San Lucas 8
8
Attho koyaneshaxhnopaꞌ es apaꞌyeseteꞌth Jesús ñeñth allpon echyenet
1Allempoñapaꞌ chopeñeꞌcherrerr Jesús errapharen serrpareꞌtyesnomoeꞌ kowen ñoñets atthoch xhap allempo ayochreshathtena Yompor. Errakmañen chopeñeꞌchyen, ora allemeñ anetsoꞌmar all shontaꞌyena acheñeneshaꞌ ñamha all ama tama shonteyaye acheñ. Allñapaꞌ kothaꞌwanererr poeyochreshaꞌ xharrasheña ñeñth poechetsa epsheña. 2Allñapaꞌ kothaꞌwanemh ñamha patantarr koyaneshaxhno ñeñth aꞌkrratyeswa Jesús awañmoꞌcha, poesheñaꞌtetspaꞌ ñeñth kaxhpatatyerr oneñeth ñeñth chorraweteꞌth, poꞌpsheññexhnopaꞌ ñeñth aꞌkrratyes ñeñth paꞌnamen atsnañtsor moeroxhtatyesaweteꞌth. Poesheñarr koyaneshaꞌ ñeñthpaꞌ añ paꞌsoꞌcheñ María Magdalena. Ñeñth Maríarpaꞌ Jesúsñapaꞌ poekaxhpatataroñ kanxherr oneñeth. 3Ñewa, poꞌpsheñeñ koyaneshaꞌ añ paꞌsoꞌcheñ Juana. Poerrollarñapaꞌ añ paꞌsoꞌcheñ Cuza añ poꞌtarwas pen attho sherbenan amhchaꞌtareth Herodes. Allothña poꞌpsheñeñ koyaneshaꞌ ñeñth kothaꞌneneꞌ Jesús ñeñthpaꞌ añ paꞌsoꞌcheñ Susana. Ellopaꞌ shonteꞌ poꞌpotantañ koyaneshaxhno ñeñth es apaꞌyesayeꞌth Jesús ñeñth allpon echyenet ñet.
All tomaꞌntatanet Jesús ñeñth aꞌparreꞌteneꞌ poerets
(Mt. 13.1-9; Mr. 4.1-9)
4Allemhatheñ anetsoth waxhaꞌtyena acheñeneshaꞌ ñeñth xhaxhets Jesúsesho. Allempoñapaꞌ oꞌ xha shontoset nanak, Jesúsñapaꞌ serrpareꞌtatapanet, ateth tomaꞌntatapanet:
5—Ñeñthña aꞌparreneꞌ poerets ñañapaꞌ awoꞌ allchaꞌ aꞌparreꞌtyenanaꞌ poepoer. All aꞌparreꞌtyeñ patantaꞌtetsñapaꞌ alla xhapyes thoñoꞌmar, ñeñthñapaꞌ attha athmamaꞌtyes acheñeneshaꞌ. Allñapaꞌ waxhaꞌtyesa ñamha oth eꞌñe añyallmeꞌchwenanaꞌ poerets. 6Poꞌpoñexhnoñapaꞌ alla xhapyes mapoetroꞌmesoꞌmar. Ñeñthñapaꞌ mameshapaꞌ chepareswañ, tharraña mameshapaꞌ alla weyaꞌwerra tharroꞌmar all mapoetroꞌmesopaꞌ ama eñalle amaꞌt koñeꞌtha oñ ñeñthchaꞌ aꞌyamosamphseꞌ narmets ñeñth oꞌ chepareswa all. 7Poꞌpotantañña poeretspaꞌ alla xhapyes allchaꞌ chepares aj. Allpaꞌxhoꞌ mameshapaꞌ chepareswañpaꞌ ajñapaꞌ mameshapaꞌ ateshaꞌtwa alla kaꞌmatwerranña narmets alla aꞌkllatwer. 8Poꞌpotantañexhno ñeñthñapaꞌ arr xhapyes all eꞌñe kowen patso. Ñeñthñapaꞌ eꞌñe kowen chepares. Allempoña ateshaꞌtwapaꞌ atarr aton ellomhreꞌtyes. Poechaꞌtetspaꞌ xharroch xharraꞌ poeꞌllomer.
Allempoña serrpareꞌtatwanet atethpaꞌ oꞌ alla oterraneterr. Eꞌñe womenkokma eñoranaꞌtanet, ateth otanet:
—Ñeñthes poꞌñoxh neꞌmhñoteneꞌ, xhaponasepaꞌch seyoxhro ñeñth ateth netmaꞌntatensa añ ñoñets.
Ateth otanet Jesús ñeñthekop ateth tomaꞌntatyenanet
(Mt. 13.10-17; Mr. 4.10-12)
9Allempoña poeyochreshaꞌpaꞌ ochet Jesús:
—Taꞌm ¿estheꞌña petmaꞌntatenya? Yañapaꞌ ama yeñoteñe.
10Jesúsñapaꞌ alla oterraneterr:
—Sa theꞌpaꞌ Yomporña oꞌ moenaterres atthoch señoterr ñeñth ama eñotpawoyaye amaꞌt awathotheñ ateth penaña Yompor poꞌkowenña attho atarr ayochreshathtena ña. Tharraña poꞌpotantañexhnoña ñeñth attha es poexhaꞌyetsa, ñokpoetpaꞌ ama eñoteñeto ñeñth ateth atmaꞌntatareth ñoñets. Atthoña amaꞌt enteñetañ ñetñapaꞌ amach es xhenaweto poeyoxhreto. Amaꞌt eꞌmoeñetañ amaña xhenanetoña poeyoxhreto ñeñth ateth yexhateney Yompor poꞌkowenña.
Arrpaꞌ all eñotatanet Jesús ñeñth tomaꞌntatenanet ñeñth aꞌparreꞌteneꞌ poerets
(Mt. 13.18-23; Mr. 4.13-20)
11‘Ñewa, ñeñth ateth netmaꞌntatasa ñorraꞌpaꞌ ñeñthpaꞌ ateth notenes: Ñeñth aꞌparreꞌtyeneꞌ poerets, ñeñth poeretspaꞌ añ notenes Yompor poꞌñoñ allempo serrpareꞌteñet. 12Añ poerets ñeñth xhapyesets thoñoꞌmar ñeñthpaꞌ añ notenes acheñeneshaꞌ ñeñth eꞌmhñotenayeñ Yompor poꞌñoñ. Allempo eꞌmhñotwetpaꞌ allorokmach wapa oneñeth oꞌch alla poerratamperranet Yompor poꞌñoñ poeyoxhretoth. Atthoña amach moeneñeto oꞌch ameꞌñenet, atthochña ñetpaꞌ amach aꞌkeshphatarethterreto. 13Ñamha ñeñth xhapyesets mapoetroꞌmesoꞌmarpaꞌ ñeñthpaꞌ añ notenes acheñeneshaꞌ ñerraꞌm esempo eꞌmhñoteññañet Yompor poꞌñoñ eꞌñech poksheñeshaꞌ agërrñañetañ Yompor poꞌñoñ. Eꞌñech kowen ameꞌñeretañ tharraña ñetpaꞌ mamekpach ateth pet. Tharroꞌmar ñetpaꞌ ateth penet ñerraꞌmrratheꞌ narmets ñeñth chepoets mapyo amach eñalle poerexh. Tsapathonethña ñerraꞌm oꞌch wapanet topateñets, ñetñapaꞌ oꞌch alla kaxhpoerrñañet Yompor poꞌñoñ. 14Ñamha poerets ñeñth xhapyesets ajmoꞌmar, ñeñthpaꞌ añ netmaꞌntatena poꞌpotantañ acheñeneshaꞌ ñeñth eꞌmhñotenayeñ Yompor poꞌñoñ. Amaꞌtchaꞌ xhapanetañ mameꞌ poeyoxhreto, tharraña ñetpaꞌ alloꞌnach senet aña atarr kothapeꞌchenet ñeñth llekaꞌyenet arr patsro ñeñth eꞌñe ñokpoeta. Añach moenenet oꞌch esokmañen es echyenet atthoch allo eꞌñe koshaꞌyenet. Atthoña ñetpaꞌ amach errothenoth orrtatoñeto ñeñth atarr sherbets Yomporekop. Ñetpaꞌ eꞌñe attheta ñerraꞌm narmets ñeñth xha kaꞌmatwerr ajmaꞌ amach errothenoth ellomhreꞌtyeseto. 15Ñamha añ poerets ñeñth xhapyesets eꞌñe kowen patso ñeñth eꞌñe kowen cheparsatspaꞌ ñeñthña tomaꞌntenaya poꞌpotantañ acheñeneshaꞌ ñeñth eꞌmhñoteneꞌ Yompor poꞌñoñ. Ñetñapaꞌ attho ameꞌñeññañet Yompor poꞌñoñ amach poesereto xhoch eñochet poeyoxhreto atthoch eꞌñe kowen maꞌyoxhroñet Yompor poꞌñoñ. Xhokmach orrtatyenet ñeñth atarr sherbets Yomporekop amachña xha kaxhpoeñeto. Atthoña ñetpaꞌ eꞌñe ateth penet ñerraꞌm narmets ñeñth atarr aton ellomhreꞌtyets.
Arrpaꞌ all tomaꞌntatanet lampareñ attho xhoyoꞌtampeney
(Mr. 4.21-25)
16Jesúspaꞌ alla tomaꞌntaterraneterr poꞌpoñoneth; ñeñthpaꞌ ateth otanet:
—Ñerraꞌm esempo yaꞌllchaten lampareñ ñeñthpaꞌ ama añekpayeꞌ yaꞌwortateñe oꞌch alla yeꞌrramamper koymho. Ñamha ama añekpayaye oꞌch alla yener oꞌponoth yemayephnaxho. Añekopña yaꞌwortatenña lampareñ oꞌch yeneꞌ enoneth atthoch xhoyoꞌtampeswan allowen acheñ ñeñth beꞌthosxhets oꞌpono pokollo. 17Tharroꞌmar allowen ñeñth ama eñotpawoyaye amaꞌt awathotheñ, theꞌñapaꞌ oꞌch eꞌñe orrtatarethterra atthoch eꞌñech eñotatarethetwerret eꞌñe poktakma.
18‘Ñeñthoꞌmarña sapaꞌ señotenatheꞌ eꞌñetheꞌ poꞌñoxh kowen seꞌmhñoteññañ Yompor poꞌñoñ ñatoꞌpaꞌ amatheꞌ. Eseshaꞌtheꞌ xhena poeyoxhro amaꞌt eꞌñe allpona Yompor poꞌñoñ, elloña Yomporpaꞌ alloꞌnach eñotatnenanet nanak shonteꞌ. Tharraña eseshaꞌña ñerraꞌm ama xhenaneto poeyoxhro tharroꞌmar ñetpaꞌ ama poꞌñoxhayeꞌ agëññañeto Yompor poꞌñoñ amaꞌt allpon eñotenetañ poeyoxhro ñeñthñapaꞌ xhach poerratamperranet Yompor.
Allempo wapoña Jesús pachor ñamha paꞌmoꞌnasheñneshaꞌ
(Mt. 12.46-50; Mr. 3.31-35)
19Allempoñapaꞌ wapa Jesús pachor epoet ñamha paꞌmoꞌnasheñneshaꞌ. Xhapoet allpaꞌ shonteꞌ acheñeneshaꞌ ñeñth emchorrenaya Jesús. Ñeñthoꞌmarña ñetpaꞌ ama eshkayeꞌ entosetoña Jesús allameꞌtets. 20Allempoña acheñeneshaꞌ ochet Jesús:
—Oꞌkaꞌye wapaña phachor ñamha pemoꞌnasheñneshaꞌ. Ñetpaꞌ aꞌyotheꞌtsaꞌyenet, moeneñet oꞌch entenpetaꞌ.
21Ñañapaꞌ ateth otanet:
—Allowen ñeñth eꞌmhñoteneꞌ Nompor poꞌñoñ ñetña ñerraꞌm ateth phowenet ñeñth ateth oteney, ñeñthña eꞌñe poꞌñoxh nachor nepen ñamha ñeñthña eꞌñe nemoꞌnasheñ nepen.
Allempo aꞌmchecherran Jesús womenkëshaꞌ ñamha saꞌp ñeñth emoꞌyarertetsa
(Mt. 8.23-27; Mr. 4.35-41)
22Allempo xherrerr pamtharr Jesúsñapaꞌ aꞌtapos noñtho epoet ñamha poeyochreshaꞌ. Ñañapaꞌ ateth otanet:
—Theꞌpaꞌ oꞌch awamphsey yomhtaꞌn.
Allempoñapaꞌ awamphset noñtho. 23Allempo awamphset Jesúsñapaꞌ alla maꞌ noñtho. All moenpaꞌ machayotha womenkëshatampesnomoet. Emoꞌyareꞌñapaꞌ xha eshaꞌtena noñtho, attheñapaꞌ chorramoch oñ noñtho xha moeneꞌ eshaꞌtatan noñth. 24Attheña poeyochreshaꞌñapaꞌ ponemhyet Jesús all moenpaꞌ opoeret, ateth ochet:
—Maestro, poꞌñoxhwachkaꞌye yokllaꞌwerratheꞌ.
Jesúsña tanterrapaꞌ eꞌñe poꞌñoñotha aꞌmtsoññetwerran womenkëshaꞌ amaꞌt ñamha emoꞌyareꞌpaꞌ oꞌ eꞌñe aꞌmtsoññetwer. Atthoña ñetpaꞌ oꞌ alla eꞌñe kowen moechethtamperret. 25Allempoña Jesúspaꞌ otanet:
—Esoꞌmareꞌtña sapaꞌ ama eꞌñeyeꞌ seyemtenno.
Ñetñapaꞌ xha atarr nanak yorenet. Attha kowanrrorteñet ñetñapaꞌ ateth otannaꞌtyeset:
—Taꞌmkaꞌye añ acheñerpaꞌ esonaꞌtartheꞌkaꞌye. Atarrepaꞌt es aꞌmchechaten, amaꞌt poꞌñoñothapaꞌ aꞌmchechaterran womenkëshaꞌ amaꞌt ñamha emoꞌyareꞌ oñ.
Attho gadaroꞌmarneshaꞌ ñeñth chorrena oneñethpaꞌ wapa Jesúsesho
(Mt. 8.28-34; Mr. 5.1-20)
26Allempoñapaꞌ oꞌ etsotoset yomhtaꞌn all senet. Allpaꞌ añ paꞌney peneꞌ gadaroꞌmarneshaꞌ alla yoth Galileoth. 27-29Allña sowosa Jesús noñthothpaꞌ allñapaꞌ wapoña poesheñarr yakma ñeñth alloꞌmarneshaꞌ, tharraña ñapaꞌ añ chorrenaya oneñeth patoner. Ñeñthñapaꞌ awathotheñ attha chopeñeꞌchyen moelleꞌmkoth, ama shetamteno. Ñapaꞌ alla yexhena all pampoeñet arromñathexhno ama pokolloyeꞌ yexheno. Ñewa, oneñethpaꞌ allempo rromoenan yakmapaꞌ epayeꞌ ottatseꞌtacheꞌth allempotheñ. Pamoꞌtseshaꞌñapaꞌ awoꞌch rromoetpaꞌ oꞌch wankëtañ atthoch kowampeñet. Ñañapaꞌ xhach tsepeꞌtwanman allo wankëññañet pot ñamha paꞌtak oneñethñapaꞌ awoꞌchxhoꞌ matach aꞌyo amayo. Allempoña entapan Jesúspaꞌ rranaꞌnma womenk, mata Jesúsesho, rromosñaña allameꞌtets. Allempoña Jesúspaꞌ otosan oneñeth ñeñth chorrenaya yakma:
—Theꞌpaꞌ oꞌch pekaxhpaꞌner añ acheñer.
Ñeñthña chorrena oneñethpaꞌ ñañapaꞌ ateth otapan Jesús:
—Esoꞌmarwachkaꞌye Jesúso phaꞌtsrreꞌmoxhtanaꞌtosen, phapaꞌ ñeñtheph Ñeñth Nanak Parets Poechemereph. Theꞌpaꞌ notapaphchaꞌ amach pekoñchatatstosno.
30Jesúsñapaꞌ alla oterranerr ñeñth chorrena oneñeth:
—Phapaꞌ ¿esoꞌtña pesochena?
Ñañapaꞌ ateth oterranerr Jesús:
—Napaꞌ añ nesoꞌcheñ Legión.
Ñewa, añ soꞌchñets ñeñth otenet shonteꞌ nanak, tharroꞌmar ñeñth nanak patoner oneñeth ñeñth chorrenaya. 31Ñewa, oneñethexhnoñapaꞌ ateth otareꞌtapet Jesús:
—Amach arra pemñatstosye oꞌpono koñchaꞌpoetso.
32Ñewa, allpaꞌ aꞌyentheꞌtsaꞌyen shonteꞌ chañchoxhno ñeñth rratseꞌtyets aspenthoneth. Ñeñthoꞌmarña oneñethexhnopaꞌ ateth otareꞌtapet Jesús:
—Ñerraꞌm xhoch moeneꞌ errothen pephoseypaꞌ arrña pemñayeꞌchosey chañchesho allochñapaꞌ oꞌch yechorraꞌyererr ñamha chañchoxhno.
Jesúsñapaꞌ allentha otanet:
—Amaꞌtkaꞌye orraskaꞌye.
33Allempoña oneñethexhnopaꞌ kaxhpaꞌwaneret yakmapaꞌ, alla chorrereterr ñamha chañchoxhno. Chañchoñapaꞌ allempo chorrosya oneñethexhnopaꞌ xhepaꞌtchaꞌ matrraꞌtwa allowen ñegoneth shorxhaꞌtwos allothpaꞌ eꞌñe ñoꞌshrraꞌtwosa oño.
34Acheñeneshaꞌña ñeñth kowampeneꞌ chañcho allempo eñchet ateth pha chañcho oꞌ shorxhaꞌtwa oño, ñetñapaꞌ allentha matrraꞌtet ñamet poeyorñoth awanmoet anetso. Allñapaꞌ serrpareꞌtyesoset ñamha ora allowen allampañoꞌmar. 35Acheñeneshaꞌñapaꞌ allentha awanmoet awoꞌch enteñetaꞌ. Oꞌ xhaxhaꞌtet Jesúseshopaꞌ allñapaꞌ entoset yakma ñeñth chorreꞌth oneñeth. Alla anen allameꞌtets Jesús paꞌtkoth ashtamath. Oꞌ eñoterra oꞌ kowenterra. Ñetñapaꞌ xha atarr mechaꞌnaꞌtoset. 36Añña ñeñth enteneꞌ Jesús attho kaxhpatatenan oneñeth acheñ, ñetñapaꞌ allentha serrpareꞌtatapet ñeñth waxhaꞌttsa anetsoth. 37Allempoña allowen acheñeneshaꞌ ñeñth yexhaꞌyetsa all ñeñth gadaroꞌmarneshaꞌ ñetñapaꞌ poeyorñothet ateth otoset Jesús:
—Theꞌpaꞌ oꞌch awerreph arroth.
Allempoña Jesúspaꞌ aꞌterr noñtho oꞌch awerr. 38Yakmaña ñeñth chorreꞌth oneñeth ñañapaꞌ allentha otan Jesús:
—Napaꞌ nemneñkaꞌye theꞌpaꞌ oꞌch noktherreph.
Tharraña Jesúsñapaꞌ ama moenache, ateth och:
39—Allaphach, theꞌpaꞌ oꞌch awerreph pepakllo phamoꞌtseshoꞌmar oꞌch peserrpareꞌtatwerranet ora allowen attho Yompor atarr yenposeph.
Ñañapaꞌ ateth otwe Jesúspaꞌ atethxhoꞌ pha. Allentha awerr serrpareꞌtyesnerrets ora anetsoꞌmar attho Jesúspaꞌ atarr nanak yenpos.
Atto Jesúspaꞌ tantaterran Jairo poꞌseñ ñamha all aꞌkrratnoman poesheñarr koyaneshaꞌ ñeñth aꞌphllaꞌnmoeꞌ paꞌshtam
(Mt. 9.18-26; Mr. 5.21-43)
40Allempoña alla xherr Jesús añemhtaꞌn alloth ta awaña. Acheñeneshaꞌña allpaꞌ eꞌñe poksheñeshaꞌ agapapoeñet tharroꞌmar oꞌ atarr koweret oꞌch werra. 41Allempoña allpaꞌ wapoña poesheñarr amhchaꞌtareth añ paꞌsoꞌcheñ Jairo. Ñapaꞌ ñeñth poesheñarr ñeñth amhchaꞌtarethtetsa judioneshaꞌ poꞌprawo. Ñañapaꞌ alla rromosa Jesús paꞌtkothpaꞌ ateth otosan Jesús:
—Napaꞌ nemneñ oꞌch phoktherren nepakllo, 42tharroꞌmar neseñ ñeñth nepathrrorpaꞌ xha atsnaꞌten oꞌ aꞌpoꞌntsaꞌmocha.
Ñewa, ñeñth poꞌseñpaꞌ allpontheꞌ echenan poꞌcharña xharraꞌ poechena epa char.
43Allempo kothaꞌner Jesús kothaꞌwaner ñamha shonteꞌ acheñeneshaꞌ xha emchorratseꞌtnomet, xha toꞌmamaꞌtneñet. Allñapaꞌ kothaꞌnmanet ñamha poesheñarr koyaneshaꞌ ñeñth atsnaꞌtets. Xharraꞌ poechena epa char ñeñth attho xhokma yellaꞌyena. Amaꞌt epayeꞌ partata oꞌ aꞌgastaꞌwawan poꞌkhllayor attho parteñet amaña eseshayeꞌ aꞌkrraterraye. 44Ñañapaꞌ all kothaꞌnenan Jesús paꞌcheꞌñoth, allñapaꞌ aꞌphllerrñañaꞌ paꞌshtam paꞌrrpeꞌmoth. Eꞌñe aꞌphllaꞌweꞌ paꞌshtampaꞌ allorokma maserrña poꞌrras, oꞌ metwer ñeñth attho moeroxhtena.
45Jesúsñapaꞌ ateth otanet:
—¿Eseshaꞌtña oꞌ aꞌphllaꞌnmoenña neshtamoth?
Ama eseshayeꞌ eñoratso. Pedroña ñamha ñeñth epoet yemtena, ñetñapaꞌ ateth ochet Jesús:
—Maestrochaꞌ phapaꞌ penteñtheꞌ shonteꞌ acheñeneshaꞌ ñeñth allothemeña petoꞌmamaꞌtneneꞌ. ¿Esoꞌmareꞌtña photenña eseshaꞌtheꞌ phaꞌphlleneꞌ peshtamoth?
46Tharraña Jesúspaꞌ ateth oterraneterr:
—Napaꞌ neñoteñ poꞌñoxh poesheñarr acheñ eꞌñe poemnenñoth aꞌphllenen neshtamoth tharroꞌmar napaꞌ neñotena napaꞌ oꞌ naꞌkrrach eꞌñe na newamenkoth attho aꞌphllenen.
47Koyaneshaꞌña allempo ñapaꞌ eñotena amach errothenoth aꞌnasoto. Ñapaꞌ xha paꞌshmoena poeyorñoth konkorposa Jesús paꞌrrphoth. Allñapaꞌ eꞌñe aꞌmethaꞌwosan ñapaꞌ añekopña aꞌphllenan Jesús paꞌshtam atthoch korrerra eꞌñe kowen. Allñapaꞌ ateth otan allowen acheñeneshaꞌ:
—Na allempo naꞌphlloñ Ayochreshath paꞌshtampaꞌ ñeñthña naꞌkrraterreꞌ allorokma.
48Jesúsñapaꞌ ateth otan koyaneshaꞌ:
—Phapaꞌ nesñeshachaꞌ attho atarr peyemtenna na atthoña theꞌpaꞌ oꞌ eꞌñe naꞌkrratnomoeph. Theꞌñapaꞌ oꞌch awerreph eꞌñe peñmañeshaꞌ.
49Allempo eñorena atethpaꞌ allñapaꞌ waxhaꞌta ñeñth wetsa amhchaꞌtareth Jairo paꞌpaklloth. Ñetña wapoetpaꞌ ateth otoset Jairo:
—Peseñpaꞌ oꞌkaꞌye rroma. Theꞌñapaꞌ amach alloꞌna phaꞌtsrreꞌmoxhtanaꞌtatsche Maestro oꞌch kotherreph pepakllo.
50Jesúsña amaꞌt eꞌman ateth otoset Jairopaꞌ ñañapaꞌ ateth otan Jairo:
—Phapaꞌ amach xha peꞌcharrtatatsto peyoxher, nachña eꞌñe peyemta atthoch korrerraña peseñ.
51-53Allempoñapaꞌ awanmoet Jairopawo. Xhapoet pokollo allñapaꞌ alloꞌtsaꞌyen shonteꞌ acheñeneshaꞌ all yawanrrortenet, yaꞌnaꞌteñet arromñath. Jesúsñapaꞌ otosanet:
—Amach atarr seyawatsto. Añ shopsheshaꞌpaꞌ amakaꞌye xhoyeꞌ rromoeno xhakaꞌye moen.
Ñetña pachmhareꞌteñothetpaꞌ attha cheꞌtatsetyesapet tharroꞌmar ñetpaꞌ eꞌñekaꞌye eñoteñet xhokaꞌye rromoen. Allempoña Jesúsñapaꞌ ama moenatano allowen acheñeneshaꞌ oꞌch beꞌthoset alloꞌtsen arromñath. Ñapaꞌ aña moenat Pedro ñamha Juan, ñamha Jacobo ñamha arromñath poepapar ñamha pachor ñeñthaña epoet beꞌthosxhaꞌtoset alloꞌtsen arromñath. 54Allempoña Jesúspaꞌ rremotaꞌtosan shopsheshañ potothpaꞌ poꞌwamenkokma otos:
—Oꞌch nesñe notoseph, theꞌpaꞌ xhopha tanterrtsa.
55Eꞌñe otweꞌ atethpaꞌ allenthepaꞌtchaꞌ oꞌrrerrerra xha tanterrtsa. Jesúsñapaꞌ otanet:
—Theꞌpaꞌ oꞌch serratallmeꞌcher.
56Poepaparña ñamha pachorpaꞌ ñetñapaꞌ attha kowanrrorteñet. Jesúsñapaꞌ ateth otanet:
—Amach eseshaꞌ sotaphsaꞌtatsto amaꞌt poesheñarra ñeñth ateth oꞌ norrtatennasaꞌ sepakllo.
Currently Selected:
San Lucas 8: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.