Efesios 2
2
Attho Yomporpaꞌ eꞌñe poemoereñothey ya oꞌ aꞌkeshphaterrey
1Amaꞌt ateth ñerraꞌm sa: sapaꞌxhoꞌña awathpaꞌ aña sokthapeꞌchyeseꞌth ñeñth ama kowenayeꞌ enteno Yompor. 2Aña seyxheꞌth ñeñth ateth phatseꞌtyena acheñeneshaꞌ arr patsro ñeñth ama ameꞌñetso. Allempo sapaꞌ aña sameꞌñatayeꞌth oneñeth ñeñth paꞌmhchaꞌtarether pen allowen ñeñth errakmañen amhchaꞌnoxhetyetsa entoth ñeñth ama entpawoyaye. Ñeñthña oneñeth pokthaphñapaꞌ ñeñth atarr koshateneꞌ allowen acheñeneshaꞌ ñeñth athparñathtetsa theꞌ arr patsro. 3Ñewa, amaꞌt alloweney awathpaꞌ eꞌñe atthekma yeyxheꞌth. Aña yokthapeꞌchyeseꞌth ñeñth eꞌñe ateth yemnatseꞌtyen ya, ñeñth ateth moenatseꞌtateney ya yechets ñamha ñeñth kowen yenteꞌth eꞌñe yañeña yokthaphñoth. Eꞌñe ya yokthaphñoth ñeñth ateth yeyxheꞌthpaꞌ ñeñthaña eꞌñe yokthapeꞌchatseꞌtatyesayeꞌth. Ñeñthoꞌmarña Yomporpaꞌ aña oꞌpatatyeꞌth atthoch koñchaterrey. Ñewa, amaꞌt allowen poꞌpotantañ acheñeneshaꞌ ñeñth ateth phatseꞌtyeseteꞌthpaꞌ Yomporñapaꞌ eꞌñe atthekma oꞌpatataneteꞌth ñeñthara koñcheñets. Ñerraꞌm allempokmach yerromañpaꞌ eꞌñech yechenkaꞌwerrañ, 4tharraña Yomporñapaꞌ atarr nanak amorrentña, atarr moerenya. Eꞌñe ña poemoereñotheypaꞌ oꞌ aꞌkeshphaterrey. 5-6Ñatoꞌ oꞌch netmaꞌntacha ateth ñerraꞌm oꞌ yerroma yoꞌchñaroth tharraña Yomporpaꞌ oꞌ alla tantaterrey. Ñewa, allempo tantaterran Poechemer Cristopaꞌ yaꞌnaña tantaterr tharroꞌmar eꞌñe yeparrokmaten epay Cristo. Ñamha attho xhapaterran Poꞌcristor poeꞌntaño allchaꞌ atarr kosheñtsoꞌtsen, yaꞌnaña oꞌ xhapaterr allchaꞌ atarr kosheñtsoꞌtseney yamha tharroꞌmar eꞌñe yeparrokmaten epay Poꞌcristor. Oꞌch netmaꞌntacha ateth ñerraꞌmrratheꞌ oꞌ yexhap Yompor poeꞌntaño allchaꞌ yekowentapretera Cristo. 7Atthoña Yomporpaꞌ xhokmach orrtatennay poemoereña amaꞌt errponañowen. Atthoña oꞌ xhapwonaya yeyoxhro Yomporpaꞌ atarr moerenya nanak. Attho atarr moerenana Poꞌcristor yaꞌnaña atarr moerena tharroꞌmar yapaꞌ yeparrokmaterrñaña Poꞌcristor ñeñthara Jesús. 8Tharroꞌmar poꞌñoxh eꞌñe poemoereñothey Yomporñapaꞌ aꞌkeshphaterrey eꞌñe yeyemteñotha ña. Ama añotheyeꞌña aꞌkeshphaterrye attho eꞌñe kowenareꞌ es yephaꞌyen ya. Yomporpaꞌ eꞌñe attha aꞌkeshphaterrey. 9Ñamha ama yethorreñotheyeꞌ ñokop aꞌkeshphaterryeña Yompor atthoch tsaꞌterrya ñeñth allpon yethorra ñokop. Tharroꞌmar ñerraꞌm eꞌñe yethorreñotha yaꞌkeshphatenañ, yañapaꞌ xhatheꞌ atarr kowen yentena yañeña ñeñth attho yaꞌkeshphatena. Allempoña Yomporpaꞌ amatheꞌ aꞌkeshphatañeyeꞌ yenteñe. 10Tharraña Yomporpaꞌ oꞌ etserrataterrnay yokthaphña allochñapaꞌ atthoch eꞌñe kowen es yephaꞌyen. Poꞌñoxh eꞌñe yeparrokmateñoth Cristo, Yomporñapaꞌ oꞌ etserra yexhkaterrey. Tharroꞌmar ñapaꞌ amaꞌt awathotheñpaꞌ ateth kothapeꞌcheꞌth yokop atthochña yapaꞌ eꞌñepaꞌchña kowenareꞌ es yephaꞌyen.
Cristopaꞌ eꞌñe kowen amoꞌtstatannaꞌtña allowenakop
11Ñewa, theꞌpaꞌ oꞌch alla seyerpoerra ñeñth ateth sepeꞌth awath. Allempopaꞌ atarr allapharoꞌtsaꞌyenes Yomporeshoth. Ñewa, sapaꞌ ateth eñalletñas ama judioneshayayso. Añña ñeñth ateth eñalletena judioneshaꞌ ñetpaꞌ aña yexhenet oꞌch tsorrannenet. Ñeñthoꞌmarña ñetpaꞌ otarethtenet atsorrarethneshaꞌ. Ñeñthoꞌmar ñet sañapaꞌ attha sochatseꞌtenset sapaꞌ añoꞌ atsorratarethneshayayso añoꞌ poechemereyayso Yompor. 12Poꞌñoxh allempo sapaꞌ atarr allapharoꞌtsaꞌyenes Cristeshoth tharroꞌmar ama separrokmaterraꞌ epas. Ñamha amaꞌt israelenaꞌtarneshaꞌ ñeñth otenet Yompor poeyochreshaꞌ, sañapaꞌ ama parroꞌmarneshayayso. Ñamha attho Yompor aꞌpoktatan israelenaꞌtar allempo otaneteꞌth ñeñthchaꞌ ateth yenpoerranet esempo, saña allempopaꞌ amaꞌt mameshapaꞌ ama seꞌmareꞌtperaꞌ. Ama es sekweno amaꞌt mamesha ñeñthchaꞌ saꞌkeshphaterreꞌ tharroꞌmar allempo sapaꞌ ama eñalle Seyomporer ñeñthchaꞌ poꞌñoxh seyemtena samha arr patsroth. 13Tharraña theꞌ sapaꞌ oꞌ señoter Cristo Jesús ñeñth rromats ñamha sokpaꞌna. Ashatarethta poꞌrras amaꞌt samha soꞌchñarekpaꞌna. Ñeñthoꞌmarña yoten eꞌñe poꞌrrasoth atthoña oꞌ xhapaterres samha Yomporesho amaꞌt sa ñeñthes awath atarr allapharoꞌtsaꞌyenes Yomporeshoth. 14Tharroꞌmar Cristopaꞌ atarr amoꞌtstatannaꞌtña allowenakop. Amaꞌt ya ñeñthey judioneshay ñamha sa ñeñthes ama judioneshayayso, Cristoñapaꞌ awoꞌt parroꞌmarneshatatey alloweney. Ñamha ñeñth attho atsrreꞌmoxhen yentannaꞌtyeseꞌth awath ñañapaꞌ oꞌ waporeꞌtampesyeney ñeñth yellopaꞌtetstatyesayeꞌth awath. 15Ñeñthpaꞌ ateth phonay Cristo allempo rroma yokop. Eꞌñe ña poꞌchtsothpaꞌ oꞌ aꞌwañampeney attho amhchaꞌnoxhen yenten añ ñoñets ñeñth ateth anareth awath judioneshakop, ñeñthara paꞌnamen aꞌpoktateñtsoñ ñeñth ateth anarethtetañ ñokpoet ñeñthchaꞌ ateth phowetañ. Atthoña allempotheñpaꞌ oꞌ eꞌñe pathrra yokthapeꞌchen ñeñth ateth kothapeꞌchateney Cristo. Allempotheñña amach alla atsrreꞌmoxhen yentannaꞌtyerreꞌthe. Ñatoꞌ oꞌch yot attho awath allowen acheñeneshaꞌ ellopaꞌtetsteteꞌth eꞌñe ñet pokthaphñoꞌmareta, Cristoñapaꞌ oꞌ aꞌwañamphsanet atthoña eꞌñe parrokmatatwerrey, eꞌñe kowen yamoꞌtstannaꞌtwerra alloweney. 16Atthoña epotantoꞌmarey eꞌñe yeparrokmateñoth, Cristoñapaꞌ eꞌñe kowen amoꞌtstaterrya ñamha Pomporesho. Eꞌñe poerromñoth korsochopaꞌ ñañapaꞌ oꞌ aꞌpoktatonay Pomporesho. Attho ñapaꞌ oꞌ aꞌwañamperrey ñeñth awath attho xhokma yeꞌmoñeꞌtannaꞌtyeseꞌth.
17Ñeñthoꞌmarña Cristopaꞌ wapa. Ñach yeserrpareꞌtatoseꞌ kowen ñoñets attho ñapaꞌ ña amoꞌtstannaꞌtatañtetsa. Atthekma serrpareꞌtatosey alloweney, amaꞌt sa ñeñthes ama judioneshayayso ñeñthes atarr allapharoꞌtsaꞌyenes ateth entyenesña Yompor. Atthekma serrpareꞌtatosey amaꞌt yamha ñeñthey judioneshay ñeñthey eꞌñe allameꞌttsa entyeney Yompor. 18Atthoña alloweney amaꞌt ñeñthey judioneshatets ñamha ñeñth ama judioneshayaye eꞌñe Cristeshothekma eꞌmhñoteneyña Yompor tharroꞌmar Poekamkëñpaꞌxhoꞌña eꞌñe pathrra ñeñth yechorrenaya alloweney. 19Ñeñthoꞌmarña theꞌpaꞌ oꞌch notas, sa ñeñthes ama judioneshayayso, theꞌpaꞌ eꞌñe parroꞌmarneshakmay enteneyña Yompor, amaꞌt allowen ñeñth poeyochreshaꞌ pen Parets, tharroꞌmar alloweney eꞌñe poechemereshaꞌ peney Yompor. Ñeñthoꞌmarña theꞌ sa ama attheyeꞌ entenso ateth ñerraꞌmrratheꞌ ñeñth ama poentare ña, oꞌwañ attheyeꞌ entenes ñerraꞌmrratheꞌ ñeñth attha wetsa poꞌpoñ anetsoth. 20-22Ñeñth ateth entenes theꞌpaꞌ ñatoꞌ oꞌch netmaꞌntacha ñeñth attho yathomaten pokoll. Ñewa, attho kowen thorraꞌyeseꞌth allowen ñeñth allpon Yompor poellsensarneshaꞌ epoet ñamha allowen ñeñth allpon aꞌmhtaꞌyesayeꞌth poꞌñoñ, ñetpaꞌ añ tomaꞌnteteꞌth ñeñth ñanom yathomaten allo echarr yepen yepakëll. Ñamha Jesucristopaꞌ añ tomaꞌntena pokoll poꞌkellpach ñeñth atarr echarr orreneꞌ pokoll. Ñewa, sa ñeñth attho oꞌ separrokmatera Yepartseshar Cristo, poekoner penes ñamha poeyophacher penes allowenes ñeñthes eꞌñe womenk rremoeneꞌ pokoll. Atthoña eꞌñe kowen saꞌyexhkatarethterra poepawarr pokoll, ñeñthes paꞌpakëll oꞌ perres Parets, atthoña oꞌ yexherra Poekamkëñ sesho.
Currently Selected:
Efesios 2: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.