El Apocalipsis 21
21
Attho Juanpaꞌ entan poꞌpoñ enet ñeñth eꞌñe etserra ñamha patspaꞌxhoꞌña oꞌ etserraterr
1Allempoña na ñeñthen Juanan allpaꞌ oꞌ nenterrerr poꞌpoñ enet ñeñth eꞌñe etserra, patspaꞌxhoꞌña oꞌ etserraterr. Tharroꞌmar ñeñth ateth yenten enet theꞌ ñamha pats, ñeñthpaꞌ oꞌ eꞌñe chenkaꞌwerra oꞌ wañerr. Ñeñth etserra patspaꞌ allña amaꞌt saꞌp ñeñth yenten añekmoen ama eñalle. 2Nenterrerr ñamha Parets paꞌnetser ñeñthara Jerusaléñ ñeñth oꞌ etserraterr. Ñeñthñapaꞌ entoth aꞌswatarethterra eꞌñe Yomporeshoth. Ñeñthñapaꞌ atarr kowen orrtena eꞌñe ateth orrtena ñerraꞌm poesheñarr koyaneshaꞌ allempo someꞌtenapaꞌ oꞌch aññoꞌtena eꞌñe koxhneshoth atthochña poerrollarpaꞌ atarrchaꞌ kowen enteñ. 3Allempoña napaꞌ oꞌ alla neꞌmoerrerr all eꞌmorrtena ñoñets ñeñth wetsa entoth eꞌñe Yompor poꞌkonañoth. Ñeñthñapaꞌ ateth oten:
—Theꞌpaꞌ señochepaꞌch, oꞌ xherr allempoch yexherra Parets eꞌñe parro epoet acheñeneshaꞌ. Ñeñthchaꞌ eꞌñe parro yexherra ñetpaꞌ eꞌñe poeyochreshocheꞌ penanet Yompor. Ña amaꞌt atarr Paretspaꞌ yexherrach epoet acheñeneshaꞌ ñeñth eꞌñe Poꞌyomporer penet. 4Theꞌña Yomporpaꞌ oꞌ aꞌwañamperrnay yellkëña, theꞌña amaꞌt awathapaꞌ amach alla yeyawerreꞌthe. Theꞌ amaꞌt awathapaꞌ amach yerromoerreꞌthe amach yellkërreꞌthe. Theꞌ amaꞌt awathapaꞌ amach eñalleterreꞌthe yaweñets amaꞌt ñamha atserrpeñets amach eñalle. Tharroꞌmar añexhno ñeñth allpon yellkatyesayeꞌth theꞌñapaꞌ oꞌ eꞌñe wañerr.
5Allempoña Yompor ñeñth anets poꞌkonañopaꞌ alla eñoranaꞌterrnerr, ñeñthpaꞌ ateth oten:
—Theꞌñapaꞌ oꞌch señoch, napaꞌ oꞌ netserrataterr ñeñth allowen esokmañen eñall.
Allempoñapaꞌ alla oterrnerr:
—Theꞌ phokoppaꞌ añ pokteꞌ oꞌch alla pekellkërrerr ora allowen añexhno tharroꞌmar añ ñoñets ñeñthchaꞌ atarr seyemtena ñeñthpaꞌ eꞌñe poꞌñoxh ateth.
6Allempoña ñapaꞌ alla oterrnerr:
—Theꞌña poꞌñoxhpaꞌ oꞌ eꞌñe etsotwerra, oꞌ wañerr ñeñth sentyeseꞌth awathotheñ. Napaꞌ eꞌñe paꞌmothrotheñ eñallen atthen ñerraꞌmrratheꞌ kellek A ñeñth paꞌmother pen alfabeto. Allempotheñña napaꞌ xhokma eñallen esempowañenchaꞌ wañerr ñeñth allpon eñall, napaꞌ atthen ñerraꞌmrratheꞌ kellek Z ñeñth all poen alfabeto. Theꞌpaꞌ allowen ñeñth ama eꞌñeyeꞌ koshetso poeyoxhro ñeñth xhokmach es eꞌnenet, nañapaꞌ napanetchaꞌ ñeñth alloch eꞌñe eñmaterret. Tharroꞌmar attho ama kosheneto xha ottenet ñerraꞌmrratheꞌ ñeñth atarr nanak oñpaꞌtets. Ñeñthoꞌmarña theꞌ napaꞌ notenes allowenes ñeñthes oñpaꞌtetspaꞌ napoerreschaꞌ oñ ñeñth ama awañañathe ñeñth xhokma potets all. Ñeñthña oñ alloña sapaꞌ korretsasach. Tharraña ñeñthñapaꞌ amaꞌt koñeꞌthapaꞌ amach setsaꞌtero. Eꞌñe attha napoenes. 7Allowen ñeñth metanaꞌtweꞌ paꞌnamen topateñtsoxhnopaꞌ ñetñapaꞌ noꞌpataterranet ora añexhno aꞌnateñets. Atthochña ñetpaꞌ eꞌñech Poꞌyomporer pennet, nañapaꞌ eꞌñech nechemereshaꞌ nephowenanet allowenet. 8Tharraña allowen ñeñth ama nameꞌñenayo ñeñth echarrtetsa poeyoxhro, ñetñapaꞌ aña oꞌpatenawet all parraren tsoꞌ errapharen, ñamha allowen ñeñth etsoteneꞌ sosyaꞌtsañexhno ñeñth atarr atsenaꞌtpoꞌ ñamha ñeñth amtsañneshaꞌ ñamha ñeñth kañoreshaꞌtets, ñetpaꞌxhoꞌña allowenetpaꞌ aña oꞌpatenawet all parraren tsoꞌ errapharen. Ñamha ñeñth amaseꞌñethexhno ñamha ñeñth poꞌyomporer phaꞌyeneꞌ ayexhkatarethexhno ñamha allowen ashkarñathexhno, ñetpaꞌxhoꞌña aña oꞌpatenawet all parraren tsoꞌ errapharen ñeñth wortets shemasher. Ñeñthpaꞌ allchaꞌ poepocheño rromoerret.
Attho Juanpaꞌ entan Yompor paꞌnetser ñeñth soꞌwaꞌnetsa entoth ñeñthara ñeñth sochetsa Jerusaléñ
9Allempoña ñeñth kanxherrsheña mellañotheñneshaꞌ ñeñth echyesayeꞌth poꞌpajotholleshaꞌ all eꞌchorrayesarethteꞌth ñeñth alloth eꞌñe orrtatwerret allowanen moeroxhteñets, poesheñarrña mellañotheñpaꞌ oꞌ wapapaꞌ otosen:
—Aphon oꞌch phokthaꞌn oꞌch negatenphaꞌ ñeñthchaꞌ poethapor perr Cristo ñeñth atmaꞌntatareth Carnero.
10Allempoña napaꞌ oꞌ alla chorraterrnerr Yompor Poekamkëñ ñeñthña nanmoeꞌ aꞌyo alloꞌtsen ñeñth atarr añekmoen aspeneth. Allothña napaꞌ nentapoñ Parets paꞌnetser ñeñth sowaꞌnetsa entoth eꞌñe Yomporeshoth ñeñthara ñeñth Jerusaléñ. 11Ñeñthña anetserpaꞌ xha popoetnena atarr koxhneshaꞌ ateth kowentena Yompor poꞌkowenña. Poꞌpopteña eꞌñe ateth ñerraꞌmrratheꞌ mapoeꞌ ñeñth atarr poptameꞌteꞌ ñeñth mapyer otenet jaspe ñeñth nanak amorrentareth. Ñeñthpaꞌ eꞌñe ora orrtatwenan allowen ñeñth alloꞌtsaꞌyen eꞌñe all. 12Ñeñth anetserpaꞌ eꞌñe akonxhaꞌtamphsareth aꞌyowen. Ñeñth allo akonxhaꞌtamphsarethpaꞌ atarr añekmoen enoneth. Ñamha alloꞌtsen xharraꞌ poechena epa yetarr alloth beꞌthenet. Eꞌñe patheꞌtets yetarr alloꞌtsaꞌyen ñamha poesheñaꞌtets mellañotheñ ñeñth kowampeneꞌ yetarr. Patheꞌtets yetarropaꞌ all akellkaꞌyesareth añ paꞌsoꞌchñexhno Israel poꞌmhreneñ ñeñth xharrasheña poechena epa. 13Ñeñth konxhet, alloth wena atsneꞌ alloꞌtsen maꞌpa yetarr. Ñamha alleneth emoena atsneꞌpaꞌ alloꞌtsen ñamha maꞌpa yetarr. Tenothemhtaꞌnpaꞌxhoꞌña alloꞌtsen maꞌpa yetarr. Topothemhtaꞌnpaꞌxhoꞌña alloꞌtsen maꞌpa yetarr. 14Ñeñth konxhtar allo echarr apharethtena paꞌrrphopaꞌ eꞌñe allowenpaꞌ alloꞌtsen xharraꞌ poechena epa mapoeꞌ ñeñth allo echarrtateñet. Ñamha patheꞌtets mapoeꞌ allo echarrtateñet konxhetpaꞌ all akellkaꞌyesareth añ paꞌsoꞌchñexhno ñeñth xharrasheña poechena epa ñeñthpaꞌ ñeñth poellsensarneshaꞌ Cristo ñeñth atmaꞌntatareth Carnero.
15Mellañotheñ ñeñth neserrpareꞌtateneꞌ ñañapaꞌ echenan tepapets ñeñth oropepen allo tepoenan Parets paꞌnetser ñamha allo akonxhaꞌtamphsareth ñamha poeyottarowen. 16Mellañotheñ attho tepoenan Yompor paꞌnetser eꞌñe allponeshakma tepaꞌwe allemhatheñ —onnathoneth ñamha paꞌllpochaꞌperoneth ñamha enoneth eꞌñe allponeshakma xhaꞌnmach— dos mil doscientos kilómetro allemhatheñ. 17Allempoña tepan ñamha konxhet poꞌbhatheña ñeñthñapaꞌ alloꞌtsen sesenta cuatro metro. Ñewa, mellañotheñ eꞌñe ateth es tepaꞌyen ateth es yetpaꞌyen yamha ñeñthey arromñathey.
18Ñamha añ konxhetpaꞌ añ ayexhkatareth mapoeꞌ ñeñth atarr kowen aspanamemeno poptameꞌtyena ñeñth otenet jaspe. Paꞌnetserñapaꞌ añ ayexhkatareth oro —ora allowenpaꞌ eꞌñe orocheꞌ. Añ oropaꞌ atarr nanak kowen ñeñthpaꞌ eꞌñe orrtatwenan paꞌnamen ñeñth allpon alloꞌtsaꞌyen. Eꞌñe ateth ñerraꞌmrratheꞌ rerpat ñeñth atarr kowen eꞌñech orrtatwenan allowen paꞌnamen ñeñth alloꞌtsaꞌyen. 19Ñewa, añ ekonach allo orratenet konxhet, ñeñth ekonach poeklloꞌyaꞌtetspaꞌ atsetareno poptena ñeñth allo aꞌkowentateñet. Ñeñth ñanom ekonach poeklloꞌyarr allñapaꞌ añ anaꞌyesareth atarr kowen poptameꞌteꞌ aspanamemenatholleshaꞌ ñeñth otenet jaspe. Ñeñth poepoeklloꞌyañ ekonach allñapaꞌ añ anaꞌyesareth atarr kowen poptameꞌteꞌ asollememenaretholleshaꞌ ñeñth otenet zafiro. Ñeñth ekonach poemaꞌpoeklloꞌyañ allñapaꞌ añ anaꞌyesareth atarr kowen poptameꞌteꞌ wallamemenatholleshaꞌ ñeñth otenet ágata. Ñeñth poepaꞌtatseklloꞌyañ ekonach allñapaꞌ añ anaꞌyesareth atarr kowen poptameꞌteꞌ aspanamemenatholleshaꞌ ñeñth otenet esmeralda. 20Ñeñth ekonach paꞌmnareklloꞌyañ allñapaꞌ añ anaꞌyesareth ñeñth atarr kowen paꞌnamenoth poptameꞌtyena ñeñth otenet ónice. Ñeñth poꞌpechapoeklloꞌyañ ekonach allñapaꞌ añ anaꞌyesareth atarr kowen poptameꞌteꞌ tsamemenatholleshaꞌ ñeñth otenet cornalina. Ñeñth ekonach poꞌkanxherreklloꞌyañ allñapaꞌ añ anaꞌyesareth atarr kowen poptameꞌteꞌ shemashrememenatholleshaꞌ ñeñth otenet krisólito. Ñeñth ekonach poꞌpsoklloꞌyañ allñapaꞌ añ anaꞌyesareth atarr kowen poptameꞌteꞌ aspanamemenathollesho asolleten ñeñth otenet berilo. Ñeñth ekonach poeꞌskoneklloꞌyañ allñapaꞌ añ anaꞌyesareth atarr kowen poptameꞌteꞌ eꞌñe shemashrememenatholleshaꞌ ñeñth otenet topacio. Ñeñth ekonach poꞌxharraklloꞌyañ allñapaꞌ añ anaꞌyesareth atarr kowen poptameꞌteꞌ ama eꞌñeyeꞌ aspanamemenaretholleshayaye ñeñth otenet krisoprasa. Ñeñth ekonach poꞌxharraklloꞌyañ poechena poeklloꞌyarr allñapaꞌ añ anaꞌyesareth atarr kowen poptameꞌteꞌ asollememenmaꞌthetholleshaꞌ ñeñth otenet jacinto. Ñeñth ekonach poꞌxharraklloꞌyañ poechena epoeklloꞌya allñapaꞌ añ anaꞌyesareth atarr kowen poptameꞌteꞌ yetsñorromemenatholleshaꞌ ñeñth otenet amatista. 21Allowen yetarroxhno ñeñth xharraꞌ poechena epa eꞌñe kowen wallatrren ateth ñerraꞌm chemhpeshtall oꞌponothpaꞌ atarrchaꞌ wallatllellen ñeñth otenet perla. Patheꞌtets yetarr eꞌñe pathrra perla ayexhkatareth. Ñamha añ calle ñeñth all chopeñeꞌchenet ñeñthpaꞌ eꞌñe orocheꞌ ayexhkatareth ateth ñerraꞌm rerpat ñeñth eꞌñe orrtatweneꞌ ora ñeñth allpon alloꞌtsaꞌyen all.
22All Parets paꞌnetsro amaꞌt pathrra pokoll ama neñche ñeñth all maꞌyocheñet Yompor. Tharroꞌmar allpaꞌ ama pallteno pokoll allchaꞌ maꞌyocheñet Yompor, tharroꞌmar ñeñth nanak Parets ñeñth Yepartseshar yepen ñapaꞌ eꞌñe alloꞌtsen all ñeñthchaꞌ maꞌyochena allowen acheñeneshaꞌ epoet ñamha Poechemer Cristo ñeñth atmaꞌntareth Carnero. 23Ñamha Parets paꞌnetsro allpaꞌ ama moenenano atsneꞌ amaꞌt arrorra ama moeneñeto ñeñthchaꞌ xhoyoꞌtetsa all. Tharroꞌmar Yompor ñeñth attho poptena paꞌtsnomoeñothpaꞌ ñeñthña xhoyoꞌtetsa all epoet ñamha Poechemer Cristo ñeñthña lamparñetets. Ñeñthara Cristo ñeñth atmaꞌntatareth Carnero. 24Ñeñth attho poptena Yompor paꞌtsnomoeñothpaꞌ ñeñthña aꞌpoetarsampeneꞌ errakmañen allowen paꞌnamen acheñeneshaꞌ atthoña korrenet eꞌñe kowen. Allowen amhchaꞌtarethneshaꞌ ñeñth attho kowentenet añe patsro, wapatweretchaꞌ Parets paꞌnetsro alloch kowentateññañet ñamet Parets paꞌnetser. 25Ñeñth Parets paꞌnetser ñeñth poeyottar pen alloth beꞌthenet, amach yottamperreꞌthe eꞌñech ellapeneꞌth atorareth. Allpaꞌ amaꞌt chekmetapaꞌ ama eñalle. 26Allowen paꞌnamen acheñeneshaꞌ ñeñth amhchaꞌnaꞌtpotyetsa añe patsro ñeñth attho kowenetyenet, wapatweretchaꞌ Parets paꞌnetsro alloch kowentateññañet ñamet Parets paꞌnetser. 27Allpaꞌ amaꞌt awathapaꞌ amach orrtateto ñeñth sosyaꞌtsañexhno tharroꞌmar allpaꞌ amaꞌt poesheñarrapaꞌ ama beꞌtheno ñeñth kothapeꞌcheneꞌ sosyaꞌtsañexhno ñeñth atarr tsenaꞌten Yompor ñeñth ateth ñerraꞌm ashkarñath. Allpaꞌ aña beꞌthets ñeñth akellkareth paꞌsoꞌxhñexhno Cristo poꞌlibro atthochña ñetpaꞌ korretsetach.
Currently Selected:
El Apocalipsis 21: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.