San Mateo 28
28
Attho tanterra Jesús
(Mr. 16.1-8; Lc. 24.1-12; Jn. 20.1-10)
1Oꞌña wañ yethñats allempokma amesenet allempoña thaya poetaren temenk allempo mothtaꞌmoena yethñatspaꞌ Maríaña Magdalena ñamha poꞌpsheñeñ María ñetñapaꞌ awathekma awanmaꞌmoenet oꞌch entaꞌmoeñet Jesús poepampro. 2Allempoña machayothepaꞌtchaꞌ pella pats womenk; añ sowatsa Yompor poꞌmhllañotheñer entoth. Oꞌ sowapaꞌ aꞌrrotheꞌtosan mapoeꞌ aꞌyeneth ñeñthña mapoeꞌpaꞌ allña anorros. 3Ñañapaꞌ atarr nanak poptosa eꞌñe ateth orrtosa ñerraꞌmrratheꞌ meratsteꞌ. Paꞌshtamñapaꞌ atarr nanak wallamaꞌth. 4Guardianeshaꞌñapaꞌ ñeñthña atarr yoreꞌtoseꞌ. Poemhchañothetpaꞌ xha yonshemaꞌtyeset xha othaꞌyeset eꞌñe atthet ñerraꞌm xho rromoenet. 5Allempoña mellañotheñpaꞌ ateth otapan koyaneshaxhno:
—Amach xha seyorenatsto. Napaꞌ neñotenes añkaꞌye semnen oꞌch sentaꞌmoeñ Jesús ñeñth korsoꞌtamphset. 6Amakaꞌ arroꞌtsenaro arr, ñapaꞌ ateth otaseꞌthpaꞌ theꞌñapaꞌ oꞌkaꞌye tanterra. Sonkaꞌye sekweñaꞌ all phanet amakaꞌ eñalle. 7Sekwaꞌwepaꞌ orrerres semaꞌyoreñ oꞌch soterrñañaꞌ poeyochreshaꞌ: “Oꞌkaꞌye tanterraña Jesús rromoth. Ñapaꞌ ñanomchaꞌ otatsa oꞌch awen Galileo. Sapaꞌ allchaꞌña sentwer.”
8Allempoñapaꞌ poemaꞌyoreñ awanerret poepamproth. Amaꞌt yorenetañpaꞌ poksheñeshaꞌ matrraꞌterret oꞌch oteññañetaꞌ poeyochreshaꞌ. 9Mataxhetsetpaꞌ Jesúsñapaꞌ awepaꞌtchaꞌ poktanet, womhchaꞌtapanet. Ñetñapaꞌ allentha ponemhyet, rromoset paꞌrrphoth konkorposñañet. 10Allempoña Jesúspaꞌ ateth otanet:
—Amach semhchaꞌtatsetno. Orrerres sotennanaꞌ nemoꞌnasheñneshaxhno awanmoetepaꞌ Galileo, allchaꞌña eꞌñe enterrnet.
Attho solltarneshaꞌpaꞌ serrpareꞌtatyesan allowen kornaneshaxhno ñeñth ateth entet ñet
11Awanmatsetpaꞌ poesheñaꞌtetsña guardiapaꞌ awanmoet ñamet anetso. Allñapaꞌ serrpareꞌtatoset kornaneshaꞌ paꞌmhchaꞌtaretherneshaꞌ allowen ateth oꞌ entwet. 12Ñetña allempo apxhenet epoet ñeñth pomporneshaꞌ pen judioneshaꞌ ñetñapaꞌ kothapeꞌchatannaꞌtet. Oꞌña kothapeꞌchatannaꞌtwetpaꞌ allempoñapaꞌ apet solltarneshaꞌ shonteꞌ kelle. 13Ñeñthpaꞌ ateth ochet solltarneshaꞌ:
—Theꞌpaꞌ atethchaꞌ sot: “Yaña tsapopaꞌ moetsyeꞌtpaꞌ poeyochreshaꞌñapaꞌ awoꞌt wapoet aꞌnawaꞌt eretaꞌña arromñath.”
14Ellopaꞌ alla oterranerr solltarneshaꞌ:
—Ñerraꞌm amhchaꞌtareth xha eꞌmareꞌteꞌ yapaꞌ yaꞌpoktatonaschaꞌ eꞌñe kowen ñesho atthochña sapaꞌ amach erroth phaseto.
15Ñetña allempo agapwet kellepaꞌ ateth otarethtetpaꞌ atethxhoꞌ pet. Ñeñthoꞌmarña ñet poeserrparñetpaꞌ eꞌñe allempotheñ epaꞌwa judionesheshoꞌmar.
Attho Jesúspaꞌ otnerran poeyochreshaxhno ñetpaꞌ atethchaꞌ phaꞌyerret
(Mr. 16.14-18; Lc. 24.36-49; Jn. 20.19-23)
16Ñeñth xharraꞌ poechena patherr poeyochreshaꞌpaꞌ ñetñapaꞌ awanerret Galileo. Arr awanmoet all aspentho all otanet Jesús allchaꞌ tet. 17Allempo entosetpaꞌ ñetñapaꞌ xha konkorpaꞌrretyesoset. Poesheñaꞌtetsñapaꞌ xha echarrtanet poeyoxhro. 18Allempoña Jesúspaꞌ ponmanet ateth otapanet:
—Napaꞌ aparethen allowen llesens añe patsrekop ñamha Yompor poeꞌntañekop. 19Ñeñthoꞌmarña theꞌpaꞌ orras oꞌch seyxhatyes ora allowen paꞌnamen acheñ atthoch neyochreshaꞌ neperranet. Oꞌch sapatanet Yompor Parets paꞌsoꞌchño ñamha Yompor Poechemer paꞌsoꞌchño ñamha eꞌñe Yompor Poekamkëñ paꞌsoꞌchño allochñapaꞌ atthochña eꞌñe poeyochreshaꞌ perranet Yompor Parets. 20Ñamha xhokmach oꞌch eꞌñe seyxhatyesanet allochñapaꞌ atthoch eꞌñe kowen ameꞌñerrnanet eꞌñe ora ñeñth allpon oꞌ notwas. Ñamha señochepaꞌch napaꞌ eꞌñe patheꞌtets yeth xhokmach alloꞌtseney parro atthoch xhokma nebensareꞌtampenes amaꞌt tharrempowach esempowañen allempoch mellapoterra. Ñeñthpaꞌ atthetepaꞌch Nompore. Allowa.
Currently Selected:
San Mateo 28: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.