San Lucas 17
17
Attho xhokmach waponaya ñeñthchaꞌ yetpatyeneꞌ oꞌch ateth phatyesey ñeñth ama pokteyeꞌ enteno Yompor
(Mt. 18.6-7, 21-22; Mr. 9.42)
1Allempoña Jesúspaꞌ alla serrpareꞌtaterranerr poeyochreshaꞌ, ñeñthpaꞌ ateth otanet:
—Xhokmach waponaya ñeñthchaꞌ yetpatyeneꞌ oꞌch ateth phatey ñeñth ama pokteyeꞌ enteno Yompor. Tharraña napaꞌ oꞌch notas, atarrchaꞌ yoroxhenoꞌtsen amaꞌt erraꞌtsena acheñer ñeñth orrtateneꞌ ñeñthchaꞌ topatyeneꞌ poꞌpsheñeñ ñeñth nameꞌñenaya oꞌch ateth phatyenanet ñamet ñeñth amaꞌt mamesha ama pokteyeꞌ enteno Yompor. 2Amaꞌt ñeñth eꞌñe errteꞌ nameꞌñenaya ñerraꞌm eseshaꞌ oꞌch orrtatanet atthoch oꞌch ateth phatachet ñeñth ama pokteyeꞌ enteno Yompor, ñeñthña acheñerpaꞌ atarrchaꞌ yoroxhenoꞌtsen tharroꞌmar ñapaꞌ aña oꞌpatenaya koñcheñets ñeñth atarr womenk. Amaꞌt ñokoppaꞌ ama tama yoroxhenayayñe ñerraꞌm ama ateth phatenanaꞌ poꞌpsheñeñ, eꞌñech allorokma xharachetañ mapoeꞌ añekmoen paꞌxhnopho allpon ñerraꞌm poetseꞌtamets oꞌch waporeꞌchet oño epo allchaꞌ ñoꞌshach mapoeꞌ. 3Ñeñthoꞌmarña sapaꞌ eꞌñech señota, amach sorrtatatsto atthoch saꞌshoratach poꞌpsheñeñ amaꞌt erraꞌtsena.
‘Elloña napaꞌ oꞌch alla noterrserr, ñerraꞌm esempo samoꞌts erroth phonas sa ñeñth ama pokteyeꞌ enteno Yompor, sokoppaꞌ añ poktetsa oꞌch sokthapeꞌchater eꞌñe kowen oꞌch photer ñeñth ateth oꞌ phowonaphpaꞌ amaꞌt mameshapaꞌ ama pokteyeꞌ enteñe Yompor. Allochñapaꞌ ñerraꞌm oꞌch alla kothapeꞌcherran kowen Yomporekop, sañapaꞌ añ poktetsa oꞌch alla eꞌñe kowen sephretner. 4Amaꞌtchaꞌ atonocheꞌtats ateth penset, amaꞌtchaꞌ pamtharrpaꞌ kanxhrrocheꞌtatschaꞌ ateth penset ñerraꞌm oꞌch alla llekërrana ñeñth ateth pennaset, ñerraꞌm amaꞌt pamtharr kanxhrrocheꞌtats oꞌch alla oterrset: “Napaꞌ oꞌ ateth nephonaph ñeñth ama pokteyaye tharraña theꞌña ellopaꞌ amach alla ateth neperreꞌthe”, sokoppaꞌxhoꞌña añña eꞌñe poktetsa oꞌch alla eꞌñe kowen sephretner ñeñth ateth sepeneꞌ.
Eꞌñe yeyemteñoth Jesús ñeñtha awamenkath yepeneꞌ atthoch es yorrtatyen ñokop
5Allempo ateth otarethtenet añña poellsensarneshaꞌñapaꞌ ateth ochet Poꞌpartsesharet Jesús:
—Elloña yapaꞌ awamenkathchaꞌ pephaꞌy allochñapaꞌ eꞌñech kowen yeyemterrpha.
6Partseshaꞌñapaꞌ alla oterraneterr:
—Ñerraꞌm poꞌñoxh eꞌñe na seyemtenañ napaꞌ eꞌñekaꞌye naꞌpoktatenña neñoñ ñeñth ateth notenes, amaꞌtchaꞌ allponathollotha seyemtenna ñerraꞌmrratheꞌ mostazllometholl, sañapaꞌ amaꞌt erraꞌtsena senamoennoñ amaꞌt ñeñth atarr echarr sentenpaꞌ nañapaꞌ atethchaꞌ nepennaseñ. Oꞌch netmaꞌntatasa ateth ñerraꞌm oꞌch sot añ tsachekop sicómoꞌrech: “Beraꞌnmoepaꞌch arroth all then, arrepaꞌchña thomwerrerr aꞌyo saꞌpo”, tsachñapaꞌ atethchaꞌxhoꞌña phañ eꞌñe ateth soteñ.
Attho atmaꞌntatarethtena atarwasañpaꞌ añ poktetsa ñokop eꞌñech etsotenan ñeñth ateth moenateñ pamoꞌmteꞌ
7Ellopaꞌ alla tomaꞌntaterraneterr, ñeñthpaꞌ ateth oterraneterr:
—Ñerraꞌm eseshas echeneꞌ saꞌtarwasañer, ñatoꞌ ñapaꞌ ellapeneꞌthchaꞌ llampoeꞌ sechamoelleñ amapaꞌ ñatoꞌ ellapeneꞌthchaꞌ kowampeneꞌ sayaraxhno ellerronethña allempoch werra poꞌtarwasothpaꞌ sañapaꞌ amaꞌt poesheñarrothesapaꞌ amach sotapoereña señañra: “Theꞌpaꞌ oꞌch pebeꞌthoswerr oꞌch yerrallmeꞌchnen parro.” 8Elloña ñeñthapaꞌ oꞌchxhoꞌ alla sotapoererr: “Theꞌñapaꞌ oꞌch peptareꞌtwerren ñeñthchaꞌ nerraꞌnen, allothñapaꞌ oꞌch phaꞌkowenetwerr peshtam atthoch eꞌñe kowen pesherbhaꞌwerren xhophchaꞌña napwerreꞌ nerrar ñeñthchaꞌ nerraꞌnen. Oꞌchña nerrwanen napaꞌ allempoñapaꞌ xhophchaꞌña rrallmeꞌchnets phamha.” 9Amaꞌtña sapaꞌ atethkaꞌye sepena. Ñamha saꞌtarwasañer ñerraꞌm esempoch eꞌnwan ora poꞌtarwas ñeñth seyecheña, sañapaꞌ amaꞌt poesheñarrothesapaꞌ amach sotereña: “Parasyos oꞌ peꞌnwon netarwas.” Amaꞌt ama atarr sokshateñe ñeñthpaꞌ eꞌñe pokteꞌ ñokop tharroꞌmar ñapaꞌ allpona oꞌ eꞌnwa ñeñth allpon seyecheña. 10Sapaꞌxhoꞌña Yompor paꞌtarwasañer sepeneꞌ. Ñamha amaꞌt allempoch setsotwen ora allowen ñeñth ateth otenes Yompor attherepaꞌchña sentena ama atarr atonayeꞌ sesherbeno. Aña setsoten ñeñth eꞌñe poktetsa allowen añekop ñeñth paꞌtarwasañer pen Yompor.
Attho Jesúspaꞌ eꞌñe poꞌñoñotha aꞌkrratyesapan aptsarñathexhno ñeñth xharrasheña
11Allempo sechena Jesús Jerusaléño arr oñem allowa temoena Samaria epoet Galilea. 12Allempoñapaꞌ xhap patherr anetso. Allñapaꞌ waxhaꞌtoña xharrasheña ñeñth osyen poetsarñats ñeñth otenet lepra. Ñeñthña aptsarñathexhno aꞌyotha thomxhaꞌtyesoset. 13Ñetñapaꞌ allothña rranareꞌtyesosetpaꞌ ateth ochet Jesús:
—Maestro Jesúsochaꞌ pemoerayeꞌchosya yamha.
14Jesúsñapaꞌ allentha kowosanetpaꞌ ateth otosanet:
—Theꞌpaꞌ oꞌch awes oꞌch segatyenaꞌ sañeña judioneshaꞌ poꞌkornanesharesho atthoch ñetpaꞌ oꞌch eñotaset theꞌpaꞌ oꞌ sokrrerra.
Ateth otanet Jesús, ñetña awanmatsetpaꞌ eꞌñe allorokma akrraꞌyeswerrochet. 15Poesheñarrña allempo eñota oꞌ korrerrapaꞌ alla poetallerrapaꞌ oꞌ alla awerr Jesúseshoneth atarr nanak poksheñeshaꞌ ayeꞌchoxhtatnerran Yompor. 16Eꞌñe poeparasyosoꞌteñeshaꞌ rromosa Jesús paꞌrrphoth. Ñewa, ñeñth ateth phatsapaꞌ ñeñthpaꞌ ñeñthña samarioꞌmarneshaꞌ. 17Allempoña Jesúspaꞌ ateth otan acheñeneshaꞌ ñeñth alloꞌtsaꞌyen:
—Amaꞌt xharrasheña ñeñth oꞌ naꞌkrratyeswa theꞌ. ¿Poꞌpotantañña eskonsheñapaꞌ? Ñetñapaꞌ ama es yerpaꞌpesnomayeña atthoch ayeꞌchoxhtatoñet Yompor. 18Eꞌñe poesheñarraña ñeñth poerrerrtsa atthoch atarr ayeꞌchoxhtatan Yompor amaꞌt ñapaꞌ ama judioneshayaye.
19Allempoña Jesúspaꞌ ateth otan ñeñth aꞌkrraterr:
—Theꞌñapaꞌ oꞌch petanterra, eꞌñech kowen peserr tharroꞌmar phapaꞌ eꞌñe peyemteñothen na oꞌ phokrrerra.
Attho fariseoneshaꞌpaꞌ aꞌphthoꞌchet Jesús: ¿Esempoꞌtchaꞌ orrterraña Yompor poꞌkowenña allempoch atarr amhchaꞌtarethterra ña?
(Mt. 24.23-28, 36-41)
20Parrochña fariseoneshaꞌpaꞌ aꞌphthoꞌchet Jesús:
—¿Esempoꞌtchaꞌ orrterraña Yompor poꞌkowenña allempoch atarr amhchaꞌtarethterra ña?
Jesúsñapaꞌ ateth otanet:
—Yompor poꞌkowenña attho ayochreshathtena ñapaꞌ ñeñthpaꞌ ama attheyaye ñerraꞌmrratheꞌ ñeñth es yentyen yeklloyoth. 21Ñeñthoꞌmarña amach errothenoth oteto: “Arrkaꞌyeña amhchaꞌtarethtenaña Yompor”, amapaꞌ “Tharrokaꞌyeña amhchaꞌtarethtenaña Yompor.” Tharroꞌmar Yompor poꞌkowenña ñeñth attho ayochreshathtena ñapaꞌ ñeñthpaꞌ oꞌkaꞌye mothetnoma orrtatsa eꞌñe sesho amaꞌt seyoxhro.
22Elloña ñapaꞌ ateth oterranerr poeyochreshaꞌ:
—Xherrchaꞌ esempowañen allempoch atarr seꞌnerren atarrchaꞌ semnerren Ñeñthen Acheñetostseꞌth oꞌch norrterrnasa amaꞌt eꞌñe pamtharra. Tharraña amaꞌt eꞌñe allempa amach senterrno. 23Saña allempopaꞌ atethchaꞌ otasetañ: “Theꞌpaꞌ oꞌ orrterraña Cristo alloꞌtsenkaꞌye”, amapaꞌ “Tharroꞌtsenkaꞌyeña Cristo.” Sañapaꞌ amach setatstoña all, amach sokthatscheña ñeñth sets all. 24Tharroꞌmar ñerraꞌm esempo xherr allempoch nowerra na Ñeñthen Acheñetosets eꞌñe allowen acheñeneshaꞌpaꞌ eꞌñech entwapoerrnet tharroꞌmar allempopaꞌ atethchaꞌ perra ñerraꞌmrratheꞌ meratsteꞌ, oꞌch meratsta womenkpaꞌ eꞌñech aꞌpoetareswan ora enet errapharen. 25Ñewa, na theꞌ ñeñth ateth anareth nokop ñanompaꞌ atarrchaꞌ naꞌmoeroxhtatarethta, amaꞌt namoꞌtseshaꞌ ñeñth korretsa theꞌpaꞌ amach eseshayeꞌ nagënaye. 26Tharraña allempoch nowerra poꞌpocheño na Ñeñthen Acheñetosets, allempopaꞌ eꞌñech ateth perret eꞌñe ateth peteꞌth awath allempo korreꞌth Noé. 27Allempopaꞌ ama es poexhaꞌyeneto aña eꞌñe kothapeꞌcheteꞌth attho atarr paꞌnamen moenenet ñeñthchaꞌ rraꞌyenet, orrareꞌtyeseteꞌth, senaꞌtanatyena yakmaneshaxhno, koyaneshaxhnopaꞌxhoꞌña apanatyeseteꞌth ñeñth yoranatyesaweteꞌth. Ñetñapaꞌ ñeñtha eꞌñe kowen enteteꞌth. Attheñapaꞌ xhap allempo beꞌthosos Noé poꞌwarkopawo. Allempoñapaꞌ wata, chopha oñ errakmañen, eꞌñe aꞌkllatwan allowen acheñeneshaꞌ errapharen. 28Atthekma perreterr allempo korreꞌth Lot, aña eꞌñe kothapeꞌchyerreterr shonteꞌ rrallmeꞌchyeseteꞌth ñamha shonteꞌ orrareꞌtyeseteꞌth, atarr es rañthaꞌyeseteꞌth, ñamha pomatsreꞌtyeseteꞌth. Shonteꞌ esokmañen ñeñth paꞌnamen nareꞌtyeseteꞌth, thomatyeseteꞌth ñamha shonteꞌ pokollaxhno. Ñetñapaꞌ eꞌñe ñeñtha kowen enteteꞌth. 29Attheñapaꞌ xhap allempo xhaꞌnom Lot ñeñth anetsroth. Eꞌñe ñeñthe yethrokma allempo xhaꞌnom Lot alloth, Yomporña poeꞌntañoth aꞌshoranet tsoꞌ ñeñth shemashrepñeñenoꞌ worten, ñeñthña eꞌñe aꞌkllatwerraweterr allempo. 30Atthekmach perreterr allempoch norretwerra na Ñeñthen Acheñetosets.
31‘Tharraña allempoch norrterra na sapaꞌ arepaꞌchña aña sokthapeꞌcheno ñeñth patsoꞌmarekpa, ateth ñerraꞌmrratheꞌ poesheñarr ñatoꞌ aꞌyotheꞌtsenach paꞌpaklloth arepaꞌchña beꞌthosatsterro amaꞌt eꞌñe mamesha paꞌpakllo atthoch yoratsreꞌtnoma. Amapaꞌ ñerraꞌm poesheñarr paꞌmroꞌtsenpaꞌ arepaꞌchña onatsterro. 32Seyerpoepaꞌchña ateth pha awath Lot poethapor ñeñth atarr morrentnomaya ñeñth patsoꞌmarekpa. 33Ñamha ñerraꞌm eseshaꞌ eꞌñe aña eꞌnenet oꞌch korrena atomat atthoch eꞌñe koshenet arr patsro, ñetñapaꞌ aꞌchenkaterretchaꞌ ñañeñeta. Tharraña ñerraꞌm eseshaꞌ eꞌñe pokteꞌ enteneꞌ oꞌch es sewanmoet ñeñth ateth moenenet ñeñth eꞌñe ñokpoeta arr patsro ñeñthña acheñerpaꞌ korretsach poksheñeshokmañen eꞌñe thayotheñ errponañowen.
34‘Poꞌñoxhkaꞌye oꞌch notas atethchaꞌkaꞌye perra allempoch nowerra, poesheñaꞌtetspaꞌ anmarethterretchaꞌ; amaꞌt ñeñth eꞌñe pamoꞌts peneꞌ, ñeñthñapaꞌ allach asaꞌnmarethterra. Ateth ñerraꞌm tsapo all manrrenet epsheñoꞌmaret, poesheñarrpaꞌ anmarethterrach, poꞌpsheñeññapaꞌ allach asaꞌnmarethterra. 35Amapaꞌ ñatoꞌ allempopaꞌ alloꞌtsenchaꞌ epsheña koyaneshaꞌ ñeñth parro poetseꞌtets mapyo ñeñthpaꞌxhoꞌña poesheñarrpaꞌ anmarethterrach ñamha poꞌpsheñeññapaꞌ allach asaꞌnmarethterra. 36Amapaꞌ ñatoꞌ allempopaꞌ alloꞌtsenchaꞌ ñamha epsheña ñeñth eꞌñe parro tarwasenet paꞌmro. Poesheñarrñapaꞌ anmarethterrach, poꞌpsheñeññapaꞌ allach asaꞌnmarethterra.
37Allempoña poeyochreshaꞌpaꞌ aꞌphthoꞌchet, ateth ochet:
—Partseshachaꞌ ñeñthpaꞌ ¿erraꞌtchaꞌña ateth perra?
Jesúsñapaꞌ ateth otanet tomaꞌnteñtso:
—Ñerraꞌm erroꞌtsenchaꞌ ñeñth rromoeꞌpaꞌ allchaꞌña shontaña tseꞌm.
Currently Selected:
San Lucas 17: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.