San Juan 9
9
Allempo Jesúspaꞌ aꞌkrraterran poesheñarr aporoꞌyeth ñeñth attha eñalletña
1All oñen Jesúspaꞌ allña entnoman poesheñarr yakma aporoꞌyeth. Ñeñthña aporoꞌyethpaꞌ attha eñalletña. 2Poeyochreshaꞌñapaꞌ allentha aꞌphthoꞌchet:
—Maestro, ¿eseshaꞌtña ochñaꞌtats ñatoꞌ ña amapaꞌ pamoꞌmteꞌtheꞌ ñeñthoꞌmar eñalletaña ateth aporoꞌyeth?
3Jesúsñapaꞌ ateth otanet:
—Amakaꞌye poꞌchñarotheyaye amaꞌt ñamha pamoꞌmteꞌ; ñeñthpaꞌ añekopña allochñapaꞌ oꞌch norrtatoñ Yompor poꞌpartsoña ñesho. 4Ñeñth poktetsa oꞌch norrtatoñ poꞌpartsoña ñeñth nellsenseꞌ thayepaꞌtñapaꞌ poetarmeñ. Ñerraꞌm oꞌch chekmetenpaꞌ amach eshkayeꞌ yetarwaso. 5Thayepaꞌtña añe patsroꞌtsenmeñenpaꞌ na ñeñthen aꞌpoetarsampeneꞌ acheñeneshaꞌ pokthaphña añe patsro.
6Allempoña ateth otwapaꞌ allentha aꞌxhonan paꞌsnom patso oꞌ aꞌxhaxhaꞌtach. Ñeñthña xhaxhaꞌteꞌpaꞌ alloña aꞌyaklleꞌchanña aporoꞌyeth. 7Oꞌña aꞌyaklleꞌchwepaꞌ ateth och:
—Theꞌpaꞌ orraph oño all apkoꞌsathtataretho ñeñthpaꞌ añ paꞌsoꞌcheñ Siloés. Allchaꞌ peꞌpaklleꞌcha. (Ñewa, añkaꞌye otenetña Siloés ñeñth oñ awaꞌñareth.)
Ñañapaꞌ allentha awoꞌ oño allchaꞌ eꞌpaklleꞌchenaꞌ. Eꞌpaklleꞌchwatsapaꞌ eꞌñe errtsapaꞌ allenthepaꞌtchaꞌ kowenterraña paꞌklleꞌ eꞌñe kowen enterra. 8Pamoꞌtseshaꞌña ñamha poꞌpoñexhno acheñ ñeñth eꞌñe chemeꞌteneꞌ all allempo enamaren kelle, ñetñapaꞌ ateth otyeset:
—Añpaꞌ ¿amaꞌt añeyayeña ñeñth anorrtseꞌth ñeñth enamareꞌtatseꞌth kelle?
9Patantarr acheñeneshaꞌpaꞌ ateth otyenet:
—Ñeñthkaꞌye.
Poꞌpotantañexhnopaꞌ ateth otyenet:
—Amakaꞌye ñeñtheyaye, atthakaꞌ ñeñthemaꞌthtena.
Aporoꞌyethñapaꞌ ateth otanet:
—Napaꞌ ñeñthenkaꞌye.
10Ñetñapaꞌ ateth otyeset:
—¿Errothenotheꞌtña oꞌ pekwerr?
11Ñañapaꞌ ateth oterraneterr:
—Añ yakmar ñeñth otenet Jesús ñakaꞌye aꞌxhaxhaꞌteꞌña paꞌsnomo patspaꞌ allokaꞌyeña aꞌyaklleꞌchen. Allempoñapaꞌ oten nepaklleꞌchenepaꞌtoꞌ oño Siloéso. Nañapaꞌ allña neꞌpaklleꞌchenaꞌ. Eꞌñe eꞌpaklleꞌchwatsanpaꞌ allenthepaꞌtchaꞌ nekwerr.
12Ñetñapaꞌ alla otereterr:
—¿Erroꞌtsenaꞌtña ñeñth yakmar?
Ñañapaꞌ ot:
—Taꞌm, amakaꞌye neñoteñe.
Attho fariseoneshaꞌpaꞌ aꞌphthoꞌtareꞌtenan aporoꞌyeth ñeñth aꞌkrraterr Jesús
13Allempoña ñeñth poroꞌyeꞌchatseꞌthpaꞌ anmet alloꞌtsen fariseoneshaꞌ. 14Ñewa, allempo aꞌxhaxhaꞌtan Jesús paꞌsnomo pats allo aꞌyaklleꞌchan aporoꞌyeth ñeñth kowaterreꞌ allempopaꞌ añ yethro allempo amesenet. 15Fariseoneshaꞌñapaꞌ ello alla otereterr:
—¿Errothenotheꞌtña oꞌ kowaterrpet?
Ñañapaꞌ ateth otosanet:
—Añokaꞌye aꞌyaklleꞌcherrnet senmatso ñeñth aꞌxhaxhaꞌtareth epoet pats oꞌña neꞌpaklleꞌcherrapaꞌ allentha nekwerr.
16Patantarrña fariseoneshaꞌpaꞌ ateth otyeset:
—Ñeñth yakmarpaꞌ amatheꞌkaꞌye Partseshotheyeꞌ wapo ñeñthoꞌmar ama esoyeꞌ entenanoña ñeñth anareth patherr yeth allempokma yamesen.
Poꞌpotantaññapaꞌ ateth otyeset:
—Taꞌ, elloña ñerraꞌm ochñath acheñ amatheꞌ errothenoth orrtatonayeña partsoteñets.
Atthoña eꞌñe all ellopaꞌtetstatet pokthaphña ñokop. 17Ellopaꞌ alla otereterr ñeñth poroꞌyeꞌchatseꞌth:
—¿Errothenaꞌt photenña pha añekop ñeñth oꞌ kowaterreph?
Ñañapaꞌ ateth ot:
—Ñapaꞌ ñeñthkaꞌye aꞌmhteneꞌ Yompor poꞌñoñ.
18Judioneshaꞌñapaꞌ ateth otyeset:
—Ñapaꞌ amakaꞌye poꞌñoxh aporoꞌyetheyaye, eꞌñekaꞌye kowen entena.
Allempoñapaꞌ xhoreꞌtoñet pamoꞌmteꞌ ñeñth oꞌ kowerr. 19Ñetñapaꞌ ateth otapoñet pamoꞌmteꞌ:
—Añpaꞌ ¿añeꞌtña sakñeꞌther ñeñth sotyeseꞌth awoꞌ eñalletaña sakñeꞌther aporoꞌyeth? Theꞌñapaꞌ ¿errothenotheꞌtña oꞌ kowerr?
20Pamoꞌmteꞌñapaꞌ ateth otosanet:
—Poꞌñoxh añkaꞌyeña yakñeꞌther ñeñth attha eñalletatsa aporoꞌyeth. 21Attho oꞌ kowerrpaꞌ yapaꞌ amakaꞌyeña yeñoteñe. Taꞌ, eseshaꞌtheꞌ oꞌ kowater, yapaꞌ ama yeñoteñe. Saꞌphthoꞌch eꞌñe ña, ñapaꞌ oꞌkaꞌye attha poꞌnapen, ñothachkaꞌye eñora.
Judioneshaꞌña allempopaꞌ ateth otyeset:
—Poꞌñoxhepaꞌtkaꞌye aporoꞌyeth oꞌ kowerr.
22Ñewa, pamoꞌmteꞌ ateth otanet tharroꞌmar ñetpaꞌ mechaꞌteñet judioneshaꞌ. Ñewa, judioneshaꞌ ñetpaꞌ ateth aꞌpoktatenet ñerraꞌm eseshaꞌ otets: Jesúspaꞌ ñeñthkaꞌye Cristotets, ñeñthña ateth otetspaꞌ oꞌch moeñoꞌchet ñet poꞌprawoth. 23Ñeñthoꞌmarña pamoꞌmteꞌpaꞌ ateth otanet:
—Ñapaꞌ oꞌkaꞌye attha poꞌnapen, ñothachkaꞌye eñora.
24Poepocheñopaꞌ alla xhoreꞌtereterr ñeñth poroꞌyeꞌchatseꞌth ateth otapet:
—Theꞌ phapaꞌ oꞌch pekowentaterrñañ Yompor. Yapaꞌ yeñoteñ añ yakmapaꞌ atarrkaꞌye ochñath.
25Ñañapaꞌ ateth oterraneterr:
—Taꞌ, ñatoꞌ ochñatheñtheꞌ napaꞌ ama neñoteñe. Napaꞌ añakaꞌye neñoten napaꞌ aporoꞌyethen theꞌñapaꞌ oꞌ kowen nekwerr.
26Ñetñapaꞌ alla otereterr:
—¿Errotheꞌtña perreph? ¿Errothenotheꞌtña oꞌ kowaterreph?
27Ñañapaꞌ oterraneterr:
—Amaꞌtña napaꞌ oꞌkaꞌye notwas sañapaꞌ areꞌtña señoteñe. ¿Esoꞌmareꞌtña semneñ oꞌch alla noterrserr? Ñatoꞌ ¿añekoptheꞌ semneñ oꞌch yochreshaꞌtasa samha?
28Ñetña allentha otnareꞌchetpaꞌ ateth otereterr:
—Phapaꞌ poeyochreshaꞌ peneph ñeñth yakmar, yañapaꞌ Moiséskaꞌye poeyochreshay. 29Yapaꞌ yeñoteñ Paretspaꞌ eñoranaꞌtana Moisés, tharraña ñeñth yakmarpaꞌ ama yeñoteñe erroththeꞌña wapa.
30Ñeñth poroꞌyeꞌchatseꞌthpaꞌ ateth oterraneterr:
—Errothenothwakaꞌye ama señoteñetheꞌña erroththeꞌ wapaña amaꞌt napaꞌ oꞌkaꞌye eꞌñe kowen kowaterren. 31Yapaꞌ yeñoteñ ñeñth ochñath acheñpaꞌ amakaꞌye eꞌmhñoteñe Yompor, tharraña ñerraꞌm ya yemhchaꞌnaꞌteñoth Yompor ateth yepena ñeñth moenen ñapaꞌ xhokmach eꞌmhñoteney. 32Ya amaꞌt awathapaꞌ ama yeꞌmareña eseshaꞌpaꞌ oꞌ kowaterranña ñeñth attha eñalletña aporoꞌyeth. 33Ñerraꞌm ñapaꞌ ama Yomporeshoth wapañe amatheꞌ errothenoth kowaterrnoñe.
34Ñetñapaꞌ alla otereterr:
—Phapaꞌ peꞌñalleta eꞌñe ochñartsoth. Theꞌñapaꞌ xha pemneñ oꞌch peyxhatey ya.
Allentha moeñoꞌchet eꞌñe ñet poꞌprawoth.
Ñeñth ama ameꞌñetso Jesúsñapaꞌ ateth entenanet ñerraꞌm aporoꞌyeth
35Jesúsñapaꞌ oꞌ eꞌmareꞌch ñeñth aporoꞌyethtatseꞌthpaꞌ oꞌ moeñoꞌchet. Allempoña enter Jesúspaꞌ ateth oter:
—¿Phameꞌñeñaꞌt ñeñth Yompor Poechemer?
36Ñañapaꞌ ateth och:
—Ayochreshathe, ¿eseshaꞌtña ñeñth Yompor Poechemer ñeñthchaꞌ nameꞌña?
37Jesúsñapaꞌ ateth otererr:
—Ñeñth pekwen, ñeñthen ateth photeneꞌ, nakaꞌye.
38Ñañapaꞌ allentha konkorpa ñeshopaꞌ ateth otererr:
—Nameꞌñerrphach, Partseshachaꞌ.
39Jesúsñapaꞌ alla oterrerr:
—Napaꞌ añekopña nowapa arr patsro allochñapaꞌ atthoch akrarethterra acheñeneshaꞌ errothenchaꞌ nentyesanet, allochñapaꞌ ñeñth ama entetsopaꞌ oꞌch eꞌñe kowen enterra. Ñeñthña entetsañpaꞌ oꞌch alla aporoꞌyethterra.
Ñeñthpaꞌ añ tomaꞌntata, ñeñth atarr ochñath entetsa ñerraꞌm ameꞌñerrana Jesús, ñetpaꞌ xherranetchaꞌ Yompor poꞌkowenña poeyoxhreto. Ñeñthña ama ochñatheyeꞌ entetsañe ñeñthoꞌmarña ñetpaꞌ amach ameꞌñereto Jesús, ñetñapaꞌ amach xherraneto Yompor poꞌkowenña poeyoxhreto.
40Patantaꞌtetsña fariseoneshaꞌ ñeñth allameꞌttsoꞌtsaꞌyenet ñesho, ñetñapaꞌ eꞌmoeñet ñeñth ateth oten Jesús. Ñetpaꞌ ateth ochet:
—Taꞌm yapaꞌ ¿amatheꞌ aporoꞌyetheyeꞌ pentenye?
41Jesúsñapaꞌ ateth otanet:
—Ñerraꞌm poꞌñoxh sa aporoꞌyeth sentenañ amatheꞌ eñallmeñeña soꞌchñar. Tharraña sapaꞌ ateth soten, sapaꞌ añoꞌ aporoꞌyetheyayso, eꞌñoꞌ kowen sekwen, ñeñthoꞌmarña theꞌpaꞌ oꞌch notas, soꞌchñarpaꞌ xhokma eñall.
Currently Selected:
San Juan 9: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.