꞌ alla oterraneterr:
—Ñeñthepñapaꞌ añ poktetsa oꞌch yaph amhchaꞌtareth ñeñth ño ñeñth ateth poktetsa gobiernokop; tharraña elloneth ñeñth Yomporo oꞌch yaph ñamha ñeñth ateth poktetsa ñokop.
26Atthoña amaꞌt poeshkëñothet ateth otyenetpaꞌ ama errothenoth eñoracheto ñeñth ama pokteyaye amaꞌt ñamha gobiernokop tharroꞌmar allowen acheñeneshaꞌ ñeñth alloꞌtsaꞌyen eꞌñe kowen enteñet ateth anapoenanet Jesús. Ñeñthña ashkañneshaꞌpaꞌ attha kowanrrorteñet tharroꞌmar atarr kowen anapoenanet Jesús. Ñeñthoꞌmarña ñetpaꞌ ama errothenayeꞌ otenayeꞌ entereterro.
Attho aꞌphthoꞌchet Jesús, ñerraꞌm poꞌñoxhtheꞌ atanterrapoꞌ rromoth, taꞌm, allempopaꞌ errothenchaꞌña yeperra
(Mt. 22.23-33; Mr. 12.18-27)
27Allempoñapaꞌ waxhaꞌtoña ñamha patantarr ñeñth saduceoneshatets. Ñewa, ñeñth saduceoneshatets ñetñapaꞌ elloneth echenet pokthaphña ñeñthoꞌmar ateth otenet amatheꞌ errothenoth yetanterroña rromoth amaꞌt errponaña.
28Ñetñapaꞌ ateth otoset Jesús:
—Maestrochaꞌ, awath Moiséspaꞌ ateth kellkonay ñoñets ñeñth poktetsa ñeñthchaꞌ ateth yepha. Ñeñthpaꞌ ateth otenña Moisés poꞌñoñ: Ñerraꞌm esempo rroma yakma oꞌch saꞌnman poethapor tharraña ama chemereꞌtnomopaꞌ añ poktetsa paꞌmoꞌnasheñchaꞌ alla yorerreꞌña poꞌnorrar allochñapaꞌ atthoch eñalleterraña ñeñthchaꞌ poechemer perr paꞌmoꞌnasheñeñ. Ñeñthpaꞌ atethkaꞌye kellkaꞌnmonayña Moisés awath. 29Ñewa, theꞌpaꞌ eñall kanxherrsheña ñeñth eꞌñe poktakma paꞌmoꞌnasheñekmoet. Ñeñth poesheñarr popoꞌnaretpaꞌ oꞌ yoran koyaneshaꞌ ñeñth poethapor phaꞌ. Eꞌñe allponmatatsapaꞌ oꞌ rromaña, yakma ama chemereꞌtnomo. 30Allempoña ñeñth poꞌrroxhoꞌmerpaꞌ oꞌ yorerran paꞌmoꞌnasheñeñ poethapor. Eꞌñe allponmatatsapaꞌ ñapaꞌxhoꞌña oꞌ rromoerrerr ñamha, ñeñthpaꞌxhoꞌña ama chemereꞌtnomo. 31Allempoña poꞌpsheñeñ paꞌmoꞌnasheñpaꞌ oꞌ alla yorerranerr ñamha poꞌnorrar. Eꞌñe allponmaterrtsapaꞌ ñapaꞌxhoꞌña oꞌ rromoerrerr ñamha, ñeñthpaꞌxhoꞌña ama chemereꞌtnerrerro oꞌ attha rromoerrerr. Eꞌñe atthekma phowet kanxherrsheñoꞌmaretpaꞌ eꞌñe poeyorwarochet ñeñthara poesheñarr koyaneshaꞌ. Eꞌñe allowenetpaꞌ eꞌñe atthekma pet kollaꞌwet amaꞌt poesheñarrothetapaꞌ ama chemereꞌtnomoeto. 32Allempoña oꞌ rromaña ñamha koyaneshaꞌ. 33Theꞌña ñerraꞌm poꞌñoxhtheꞌ yetantena yerromñothpaꞌ añña koyaneshaꞌ allempopaꞌ ¿eseshaꞌtchaꞌña poethapor perreꞌ tharroꞌmar allowenet kanxherrsheñoꞌmaretpaꞌ eꞌñe poeyorwarochet?
34Allempoña Jesús otanet:
—Ñewa, ateth yexhen acheñeneshaꞌ arr patsro, xhokmach senaꞌtenet, koyaneshaꞌpaxhoꞌña apoeñet ñeñthchaꞌ poerrollar phaꞌ. 35Tharraña esempowañen allempoch tanterret poꞌpocheño allowen ñeñthchaꞌ eꞌñe pokteꞌ entwerr Yompor allochñapaꞌ atthoch oꞌch alla korrerret poꞌpocheño, ñetña allempopaꞌ amaꞌt poesheñarrotheta amach senaꞌterreto, amaꞌt koyaneshaꞌpaꞌxhoꞌ amach eseshayeꞌ apoerraye ñeñthchaꞌ yorerrawet. 36Tharroꞌmar allempopaꞌ amach arromñathterreto amaꞌt awatha atthoch eꞌñech ateth perret ñerraꞌm mellañotheñnaneshaꞌ. Yomporñapaꞌ oꞌch eꞌñe poechemer perranet eꞌñe poktakma tharroꞌmar allempopaꞌ oꞌ tanterret rromothpaꞌ oꞌwañchaꞌ arromñathterret amaꞌt errponaña. 37Elloña amaꞌt Moisés ateth eñotataneꞌth acheñeneshaꞌ poꞌñoxh ñeñth kollaꞌwatsa allempo, ñetñapaꞌ korretseta. Ñewa, all akellkareth tsachmoꞌr ñeñth eꞌñe ñotha wortets. Allothñakaꞌyeña Yomporpaꞌ eñoranaꞌtanaña Moisés; ñeñthpaꞌ atethkaꞌ otña Yompor allempo: “Napaꞌ ñeñthen Poꞌyomporer pen Abraham ñamha Isaac, ñamha Jacob.”
38Jesúsñapaꞌ alla oterraneterr:
—Ñewa, yapaꞌ yeñoteñ Yomporpaꞌ ama añeyeꞌ Poꞌyomporer penaye ñeñth rromoets eꞌñe poktakma ñapaꞌ añkaꞌyeña Poꞌyomporer peneꞌ acheñ ñeñth korretsach. Yomporñapaꞌ eꞌñe entenanet allowenetpaꞌ eꞌñe korretseta.
39Añña poesheñaꞌtets ñeñth atarr etsoteneꞌ ñoñets ñeñth ateth anareth, ñetñapaꞌ ateth ochet:
—Eꞌñe Maestrochaꞌ eꞌñe poꞌñoxh ateth photen.
40Ñeñthoꞌmar allempotheñpaꞌ amaꞌt poesheñarrothetapaꞌ ama eseshayeꞌ aꞌphthoꞌtenayeꞌ enterraye.
Attho Cristo ñeñth Poꞌpartseshar peꞌth David, elloñapaꞌ oꞌ alla poꞌmhreneñ per
(Mt. 22.41-46; Mr. 12.35-37)
41Allempoña Jesúspaꞌ ateth otan ñeñth atarr etsotayenayeñ ñoñets ñeñth ateth anareth:
—Esoꞌmareꞌtña otyenet ñeñthchaꞌ Cristotosets ñapaꞌ aña poꞌmhreneñ peneꞌ David tharroꞌmar ñeñthchaꞌ Cristoterrets ama aña poꞌmhreneñ peñe David tharroꞌmar ñapaꞌ Poꞌpartseshareꞌnaña peꞌth David. 42Tharroꞌmar amaꞌt Davidpaꞌ allempo kellkëꞌth all libro Salmo allempopaꞌ atethkaꞌye eñoseꞌthña añekop ñeñthchaꞌ Cristoterrets:
Yompor Paretspaꞌ ateth otennan ñeñth Nepartseshar nepen na (ñeñthara ñeñthchaꞌ Cristoterrets): “Theꞌpaꞌ oꞌch phanorrwerr arr nekowenroth allchaꞌ pekowentapreterrna.
43Atthochña amaꞌt ñeñth peꞌmoñeꞌteneꞌ napaꞌ oꞌch nameꞌñatwerranet allochñapaꞌ oꞌch ateth perret ñeñth pemnen pha.”
44Ñeñthpaꞌ atethkaꞌye oteꞌthña David ñeñthchaꞌ Cristoterretspaꞌ ñeñthkaꞌyeña Poꞌpartseshar peꞌthña amaꞌt allempotheñ. Ñewa, amaꞌt señoteñeña Cristo ñeñth Poꞌpartseshar peꞌth David ñeñthña theꞌpaꞌ oꞌ alla poꞌmhreneñ per ñamha.
Attho Jesúspaꞌ aꞌmethareꞌtenan ñeñth etsotayenayeñ ñoñets ñeñth ateth anareth, ñeñth ateth yexhenet ñetpaꞌ ñeñthpaꞌ ama kowenayeꞌ entapretenaneto Yompor
(Mt. 23.1-36; Mr. 12.38-40; Lc. 11.37-54)
45Elloña shonteꞌ acheñeneshaꞌ ñeñth eꞌmhñoꞌteneꞌ allempo ateth otenan Jesús poeyochreshaꞌ:
46—Amach semeñeꞌtapretatsche ommoñatheneshaꞌ pokthaphña ñeñthareta ñeñthet atarr etsotayenayeñ ñoñets ñeñth ateth anareth. Tharroꞌmar ñetpaꞌ añeꞌnaña atarr kowen entenet oꞌch chorrenet atarrom shetamoets oꞌch attha yormaꞌtatseꞌtenet paꞌshtam. Ñamha pommoꞌcheñothetpaꞌ atarrchaꞌ moeneñet oꞌch eꞌñe poemhchaꞌnaꞌteñoth eꞌñech kowen womhchaꞌtenanet acheñeneshaꞌ all chopeñeꞌchyenet. Ñamha ñetpaꞌ añeꞌnach atarr moenenet oꞌch anorrxhaꞌtyenet judioneshaꞌ poꞌprawo allekma anorryen ñeñth atarr amhchaꞌnaꞌtpoꞌ entyen allowen acheñeneshaꞌ ñamha eꞌñe atthekma penet ñamha all rrallmeꞌchapretenet. 47Tharraña ñetñapaꞌ rrethorrnaneshaꞌnaña poerratampesyenetña paꞌpakëll. Elloña eꞌñe pommoꞌcheñothetpaꞌ aña atarr moenenet oꞌch ateth penet ñerraꞌmrratheꞌ ñetpaꞌ atarroꞌ kowen acheñret ñeñthoꞌmarña arrchaꞌ maꞌyochenet all shontena acheñeneshaꞌ, amach thematenayaya maꞌyocheneto. Ñeñthoꞌmarña theꞌ napaꞌ oꞌch notas, ñeñth ateth petsa pommoꞌcheñothpaꞌ elloña atarrchaꞌ aꞌkoñchaꞌtarethterret.
Currently Selected:
San Lucas 20: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.